Provérbios 3 - Dupade Uruode

Udojo júdi tu ujetiga gosi chise payuquetotiguei úringárique pirajaque ome re

¹ Yababi á, jé ca acadígui yacajnaquéode udojo quigode ome ua jne. Ajuse guio iji báyipie ajei yojningane cucha jnese jne ome ua.

² A bacuecaringuei umaripise iji erámi tudé enga a barasique ua gatuaque jne ujetiga apésu yojningane udojo cucha ome ua.

³ Ca aya bajnoraquei ome bojode ayoréo ore jnese. Ca ayápo baru uréone to rĩ. Cho ujetiga pajopie ojnaquéroragaja udojo aja báyipie jeta ca acadígui. Enga a baparagácho jne uje a gajnúone u bajnápetígo uje bajúna ga badíja betabi enga ore chimo jnese iji betabi.

⁴ Ujetiga apéso udojo enga a bojode ayoréo ore irasique ua jne, mu cuchiyi tupúsu Dupade uje irasiguipise ua uje babé udore quigode jnese.

⁵ Be enga báyipie jogadípise Pangarádejnai Dupade gatuaque enga angureta yui ujetiga chátaja ua. Enga ca báyipiedie chopo quiyíguiyí ome cuchade uje chácariji bádode.

⁶ Angongara ua aja Dupade gatuaque ujetiga chingo bapesutígo cucha quitígo aja ua jnese iji deréjnane jnese. Jogadi a u jne ujetiga Dupade chingongara dajeque caputai aja ua gatuaque jne ga bajnáji jnumone gatuaque jne.

⁷ Ca opise irajatáguiji ua ome cuchade jnese. Mu paraque ua jne enga angaripísi Pangarádejnai Dupade. Enga ayápusu apésu pisijnaringuéone jnese.

⁸ Ujetiga be yojningane udojo cucha enga a gajnui tu cucha bisitígo ome ua uje bóji bisidi uté ga bate urõsode cho jnánguiji bádode ome bisidi tuté.

⁹ Jecucha ga o beduguéjnai iji Pangarádejnai Dupade enga ẽrája ome baplátarigui petígo. Jé chopome bajutícabia te rĩ. Ujetiga ãra bacade cucha enga bajaque Dupade jne ujetiga asi ome bacade cucha petique ome.

¹⁰ Ujetiga be yuruode udojo quigode ga a amo jne uje berani casodica uje Dupade chatirépo babai ga sué baja casodica gáyode, uje banasu bacade cucha ga bachagúja piedie mu sué gáyode ga que arajápo jogatique rĩ.

¹¹ Yababi á, ujetiga Pangarádejnai atique dosója ua marínga, jé ca aya angári uté. Enga ca arañime udore ome ua. Uje Dupade a cho baquigome cuchade udore jne gu.

¹² Pangarádejnai Dupade jé gajnúone u jnanírique uje cho dajnorane dape ore quique. Chamáñaje Pangarádejnai Dupade chijnóra dabode uyoque to gu, enga cho yoquiquique to ome cuchade.

¹³ A pininaquei gajnesṍri tu gosi ujetiga chise dáringárique áyipierãque jne, jé upome udore ore rĩ uje ore irajatigade chajnera dádi.

¹⁴ Yirajágo uje gosi gajnei tuté payuquetotiguei sué ore guẽrapáidedie pláta gáyode, jé aja órodie rĩ.

¹⁵ Enga pirajatigai jé chopo rĩ uje sué cucarané ueradedie gáyode to rĩ uje jiei oredie. Suépo cucha pirasigode gáyode jnese rĩ iji erámi údode jnese.

¹⁶ Payuquetotiguei tuté a chorase ayoré iji re ga chisírasome dãrachua tome yoque ga qui tu gu uje gosi ucuecaringuei umaripísiráse iji erámi tudé. Jé basa ga chisírasome darasé ome yoque ga qui tu gu ujetiga gosi chise dáringárique ataque, dáringai pangarate rĩ.

¹⁷ Ujetiga ajna payuquetotiguei tuté aja quedéjnane enga a barasique ua jne enga jogadi a u to jne ujetiga quene bese pajesereringai gatuac.

