Provérbios 24 - Dupade Uruode

-19-

¹ Jé ca ojningame ayoré sijnángone ore: "Cuchade jiépisi iji udore ore gari, enga a yibágui ore enga yijína ore aja quedéjnane to, jé soca yo yadíji ore ugúcharique to."

² Jé ca be baruode udore, enga ca áta ua aja ore. Chamáñaje ore áyipiedie jogadípise pocaningane, pujuredie ore, enga que ore chĩ́care cucha uñeque ome decarane pocaninga.

-20-

^3-4 Yocúringai ayoré tudé gajnui tu guiguíjna poratique. Yoquirajatigai doi ga pésu uté eruéode bajaque, mu yocayuquetotiguei cho jeta imanique aja gaté. Yocajnéone pacajnaqué pésu cuchade iji guiguíjnai tuté ajei. Ga yoquirajade udore ome ore acajnaquéode ga cho jeta guijnatajei cho daparagádu enga guiguíjnai uté e chise dáringárique guiguíjna orerãque uje uerate ajei, guesi ore jnese gu.

-21-

⁵ A jé picotaque ayoré uajádode to, mu garósi ore gajnéone picotaqué. Jé basa ga picotaguipísi u ayoré irajataguipísi.

⁶ Yirajágo uje ayoré jõcaratade ore pésu dáyipiedie ome ñane bajaque uje ore pésu dajocaningai ome damajosórone, enga jé u uje ore sué ore gáyode. Isocai jé u to ome yoque. Ueradi tu ujetiga yangácoi yocujode ayoré áyipiedie bajaque to uje yipéco cuchárique. Ujetiga jiei ore uje ore cho yoquiquique enga a ueradípise yoquipesutígo cucha quigode to.

-22-

⁷ Ujetiga e ayoré táyipietique déji eduguéjnarique iquei uje uté chajire uté adode aja quigode, ga que uté chiraja daru quitíguiji eduguéjnai tuté iquei. Cho ujetiga chiságui pirajatigai ga cho ujetiga chisa jóroque yúode mu táyipieque ga cachi isagui jóroque uté yúode.

-23-

⁸ Ayoré áyipie noñángone ore déji to uje ore chucué dajequichome dasijnaringuéone, enga a ore chise dáringáringo ibijócho jne ome dojode ayoré.

⁹ Táyipiegode ore, jecucha ga ore áyipiedie déji cucha gajnaréngone úringáringo pipesucho. Enga ayoré surungúmeone ore ujode ayoré chujãpise ore isocade.

-24-

¹⁰ Ujetiga yiparátagome cuchade ga que yisago gatérique ome yoquirosobátique cucha, enga jogadi u uje jĩraque yibaco ome yocajnetique cucha dacate.

-25-

^11-12 Ujetiga amo ayorérique jeta cho dajocaningame dojórique ayoré ga be uté gosi ga aquírame jocaningai uté. Jé chopome jetiga amo cucháriguiji bajõrárique uéchai ga abite uté gai ujetiga chajuque rome enga chapídome. Mu ujetiga jé ca be udojo quigode, ga cho jetiga ãra bojode ayoré ore uje bojninga: "Que yimo gu, jecute que yibite." Mu Dupade pañapísiji badode udore quigode, enga uté cho ayoré chojmara, chojmarane bai iji ore adode uje que ore chañuru dojórique ayoré guio.

-26-

¹³ Yababi á, ¿ama jé ca uneréjna cutepei tuté iji dabié ajei te a? Cachi unere arĩa.

¹⁴ Jé uté chopise pirajatigai, payuquetotiguei ore ome danéningarique. Be ga acuepísi udore ome ua to enga a ese cucha omone ore gatuaque jne, jé aja beruénique. Enga a jé ca angureta cucha udore yúode ome ua bisideque jne.

-27-

¹⁵ Jé ca báyipieraque déji paringaquérique ome jnani ate arétique, enga jé ca ejongoque uté. Enga jé ca báyipieraque déji uté ugúcha poritique rĩ iji iguíjnai ajei.

¹⁶ A ore chajnose jnani ate ujñapetai tuté ga a ore ajnoñaquéode gare iji ti yijmanuñai, mu a uté chague jmame gatuaque. Mu jnani ate ujñapetai tuté ajnoñasórone a ore gajneque Dupade josipiéraque ome raque jne jeta chague ore gánique ga que ore chapídome rĩ.

