Provérbios 19 - Dupade Uruode

¹ Cucha ueradi tu gosi jeta jorane ore chimópise adode ga ca potigayaque uté gosi ome atique uje jmataque uté gosi mu. Jé basa ga ujetiga gosi jorane ore cho ayoré turuturé iji gosi, jeoga jutaréquechoquí iji uté gosi ga que uté gosi ugúcha dipeséode bisitique cus.

² Ujetiga gosi tṍraji dajñarenie ome dapesudode cucha mu que gosi chucué dáyipie quichome ga cachi gosi imanicho udore bisidec. Uje gosi quejname dapesudode ga jecucha gosi cho parac, parac ome dapesudode udore.

³ Ujetiga gosi chiraja dajeque caputaguipísi mu gosi turuturéringane choréji dajeque cacachui ga gosi chise dajnei cucha dacadíji uté ga gosi chojninga: "Chimo jóroque re uje Dupade chisi ome cucha dacadi tuté ome yu." Mu gosi jé guiyaque cucha dacadi ome re.

⁴ Ujetiga gosi quene chise dáringai ataque ga quene gosi ujode ayoré ore pota jeta ore cho dajõrai iji uté gosi to. Jé basa ujetiga gosi quene chise dáringai jmataque enga que qué pijõrápo uté aja quedéjnarique rĩ.

⁵ Ujetiga gosi chaguhéta cuchárique dojórique ayoré gai bisideque enga que toc jetiga jé ca uté gosi chimo dajnei pujuyaquérique ome re. Jé chopome urupatáquechoquíode ore to rĩ uje a ca ore chapite to jne.

⁶ Ujetiga gosi ca charatáyime dagúcharingome dojórique ayoré jeta jé chijna ga ujode ayoré ore edójnari uté gosi jnese.

⁷ Uje quene gosi chise dáringai jmataque ga uté gosi desade ore dojnóngaja ome úringai jmataque jnese; enga cuchiyíode u uté jõra casodica uje ore noñome uté iji te. Uje uté chijócha ore ajéode údi marínga, ore chicáji quedéjnane ome.

⁸ Ujetiga ayorérique chucué dasocáringome cuchárique ga uté áyipie qui tocade ome cuchade ga uté chachietáji dáyipie quigode uje e tocade, ga qui jé uté ome darajatigade.

⁹ Ujetiga gosi chaguhéta cuchárique dojórique ayoré gai bisideque ga que toc jeta jé ca pujuya uté gosi jne. Enga pitoringai jé jogate ayoré urupatáquechoquíode iquébi suté.

¹⁰ Yirajágo uje que ayoré turuturérique cho daparagádu dagúcha ueratique, ga yarogapísa dagúcha ueradode udore ome yoque jnese. Ga jé chopome ayoré pirótique ujetiga chise dáringai eduguéjna ga jé yarogapísa dáringai eduguéjna uje ore iroque uté gu.

¹¹ Yocúringai ájningarãque gajnui u cabáyu porutique uje erásorone déji pijnani ga yaquírango ga que toque úringai bayágome. Jecute obiréjnapise ayoré áyipierane uje ore chiraja jeta ore chaquĩ́ra re ome dájningai ga que gosi cho dájninga. Enga cuchadatépisome gosi jeta ca timíninga cucha dacadode ome re jnese.

¹² Uje eduguéjnarique cho dájningame darásarique ga ájningai gajnúone upúsu caratéraque ajéode uje chajuque ayorérique agutéraque. Mu ujetiga ajéquesé eduguéjnarique ome gosi ga eduguéjnai tuté chopise gue jururúraque uje chuta jnumi enga pésu cuchade iquéraningai.

¹³ Disi táyipiegode ore ipesute dayode áyuguhebátigade ome cuchade. Chequé chérecherédie jé ore chopise guiguíjnarique edóraque ome dabayode uje gue ayedie jecucha cho ta-ta aja jnumone iji uaté.

¹⁴ Jnani abechugode ore abode gajneque dayode ugúchade, jé aja ore iguíjnai iji ore quigáningo. Mu gusu Pangarádejnai Dupade uje chisi ome jnani acoté áyipierẽ́ tome.

¹⁵ Ayoré ducutáquechoquíode udore ga unéri tu ome ore jeta ore mo gatuaque. Mu ujetiga ore iyaguhénique chejna ore ga que ore chajmárapo moi gotique rĩ.

