Provérbios 26 - Dupade Uruode

¹ Uje tejnu iji sequeré ga gajnareque. Jé chopome rĩ ujetiga ore na dacade cucha ga gajnareque uje guéode tagu ore aja ore irángone. Ga adi jé u ome ayoré táyipietique to ujetiga pisi gai ome táyipietigai, ga gajnareque to.

² Ujetiga gosi chacacãre ua ome daru noñatígo marínga, o cucha bisidéguiji gosi uruode udore ome ua, ga gosi uruode udore cho chugúpẽre asétique ome dáringai choque. Chamáñaje que babárique cucha cus ome uté gu.

³ Ujetiga jé ca chuque raja buricai gai ga que toc jeta porute. Jeta jé ca payute burica quedéjnai pijnani erã́sori jne enga a ca basirase. Jé chopome ayoré táyipiegode ore rĩ ujetiga jé ca paquesuque ore údode ga a jé ca ore basirásome date gajnaréngone.

^4-5 Ujetiga ayoré táyipietique pojna ua marínga, jé ca achajnai uté uruode. Chamáñaje a achajnai jne enga a ore cho táyipieguiji ua to jne uje jé bo uté.

⁶ A jé bapesute barosobátique cuchame ua jne jeta atṍri ayoré táyipietique jeta qué jnope baruode údi ome bojórique ayoré. Que pimo gu jeta nápisaja quigode, jeoga chicháji ejode.

⁷ Yirajágo uje ayoré noñátique cho sebec, sebec aja dajesui enga que toc jeta chise sañeque. Jé chopome ayoré táyipietique rĩ jeta pota jóroga ayoré áyipierã́tique uru quitígo, mu que pangarate uté ome dojñane, ga jé chopise ayoré tatoi uté uje que chise sañeque to.

⁸ Ujetiga picotaque ayoré táyipietique mu cachi picotaque uté bisideque. Ga uté chopise pichogarãtique jeta pigarique jnupabejna aja uté ga a pichogaranérase mu que jno uje ore chigaru aja ijmai.

⁹ Yirajágo ujetiga pite petique chichagu yote pioi yutique marínga, que chejnáreque. Chamáñaje yote pioi yuque gu. Jé adi tu ome ayoré táyipietique jetiga pacadígome pacajnaqué obiréjnapísode, uje jé péroji jmapiedie gu ga a chojninga: "Jé go uje que yiraja ore acajnaquéode quitique to go." Enga cachi uté gosi itáyipietigai yuque gu.

¹⁰ Omi tu ujetiga yirajagopise jnanírique atique bajaque ujetiga yicoi enga yirójo uté aja yoquiroquéode. Mu ujetiga yapúco yoquirógode aja enga yocajnui tu ayorérique uje chicho dejode enga chapuse detígo aja.

¹¹ Tamocode jé ore ate uje ore chajniápo dapogaidode gáyode rĩ. Ga jé adi tu ayoré táyipiegode ore uje ore chajniápo aja datáyipietigade rĩ.

¹² Gajnareque ayoré táyipiegode ore isocade mu gajnarenguipise uñai uje ore chicota re enga chiese áyipieranguipíse ore ome dacotaquéode ome raque, mu que ore chirajapise cuchárique.

¹³ Ujetiga gosi chojningame ayoré ducutáquechoquírique: "¿Gotique uje que be cucha pisatique to?" Mu uté chãra re iji uje chiese caraté chagúraque déji cucha pisatique yúrique gu.

¹⁴ Yirajágo uje ayoré ducutáquechoquí jé jogate damochápi gai ga cho jeta catája damochápi enga qué chãra re iji chaguesíriguiji mochápi gai, mu chungurase raja quedéjnane iji uté gai. Ga ducutáquechoquí, cochocóiya piagoi joride jé ore cho ñane uje ore chungurase raja quedéjnane, mu que ore chicai siñeque.

