Rut 2 - Dupade Uruode

Rut jno nanique ga na basuguedie iji Booz iróguedie quigade uje ore na darósõri acade cucha nanique

¹ Ga Noemia abai casicaite Elimelec uté iguiosi déji ore idai tuté to uje i tu Booz. Enga jnani atáguejna abai casica iguiosi tuté, ga ibijoque uté iji darasade ore ujade.

² Enga chise diri nanique uje Rut catecã́ri dejo. Ga chojningame dejo: –Jeta bajéo enga a yi ga yajna ore acade ĩrasórone jne. Jé socaseti udore uñeque juégame yu jeta yimáta basugode iji quigade jne ga yimecóji to jne jeta yajo to.– Ga Noemia chojningame dacaria: –Be enga amáta basugué iji ore quigade ga yimeco yoquibijnanane iji betígo to jne.–

³ Ga jé u uje Rut jno ga na basuguedie iji ore quigade mu que chiraja gajnengónique ayoré. Mu chudute to uje iyoquíjna casica, Elimelec, iguiosi gajnecho uje i tu Booz.

⁴ Ga jé u uje Booz uté di iji dedai Belén ga quítequiguíji dejnai to, ga chajire dacade ĩrasórone iji to. Ga jé u uje chise darógode ore ga chajire ore ujade iji dajesúode ga chojninga: –Urénga ueradípise uacasagode cucha ome yu. Enga yipésupú ga Dupade chatapísaja uaque gajiné jõ.– Ga irógode ore chajnai uru ueradode ome raque ga ore chojningame darósõri: –Jé cho ua. ¡Yipécopú ga Dupade chatapísaja ua to jõ!–

⁵ Ga Booz chimo gapúraguiji darógode quigade uje na acade basugode iji ĩrasórone ore quigade. Ga catecã́ri daroguipísi ga chojninga: –¿Ama gapua uaté tṍraji rique a? ¿Ama gapua uaté iguiotígo ore írigo a?–

⁶ Ga iroguipísi chajnai uruode ga chojninga: –Que yocurása uaté. Moábgoto. Mu jõra tu dejo Noemia aja de to enga ore di diríca.

⁷ Enga catecã́ri yu ome bacade cucha que jeta na basugode iji ĩrasórone ore quigade. Enga yingome que jeta na basugode iji ĩrasórone ore quigade ga e iyajmepísiji ore quigade uje na basugode iji ore quigade. Enga quene chácare uje a íjnongosi gu.–

⁸ Ga jé u uje Booz tibágui Rut iji charidi ga chojningame: –Yababiá, yingome ua ujeta ca ãra basuguedie iji yocurasade uñane guejnane to ga edu iji yejnane udojo. Enga ajína yiróguedie jne.

⁹ Ga jecucha amíninga yiróguedie aja quedéjnane ga ajna ore quigade ome basugode jeta ãra iji ore quigade. Yigaidi tu gu jetiga ca cucha dacatique tṍraji ua iji siñeque iji quedéjnarique. Uje e yingome yiroguipísi ujetiga ca yiroque uñeque pésu bajuredie iji yejnai údode. Ujetiga acajnóriji ga be yudui ga óji to uje erãto bajo déji ejoi.–

¹⁰ Ga Rut chichaga datajidi aja jnumi iji Booz iquei, uje imoi u uje cho dangarádejnai iji uté. Ga catecã́ri ga chojningame uté: –Caniranguipise ua ome yu. ¿Jé go uje báyipie jogadípise yu uje purása quedéjna yu ome ua mu?–

¹¹ Ga jé u uje Booz chajnai uruode ga chojningame: –Jé tiógarapísa yicaniratiguéode udore ome ua. Chamáñaje que ajuseque yiguiosi casica acoté gu. Uje yudute to uje bajíome bayode, baté ore iji baniri uté jmete ica, ga bajína yiguiosi casica acoté aja yocuniri tudé to. Ise mu uje a quĩrique agutu ua ome gadode gu uje purása quedéjna yógome ua. Mu bajína bejo uaté aja de yocuniri. Uje a bagaidi tu jeta bejo uaté chagutíyame ua. Uje e poyogué gu ga bagaidi tu jeta chagutíyame ua to.

