Provérbios 2 - Dupade Uruode

Payuquetotiguei angarásorone udore ore u uje ore chagutíyame uje ore tangári

¹ Yababi á, o bajnéngu yuruode udojo quigode jnese jne. Añuru guio iji báyipie ajei yiroquéode quigode udojo ome ua.

² Enga achẽre bangoninguinone gáyode to ome payuquetotiguei ujetiga angári to. Ajuéga báyipie tome pirajatíga uréone udore to.

³ Atai Dupade ome pirajatigai, payuquetotiguei ore ga ejna baguesi ome bacatecãraitigade.

⁴ Acué yojningane cucha udore ga edúji bajei ga báyipieraque ca déji cucha uñéngome. Chamáñaje pirajatigai, payuquetotiguei ore gajnúone u cucha oreranguipísode uje pipoguiécho marínga, jé ucuesórone ore chise.

⁵ Chamáñaje ujetiga ese pirajatigai, payuquetotiguei ore enga a araja Pangarádejnai iyiejnáringuejnái quigode to. Jé isocai u ome ua uje quene Dupade úringai piyaque jogadi u ome ua to jne.

⁶ Chamáñaje Pangarádejnai Dupade uté u uje guẽrate payuquetotiguei ome uyoque gu. Enga pirajatigade ome cuchade jé cãra rome ñane mu ore garani pibijnate chojmára nanique enga Dupade pijnani u garani.

⁷ Pangarádejnai Dupade chatapísaja ayoré uréone ore enga chisi ome payuquetotiguei ome ore gatuaque, enga chañuru ayoré ate arégode ore guio ome cucha dacadode jnese.

⁸ Enga Pangarádejnai Dupade chatapísaja udore ore to uje que ore chimoque deréjnarique ome dapesudode Dupade acho. Enga chajire ayoré ũrepísode ore yui gatuaque to.

⁹ Ujetiga acué payuquetotiguei ome ua enga a araja pisoca uréone to, enga a unere pate arégode jnese ome ua jne ujetiga apésu.

¹⁰ Ujetiga araja payuquetotiguei tuté jne enga a quene bajmára unéningai ome ua.

¹¹ A ca gosi dosóñime cuchade jne ujetiga chiraja jetiga cájnaru rome cuchade. Enga uté irotangóri a u darajatigai tiji Dupade jne.

¹² Ujetiga araja jetiga acájnaru ua ome cuchade jne, ga a ca bojórique ayoré aringaquérique sué babánique jne, enga a ca toque ua ome ore jne jetiga ore jno bádi aja dasoca noñángone udore.

¹³ Yojningane u jnanione udore ore uje ore cha pate arégode úringane pipesucho ga cho jetiga ore chicáji udore yúode ome dapesudode date gajnarécho. Enga gajnui tu jetiga e ore chajnapo ijnangununie aja quedéjnane rĩ.

¹⁴ Enga yojningane u udore ore uje ore cho daboqueréringame cuchade udore uje ore chijnime pajei dotáningane ome darasade bisideque. Mu uje ore jnome dajesúode ga ore cana darasade udore ore gáyode uje ore pésu pujuredie ome ore, ga ore irasique rágaja dajesúode.

¹⁵ Mu udore ore ajnai tu dajeque jñúcuyúnguei uje ore iradi tu dajnai tuté dajeque jmapié gu. Mu ore cho dedobóya dajeque caputaguipísi uje pate omone garani tu dajeque caputai tuté.

¹⁶ Jé chopo rĩ ujetiga ese payuquetotiguei enga a chequé quedéjnaraque potárasa jeta chãra ua ome daru noñatígo jeta chojninga: "Yipota jeta yimóji bari iji gajneri." Mu a araja uaté uru noñángone qui, enga a cho ujetiga payuquetotiguei chejñu ua iji uaté jmainie.

¹⁷ Uje qué gapu uaté nanique ga chóji dabai gari nanique ga chojningame Dupade nanique: "Dupade á, yabai tudé a jé ca yiyágopo ñane jne rĩ jé aja yeruénique," mu uaté chicadígui daru cásodicáite iji dáringa casica gapu ga chucué jnani quedéjnane ome re.

¹⁸ Yababi á, angári yu. Ujetiga ajnárase dajei taja chequé dago tuaté iguíjnai jne enga jé bopise jetiga bajnai tuté dajeque aja uaté iguíjnai e oite ua aja pitoringai to.

¹⁹ Ujetiga gosi chacája chequé dagobe tuaté gari iji iguíjnai ajei ga que togome gosi jetiga qué doi ga chajniápo daquigánique to rĩ uje e chirase chequé tuaté adode ome re gu, ga cho ujetiga chequé tuaté suru uté gai iji daguíjnai enga que togápo jetiga uté gosi chajnápo pisoca arégode iji jnumone to rĩ.

²⁰ Mu yababi á, yojningámi su ua, ujetiga jé ejna ua aja bajnai tuté dajeque caputac uje ayoré parágode ore ajnai tu uje ore chiraja gu uje uté u uje chingo pate arégode quigode aja ore. Enga bo ga arate ore isocade aja bajesúode to uje ore chañuru deo ome cucha gajnaréngone.

²¹ Udore ore uje ore jogadípise pate arégode gatuaque ga a jogate ore to iji yocuniri tudé erãpe, enga a ore nína raque jne aja dajesúode.

²² Jé basa ga Pangarádejnai Dupade a cho pore pijniméji ayoré ate gajnaréngone udore ore jne uje jecucha ore chó Dupade ojningane cucha gáyode jnese gu. Enga a tṍra ore aja dajuyaquérique jne.