Provérbios 25 - Dupade Uruode

E Salomón arecujate quichopo udojo rĩ

¹ Judágosode ore eduguéjna cuchábi Ezequías chiroque darógode ore aja ore eduguéjna bajai Salomón ujetiga ore chigota urusarane quigode ujetiga ca ore chicadígui. Enga ore ajnerámeone Salomón urusãraque jé u yocajirigode udojo to uje chósi te:

² Pangarádejnai Dupade que eruojmárique cucha cuse jeta ca chiraja quitique, mu que Dupade doi ga chacate ayoréringome cucha ponai pirajágode udore, mu Dupade cho cucha pacoyacho iji udore. Enga picotaguipise Dupade gu uté irajatígajnai. Mu ujetiga eduguéjna áyipierã́tique chiraja Dupade ipesudode udore cucha uñeque quitique ga gosi ujode ayoré ore chicota uté gosi to ome irajatigai.

³ Cucha gadiógode déji uje que piyaque eruénique. Jõrai tu uje que ayorérique chiraja gaté uéchamitó abubíeraque iji jnumi yui. Jõrai tupo rĩ uje que togome ayorérique ujetiga chise jnumi ajedatérique. Jõrai jé upo eduguéjna cuchátique áyipie quitique rĩ, uje que ayorérique doi ga chiraja uté áyipie quitíguiji ajénique.

⁴ Que togome plátadie ipesungoremétique jeta pésu cópa orerã́tiguiji pláta iguirícojnaringui. Mu uje uté chãrei enga iguirode tocade ga quene pésu cópa orerã́tique iji.

⁵ Ga adi jé upome peduguéjna parátique rĩ jetiga cãra daróquegatérigo ore jogatique uje que áyipiedie ujñapeque, enga jogadi u ujetiga quene pijoque eduguéjnai uté úringai paraque ome uté urasade ore.

^6-7 O ayoré gajnarénguiji ua ga jé ca acunguésõri eduguéjnarique jeta ca tibidi ua. Chamáñaje que ore pijnángaidí tu ua gu ga gajnareque ujetiga oria ese uté iji isagode cucha omi gáyode. Jé soca uté jĩraque chiroque ua aja doi tiji dojode eduguéjna ore iquei jne, enga a ajéngui jórogome ua jne.

⁸ Ujetiga amo cucháringome bedodie marínga, jé ca bo ga ca aquejname úringárique pute ome eduguéjnarique. Jé soca gosi basája baquigade ga chimópise udore ore isocade que, ga cachi bojña baruode ucode uje jĩraque batata que ome eduguéjnai, enga que arajápo baru quitígome eduguéjnai te rĩ iji udore quigade.

⁹ Ujetiga bajõrárique botare ua ome cuchárique marínga, be ga opise cuchárique quigome uté. Mu jeta jé ayáyo uacabotaquei gajnetique cucha ga aya bu, ga jé ca agota iji bojórique ayoré ejórique.

¹⁰ Ja seca bojórique ayoré chudute udore to jne enga anguíra pajegátigai taja ua jne. Enga a ca bajõrárique chisápo banétique jne rĩ jeta ore chiraja báringárique jutaréquechoquí.

¹¹ Uje yajmárango gosi uru quigode enga uté uruode cho cucha nanganatátique uje cho nánga, nánga aja dajesúode.

¹² Jé chopo gosi te rĩ jetiga chingo daru ueratígo aja dojórique ayoré, ga chaquĩ́ra ome atique, ga uté gosi doi uru quigode, enga pisocai uté sué órodie gáyode ome úringanie orerẽ́.

¹³ Ujetiga gosi irótique chóji gaté ome darósõri utoquéode enga uté irósõri chutṍri uté ujetiga jno uruode údi aja sona, enga chirajapise daroi uté jeta que chimoque uru quitique. Uté iroi gaidi tu gu jeta jé ca pésu danerotiguéringome darósõri uté. Enga uté irósõri nínapúsu re ome uté ga pininaquei jogadípise uté gatuaque ome daroi.

