Provérbios 28 - Dupade Uruode

¹ Ayoré táyipiegode ore todo dejode jeta ayorérique chiraja ore ome ore atique ga jecucha ore chayo mu que pajnaque ore enga cachi bayaque ore. Jé basa ayoré ate arégode que ore chayome cuchárique. Ga jé ore chopísome caraté quedéjnanie uje que chayome dojórique cuchiso.

² Ujetiga punínique chapúsaja dasocárique ga jecucha ga ore chécãre deduguéjna cuchábode gatuaque. Ore áyipiedie u jórogu jeta uñai chácariji uté charidi ga cuchade quérãji ore uniri tuté. Mu jé isoca dasocai. Jé basa eduguéjna áyipierã́tigo a ore chiraja dasocáringome darásarigo ore ga jé uté gosi jogate dayaridi, ga cuchade quérã iji uté uniri.

³ Ayoré josipíerane uje ore cho dajosipié ome ayoré jmatágode ore ga ore chopise gueyequejnáraque uje chejna cucha pacade iji ore jutícabidie. Chamáñaje ayoré jmatátique que quérã gu ayoré josipíerane ore isocade.

⁴ Ujetiga gosi cho chere chere ome deduguéjnarique áyipie quitígo, ga cho jetiga narare ayoré táyipietígo ore gai uje ore chó deduguéjnane áyipiedie gáyode gatuaque. Mu jetiga gosi dopísi deduguéjnane áyipiedie quitígo ga cho jetiga chetaque ayoré ate gajnarétigo ore isocade udore.

⁵ Que ayoré táyipiegode ore chise eduguéjna uréone ore áyipiedie quitique unétique. Jé basa ga Pangarádejnai anguresõre uréone ore u uje ore chiraja eduguéjna uréone ore áyipiedie úringanie ũrei.

⁶ A gosi irasiguirase re ome dagúcha dipesérigo uje imanicho udore gu daringaquéode. Ga irasique re ome. Mu a ayoré gajnarétique irasiguipísiráse re ome dajmátaringuéi ga suépise ayoré ugúcharã́i tuté gai. Chamáñaje chirajapise dáringai ũré gu ome Dupade. Ga irasitigai sué ayoré ugúcharã́i tuté irasitigai gai.

⁷ Ujetiga jnacánique dopísi Dupade ojningane cucha quigode jnese ga úringai pape irajataque pijógome dai, enga uté dai irasiguipise dabi tuté. Mu a gosi abi nóna ayoré acharánecojnáringo ore aja quedéjnane enga a uté dai chajéngui jórongome dabi tuté jne.

⁸ Jnani iplátarã́tique jeta ujórigo ayoré ore chutai iplátarigui jeta qué ore chijnama, mu a uté chisírasome ore mu chojninga: "Ajnáño mu a atire yibai mu a ajnungu quise jne." Uté ipesudedie dapláta unucodé dipesei, mu a Dupade chijna iji uté gari jne, enga chisi ome ayoré paraque osõratai uje chosõre ayoré jmatágode.

⁹ Ujetiga ayorérique jé ca chise Dupade ojningane cucha udore unétique, ga a jé Dupade doi gosi isocai to uje que tangári gosi icatecãraitigade to.

¹⁰ Uje ayoré sijnátique dejéna dojórique ayoré paraque aja dasoca noñatígo ga a uté gosi jé gajneque dajuyaquéode udore jne ujetiga Dupade cho dajuñame gosi. Mu Pangarádejnai a tẽrája ayoré parágode ore ome dẽrapáitigo cucha jne uje areque ore adode gu.

¹¹ A ayoré ugúcharã́tique chicotárase re ome dagúcha dipesérigo, ga chojninga: "Áyipierãi tu yu ga irajatai tupo yu rĩ." Mu ayoré jmatátique u irajatai uje chududirase uté uruode ga chojningárasome: "Urénga, yosõripísi jóroque uté ome uruode, uje chiese irajataguipise, mu uté ugúcha dipeséode que chiquetápo iji itoringárique to jne rĩ."

¹² Ujetiga ayoré parátique quene chise dáringárique eduguéjna ga ujode ayoré ore chachietai uté ga ore pésu daninaquéode gajnéone cucha. Mu jeta ayoré sijnaque eduguéjnai tuté ga que pachietabaite uté uje que pipesute cucháriguiji uté. Mu cho jetiga urasade ore chacose re ome uté gosi uje sijnaque ga que piyaque unétique.

¹³ Jeta gosi pógu dasocáringome cuchade udore ga a ca gosi chise cuchade udore omitigárique jne. Mu ujetiga gosi chatata dasoca noñatígo udore jne enga gosi cha pésu udore, ga a ca jnusinápo dadode udore jne rĩ uje a Dupade chicadígui uté isoca gajnaréngone udore jne gu.

¹⁴ A pininaquei gajnesṍri tu gosi jeta angoninguite guesaguipísome Dupade. Jé basa ga a angoninguite parigode a ore angoninguite paritigade chajni ore gáyode enga chinguíra ore aja jnumone.

