Provérbios 5 - Dupade Uruode

Jnanione udore ore bijna ga gotópise chequé dibéchoquídie ore iji erámi tudé gu uje ore chajiripise udire ore yúode

¹ Yababi á, payuquetotiguei, pirajatigai ore déji yu ga yo baquique jetiga angári yu.

² Yigaidi tu gu jetiga acájnaru ua ome cuchade ujetiga áyipierãque ua, enga jé ca cucha bisideque baru quigode ome cuchade jnese rĩ.

³ Uje chequé quedéjnanie ore catecã́ri jnani quedéjnane ome dapotiguéode ga ore uruode ueradípiso quigode ga sué cucha pibose pajmarátique gai iji taningai.

⁴ Mu quigade uje jnani chejna chequé tuaté ipotiguéode guesi ga jé cho cucha pibose iringotígo ome. Enga cho jetiga chequé tuaté chujépise ome quesérique uje asode gare.

⁵ Ujetiga ajína gapu dibéchoquídie udire ore aja quedéjnane ga cho jetiga bajína ore aja bode yui ga a bagachodi jogadi tu uté jne.

⁶ Que cucha pucuecaringuei ome gapudíe udire ore gotique. Enga que ore chiraja uje gajnareque ore ajnai tuté dajeque, ga a cuchárigo sué ore gáyode iji. Mu que cucha ome ore, jé ore chejna rángaja úringai pajnac.

⁷ Mu yababi á, adójnangapísa yuruode udojo, ga jé ca acadígui yacajnaquéode quigode ome ua.

⁸ Jé ca acunguésõri chequé quedéjnaraque, jé aja iguíjnai jetiga ca abágui.

⁹ Bamo gu uje pate gajnaréngone chiborátaja pisocade uñane, uñane to. Ga quigade u uje bamanirase ua aja báringárique ate areque diríca, mu ore chimo ua iji badode udore gáyode ga que piyagápo banétique rĩ. Enga gajnareque jetiga achia badode udore ome gapu quedéjnanie ore.

¹⁰ Que gusu udore, mu jé socaseti eduguéjnane ore chutai baplátadie ujetiga o basijnaringuéone udore oré enga e que agutíñame basagode cucha oréraque gotique mu baminingame ayoré quedéjnane ore.

¹¹ Mu a chise deréjnarique jne ujetiga abóji bejode ujetiga e arajaque badode ujetiga pugórodie tṍraji babai ga barañi jórogome uje dorite babai.

¹² Ga jogadi a u jne ujetiga quene ajnusina jóroga jetiga angári ore uje ore cho baquique diríca ome bate gajnaréngone.

¹³ Enga a ojninga jne: "U gu uje que yangári yacadisórone gotique to. Enga yo cucha bisidéguiji ore acajnaquéode quigode ica gu.

¹⁴ Uje e yise yúringai dipónguerã́que iji yujode ayoré ore ujade ga ore timíninga yu aja yajesúode ome yúringai dipoque."

¹⁵ Yababi á, edu bacotéraque ome ua, uje uaté gajnua tu yotique ujetiga tṍraji berutique uje baraja uje yote unere ga jecucha bóji uje que ese yote uñeque unétique ome yodi tuté.

¹⁶ Berui tuté uje yote unéri tṍraji, ga jé ca ajuseque ga ca achia ujetiga ca chayo bisideque aja dajeque uñéngo.

¹⁷ Bamo uje bajnépise bacoté tuaté uje gajnua tu berutique. Jecute jé tiógara ujetiga gusu uaté ujetiga batígo basíji uaté. Jé basa ga gajnarenguirase ujetiga batique basíji chequé unejángueraque.

¹⁸ Pininaquei gajnesṍri tu uté gosi ujetiga jecucha chóji yodi tiji deruguipísi tuté gatuaque. Mu, yababi á, be ga anína ua ome bacoté tuaté uje basa nanique iji báringai jnacare ga ca ese unerotiguérique.

¹⁹ Uje gapu nanique ga uomepise ome ua nanique, ga uaté gajnua tu erámororaque nanique uje cho chemé, cho chemé aja dajesúode. Ga chijnorapise ua to nanique iji dáringa gapu. Enga gusu bacoté ujetiga chujé ua aja jnumone, enga a jé ca chise banerotiguérique jne, enga a ijnoraquei ome ua chise beruéode jne.

²⁰ Yababi á, ¿gotique gu a uje bagarurásu gapu quedéjnanie udire ore uje que bacoté ore mu?

²¹ ¿Ja ca araja uje Pangarádejnai que chirajaque badode udore uñeque, uje timíninga ua aja quedéjnane jnese?

²² Jnani ate gajnaréngone uje ore adode chaco ore gáyode ga cho jetiga pujuyáraque isaque udore ore uje que ore chijnimápo re iji jmanéraque rĩ. Ga chopo rĩ jetiga pigarique ore aja ñane ome enuéjnarique uje que ore cho cuyúguiji.

²³ Mu udore ore uje jé ore gaidode u dajequigode ome cuchade iji erámone udojo ga ore isocade udore u uje chorei ore iji pitoringai. Que ore chiraja gu ujetiga ore cájnaru rágome cuchade. Táyipieque ore gu.