¹⁶ Mu ujetiga gosi gaidode u Dupade uru pirosobádode quigode ga cho jeta uté gosi gãrei tu ome cucha gajnaréngone iji erámi tudé. Mu ujetiga jé ca gosi doi Dupade uru quigode ga a gosi jĩraque toi jne.

¹⁷ Ujetiga gosi chimo dojórique ayoré jetiga ca urénga taya ga que toque jeta chise dabotique cucha, mu gosi a chisírasome dapláta ome ga chojninga: "Ajnáma, mu amate yu jne jeta amate yu," enga cho jetiga gosi osongaquei gajnesṍri jé u Dupade to. Enga a Dupade u ujeta chatire uté osongaquei casica gai jne.

¹⁸ Jnani abechugode uaque á, ueradi tu jeta oyo uacabode quique iji ore úringamí parátagape uje cáma angoninguite pariguipise ore. Mu ujetiga ca aquesúyo uacabode údode enga a chise dínique jne ujetiga ore angoninguite paritigade sué ore gáyode enga a jno ore údi aja pitoringai, enga a ca bisitique cuse jne ome ore.

¹⁹ Cucha dacate gajnaréngone a tṍraji dajñarenie ome ayorérique ujetiga cho dájningai gatuaque. Mu jé dóji ga ayoré ájningarã́i tuté chejnáreque re iji dajnéone udore jmainie, enga ca ajnime uté iji udore jmainie. Chamáñaje ujetiga ca pujuyaque uté enga a jé ca uté cha dájningai iji deréjnane, enga a jé ate jne ome ua uje bacué basocáringome uté gatuaque ujetiga ajnime uté iji cuchade jmainie.

²⁰ Ujetiga gosi chacate ua ome dacajnaquérigo ga angári gosi uru quigode. Jé chopome rĩ jeta gosi chaquĩ́ra ua ome basoca gajnarétique ga angári boquisórone udore ore to. Ga a chise dínique jne jeta ese báringárique irajataque to.

²¹ Jecucha ga jnanione ore pésu dajéode ome cucha ponáyone jnese jeta ore pésu, mu jé ũré uje cuchade udore jnese déji Pangarádejnai Dupade jmainie, enga uté ajegaidode cucha u uje tocade jne.

²² Pajegátigai upúsu jeta ca gosi áyipie jnoji dáringárique ayoré ugúcharã́que. Ujetiga jmataque gosi mu uté gosi sué ugúcharã́que aringácachoquí gai ome Dupade gu uje canirángome dojode ayoré enga que cho daringaqué to go ome dagúcha garósabode.

²³ Ujetiga gosi tangaripísi Pangarádejnai ga uté gosi ijõripise gatuaque iji ucuecaringuei. Enga a ca gosi chejnáreque rome dajnenie pujurei to jne.

²⁴ Ayoré ducutáquechoquíode ore posode cucha cuse, mu jé ore cutame uje déji ore agapiedie ajéode mu jé ore cutame jeta ore charo ga ore chṹraja re.

²⁵ Ayoré surungúmeone jé tiógara jeta pujuya ore, jé soca ujórigo ayoré táyipieque ore chimo uté iji úringai pujuya enga ore todo jne. Mu ujetiga áyipierãque gosi enga po ayoré áyipierãi tuté quique ga chojmára ga jĩraque chiraja cuchárique quitique.

²⁶ Pajegátigadatépisome jnanírique jeta atique socárome dai, ga jé cho jeta chiroque daté aja doi, gajnarenguipise to rĩ.

²⁷ Yababi á, jetiga aya angári paquĩraquéode ome ua, enga a ajuseque pacajnaqué omone quigode ome ua to jne.

²⁸ Uje pajirique ayorérique atígo aja quigode ome eduguéjnane enga ore tibidi ore adode pijogúsorone ujetiga ore chatata cucha dacadode quigode ome ore. Mu que ũrepise ore adode pijogúsorone uñane gotique. Que pisadodéringárique dépisi ore ajéode gotique gu ome Dupade, jecute ore chãra eduguéjnane, enga ore canapise ore gai iji quigade. Ore cho cucha pibotique iji darupatáringane, dasijnaringuéone ore enga ore irasiguipise rágome date gajnaréngone gatuaque.

²⁹ E dimane pogué paréraque ome surungúmeone. Jé chopome paójnane rĩ uje dimane ome táyipiegode guidobode jeta paquesucho ome.