¹² Jecute a Dupade chatire bacaniratiguéode udore babai jne. Ga yipésupú ga israélgosode yocangureni Dupa chatapísaja ua jne jõ iji yocujade. Uje yudute to uje a o bangureni iji Pangarádejnai uté to jne. Enga a jé amo jne jetiga uté tẽrája ua ome bacaniratiguéode, uje e bangureta uté gu.–

¹³ Mu uaté chojninga: –Yirajapise uje baruode udore a chatapísaja yu jne. Uje que yugúsiji cuchárique mu bañurupúsu baruode guio ome yu que. Uje baróguedie a ore gajnenguírase baru omone gatuaque uje ore u gu uje ore doi baroquéode gatuaque. Jé basa uyu ga cachi yiquique iji bejnai bisideque uje que barogué yu to. Mu yigaidode u bacade basugode iji barógode quigade. Mu jé bañurupúsu yio to ga yacaranguipísome ua.–

¹⁴ Mu e chise ore atigai jogadi ga jé u uje ore tagu dabosode jnese. Ga Booz tibidi Rut ga chojningame: –Rut, boji te á ga agu babotique to á.– Ga jé u uje Booz chisa arurei ga chacáji cucha otadi uje i tu vinagre ga jé u uje chisi ome Rut jeta tagu to. Ga jé u uje Rut chácariji irógode ore ujai ga jé u uje tagu ore posode to. Ga jé u uje Booz dopoi ore arorigode guejna ga jno údi aja Rut jeta tagu to. Ga e subudépise Rut, ga que chejna ore gueranone cucha pibose.

^15-16 Uje e ore napo rĩ ga Booz chojningame darógode ore: –Óraño uñéngo aja jnumone jne iji gapabia suaté iquéode to jne. Yigaidi tu gu jeta uaté cháta basugode aja uacamorañatígo enga a ujuya detígo to gajiné. Yigaidi tu gu jeta caniraque uágome uaté ga ca uacuñeque pésu ujuredie to.–

¹⁷ Enga Rut chejna deréjnai tiji basugode uje na ga chuságaja dejai. Uje Rut e ore chidasu yugode basucho to enga idasua kílodie chise 20 kílos.

¹⁸ Enga jé u uje chajníja guidai ga chichagu riji gaté aja dajesui uje irasépise re uje ujuya darángone to. Enga chise Noemia enga jĩraque chijnime dabose iredie iji dagúchade ga chisi ome Noemia ga jé u uje tagu to.

¹⁹ Enga jé u uje Noemia catecã́ri dacaria ga chojninga: –¿Gosi guejnaque que a uje bãra basugué tiji ore quigade?– Ga chojninga: –Yaníri u gu uje bajuyápise barángone to. Enga obiréjna uje gajnengónique canirángome ua. ¡Ga yipésupú ga Pangarádejnai chatire uté gosi icaniratiguérique gai gajiné jõ!– Ga Rut chajnai dejo uruode ga chojningame: –Gajnengóri uté i tu Booz.–

²⁰ Enga jé u uje Noemia chojninga: –A Dupade chatapísaja Booz uté jne ome icaniratiguédatéode udore jne. Uje que gusu icaniratiguéode uje chátaja yoque iji de. Mu caniranguipise to ome uyoque nanique uje qué yabai ore eca to nanique. Enga yabai iguiosipise uté to, ga uté gajnei jé u to ujetiga chajire gadode to uje iguiose casica yabai toi ica gu. Jé aja ua to uje yujnacari casica acoté ua to ica gu.–

²¹ Ga Rut chojningame dejo: –Uté pota jeta yiji guejnai iji dirode jnese, ga jé yuságaja jeta iróguedie ore cha ore na acade cucha jne.–

²² Ga Noemia chojningame dacaria uruode: –Yababiá, jé areque jetiga edu uté guejnai úringai piránguiji iróguedie quigade to. Yitodo gu jeta ese uñeque guejnatique iji sañeque enga irótigo pésu bajuredie iji darósonique guejnatique.–

²³ Ga jé u nanique uje Rut jecucha ga doi ga na cebáda, arroz quedéjnai ore iji iróguedie quigade gatuaque iji Booz guejnai ga jé chuságaja irógode uje ore chimate iroquéode. Enga Rut qué chácariji dejo iguíjnai, ga ejo chagutíyame dacaria uaté to.