Provérbios 23 - Dupade Uruode

-6-

^1-3 Ujetiga atátique tibidi ua ome dabotígo ujetiga acásaramá uté to iji posode udore, e mu ajusípise beo ome uté ujetiga jé ca ajmárapúsu pose unérone. Jé soca chãra ua iji cuchárique jne. Bamo uje atade que ore tibidi ayoré gajnarétique bisidec.

-7-

⁴ Jé ca báyipieraque jogadípise jeta bagúcharique jiépisiji erámi tudé. Ga jé ca o bedójnaringuéo iji cucha pisagode gatuaque jeta amate bagúcha uátic.

⁵ Bamo uje que cucha piquetangore pugúcha uásode gotique. Uje udore jé chopise chugúpẽredatéode uje aramanie cuse ga chó ga jĩraque jnome dajesúode, ga adi jé u ome cuchade iji erámi tudé jnese.

-8-

⁶ Ujetiga jnani jurétatique tibidi ua jetiga acásaramá uté to mu etaque uté inejequéode ome ua. Uje chiese unéño uté posode enga pota jetiga caniranguipise ome ua.

^7-8 Mu cachi uté pijnangaite ua gu daringaquéode. Ujetiga agu uté posode to ga a ójiapo uté jotai to rĩ ga jotai tuté cho jeta cucha ojórigo sué iji babusugúi ome uté jotai, enga a apogapóji to jne rĩ. A ajose eti bojñane unere quigode ome uté mu que chise bojñane unétique enga quene baraja uje que cuchárique tõrapísiji baru quigode udore ome uté.

-9-

⁹ Ca atata báyuquetotiguérique iji táyipietique ejórique. Bamo uje a uté cho pujñiequei iji báyuquetotiguéode udore quigode. Uje que chiraja páyuquetotigué uréone quitique gu.

-10-

¹⁰ Jé ca ecãcho yocai cásodicáite jnani bajaque ore utaidode jnupe udore quitígo uje ore pésu dajminone iji eruéode nanique. Enga jé ca ajna disijátique gajnetique jnupe iji gari.

¹¹ Uje disijádode ore irotangore cuse to uje suépise cuchade gáyode jnese. Jé soca uté chirota disijádode ore jne enga chajnose ua ome bajnéone cucha jnese to jne á.

-11-

¹² Be ga jé ca aramurase ore ingoméone cucha iji báyipieraque uje badúdome bangoninguinone ica. Ujetiga gosi cho baquigome cuchárique diríca ga ajiripise uté isocade aja quedéjnane, enga bepísi gosi jmapié uaté.

-12-

¹³ Be ga jé ca acho jeta o babode ore quique. Uje a aquesu gosi útigo marínga, a ca gosi topísirási.

¹⁴ Mu jeta jé ca o batique quique jne enga a uté isijnaringuérique sué gánique enga qui tu pitoringai. Jecute uje bo uté gosi quique enga cho jeta ajna uté iji pitoringai jmainie.

-13-

¹⁵ Yababi á, uje bamate ua aja páyuquetotinguerã́i ga a barasique ua jne, mu cuchiyi tupúsu yu uje yirasiguipise yatique jeta chise dáringárique áyuquetotinguerã́que.

¹⁶ Ujetiga o báyuquetotiguérique quique ome uñéngo enga a yudute báyuquetotiguérigo to enga a jiépisi yininaquei tome ua jne.

-14-

¹⁷ Ujetiga amo ayoré ate gajnarétigo udore ore marínga, jé ca aratáyime ore adode ome ore. E mu ejnárase báyipie aja Pangarádejnai uté úringai pangarate jé aja úringai picotaque iji bacuecaringuei tudé jnese.

¹⁸ Ujetiga jecucha apésu cuchade udojo enga a amo cucha omone gatuaque jne iji baquéode jé aja beruénique. Enga a ca toque jne jetiga pĩroque banguretigai ome cuchade yúode uje cáma amo mu.

-15-

¹⁹ Jecute, yababi á, ajusípise basocade guio, jeta ajnapise dajeque caputai tuté iji jnumone.

