Provérbios 21 - Dupade Uruode

¹ Pasutedie cho jetiga ore dopísi dáyipiedie quigode, mu que ore doi gotique. Ga jé ore chopise tié jmainie uje que ore chicáji siñéngome daqui tié jochaque uje Dupade ipesudome ore nanique gu. Isoca to ome yocasutedie uje que ore doi dáyipie quitique gotique ujetiga jé ca Pangarádejnai áyipie u ome ore.

² Jnanione ore ipesudode cucha cho jetiga ueracho ome ore ajéode gatuaque. Mu gusu Pangarádejnai Dupade uje chirajapise dasocade ome pisocade udore, jeoga gajnarécho, jeoga ueracho. Gusu Pangarádejnai Dupade uté gu uje chiraja ayoré chojmarai áyipiedie quigode gu.

³ Be, ga ũrepise ua ome bojningáringo cucha jnese. Be, ga ca acho apésu cucha arégode gatuaque. Chamáñaje Pangarádejnai chojninga: "Pisocade udore u uje sué yajnéone ayoréode ore guẽrapáicho cucha gáyode jnese."

⁴ Ujetiga dicotárechoquí ayorérique, jeoga uté dojnóngaja dojórique ayoré, jeoga pésu cucha gajnaréngone uñeque mu máraque uté gosi, enga pésu pisijnaringuéone ome Dupade.

⁵ Uje que gosi jĩraque pésu cuchárique ga chucué pisocame bajaque ga gaidi tu jeta pésu ga uerate ipesudi quigode ome uté gosi. Jé basa ga ujeta gosi jĩraque pésu cuchárique ga ipesudi tuté cucha que ujñapeque gu uje que chucué dasocáringome bajaque.

⁶ Ujetiga gosi chimate dagúcha dipeséode aja re ome daringaquéode, enga a uté ugúchade bijnapo ome uté rĩ, enga cho ujetiga uté ugúchade udore jno uté údi aja dagachodi yui.

⁷ Ayoré sijnángone ore jocaningane a chajni ore gai jne enga socárome ore ga chinguíra ore aja quedéjnane. Chamáñaje ore eteque pisoca omone nanique gu.

⁸ Que pirajaque pisocáringome ayoré sijnátique jeta po quique, chamáñaje dosója dejode ome cuchade jnese gu ga chorei dáyipie iji udore, iji udore yúode. Jé basa ga jnani ate arégode ore isocade omío gatuaque iji deréjnane jnese.

⁹ Ujetiga origuíjnai cochocoi ueradé, mu derocome jnani ujetiga acoté cho chere chere iji origuíjnai tuté gatuaque. Ujetiga uté gosi jno enga pésu daguíjna ponique iji siñeque iji uaté dosatique mu irasique daguíjna pori uje pajesereringai jecucha déji. Enga iguíjna pori sué iguíjna cochocoi ueradé gai ome uté gosi.

¹⁰ Ayoré sijnángone jecucha ore áyipie jogadípise dapesute cucha gajnarétique gatuac. Enga que posongaquérique dépisi ore ajéningome dojórique ayoré.

¹¹ Ujetiga paquesuque ayoré surungúmetique údode ga táyipiegode chimo ga jé u uje ore jõre. Jé basa ayoré áyipierane a po ore quique ga chojmára ome cuchárique ga jĩraque ore cha.

¹² Ayoré uréone uje ore susípise cuchade guio iji daguíjnane ore chimo uje jnani sijnángone ore ate gajnaréngone chajni ore gáyode enga chejna ore gajnéone cucha jnese.

¹³ Ujetiga ca gosi chuse ayoré jmatátique guio ga que chisi ome ipotigátique cucha ome. A chise dínique to jne jetiga gosi jmáta to ga a ca pajirique uté gosi yúrique to jne.

¹⁴ Ujetiga ájningaránguipíse gosi ome dajõrárique marínga, gosi jõrai doi ga chisi ome cucháringome dajõrai uje gusu ore iji ñane gari, ga jé u uje uté gosi jõra ájningarãi tuté cha dájningai ome dajõrai guẽrapáidi cucha ome.

¹⁵ Ujetiga eduguéjnarique chajire ayoré sijnátique atígo aja quigode, ga ayoré parágode ore irasique rome uje ore eduguéjnai cho dajuñame ayoré ate gajnarei tuté, jé basa ga ujode jnani ate gajnarécho ore chopise dáyugu re ome dajõrai úringai pujuya.

¹⁶ Ayorérique jeta chácariji dajnai dajeque uje garani tu payuquetotiguei ga uté gosi chajna dajeque uñai uje cãra daqui, ga uté qui tu pitoringai yui, enga uté gosi a cho dajõráji ayoré togode to jne iji jnaropié.