¹⁵ Ayoré ducutáquechoquíode ore posode cucha cuse, mu jé ore cutame uje déji ore agapiedie ajéode mu jé ore cutame jeta ore charo ga ore chṹra aja re.

¹⁶ Ayoré ducutáquechoquíode ore chicota re ga ore chojninga: "Ujetiga ayoré garitíode ore chajnai uacaruode, mu uyu u uje yirajapise yuru quigode ome uaque uje yujnuépise ore gáyode gu ome yirajatígadatéode."

¹⁷ Ujetiga ayorérigo ore pojna ñane ga que uyoc u dipojnane ome ore to, mu jeta yoque gosi chisi uñeque gánique ga jé u uje ore chaguhéta ayoré ajéquesérique gánique to. Ga uté gajnui tu ujetiga pisaque tamoco sijnátique angoroinie ga payudei ga tagu gosi jmainie yúode.

^18-19 Ujetiga gosi chojningárasome cuchárique ome dojórique ayoré: "Jé ca bajei dotárome yujñiequé gajnei tuté cucha uje cachi yujñiequéo ome ua." Mu uté gosi a chojningárasa: "E bapésu yejnarei ome yu uje yo tídi, tídi." Enga uté gosi gajnui tu ayoré ũrusórique uje chicho dejode ome dojo ditaguedie ga cho dajñiequé iji dachogaranenie udire dojoi.

²⁰ Ujetiga jé ca padíja pitígaja pioi ga jé u uje jĩraque toi. Jé isocai tu to ome pibotaquéode jeta jé ca ayoré jutaréquechoquírique chajnerame ayoré uru dosótigo ore uru quigode ga jĩraque togadec.

²¹ Ujetiga gosi pota jeta ipotai gueguerade jũruáji jnumi ga gosi chubúchu gatuaque. Ujetiga gosi pota jeta ca ipotai toi, ga chadia pidode aja gatuaque. Ujetiga gosi pota jeta pibotaquéode qué quérã dádi, ga gosi jõrai chátaja uté ome úringai botaque.

²² Ayoré jutaréquechoquíode jecucha ore chatata darade ome dojode ayoré ga cho jetiga ore ichajui tu ayorérique uje ore chatata adode ome dojórique ayoré, enga chise ore ajei uje ore chejnáreque uté uru quigode ome re.

²³ Ayoréode ore déji uje cachi ore idejénamáite cuchade, uje ore aringaqué gajnecho gu. Ga gajnúone u cuchade guẽrapaisórone uje ore chisi dapesudode gáyode ga chiese pláta upúsu udore, mu jnumípisiji ajei ga que ore oráraque oréraque cuse.

^24-26 Mu yababi á, ajuse beo ome bojórique ayoré jetiga uruode cho posõratade ore uruode ome ua. Mu jé ca angári uté gosi, uje cachi urúo ome ua gu, enga ipoguiédedie dáyipiei déji ajei. Enga a chise dínique jeta yipáñangoji uté ipesute gajnarétique ome ua jne.

²⁷ Ujetiga ayorérique ajéode u jeta chujé dojórique ayoré ga na detígaja erui tuté, mu a Dupade chirotárase gosi ga Dupade u uje na ayorei tuté aja jochai tuté eruque ga udé jogadi jé u. Adi jé upome gosi rĩ ujeta gosi pota chiramurase cucarané aja dojórique ayoré gai ga chujé uté gosi, mu cucarané tuaté cṍra gosi gai ga chajo aja ti ga gosi cachodi tu uje uaté chajni gai.

²⁸ Obiréjnapise ayorérique uje chetaque dajorámetique gu uje cho darupatáringame uté. Ga adi jé upome gosi rĩ jeta dejéna dajõrárique údode mu chajéngome dajõrai tuté gu uje que ũré ome inejequéode, uje áyipie gajnarénguenie jé jogate uté ajei ome uté gosi.