²⁰ Enga jé ca áta ua aja ũrusóbeode ore to uje yote pioi jecucha chujé ore, jé aja ayoré acharánecojnane ore.

²¹ Yote pioi josõreméone, acharánecojnane ore isocade udore ga chimate ore aja jnumi jne. Jé chopome ayoré ducutáquechoquíode ore to rĩ, a ore chedu daguidé arímenie jne.

-16-

²² Be ga angaripísi bayé uje bãrapi tu bai tuté nanique. Ujetiga baté chise dáringáraque gata marínga, jé ca ajíñome iji te jmete, mu jé angaripísi uaté uru quigode to.

²³ O cucha oreranguipísiji bajnéone pacajnaqué udojo, jé aja pirajatigai, jé aja puru uréone, jé aja payuquetotiguei, jé aja pacajnaquéode. Cho jetiga bagaite udore oréraque ica ome ua, ga ca ajuégapóme oréraque rĩ, ga jé jogadípise bari.

²⁴ Ujetiga jnanírique atique irajataque ga paraque rĩ, enga dai irasique re enga jé tiógara jeta chicota dajnacari.

²⁵ Yababi á, ujetiga bepísi bátegoningáne, ga jé tiógara jeta baté, uyoque yitijínango gatuaque ome ua, enga yicotágo ua.

-17-

²⁶ Yababi á, jecucha ajire yijmapié ga jé be yijmapié ome cuchade jnese to.

²⁷ Bamo uje que yise chequé quedéjnaraque unétique gotique. Yojninganie u gapu dibéchoquídie, chequé dipotedie ore. Uje gajnunie u ejopiéraque uje que piyaque eruénique, enga gosi basája ejo tuaté ga gosi cachodi jé u.

²⁸ Chequé dipotedie udire ore chopise ayoré oriechoquírique uje ore toria dojodie chequé abayode ga ore chacose ore ome doriquéode. Enga jiépisi jnani bijnángone ore, ga goto chequé dipotedie udire ore gu uje ore chimate jnanione udore uñane aja jnumone.

-18-

²⁹ ¿Gosode a uje ejnarétaguebeque ore? ¿Gosode rĩ a uje chere chere ore ome cuchade jnese? ¿Gosode rĩ a uje jecucha ore doi pocaningane ome dojode ayoréo, mu quigade ga ore chucué dajequicho iji udore quigade? Ga ore chojninga: ¿Chimo jóroque re uje yipésu udore? ¿Gosode u uje pajnongoque ore gatuac? ¿Gosode rĩ a uje jecucha ore edodie cho jise?

³⁰ Obiréjnapise uté gosi, uje uté gosi u uje que cha víno úringárique pijote. Ga udore jecucha ore chajnera dádi ome decarane dajote cucha otacho ga pésu ore ũrusoringuéone iji jmainie.

³¹ Yababi á, be ga jé ca etingare víno uté to jeta ca ajirápo yúrique rĩ. A ore chingongara víno aja ua jne enga a ore chojninga: "Uerate víno tudé arĩa. Uje gatíjna, enga cho nánga, nánga iji yoquijópidi tudé ajei. Uje yójigo ga yiníco yoquibogórodie ga ueradája yocajei."

³² Mu yababi á, que ũré ore uruode udore gotique. Uje víno gajnui tu ugárique uje chigase yoc enga chequésãre yoc.

³³ Ujetiga víno yuque ua ga bamo cuchade uje chécãre re, chécãre re ome ua. Enga a báyipiedie chácariji bádode jnese jne. Enga a baruode noñácho aja bejode gatuaque jne.

³⁴ A arique jne mu jnumi chachia re iji baquéode ga bacho jóroque uje chachia re ga banguíra ua aja quedéjnane. Ga aterẽta jóroque enga jé isoca uje chachia re iji bádi.

³⁵ Enga a ajire babai jne enga bamo ore yupídode iji, ga bojninga: "A ore chujé yu mu que yejnáreque ore yupídode. Enga a ca yuninapo ore que rĩ, yisórone ore. Mu ujetiga e yirajápo tijode jne rĩ, enga jé u uje e yucuepoi víno gaté rĩ jeta yóji."