Provérbios 29 - Dupade Uruode

¹ Ujetiga paquĩraque ayoréringome pisijnaringuérique marínga, que timíninga daquĩrasónique dojo ayoré, ga a uté isijnaringuéone jĩraque na uté aja jnumi, enga e chise deruei enga que bisitique déji ujetiga chiringare.

² Ujetiga ũré peduguéjnarique iji punínique ga urasade ore irasique rome deduguéjna ũrei tuté. Jé basa ga jeta eduguéjnarique sijnaque iji punínique ga cho jeta urasade ore chejnáreque re ome uté adode.

³ Pape áyipierã́tique uje chiraja cuchade quigode enga dai irasique re ome dabi tuté irajatigade. Mu jé basa ga jnani atique chajna gapu dibéchoquídie aja quedéjnane enga tṍra dayé ore iplátadie bisideque.

⁴ Eduguéjna parágode uje ujnomerãque ore uniri ga ore gaidi tu jeta ore ujode ayoré chudute ore uniri ujnoméone to uje ueradípise ore isocade iji daniri. Mu jé basa ga eduguéjna sijnángone que ore áyipieraque déji jeta ore isocárique uerate iji daniri, mu gusu jeta ore pésu jmatai tiji darasade uje ore chutai ore ome ore ugúchade gatuaque.

⁵ Ujetiga jecucha ayorérique chicota dajõrárique dojo ayoré bisideque, ga cho ujetiga uté icotaquéode cho pujuyáraque iji uté iquéode, ga que toc jetiga ca gosi pésu pisijnaringuéone enga cho ayorédaté iji re to.

⁶ Jnani sijnángone udore ore uje que ore chibéro rágome dasijnaringuéone, jé ore ipesute pujuyadie ome raque uje ore chicháji daquéode ga ore basája dajuyadie gatuac ome dasijnaringuéone. Jé basa ayoré parágode que ore chimo darengátique cucha ome re, ga ore irasique re aja dajesúode.

⁷ Ayoré parágode que ore dojnóngaja ayoré gajnaréngone ore to uje ore chiraja uje ore ujo ayoré ore gu. Mu ayoré sijnángone ore ga ore chopise cucha pibotajmáji ayoré gajnaréngone ore, ga que ore chañuru ore guio gotique.

⁸ Uje gojñangarã́quechoquíode di ga ore cho dojñame dojode ayoré ga ore ujode ayoré botare ñane ome ore ijnimingone ojña. Mu ayoré áyipierane chiraja jeta ore chaquĩ́ra darasade ome ore ibotaquéode ome ñane ga ore cha dabotaquéode ga jé ajéquesepó ore ome ñane jne rĩ.

⁹ Que cuchárique tṍraji ujetiga ayoré áyipierã́tique pota jeta cho jóroque ayoré táyipietique quique. Mu a uté canarase gai ga chujñieta uru quigode, enga que chise ayoré áyipierãi tuté aquĩraquéode unétique ome re.

¹⁰ Ayoré jõcaratáguebéode jecucha ore pota jóroga chutígome jnani parágode uje ore chujã ore ipararinguei gu. Jé basa jnani parágode ore chosõre jóroque udore ore ome ore úringane jõcaratáguebecho enga ore pota jeta ore chécãri jóroque ore isocárique to.

¹¹ Ayoréode yoquipotiguéode gajnúone u burica poruti. Jeta táyipieque orusṍri enga que chayo doruti erásorone údi ga que base, ga chayo uté gosi údi aja pate gajnaréngone. Mu jetiga ayoré áyipierãque orusṍri ga jĩraque chayo carubode údi enga basíji cuchade yui.

¹² Ujetiga aringácachoquí eduguéjna cuchátiguiji punínique enga chicha dojode aringácachoquí aja darosadode jeta udore ore cho daringaquéode to iji daniri tuté.

¹³ Josipíerãi, pijosipiedie gajnesṍri jé ore chopise ñane, uje ore edodie cuse jnese gu Pangarádejnai to.