¹⁸ Ujetiga gosi chise pirajatigai tuté ga jogadi u uje uté chise dacuecaringuei tiji. Enga pininaquei gajnesṍri tu uté gosi uje que chejñu re iji pirajatigai, payuquetotiguei ore.

¹⁹ Chamáñaje Pangarádejnai Dupade jogosórone u pirajatigai, payuquetotiguei ore nanique gu uje pésu gatajnoquei, jnumi ore nanique.

²⁰ Pangarádejnai Dupade uté chiroque dayuquetotiguei aja yote quedéjnai nanique ga chirógaja tié jochade iji erámone. Jé chopo gue abujadie rĩ uje chirógapo dayuquetotiguei aja nanique rĩ ujetiga guéode tṍraji udire ome yoque.

²¹ Yababi á, acuepísi payuquetotiguei ome ua enga edu cucha arégode úringáringo pipesucho ome ua. Ajuse beo ome cucha gajnaréngone úringáringo pigaicho enga edu páyipie omenie ome ua gatuaque.

²² Chamáñaje pisoca arégode udore gajnui tu sibíjnarique ujetiga gosi chóji ga ecáji deréjnane jnese. Jé upo gosi rĩ ujetiga tujúna dajnápeode ga aparagácho.

²³ Ujetiga ajína payuquetotiguei aja quedéjnane gatuaque enga a etoque ua jne iji Dupade adode, enga a ca toque jne jeta pisijnaringuérique suérase babánique.

²⁴ Ujetiga ácariji bayaritique marínga, a ca atodo bejode jne. Jé upo rĩ ujetiga amóji bamochátique marínga, a ca cuchárique chósi ti iji bamochápi tuté jne.

²⁵ Baraja uje ate gajnaréngone ore tṍra rángome darosobádode cucha, mu payuquetotiguei gajnesṍri tu ua jecute a ca arosóñime cuchárique.

²⁶ Enga a Pangarádejnai Dupade chingongara basocárigaja ua ujetiga araja basocáringome bapesutique cucha. Enga a chátaja ua jne jetiga araja pujuyáraque jogadi tiji baquei enga a ca chisa ua jne.

²⁷ Ujetiga bojórique ayoré chutai ua ome dajmátaringuéi gajnetique cucha ga ajuéga ome ga asi ome, ga jé ca ãra ua iji cuchárique. Asi ome bu.

²⁸ Ca ojningame: "A yisi ome ua dirome jetiga qué ajna." Mu omi tu ujetiga gosi chutai iji ua ga jĩraque asi ome gosi utaitique cucha ome.

²⁹ Ca acué báyipie noñángueringui iji bajei ome bajorane ore uje ore déji bejode ga ore changureta ua ome páyipie omenie quigode to.

³⁰ Ca ajnime pejóporinguéone ome ore to uje que ore pésu bejóporinguéone gotique.

³¹ Ujetiga jnani surungúmetique dérasiji uacajade ga jecucha ga chugúa uacadode ga chicota re iji uacajade ga chojninga: "Uacarosóñiñome yu." Be ga jé ca arate uté gosi isocade to uje pota jetiga sué dajorane ore gáyode.

³² Chamáñaje Pangarádejnai Dupade chujãpise ayoré ate gajnaréngone udore ore gu ga chetaguipise ore. Jé basa ga Dupade chingongara dáyipiedie aja ayoré parágode ore iji udore, udore.

³³ Pangarádejnai Dupade chamacãre jnani sijnángone udore ore iguíjnane ome daru noñángone. Jé basa ga chacacãre ayoré ate arégode ore iguíjnane to ome daru ueradode.

³⁴ Boqueráquechoquíode u ore uje ore dojnóngaja Dupade, dojode ayoré ore. Mu Pangarádejnai Dupade gajmaque udore ore to ujetiga jé basa ga canape ore gai iji sañeque. Mu caniranguipise Dupade ome jnani pajnotágode udore ore.

³⁵ Uje Pangarádejnai Dupade tẽrája payuquetotiguei irajasórone udore ore ga chisi ome ore úringane pangarácho ome ore. Jé basa a tẽrája turuturéode ore to jne mu guerani tu jeta ca piyaque ore atique unétique ome ore ujórique ayoré. Chamáñaje ore chetaque payuquetotiguei ome raque gu.