¹⁴ Ujetiga ayorérique chojningame dojórique ayoré: "A bajneque yugúchai jne," mu que chisi ome dojningai ome uté, enga chopise guecorépitái uje que guérique tṍraji.

¹⁵ Ujetiga yangacopísi yocujórique ayoré uruode uje botare yoc, enga yujucópise yocuruode guio to ome uté uje yichajnángoi uruode, enga diga uté ájningai doi jnumi enga tangári yoque to.

¹⁶ Jé ca apesipise cutepetique, jé soca agupase ua iji jne enga apogaya jne é.

¹⁷ Jé ca agotája bajõrárique úringárique paquíningui, ja seca uté chetaque ua jne jeta bejo.

¹⁸ Uje yaguhétago cuchade yocujode ayoré gáyode bisideque ga jé chopise docoguéraque, asṍreraque, docojo asícoraque ujetiga íjnonguiji yoquijõrárique enga chinguíra uté aja jnumi.

¹⁹ Ujetiga yoquijõrárique chijnime darúringome yoque ujetiga cháta yoquisatique cucha aja yoque, mu cachi uru daruode ga yicoi yoquisatique cucha ga yoco sebec, sebégaja jeta yimáco. Ga yocajnui tu jeta yajo cucháringome yoquimataraque edóraque ga yucúgo gai.

²⁰ Ujetiga jnusiétaque gosi ga que pirasitigárique déji gosi ajénique. Jecute yicoi gosi ga yijñecaco iji ejode. Yoquigaidi tu gu jeta gosi áyipie doi jnutique. Mu a gosi chetaque yoquijñecade, ga cho jetiga uté gosi ujótique déji gánique ga panire cuchárique aja jetiga chacája uté gosi ujosi iji gai. Ga jé chopome rĩ jetiga pejñuque gosi iguidéraguiji tejnuringádatérique ga gosi chácare iji tejnuringai ome dáringai choquíbi.

²¹ Ujetiga bamajosónique chejnáreque dayaguhénique ga asi ome potígome. Jetiga cajnóriji enga asi ome yotígome ga chóji to.

²² Ga a jé u jne jetiga uté chajéngui jórogome dadi casodica ome ua uje bosõre. Enga Pangarádejnai a cho bosongaquéode udore oré ome ua jne.

²³ Pujutarétigade jecucha ga chijnime pájningane, adi tu ome casaque uje chijnoque guéode ga beque.

²⁴ Ujetiga ore iguíjna cochocoi ueradé, mu derocome jnani ujetiga acoté cho chere chere iji ore iguíjnai tuté gatuaque. Ujetiga uté gosi jno, enga pésu daguíjna ponique iji siñeque iji uaté dosatique mu irasique daguíjna pori uje pajesereringai jecucha déji. Enga iguíjna pori sué iguíjna cochocoi ueradé gai ome uté gosi.

²⁵ Uje yudúco yocuague uñanie ore ujnomé ueradode uje idája ore ome yoque, enga ore ujnomei chopise yote aréredatéi jeta yocubusugúi cajnore marínga, yójigo yote aréredatéi ga jé u uje ueradápo yocubusugúi iji uté jmainie.

²⁶ Ujetiga jnani parátique chécãre dasocárique enga tangári jnani ate gajnarétique ome inejequéode uje dejéna uté aja dajmapiedie, enga uté chopise sibíjna ueratique ica, mu jé nóña ga echujna uté uje nóna ayoré gajnaréngone ore gu.

²⁷ Yirajágo uje gosi chipese cutepei ga quĩrique chipese ga uneripísome. Mu jeta gosi ujuya ga agupase gosi iji cutepei tuté. Ga adi jé u ome ayorérique jeta picotaque uté ga jnari rome dáringárique picotaque ga a uté agupase iji dacuegode picotaqué ome re jne.

²⁸ Ujetiga pidánique chiqueta raja te ga que uté umajósonique basíji yúrique jeta cho dajocaninga. Ga adi jé u ome ayorérique ujetiga chiqueta raja te enga que uté ipotiguéode basíji yúrique jeta sué gai ga basapója pisijnaringuérique rĩ.