Rut 1 - Dupade Uruode

Israélgosi Elimelec, acoté, ujnacarode ore chayome chaguhéode iji daniri nanique ga ore chicáji purása quedéjnane ore uniri nanique uje i tu Moab

^1-2 Uje cáma israélgosode ore eduguéjna cuchábode cuse nanique ga ore cho dangaránone iji dadode ajirisórone. Iji dirode udojo nanique ga chaguhéode socárome israélgosode ore iji ore uniri údode. Ga judágosi déji nanique uje i tu Elimelec. Ga uté idai u Belén nanique, ga idai tuté i uñai u Efráta to nanique. Ga uté chucué dáyipie ome re nanique jetiga chayome chaguhéode iji uraque daniri. Ga jé u nanique uje jno ga chicáji purása quedéjnane ore uniri uje i tu Moab, ga chácariji ore uniri ujade to. Ga nóna dacoté aja dajesui to uje uaté i tu Noemia. Ga nonapo dajnacare gárode to rĩ uje ore íode u udojo: Mahlón, Quelión ore.

³ Uje qué ore déji daqui tuté punire mu Elimelec toji uté to. Ga e chequé eca Noemia uaté to. Ga gusu uaté ujnacarode uje ore chañuru guio iji ore piedie gague unejangue ore gari to.

^4-5 Ga udojo quigade ga uaté ujnacarode ore chisa dacotedie iji moábgosode ore urodie to. Ga uaté dacaridie íode u udojo: Órfa, Rut ore. Mu uje e uaté, ore guejnanie siquerei chejna yijmanáyone nanique iji moábgosode ore gari ga ujnacarode Mahlón, Quelión ore topoi rĩ iji ore gari nanique, ga ore chejna rágaja toi jnese. Ga jé u nanique uje Noemia chiqueta raja erámi iji ore ujade nanique, ga que chimo dagutíyabátique ayoré iji ore ujade nanique. Chamáñaje abai, ujnacarode ore chejna rágaja jnumone uje ore toi jnese.

Chise diri nanique uje Noemia chajniapója daniri casica to rĩ ga icaria Rut nóna uaté aja ajesui tuté nanique

⁶ Mu chise diri nanique uje Noemia qué déji moábgosode ore uniri ga chudute to uje e íjnoque chaguhéode iji ore uniri casica. Uje israélgosode ore angureni Dupa e chisi ome guéode ome ore to iji ore uniri uté.

⁷ Ga jé u nanique uje Noemia chojningame re iji dajei: "Yajniapója yocuniri casica to jne rĩ ga yácariji yurasapísode judágose ore gari to jne." Ga jé u uje jno nanique ga jé dacaridie ore nóna aja sañeque.

^8-9 Mu uje e idája ore nanique ga jé u uje Noemia chaquĩ́ra dacaridie ore. Ga chojningame ore: –Boyo ga, ajníño to. Ga ajníñoja uaquedai to ga ácayopóji uacatedie ore ejode rĩ. A ca toque jeta yicadígui uacacaniratiguédatéode ome yujnacari casodica ore uyoque. Ga Pangarádejnai Dupade a chatire uacacaniratiguéode uacabáyode jne enga a chisi ome uacabai ichárigo ome uaque jne rĩ ujetiga uacamaníngo chijnorapise uaque to.– Ga jé u uje Noemia chucu dacaridie ore uredie, ga jé u uje ore poji ñane ejode. Uje a ore jnusipísi dejo gu uje chajni aja daniri.

¹⁰ Mu dacaridie chajnai dejo uaté uruode ga ore chojninga: –Úngare. A yijínango ua aja baniri jne.–

¹¹ Ga Noemia chajnai uruode ga chojninga: –Yababidie uaque á, ayáyo ajínaño yu. Boyo, ga ajníño to. Uje que yape uñeque cuse jeta ójiyoi ore gari to. Uje e gata yu ga que disírique tõrapóji yu rĩ ujetiga ójiyopóji yape ejórigo gari rĩ.

