Provérbios 9 - Dupade Uruode

Payuquetotiguei, puturuturéringai que ore cunguésõripísi ñane

¹ Payuquetotiguei pésu daguíjnai enga ueradipise. Enga chijóchame poridie iji daguíjnai gai ga gaidi tu jetiga uerate guiguíjnai tuté. Enga gare iji ti poridie udire.

² Uje chimate dapesudi daguíjna uté ga chucué dáyipie jetiga chujé cuchisórigo ga tibidi dajorane ore ga ore taguíji uté iguíjnai to ga ore pésu daninaquei ome ñane. Enga chijose úvadie ome ore to ujetiga ore chóji otadi, ga pésu dagapié ga uerate gai ome ore yui.

^3-4 Enga chiroque darógode aja ore idai údode enga tibidája dajesúode. Ga ore chojninga: "Jnacarode uaque á, uje cáma apáñañoji cuchárique to á, ¡boyo ga acayóji payuquetotiguei gari enga achobíji uté gari to jne á!"

⁵ Enga ore tibidápoi turuturéode rĩ enga ore chojninga: "Turuturéode uaque á, yoquirósõri payuquetotiguei dejéna uágaja yui to ujetiga acho arurégode iji gari iji uté iguíjnai to. Enga e chimate dajoyátiguiji úvadie otadi ome uaque jetiga ójiyo to.

⁶ Jecute ayáyo uacáringane turuturéo ga beyoi ga oyo ayoré áyipieránguiji uaque to. Adi u ujetiga pitijínaquéi déji uaque to."

⁷ Ujetiga po quique ayoré ducusurérique marínga, a ca tangári dojórique ayoré aquĩraquéringome re, gusu uje chirógaja doi ga dojnóngaja oquigode ome re. Ate gajnareque uté gu.

⁸ Jecute ujetiga o ayoré ducusurérique quique ga bajnei tu uté ajei dotáningai tome ua. Jé basa ujetiga o ayoré áyipierã́tique quique enga bajnéone u uté achietaquéode ome ua.

⁹ Ujetiga acate ayoré áyipierã́tique ga uté áyipie quérãpísome bacajnaquéode udore. Jé adi tu ome ayoré ate ujñapetátique ujetiga acate ga irajatigai quérã gaté.

¹⁰ Ujetiga gosi cho dangarádejnai iji Pangarádejnai uté ga jogadi u uje quene ayuquetotiguei déji gosi. Ujetiga gosi changureta Dupade uje ueguipis ome cucha gajnaréngone, enga pijoguipise uje pirajatigai déji uté.

¹¹ Payuquetotiguei ijnorasórone ore u uje ore ucuecaringuei umaripise iji erámi tudé. Cho jetiga ore chãraja deruéode.

¹² Ujetiga ajnorapise payuquetotiguei ome ua enga a agutíyame jne. E mu ujetiga etaque ga jé bajurei ome ua uje a ca agutíyame uté jne.

¹³ Chequé jubéradie u uje que ore áyipieraque cuse, uje táyipiegue ore gu. Puturuturéringai jé cunguésõri chequé jubéradie ore adode to.

¹⁴ Uje chequedíe udire ore cho chequé atedie iji raque enga ore chácariji dayaripíode gáyode iji daguíjnane piagode iquéode. Ore gaidi u gu ujetiga pijoguipise ore ome ore jnese.

¹⁵ Uje udire goto chimo gosode tiji dajeque caputai tuté enga tibidi ore.

¹⁶ Enga chojninga: "Jnacarode uaque á, ¡boyóji te é! ¡Yojningane u uaque é, uje cáma apáñañoji cuchárique é!" Enga tibidápoi turuturéode ore rĩ enga chojninga:

¹⁷ "Ca amo uje yoriago arurégode ga yajo ga uneripísome yoque uje yipójo yoque. Jé chopome yote poritique rĩ, ga yoriago ga yójigo ga unere ome yoque uje yójigo."

¹⁸ Mu que jnacarode udore ore chiraja uje uaté pijnangaite bajade, e ore déji pitoringai uburúdejnai.