¹⁵ Ayoré gajnaréngone que ore chiraja dasocáringome deduguéjna josipíerane ore ome ore josipiédatédie. Chamáñaje que ore áyipieraque jnoji dajosipiedie gu ome darasade ore. Enga ore gajnúone u caraté chagúraque uje socárome dojórigo cuchiso gatuaque. Jé ore eduguéjna sijnángone gajnúone upo cuchiso uje i tu óso rĩ ujetiga chachẽre ore.

¹⁶ Eduguéjna sijnai tu gosi jeta gosi chapuse darása parágode ore aja jnese jeta dosója ore. Mu eduguéjna parai tu gosi jeta nápisaja ayoré ate gajnaréngone, urupatáquechoquíode ore jeta dosója udore ore. Ga uté u uje urasade ore chijnorapise ome úringai eduguéjna, ga a iyajmanguipise uté iji úringai eduguéjna jne.

¹⁷ Ujetiga ayorérique chujépise dojórique ayoré enga uté chayópise uje todo jeta pajnaque uté ga jé uté chayópise. Ga jé chopise jeta uté chayópisaja dagachodi yui jeta chise dagachodi ga basája uté. Ga jé ca gosi tibite uté gosi gai uje e chirõre dagachodi. Jé tiógara jetiga ca pisaque uté iji cachodi yui.

¹⁸ Jecucha be baru uréone gatuaque ga cho jetiga baru uréone udore chãraque ua ome cuchade ga chicha raja bei. Mu ujetiga urupatáquechoquí ua, enga a ca araja barotangónique cucha jne ujetiga e cuchárique chise ua.

¹⁹ Ujetiga utáca gosi enga gosi ujuya daséquereraque jne, enga iséquere suépise gai. Mu jeta gosi ca chisa jnumi ga que gosi tagu dacatique cucha to mu úringai utácajma u uje sué gai, enga que chimópise cucháringome re.

²⁰ Jnani parátique uje jecucha chucué cucha arégode ome dojode ayoré ga uté ujode ayoré ore chisi uté gai uje ũrepísome daru quigode. Jé basa uje ayoréode uñane ore jnari cuchade ome raque ga ore ucueguípise dáringáringo ugúcharã́cho, mu a ore chise dáringáringo pujuya jne ome dagúcha dipeséode.

²¹ Ujetiga eduguéjnarique chajire ayoré gáningo atígo aja quigode, ga chiraja uñai uje jnani ataque ga que cho dajuñame uté to uje gaidi tu jeta uté chisíji dagúcharique jne. Jé basa ga chiraja uñai uje ayoré jmataque ga chopise dajuñame uté uje chiraja úringai jmataque ga que toc jetiga tẽrája eduguéjnai tuté to. Eduguéjnai tuté isocai tuté gajnarenguipísome udore uje chiraja uje udore ore chopise ñane ome dáringane máracho mu.

²² Ayoré tãrarachuguébeode u uje jecucha chucué cuchade ome raque ga ore tãráyime cuchade jnese mu a ore chuniname eti jé ore úringai ugúcharã́que eruei tu ome ore, ga ore ijmátaringuéi jogadi tu to.

²³ Uje yoquijõrárique chicota yóguiji taningai enga yoquirasique yógome uté icotaquéode ome yoque. Mu jeta yoquijõrárique chaquĩ́ra yógome cuchárique ga que yoquirasigápo yógome uté aquĩraquéode ome yoque rĩ. Mu a chise dínique jne jeta yimóngo yocaquĩrasṍri casica uje sué yoquicotangóri casé gai ga quene yoquirasique yoque to ome uté adode ome yoque.

²⁴ Ujetiga jnacánique toria danique ugúcharigo jeoga daté ugúcha ga ujórique ayoré a chojningárasome: "Uté oricho dayé ugúchade." Mu a chojningárasa: "Taque uaque, uje yapade ugúchade ga jé yugúcha to." Mu cachi uté urúo ome daruode udore. Jé oriechoquíode udore ore isocai u uté gu, ga jé oriechoqui uté to.

²⁵ Uje ayoré tãrarachuguébeode ore tãráyime cuchade ga ore itãrarachúringai chiboráta sujmájningane ome dojode ayoréo. Mu jeta gosi changureta Dupade ome re ga Dupade u uje tẽrája uté gosi.

²⁶ Táyipiegode ore u uje jé ore angurenenie u dáyipie noñánguenie ome raque ga que ore tangári dojórique ayoré uru quitique. Mu a ueradi tu jeta gosi chucué ayoré áyipierã́tique ga tangári uté gosi uru quitígo ome re. Ga a ca pujuréraque chisápo uté gosi jne rĩ uje que dopoi dáyipie qui casidica quigode rĩ.

²⁷ Ujetiga gosi chatapísaja jmatágode ga a ca cuchárique chona uté gosi jne. Mu a Dupade cho darúja gosi jne ujetiga chiraja uje jmataque dojórique ayoré mu que chajire uté yúrique, enga que chisi ome uté utaidi cucha ome.

²⁸ Uje eduguéjna sijnátique chise dáringai eduguéjna ga uté urasade ore noñome iji te ga que piyaque unétique. Enga a chisírase dagachotique ga ayoré ate arétique a chácarirase uté jogadi ga urasade nínapúsu raque ome uté uje ore chiraja gu uje paraque enga a ca uté úringai eduguéjna íjnoque míraque jne.