^12-13 Uacamóño to uje gatabidie que ore chisapo damaníngo rĩ. Enga a ca yisapo yamanique to rĩ ga a gusu yu jne. Mu a yisarase yamanique iji dejai tudé, mu a yisarase bisidec. Uje que disírique tõrapóji yu rĩ. Mu ujetiga yatique cuse, ¿ga arochorase úringárique jnacare yui a? Úngare, a ca arochorase. Ga uacamóño yu iji de uje yejnáreque yajnéone páyuguhebátigadatéo uje Pangarádejnai Dupade chisi ome cucha dacate datéode ome yu. Enga datéringaráso jetiga ajínaño uyu, mu a ca esórase uacamaníngo iji yurasade ujade enga uacácayoji yejode bisidec.–

¹⁴ Ga jé u uje ore ejo uruode chijõrorasipise ore. Ga quigade ga jé u uje dacaridie uña uje i tu Órfa chucu dejo uré ga chojninga: "A yajni to jne." Ga e jno ga chajni to. Mu dacaria uña que jno to ga qué chácari dejo gari.

¹⁵ Ga jé u uje Noemia catecã́ri dacaria ga chojningame: –Rut á, qué upo bajõra uje chajni to, ga aguito ga ajna to. Enga ácayoji de uacaniri, enga oyo uacadupáji uacangurenone ayoré gajnúo to.–

¹⁶ Ga Rut chajnai dejo uruode ga chojninga: –Úngare. Que yipota arorátique to. Que yipotapísa jeta yoco jmíti, jmíti ome ñane. A yijína ua aja quedéjnane jne ga baquitígo jé u yiquitígo to jne. Ujetiga ese baniri mu a yise to jne ga a yo yurasade iji barasade to jne. Enga a yo yangureni iji bangureni Dupapísi uté to jne rĩ.

¹⁷ Enga a yo yigachotique iji bagachotique punire jne. Enga a ore chicha yóderaque aja bóderaque ejórique to jne. Cucha chojmarai déji jeta pésu jeta yoco jmíti, jmíti ome ñane, enga yojningai tuté u pitoringai ujetiga uyoque goto toi ga quene cãra daqui. A aroque yu aja doi mu a ca toque jeta yiji. Mu a yírasi baruode enga jé areguipísome yu jeta Pangarádejnai Dupade chujé yu iji sañeque.–

¹⁸ Ga Noemia e chirajapise dacaria uruode úringane ũrepíso enga chojningame dacaria: –Jé arec. Ajína yu to.–

¹⁹ Enga e ore jno ga ore chijnare rágaja Noemia idai casica uje i tu Belén. Uje e Noemia ore díji darása cásodicáite enga ore ichorájna ga ore chachietáji ejode. Ga Noemia uaté ujodie chequei ore chojninga: –¡Noemia casicaite u é!–

²⁰ Mu uje Noemia chudute dei iji ore pijnanone uje ore chĩ́care i ga chojningame ore: –Ayáyo ẽ́cacho yi taja yu jne. Uje yi gajnui tu cucha pibose pajmarátique gu. Mu beyoi ga ẽ́cacho Mára aja yu to jne. Ga yi ejoi tudé gajnui tu cucha iringotique uje ayorérique tagu ga edodie chísajame enga cucha iringoi jno gosi edo údi.

²¹ Uacamóño uje yicoji uacari nanique ga ugúcharẽ́ cuchabé uyu nanique ga yabai cuse nanique iji uacari. Ga ujnacaté yu to nanique rĩ. Mu uacamóño yu uje yĩriapóji uacari iji de ga yedo yijmainie ga poti yu. Ga Pangarádejnai Dupade a jé ajéode u ome cucha dacadode udore ome yu gu. Jecute gajnaréngome yu uje yudute yi ueradéjnai tiji uacabijnanone. Uje Dupa Pujnuéngaisṍri e cho dajuñame yu gu ga que yipota jeta ẽ́cacho yi ueradéjnai tuté ome yu rĩ, uje chiese yi gajnui tu cucha pibose pajmaráni.–

²² Uje Noemia, Rut ore chise uraque dedai nanique ga ore tõrapísiji darasade uje e ore na dacadie uje i tu cebáda.