¹⁴ Eduguéjna osõratai a jé ca pijnimique uté iji charidi tuté, ga a jé jogate dajogadi gatuaque, uje que chuseque ayoré jmatágode ore gu.

¹⁵ Uje paquesuque disírique údode ome daté, dayé ore enga quene uté chiraja cucha dacadode quigode to. Mu ujetiga ca ore cho dabi quique ome cuchade enga disi tuté a ca chiraja cuchárique jne, enga uté daté a chajéngui jórogome dabi atígo jne.

¹⁶ Uje jiépisi jnani sijnángone udore ore ga jiépoi ore ipesudedie pujurei rĩ. Mu ayoré parágode a ore pañaji udore ore jeta ore isijnaringuéone chinguíra ore aja jnumi.

¹⁷ Opise babi quique gatuaque enga a ca amo pajegátigáringome ua jne enga a barasique ua gatuaque jne ome babi tuté ate omone.

¹⁸ Ujetiga ca ore timíninga Dupade uru quigode iji danínique ga que paquĩraque ore ome ore isoca noñatígo. Mu pininaquei gajnesórone u punínique idáisoningo ujetiga ore dopísi Dupade uru quigode jnese.

¹⁹ Ujetiga ayorérique irótique chiraja darósonique uru quitígo mu tagu darósõri uru quigode aja, mu jé ca gosi chedu daruode ome daroi uté.

²⁰ Ujetiga ore dojnóngaja dojórique ayoré enga ore cho turuturéji uté mu ujetiga tangári dojórigo ayoré uru quigode enga uté suépise dajõrai gai uje chiese chirajapise cuchade. Chamáñaje jĩraque uté chojninga: "Jé dóji, yiraja arĩa. A yipésu jne." Mu chapúsaja dáyipiedie quigode enga que cho parágome dapesutique cucha yúrique jóroque.

²¹ Ujetiga ayorérique chosi darógabi iji disatique ga que chuségosi ga chise dáringai jnacare jne enga que tangárapoi cuchárique rĩ gu uje irósõri cana gáyode nanique iji úringai disi enga que todopo darósõri casica gotique rĩ.

²² Ayoré botáquechoquíode uje jecucha ga dosója dejode ome cuchade jnese, enga ore chaguhéta pocaningane gáyode, enga pésupúsu darasade ujuredie.

²³ Ayoré dicotárei ujode ayoré ore chosi iji jnumi gu icotaquéode ome re. Jé basa ga ore chosi jnani pajnotai iji gaté gu pararinguei.

²⁴ Gosi ujetiga nóna oriechoqui aja oridérigui pláta quedéjnai, ga uté gosi jé iminingarate re ome dapesudedie pujurei. Mu uté chiraja jóroque uje a cho daba dajõrai tuté oriquéode to jne, mu que cha úringai pijõra.

²⁵ Ujetiga Dupade pota cuchárique úringárique pipesudome yoque marínga, yocujórique ayoré ore chãra yóguiji cucha dacatique ga ore pésu cucha unerotiguei ome yoque. ¡Mu jé ca yitodógo ore uru bisidégode! E mu yicoi ga yipéco Dupade uru quigode ga a yacãrésõri tu uté ome cuchade jnese jne. Chamáñaje a yangácoi yocujórique ayoré jne enga cho jetiga pujuyáraque isaque yoc enga e que toc jeta yipéco Dupade ojningane cucha udore quigode.

²⁶ Jecucha ayoréode chayója ayoré dacasutedie jetiga ore chosõre ore. Mu gusu Pangarádejnai Dupade uje ũrepise ome cuchade. Jecute ayóyoja uté, uje suépise ayoré dacasutedie ore osongaquéode gáyode gu.

²⁷ Ayoré ate arégode jecucha ore chetaque ayoré sijnángone ore isocade ome cuchade. Ga jé adi tupo ome ayoré sijnángone rĩ, uje ore chetaque ayoré ate arégode ore isocade to.