Provérbios 22 - Dupade Uruode

¹ Ujetiga bojode ayoréo ore chudute bajnomei uje ayoré paraque ua enga udore suépise ujetiga ore chudute bajnomei uje ayoré ugúcharã́que ua, jeoga bajuyápise iji órodie, plátadie udire. Jecute bacuei turásu báringárique ayoré ate omipise.

² Ayoré jmatágode, jé aja ayoré ugucharane, jé ore cho ñane iji jnumi uje Pangarádejnai Dupade jé ipesute ore jnese gu, enga jé ore imanisṍri tu uté jnese.

³ Áyipierãi chimo darosobátique cucha iji daquei ga chicai ti yui tome uté. Jé basa ga ayoré táyipiei chimo darosobátique cucha iji daquei to mu qué chicáji ga gaidi tu dagachodi tiji uté gu. Uje uté gosi e déji darosobádi jmainie ga quene chetágui jóroque.

⁴ Ujetiga gosi tangaripísi Pangarádejnai enga gosi cho paraque gatuaque, enga gajnéone cucha gadiógome uje Dupade chisi ome bisideque: ujetiga gosi chise dagúcha uátique, jé aja dáringárique picotaque, jé aja pucuecaringué eyúgojmai.

⁵ Ayoré sijnángone ore ũrajéone jecucha ore chicha dajuyadie aja ga jiépisiji udore. Ujetiga gosi chosõripise re ome udore ore ujuyadie yui ga jé ca gosi chajna ore ũrajei tuté to jne.

⁶ Opise batique quique ga a chise dáringárique jnani jne enga a doi bojningane cucha jnese jne.

⁷ Ujetiga ugúcharã́tique chojmára iji ayoré jmatágode udore ore ujade ga ore cho deduguéjna iji gu uje sué ore gai ome dagúchade. Jé chopome ayoréode uñai to rĩ uje ujode ayoré ore chijna dajnose carubode iji uté iplátadie, ga jé ore cho deduguéjna iji uté to.

⁸ Ayoré utácai jeta chaca dacatique cucha ga sué, ga jé gajnei daca ujníerẽ́ tuaté. Jé chopise ome ayoré ate gajnaréngone. Uje jé ore gajneque jne date gajnaréngone udore ome raque to enga ore josipiedie a chise deruénique jne ome dojode ayoréo.

⁹ A Dupade chatapísaja ayoré osongacade jne uje jecucha ore chisi dojode ayoré iji dagúchade uje jmataque ore ome cuchade gu.

¹⁰ Ujetiga pocãraque ayoré surungúmetigo ore iji pidánique ga jogadi u uje pibotaquéode doi jnumone iji uté enga que ore chetágapo ñane jmapiéraque rĩ.

¹¹ Eduguéjna cuchábi que chise darasade ore unerotiguérique uje ũrepise ore ome dadode. Jé chopome udore ore rĩ uje ore uruode uerachome ga eduguéjna cuchábi chopise dajõráji ore ome ore uru ueradode udore.

¹² Pangarádejnai que chuseque ayoré áyipierane ore uje ũrepise ore ome dojningane cucha. Jé basa ga chingo aringácachoquíode ore aringaquei quigode aja erámi gu ujeta obiréjna ore úringane aringácachoquío.

¹³ Ujetiga gosi chojningame ayoré ducutáquechoquírique: "¿Gotique uje que be cucha pisatique to?" Mu uté chãra re iji uje chiese caraté chagúraque déji cucha pisatique yúrique gu.

¹⁴ Ujetiga chequé dipotéraque tibidi dejode ome uaque gosode, ga e Pangarádejnai Dupade cho darúja uaque gu uje uacabáchoi uaté pijnane. Ga e uacabasója eruguéjnarique uje que eruénique cuse. Chamáñaje uaté pijnane jé chopise eruguéjnai tuté ome uaque gu.

¹⁵ Disiode jecucha ore pésu daturuturéringane ga ore dayode chaquesu ore údode ga cho jetiga ore chejñu ore uturuturéringane udore iji ore údode.

¹⁶ Ujetiga gosi doi dajosipiedie ome dojode ayoré jmatácho uje gosi gaidi tu dáringárique ataque, mu a ca uté gosi chimópo cucháringome re jne rĩ iji dajosipiedie udire quigade. Jé chopome ayoréode uñane rĩ uje jecucha ga ore nejéru ayoré ugucharane ore údode uje ore gaidi tu jetiga ore chisi ore iji dagúchade, mu a ca udore ore chimópo cucháringome re to jne rĩ.

Áyipierane ore arecujáchi udaji uje chise ore isecaranone uje 30 u

¹⁷ Yababi á, angaripísi yuru quigode ome ua gajneri, uje a yingo jnani áyipierane ore áyipiedie quigode ome ua jne.

¹⁸ A bajneque pininaquei to ome ua jne jetiga jecucha araja udore quigode iji báyipie ga barate ore uru quigode jnese to.

¹⁹ Yajegaidípisi u ujetiga anguretapise Pangarádejnai Dupade gatuaque, jecute yacate ua ome jnanione udore ore uru quigode udore.

²⁰ Yatatagode udojo chise 30. Pacajnaqué uñane, jé basa ga uñane garani tu uje po quique cuchade úringáringo pirajacho.

²¹ Yacate ua ome udojo gu ujetiga araja ũréningo iji cuchade ujade. Jé cho uje yajegaidéjnapise u jeta arajapise baru quitígome gosi jeta catecã́ri ua ome cuchárique quitique.

-1-

²² Be ga jé ca ajuseque ayoré jmatátique uje jmataque ga gajnei tu dáringai posõraque ome ua. Ca o cucha pibotajmáji uté gu úringai ayoré jmatac. Enga ca aguhéta cuchárique ayoré jmatátique gánique bisideque iji eduguéjnarique iquei uje que ayorérique narare uté gai.

²³ Jé soca Pangarádejnai narare uté gai jne enga cho dajuñame ua jne gu uje bo cucha pibotajmáji uté.

-2-

²⁴ Jé ca o bajõrai iji ayoré júrurubétique, jé aja ayoré sijnátique.

²⁵ Ujetiga ajína udore ore aja quedéjnane enga a ore chacate ua ome dasocade jne enga a arate ore jmapiedie udire to jne. Ga a cho ujetiga pigarique betabi ome enuérique jne enga bagachodi jé u uté uje bo cocho cochógaja jnumi.

-3-

²⁶ Ujetiga bojórique ayoré chiroque ua aja uacojórique ayoré iplátaraque ujetiga atame udore ore jeta que ore ío iji uté gari, mu jé ca be udore ore utoquei uté jne.

²⁷ Uje iplátasṍri tuté ja seca chutai udore iji ua jne, enga a jé ca araja basocáringome jne jeta amate, enga socaseti chijna bagúchade udore jnese, jé aja bamochápi.

- 4-

²⁸ Baraja uje yocayode jnani bajácho ore chutai dajnepídode iji jnumi nanique ga ore pésu dajminone iji uté eruéode. Jecute omi tu jeta jé ca pecãraque ore gajminone udore iji jogadode.

-5-

²⁹ Be ga etingare ua ome cucha pisagode jetiga arajapise úringáringo pipesucho, ga a eduguéjna cuchátigo ore cho daróguiji ua jne gu uje barajapise bapesudode udore cucha quigode. Ga a ca bepoi ayoré gajnaréngone uñeque iroquérique to rĩ, uje garósi basagode cucha pisaque oredie ome udore ore gu.