Provérbios 31 - Dupade Uruode

Eduguéjnai Lemuel uru quicho u udojo

¹ Másagosode ore eduguéjnai Lemuel uru quicho u udojo uje uté daté jecucha chacadome cuchade udojo nanique. Enga chósi tome dabi:

² "Yababi á, uje qué bagúsiji yajei nanique ga bajnua tu cucha áraque nanique iji yajei, enga que cachi cucha bisidegue yu gotique uje a yatique cuse to jne. Uje cáma yatique cuse nanique ga jecucha yutai disi iji Dupade, ga Dupade chajnai yicatecãraitigade ome yutaquéode ga cho jetiga achajnáini tu ua nanique ome yu. Enga yipota jeta yacate ua mu cáma yiraja yacajnaquei quitígome ua.

³ Quene yiraja, ga a yósi tome ua jne: Enga ajusípise beo ome gapu quedéjnanie. Enga ca aminingara ua ome udire ore to jne. Uje eduguéjna cuchábode uñane ore bijna ga goto gapudíe udire ore.

⁴ Lemuel á, que cucha uerate yote pioi gotique to jeta pijote, uje eduguéjnane uñane jecucha ore chóji.

⁵ Ujetiga ójirase yote pioi to ga ja seca be barengue casidé báyipie quicho, enga bapesute babai. Ja seca bapesute cucha gajnarétigome barasade udore ore uje bajnué ore gai, enga a arajárase tijode ga quene bo báyugu ua ome bãrusoringuéiso.

⁶ Ajíñome yote pioi iji te jetiga jnusiétaguebéode, betágode ore chóji.

⁷ Jé dóji ga jé ore chóji dapesudi tuté dajotaque, ga ore chicadígui dajmátaringuéone, dáyuguhebátigade ore.

⁸ Bamo uje ayoré gajnareque ayorérique ga que toc jeta narare damánique ome damajósonique, mu be ga arota uté ga ãrarare uté gai to ome umajósõri.

⁹ Ca o paraque jetiga ayoré josipíerane ore cho dajocaningame ayoré jmatátigo, ayoré gajnarétigo ore, ga ãrarare udore ore gai to, ga jé ca josipíerane ore chajnerame dajosipiedie ome udore ore.

Lemuel daté icotaquéode gajnetodie u chequé amanachugué ate aréguedie ore

¹⁰ Yababi á, que toguírase jeta piya chequé parágueraque, uje garósi udire ore iji erámi. Jecute udire ore tiógarapísa dáringanie chequé orerẽ́ uje ore gajnunie u cucarané pérladie uje oredie jiépisi to.

¹¹ Mu ujetiga jnanírique chójiji chequé udire uñáraque gari enga ca gosi todo jeta jé chequé tuaté chajirápo jnani quedéjnarique yúrique rĩ. Enga a jecucha uaté chañuru dabai iplátadie guio jne enga a ca cuchárique chonapo ore jne rĩ.

¹² Enga chequé tuaté áyipieraque que jnoji jeta abai chachietai átegoningáringome re jé aja deruénique.

¹³ Uaté jecucha chucué ore ucarigode uje íode u líno, lána ore uje ueracho ga chiro cuchade iji dagaidode udore gatuaque.

¹⁴ Jecucha uaté doi cucha pibosode gatuaque ga jogasúode ore tagu gatuaque uje di údi. Idájapise uaté gaidode iji ujade, mu jé di údi. Ga gajnui tu cuco cuchátique uje chijnoque cucha pibose uátique gatuaque aja danínique.

¹⁵ Uje qué totási erámi mu jé uaté niji enga pésu dabosode ome dabode ore, jé ome darógode, daróguedie ore to.

¹⁶ Uaté jecucha ga tangári ore uruode ome ore gaite oré jnupe to ga jecucha chicáji jeta chajire to jeta uerate ga doi orerángome to. Ga uaté tẽra dora casodica ga oredie cuse jetiga doi úvadie oredie to ga chacáji dajnei jnupe to.

¹⁷ Jecucha chaguesi uaté ome cucha pisagode ga que pucutaquérique déji uaté ajénique. Ga uajadepise uaté.

¹⁸ Jecucha chiraja jeta chañuru dẽrapáidode cucha guio. Enga jecucha chisa dejode aja sereringai.

¹⁹ Jecucha uaté chucare dacarigode, ga chiro cucha ponáyone iji dacarigode.

²⁰ Jecucha uaté chisi darása jmatágode ore iji dẽrapáidode cucha uje canirepise uaté gu.

²¹ Que toc jetiga tejnuringárique tagu uaté abode ore uje chiro ore iguidé diríjabidie ga chañuru guio ome tejnuringai yui.

²² Uaté jé orachópo dataranone to rĩ. Ga ueradépo uaté iguidedie udire rĩ uje chiro doidode iji borapeque diríji orerãi te rĩ, ga carataque uneroque borapei uté.

²³ Ga uaté abai que piraque iji dojode jnani ujade ome uaté átegoningáne. Ga jecucha uté ujode jnanío ore tangári iji ore idai údode. Enga ore cho dangarádejnai iji uté to iji daniri.

²⁴ Ga uaté chirópo ore iguidedie to rĩ, jé aja ore igarubode, enga tẽrame oredie gaisṍreméone ujetiga udore ore tẽra gaté.

²⁵ Ga uaté ujodie chequei jecucha ore tangári ome cuchade to ga uaté que todo daquéningome cucháriguiji dire uñeque.

²⁶ Jecucha chatata payuquetotiguei to ga nínapúsu rome dajúdode udore quigode. Enga uaté chacate dajogasúode ore to ga cho jetiga pininaquei jogadípise uaté acadigode ore gu uaté ijnoraquédatéi ome ore.

²⁷ Ga uaté áyipie jogadípise dabai, dabode ore jetiga uerate ore atígo gatuaque, enga que uaté tagu cucha pibotique jeta jé ca chejna daguesi ome bajaque.

²⁸ Jecucha ga uaté abode, abai ore chicota uaté.

²⁹ Enga ore chojningame: "Chequé paráguedie jiei iji erámi mu bajnuépise udire ore gáyode jnese ome bátegoningáne."

³⁰ Jecucha ga yoquicotaquéode gajnetodie u chequé ueradépisedie uje ore chedu dahueratigai. Chiese uerate ore isocade to, mu ore chãra yoque uje ore áyipiedie jogadípise raque enga querénga ore áyipieraque déji ore ujórigo ayoré gotique. Mu que cuchárique tõrapísiji ujetiga ueradei chequéraque edodie. Chequedíe udire uje ore cho deduguéjna cuchábi iji Pangarádejnai urásu ujetiga yicotágo ore. Chamáñaje ore u gu uje ore chijnóra Dupade uté.

³¹ Jé tiógara jeta picota chequé tuaté iji urasade ore ujade gatuac. Ga jé tiógarapo to rĩ jeta patatacho uaté ipesudode cucha quigode to rĩ, átegoningáne ore jnese to.