Provérbios 27 - Dupade Uruode

¹ Jé ca ojninga: "Yipésu yisatique cucha pisaque to dirome," mu jé ca barúo udore. Jé soca jé ca araja cucha dacatique dirome ome ua.

² Be ga jé ca asi babai ome bapesutique cucha dacate uerate. Mu jé dóji ga bojórique ayoré uñai u ujetiga chisi babai.

³ Ayoré táyipietique ipesudedie pujurei jé chopise cucaranéraque ome úringa iménu, uje a pujnungué ga imenuringuei na yógaja jnumi.

⁴ Ujetiga ayorérique cho dájningame cuchade bisideque, mu gosi chetaque cuchade iji darosadode jnese. Mu cuchadatei tupúsu jetiga jnanírique ocáca ga cho dájningame dojórique jnani, uje obiréjnapise ájningai.

⁵ Ujeta ayorérique chojninga: "Yiraja uté ate gajnaréngone mu que yatata uje yijnorapise uté gu." Mu uté ojningai dajnoraquei que pijoque iji daruode udore. Mu ujetiga gosi chingo dojórique ayoré ate gajnarétigaja ga quene pijoque uje gosi chijnóra dojoi tuté ayoré.

⁶ Ujetiga bajõrárique urúrigo dosója ua marínga, jé ca etaque uru dosótigo ome ua uje cho baquique gu ome daru dosógode. Jé basa ga jeta gosi chucu baré te marínga, jé ca o bameserãsṍri iji uté gosi uje cachi ucuté baré te gu, enga a cáma cha detétiga casodé gotique ome ua uje cho ajéquesé iji re mu.

⁷ Uje subudé gosi ga cho jeta cucha pibosode derógome gosi jnese, jeoga cutepeque marínga jé derocome gosi to. Mu ujetiga chaguhei chejna gosi ga a ca gosi chetaque cucha iringotique jne, jé aja cucha sujnátic, ga a cho cutepeque pajmarátique ome gosi jne ome cutejmai dayaguhei.

⁸ Ujetiga ayorérique idája iji daguíjnapitique marínga, jé áyipie jogadíji jóroque. Ga gajnui tu chugúpẽre chotique uje idája iji daguíjnarique ga jnusi jórogui daguíjna casica.

⁹ Uje yojaco cucha ai unénique enga uneripísome yoque. Ga udojo gajnúone jé u yoquijõrárique jeta cho yoquiquique ga uneripise gosi uru quigode ome yoque to.

¹⁰ Jé ca aya ajnóra bajorane ore gatuaque. Jé chopome bayé jõrápitigo ore to. O bajõráji bayé jõrápitigo ore to, ga ca aya ajnóra udore ore to. Ujetiga pujurérigui chise ua marínga, jé ca baquítequiguíji besaguipítique iguíjnai iji sañeque. Mu cucha ueradi tu jeta acatecã́ri bajoráringo udore uñeque ujetiga idógosipísiji ua. Chamáñaje idógosi gu, jé basa ga idájapise besaguipítique iguíjnai.

¹¹ Yababi á, ujetiga áyipierãque ua enga a apésu yininaquédatéi jne. Chamáñaje a ore chimo uje áyipierãque yabi enga a ca ore changureta yetésoningo ore uru gajnaréngone uje ore dojnóngaja yu ome ore.

¹² Áyipierãi chimo darosobátique cucha iji daquei ga chicai ti yui tome uté. Jé basa ga ayoré táyipiei chimo darosobátique cucha iji daquei to mu qué chicáji, ga gaidi tu dagachodi tiji uté gu. Uje uté gosi e déji darosobádi jmainie ga quene chetágui jóroque.

¹³ Ujetiga atai cucháringome bojórique ayoré di ichai, ga jé tiógara ujeta guẽrasṍri chaquĩ́ra bagúchade iji dari jeta di icha uté chimate doidi oredie jne, enga jé u uje chisiapome bañomi casica bagúcha ome ua rĩ. Ua u gu uje bataite uté ugúchade ome ayoré di ichai uté gu.