-28-

¹⁷ Ujetiga cuchárique sué bamajosórone uñeque gánique, enga jé ca anína ua iji uté gosi dosatique.

¹⁸ Pangarádejnai chetaque jeta yoquirasique yóguiji yoquetesórone ejode, jé soca uté gajnei pájninga chajni yoquibai jne ga jé yoco uté iji cachodi uté to.

-29-

¹⁹ Ujetiga ayoré sijnátique jecucha pota pésu bájningárique marínga, jé ca arate uté. Ga uacojórigo ayoré chicota uté ome pijnacóro marínga, jé ca ajnari ua ome picotatique to.

²⁰ Bamo arĩa uté gajnei picotaqué gajnui tu pibioque papótique uje pubuchuque uté ¡puru! Ga toi ¡sere!

-30-

²¹ Yababi á, angaripísi Dupade, enga angárapoi eduguéjna cuchábode ore to iji uacaniri. Jé ca ajína eduguéjna cuchábi uté etesórone ore aja quedéjnai to. Ga jé adi upome Dupade etesórone ore rĩ, jeta ca áta ua aja ore to.

²² Bamo uje a udore ore tṍra rome dajnetique pujuyaqué jne, uje jĩraque chise ore. Enga que pimo eduguéjnarique ujuyaquei gajnetique cucha ome ayoré ate gajnarétique jne. Enga Dupade ujuyaquei gajnetique cucha ome yoque, ga que togápo rĩ jeta pirajaque.

Jé áyipierane ore uru quigode jõrapo udojo rĩ

²³ A e yatatapo áyipierane uñane ore arecujaidie quigode udojo jne rĩ: Ujetiga eduguéjnarique chajire ayoré atátique, ayoré gajnarétique ore adode aja quigode ga chojningame atai: "A garósi guejnatígo dire jne iji báringai pujuya. Jé basa ga iyajmaque ayoré jmatai tuté úringai pujurúgai jne." Mu que pisocai u gotique jeta pajuguque udore ore ajei uje jé ore chopise ñane ome dáringane ayoré ate gajnarécho gu.

²⁴ Ujetiga eduguéjnarique chajirirase ayoré máraque atígo aja quigode mu chojningame: "Que babárique cuse, ga bo bu." Enga a uté urasade chedo gu uje chiese jé ca ayoré tuté bárique cus. Enga a purása quedéjnane chietáyime uté to jne enga a ore chojningame uté jne: "Que áyipieraque cus."

²⁵ Mu eduguéjna irajatai chiraja jeta máraque ayoré máratíque ga úringai pisígai jogadi tu ome urasade ore.

²⁶ Ujetiga yicatecãcoi yocujórique ayoré ome cuchárique ga gosi que chuseque daru quigode ome yoque ga uté uruode qui tu gu uje que chuseque yoc.

²⁷ Mu yababi á, uje cáma araja cucha pisatique quitique ga jé ca apotaba báringárique acotẽrachutique to. Apésabu cucha pisatígo bajaque, jé aja bejnatique ga a araja udojo quigode jne, enga quene bapota jeta apésu baguíjnarique to, ga jé u jetiga asa bacotéraque, ga uacatígo cuse iji te.

²⁸ Jé ca ojningame bojórique ayoré: "Yetaguipise uté adode." Enga jé ca achagápo cuchárigaja uté bisideque rĩ jeta jé ca araja quitique.

²⁹ Jé ca báyipieraque dépoji báringárique jnutaque jne rĩ. Jé ca arate bojórique ayoré atígo ome ua.

^30-31 Uje yisõre ga yise ayoré ducutáquechoquírique guejnai. A ore chiro cucaranéringui iji guejnai tuté ica, mu e achéquedíe cuse, enga acadie úvai déji jórogui mu cucha catáguedie chigaru udire údode.

³² Uje yiyáguena uté guejnai ejoi te ga yitoji gai ga yojningame yáyipie: "Jé ca yi uté jmapié tuaté to jne ome cuchade."

³³ Uje jecucha uté tibójana erámi enga chipatigase re gatuaque ome dacutaquei. Enga chojninga: "Qué yimope rĩ."

³⁴ Mu ujetiga uté qué dérasi damótique ga chuniname eti gajnei pijmátaringué diringai tu, ga chajo uté aja jnumi ¡tac!