Provérbios 6 - Dupade Uruode

Cucha ueradi tu ujetiga ca yutágoi ayoré quedéjnane ore ome ore iplátadie, ujetiga yoquijorane ca ore chijna dériguiji ayoré quedéjnarique

^1-2 Yababi á, ujetiga atai bojórique ayoré iplátaraque ome bajõrárique diríca, ga ua u jne uje ore chaguhéta babai jne uje que amácho ga ore suru babai gu bajõrai, uacajnose carubi casodé iji uté gari; uje chiese atireyo diríca mu que amácho gotique.

³ Ca ajéngome bajõrai tuté, ga abágui ¡bu! ga angome ujetiga chisi ome doidé casidé uacojórique ayoré ipláta casé ome ua, ga atireyo gajnengóri casé gai ga ojningame: "A yatirego gai gu uje cachi ore suru yibai jne."

⁴ Mu ca amoque ujetiga atireyópo bocoidé casidé uacojo ayoré iplátaraque gai te rĩ.

⁵ Enga bajnua tu erámororaque ujetiga chimo dagaisónique ayoré iji ti eti chatingara dojóragaja ga jé u uje jno ¡bu! iji iquei. Jé upo ome chugúperone to rĩ uje que toc ujetiga chugúpenique basája pujuyáraque uje chiraja gu uje pujuya tuaté chisarase ¡saque! jetiga basája. Mu ua enga ca abasapója basocade udore to jne rĩ uje batai ore iplátadie ome bajorane.

Pacajnaquéode udojo gajnengórone u ayoré ducutáquechoquíode

⁶ Ducutáquechoquí á, bo ga cajirape casecade udore ore to. Báyipie déji ore ipesutique cucha to iji uté, enga jé be ore isocai tuté to.

⁷ Bamo uje que ore irósonique déji ore gari ujetiga chiroque ore aja cucha pisagode mu ore chisa udore jnese.

⁸ Uje udore ore na pore acarane aja daguíjnai ajei ga ore pésu danucódejnánie iji daguíjnai ajei. Enga que ore cho daja ome dajnungone pidápitá aja daguíjnai tuté ajei jé aja siqueré eruei.

⁹ Ducutáquechoquí a, aya báringai moque gotique, báringai terẽtaque gotique.

^10-11 Mocucha chá, ujetiga amuchásu ua aja quedéjnane iji bamoi tuté, mu a bamajósõri cugujnárasiji ua ga chipocásu ua aja ñane uje i tu "pijmátaringuéi".

Udojo ojningane u ate gajnaréngone ore isocade

¹² Ayoré ate gajnaréngone uje ore chacája ñane ga ore gaidode u darupatáringane iji dáringane daquiracho.

¹³ Uje ore chéngame dedógade ome daringaquéode, jé upome ore pijnanane to uje ore chusẽre usodi ome, jé aja ore jmanenie, uje ore áyipiedie déji ujetiga ore chãra dojórique ayoré ome gu.

¹⁴ Chamáñaje jecucha gajnareque ore áyipiedie gatuaque gu. Ga jecucha ore chetingare rome pate gajnaréngone yúode. E mu udore ore irasique rome dapesudode cucha uje ore pésu dojode ayoré ájningane ga ore socárome ñane.

¹⁵ Mu a ore tṍra rome cucha dacate datérique jne eti chósi ti iji ore. Enga a ca udore chisápo dajnei tuté cucha eruénique jne rĩ.

Udojo ojningane u Pangarádejnai ujãpíseode cucha

¹⁶ Ama pisocade chojmaráitía, úngare gare iji ti uje Pangarádejnai chujãpise. Enga u udojo:

¹⁷ Bajai u uje ayorérique dojnóngaja dojórique ayoré ga enochai chísajame. Jõrai u yoquibijnani uje purupatáringane tṍraji. Jõrai upo yoquijmainie rĩ uje yoco yocujuñame ayoré agúpurayóde ore ome, uje que ore bárique cucha cuse mu.

¹⁸ Jõrai upo yocáyipie rĩ uje jogadípise pejóporinguéone úringáringo pipesucho ome yocujode ayoréo. Jé upo yocotadábode uje yayógoji yoquipesute gajnaréngone yúode ome.

¹⁹ Jé upo ujetiga yaguhétago cuchade yocujórique ayoré gai bisideque. Enga ejoi tu ujetiga gosi chijnime dojórique ayoré uruode bisidec ome ore ujórique ayoré ga ore chetaque ñane gu gosi ijnimingone dara udore.