¹⁴ Ujetiga acáji bajõrápitique iguíjnarique ejórique ga o parágaja bajesui. Enga jé ca anguíra babijnani aja ore jeta ese ore iji dúrasabía. Chamáñaje a qué ore déji damótique enga a ore tṍra rome ua jne, ga a ca ore chise banétique jne.

^15-16 Chequé chérecherédie jé ore chopise guiguíjnarique edóraque uje gue ayedie jecucha cho ta-ta aja jnumone iji uaté. Ujeta uaté abai pota jeta chaquĩ́ra uaté ome úringa chérecheré enga a jé cho ujetiga pota jóroga jeta chaquĩ́ra emi mu que toc jeta paquĩraque. Jeoga chojne aceite aja dajmanai enga chojninga: "Jé ca ṍraji yijmana ujade jne, ga jé bajogate yijmanai." ¿Ama aceite tangárirási jnani tuté uruode a?

¹⁷ Ujetiga ayorérique pota ujeta asíco iquesérigo ga changuñériji ñane jeta asíco jnese. Ga adi jé u ome ayoré irajatátigo jeta ore chacate ñane ome cuchade ga ore irajatigade quérã jnese.

¹⁸ Uje jnanírique chajiripise dacatique cucha yúrique enga gaidi tu jeta tagu daca tuté árigui jne, ga que chuseque uaté. Enga a chise diri jne uje adie cuse. Ga jé adi u ome pirósonique uje chijnorapise daroi uje iroi dopísi ojningane cucha quigode gu. Enga chicotapise daroi tuté uje iroi que chuseque darósõri tuté gu iji deréjnane jnese diríca.

¹⁹ Uje yajire yu iji yote yocárei údi ga jĩraque yiraja yu uje uyu u yimoi tuté. Enga jé adi upome uyu rĩ uje yajire yáyipie iji yajei ga yiraja yáyipie quigode jetiga paraque yu jeoga sijnaque yu.

²⁰ Yoquipotiguéode ome cuchade que íjnoque to go. Ga qui jé u uté ome pitoringai to, uje pitoringai chequésãre yoque jnese iji erámi tudé. Gajnua jé upúsu jnaropié to rĩ uje que ayoré totique cuse uje ca óderaque déji, uje querúpise jnaropié ga que chona ayoré totique.

²¹ Ujetiga gosi pota chiraja jeta óro ueque óroraque ga chibore jeta iguirode tocade jnese iji gai, ga obiréjna uje óropise uaté. Ga adi jé u jnanírique jeta yicotágo gosi ome ipararinguérique. Mu gosi chirase dáringai picotaque ga chopise ayorédaté iji re gaté ga obiréjna uje que jnani paraque gotique. Mu ujetiga doi enga chicota Dupade ome dáringárique ayoré paraque enga obiréjna uje ayoré paraguipísi u uté.

²² Ujetiga paquesuque ayoré táyipietique údode marínga, que cha datáyipietigai tuté.

^23-24 Ujetiga cuchárigo uásejna iji bari marínga, jé ca aya asa cucha pisatique, enga báyipie jogadípise, uje baríjogonórone cucha jecucha udore a íjnoque jne. Enga jeta bachidérigui cuse ga añurupúsu ore guio jeta quérã gatuaque ga bẽra bajedie, mu jé uñanie jogate bari. Uje jecucha cuchade íjnoque gu enga jé chopo eduguéjnane ore rĩ uje jecucha ore basája ñane charidode.

²⁵ Ga adi jé u ome bacade cucha to rĩ, jeta anásu timachugode ga acapo gaté rĩ, ga bachidedie a posode u bacade udore gatuaque jne.

²⁶ Enga jé chopome bachidedie áyasai ojode, jeta aquesu enga apésu baguidériguiji udire ojode gatuaque. Enga jé ẽchopome bachidedie áyasa uerenie uñáringui rĩ jeta baplátarigui déji, ga be bajnetique jnupe oréraque to.

²⁷ Enga be enga ajose áyasa uerenie udire irisode ga ójiyo irisode; a ijõre uaque gatuaque ome irisode udore, jé aja uacarógode ore to.