¹⁷ Ujetiga jecucha gosi doi daboqueréringane gatuaque, ga gosi jecucha chóji víno, ga jecucha chanire cucha ai unérone aja dabai gatuac, mu a uté gosi chise dáringárique jmataque to jne.

¹⁸ Jnani sijnángone, jnani aringácachoquíode ore socárome jnani ate arégode uje ore gaidi tu jórogu jeta jnani parátique chejnáreque ore atique. Mu jé ore ejnáreque dadode gaté ujetiga Dupade chijnime danguresórone iji ore jmainie.

¹⁹ Omi tu ujetiga yoco yocuniri iji erã́petarétique jeta gusu uyóguiji ome yocacoté iróquerénie, chérecherédie ore.

²⁰ Áyipierane ore chiraja jetiga ore chañuru cuchade guio, enga cucha orerane déji ore iguíjnane to. Jé basa ga táyipiegode que ore chiraja jeta ore chañuru cuchárique guio, enga jĩraque ore chejnapo daplátadie aja dagaidode cucha bisidécho.

²¹ Ujetiga gosi ucuegode u pate arégode ome re, puru uréone ore ome re to, ga a uté gosi urasade ore chicotame adode udore jne, enga a pitijínaquéi jogadípise uté gosi jne.

²² Ujetiga ayorérigo ore chiro damánique iji dedánique ga ore chicha poridéode aja dedai eruéode ga ore chojninga: "A ca chuque yóguiji yoquinama ajei jne ome yocujórique ayoré." Mu a ore ujórique ayoré dirásiji ore ga chirajapise ore isocade ome pocaningane, ga chacája ore idai tuté ga chujé ore iji ore inama ajei tuté. Irajataguipise uté gosi ome pocaningane gu, ga suépise pijnacóroráne ore gáyode.

²³ Ujetiga uté gosi chirajapise jeta chañuru daruode guio gatuaque, a ca gosi pésu pujuréraque ome re jne.

²⁴ Ayoré dicotárechoquíode jecucha ore josipiedie jogadípise cuchade ome raque, enga ore chijose raja dajesúode, ga surungúmeque ore ome dojode ayoréo adode.

²⁵ Ducutáquechoquíode ore áyipiedie jogadi jóroque pugúcha pimanitique to, mu cachi ore ajé jóroguio ome dáyipie gaidode cucha. Ga a jé ore toi dádi ome dapotigádode udore cucha uje que ore chisa cucha pisatique, ga que ore chimate dagúcharique.

²⁶ Ducutáquechoquí tuté gosi chejna deréjnai tiji dayaridi ome dacuegode dapotigué bisidécho ome cucha pugúcha pimanitique yúrique jóroque. Mu jnani parágode ga isagócapise ore gatuaque. Ga ore ugúchade jiépisi jeta ore chosõre dojode ayoré ome dagúchade udore to.

²⁷ Pangarádejnai chetaguipise ayoré ate gajnaréngone ore gueranone cucha uje ore chisi ome. Uje que irasique ore áyipiedie quigode gotique ome re.

²⁸ Que pangarate ayoré urupatáquechoquíringome dojñáringo jeta chatata cuchárique atígo. Mu ujetiga ayoré áyipierãi chatata cuchárique atígo ga jé u uje quene ore tangári uté ome ojñane. Chamáñaje uté gosi chiraja gu jeta tangári dojórique ayoré ome uru quitígo, jé basa ga urupatáquechoquí que tangári dojórique ayoré urúrique.

²⁹ Cho ujetiga ayoré sijnángone ca ore todo cuchárique uje ore chajo raja dasijnaringuéone. Mu áyipierãque ayoré ate arégode enga ore susípise dadode guio, jecute ore u uje que ore todópisa cuchárique yúrique uje ore chiraja raque gu ome Dupade.

³⁰ Dupade anguresórojmáne ayoré, ore uñane chicota raque enga chiese ore chirajapise dáyipie quigode, ga chiese áyuquetotinguerã́que ore ome dojode ayoré, mu cucha bisideque ore icotaquéode ome raque ome Pangarádejnai, uje que ore ujñapeque.

³¹ Ayoré jõcaratade dimane ore iji dorutode burica gáyode jeta ore doi dajocaningárique. Ga ore chojninga: "Yicoi ore ga yujnuéngo ore gai jne." Mu que toc jetiga ore chiraja eti ore sué ore gai. Chamáñaje gusu Pangarádejnai Dupade uje pésu ga uñéngo u ujeta ore sué udore ore gai.