Udojo júdi u pipotiguéode ome chequé quedéjnanie

²⁰ Yababi á, ajusípise báyipiedie guio ome bayé, baté ore acajnaquéode udojo jnese ome ua, jé aja ore iroquéode, ujetiga ca ore jnoji báyipie to.

²¹ Ãra ore acajnaquéode aja báyipie ajei, ga cho jetiga ajuru ore gai iji báyipie. Be ore ojningane cucha enga cho ujetiga jogadípise betabi aja quedéjnane uje bate arégode pijogúsorone u udore ore.

²² Enga cho ujetiga ayoré ore acajnaquéode udore ga nóna ua aja quedéjnane, enga chãraque ua ome cuchade jnese. Amo marínga, jé uté déji bejode. Mu uje e bãriji iji bamoi ga uté catecã́ri ua to.

²³ Jé ũrepise yu uje ore iroquéode udojo, ore acajnaquéode udojo u uje gajnui tu pibioque papótique jeta díreca gosi ejode ome. Jé basa ore garéngone cucha, jé aja ore oquigode cucha, udojo jno gosi údi aja pitijínaquéi jogosórone cucha.

²⁴ Enga gosi jnusina ore júdode udore, enga udore quigode pésu ga ca chequé quedéjnaraque sué uté gosi gai jne. A uaté catecã́ri bádode gatuaque jne, mu a ca chijnime bãrírique jne.

²⁵ Gapu ueradé uaté mu be ga jé ca chijnime bapotiguérique. Ujetiga uaté topísiji babai marínga, be ga ajire ti yui to ome uaté.

²⁶ Gapu dibéchoquídie udire u uje ore gaidode u jnacarode ore iplátadie ome raque, ga ore gaidi tu ujetiga ore chise cucha pibotique oréraque ome raque. Jé basa chequé amanachuguéraque ujetiga pota moji jnani quedéjnarique gari, que gusu ipotigádi tu ujetiga moji gari, e mu ipotigádode upo uté ugúchade rĩ, jé upo rĩ ujetiga chijnime uté iji ate arégode.

²⁷ Ujetiga jnacari moji gapu dibéchoquíraque gari, jeoga chequé amanachuguéraque gari enga gajnui tu ayorérique ujetiga chanire pioc ucuguérac aja daguidé, darobé ore ujai. ¿Ja ca pioi tagúrasu iguidé tuaté a? Úngare, tagu.

²⁸ Gajnui upo pioque urui te rĩ ujetiga gosi diguiji pioque urui tuté gai ga jĩraque tagu gosi guídade.

²⁹ Ujetiga chequé amanachuguéraque, anganácho ñane enga e que toque ujetiga qué abéroyo uágome ñane.

³⁰ Que peteque oriétique ujetiga toria cucha pibotique gu uje chaguhénique chejnápise.

³¹ Mu ujetiga piyaguirase uté iji oriquéode gai ga a jé ore chojningárasome: "O boriquéode udore oré jne. Ujetiga chojmára boritique cucha diríca mu o oré jne enga gare iji ti iji quigade, batiréode. Mu ujetiga jiei boritígo cucha diríca ga ejnápise bagúchade udore aja uté jnese ujetiga asi ome."

³² Adi jé u ome jnacari uje pota moji chequé quedéjnaraque gari. Obiréjna uté uje que chiraja cuchárique iji erámone udojo. Cho ujetiga ujuyágaidí jé u re iji dapotiguéode jmainie.

³³ Uje chequé tuaté abai dirase ga abai chujé jnacari uté údode uje moji acoté gari. Enga a chinguíra daru dosógode aja uté údode. Enga jnacari a chinguíra pajegátigai aja re jne enga urasade ca ore chisápo uté unétique jne rĩ.

³⁴ Ujetiga jnanírique tocãra ga gajnui tu pioque ditaguérique uje ocaraidie chachẽre dejode. Ujetiga jnanírique chimo jnacare unejátiguiji dacotéraque gari, ga jé u uje tocãra ome uté ga jecucha chujé uté údode ga que chimo posõraquérique iji dajéningome uté.

³⁵ Que pajnique jnani tuté ájningai ome ocaquei ujetiga jnacari pota tẽrája jnani tuté uje moji acoté gari diríca. Mu uaté abai que pota gotique ujetiga chisa guẽrapáidode cucha ome re.