Provérbios 18 - Dupade Uruode

¹ Ayoréode uje jé ore áyipie gaidi tu re enga que ore timíninga dojórique ayoré uru quitígo ome re, mu jé ore gaidode u dáyipiedie ome cuchade jnese.

² Táyipiegode ga que cucha gotique pacajnaqué uréone ome ore, chamáñaje jé ore angaránone u raque gu. Ore gaidi tu ujeta ore ujode ayoré timíninga ore aja quedéjnane ome ore ate noñángone.

³ Pisijnaringuei jõrápisi cucha cuse uje i tu pajegátigai. Jé basa ga picotaquéode ome re jõrai cuse to, ga u uje que ayorérique doi ga tangári dicotárechoquírique.

⁴ Ayoré áyipierane ore uru quigode gajnui tu tié cucháberaque ujetiga ayorérique chacáji marínga, que chise jnumi tiji údi gu uje jiépisi payuquetotiguei iji ayoré áyipierane ore uru quigode.

⁵ Gajnarenguipise jeta padode ajirisórone eduguéjna uté tangári ayoré márane ojñane, jé basa que tangári ayorérique jeta ca pésu date gajnarétique.

⁶ Ayoré táyipiegode ore pijnani tu uje chijna pujuredie aja ore. Ga ore uru noñángone u uje chisi ome ore gajnéone pejopo ome ore.

⁷ Ayoré táyipiegode ore uru noñángone u to uje chinguirapísa ore aja jnumi. Enga cho jetiga ore uru noñángone chigaru ore etabi ome enuérique ga chuguhese ore iji gaté ga ore cho cocho cochógaja jnumi.

⁸ Ayoréode uñane ore cho dabose cucha unériji pujutarétigade, ga ore chajmára ga cho jetiga ore chinire gai enga subudé ore iji.

⁹ Ducutáquechoquí jõrápisi cuse to, ga jõrai u uje que pañeraque cuchárique guio, jecute que ore chimo cucháringome raque jnese.

¹⁰ Pangarádejnai i cuchadaté jeta gosi tibidi ome darosobátique cucha ga charanguipise gosi. Ga gajnua tu poragadérac ome dajatiguejnai, uje gosi déji uaté ajei enga que cuchárique chósi tiji.

¹¹ Iplatarane, ugucharane a ore chose eti ore ipláta dipesedie, ore ugúcha dipeséode chãraque ore ome cuchade jnese; enga ore chacãra dagúcha dipeséode, dapláta dipesedie aja guidáidatérique ujuyaquérigo jeta ca cucha sijnátique chacája ore ujuyaquéode uéchai, jeta ca tagu ore iji uté.

¹² Jecucha ga ayoré dicotárechoquíode ore chicota re gatuaque ga que tita ore icotaquéode quigánique uje ore icotaquéode chajni ore gai ga chinguíra ore aja jnumone. Jé basa ga ayoré pajnotátique adode u uje chosi uté iji gaté ga que áyipie omenie eruénique cus, ga ipesudode cucha jecucha uerate quigode gatuac.

¹³ Gajnareque jetiga ayorérique jĩraque chajnai yocuru quigode uje cáma chiraja quitique mu. Uté úringai turuturé pijoguipis ome dadode enga gajneque pajegátigai to ome re.

¹⁴ Ujetiga ejnarétaque gosi marínga, gosi canirángome cucha pisatique ga icaniratiguei u uje chiringáraja gaté iji ejnarei. Jé basa gosi jeta áyuguhebátaque ga que yiguíjna cucha pisatique yúringome uté gosi, enga e que toc jetiga piságaja gatérique iji áyuguhebátigai tuté uje qué nája jnumi.

¹⁵ Uje jecucha irajatade, áyipierane ore pota cuchárique úringárique pirajaque ga jé u uje ore chiraja dapotigádi tuté cucha. Chamáñaje jecucha ga udore ore chucué udore gatuaque gu ome re, jecute ore chise.

¹⁶ Ujetiga gosi chisi ome dẽrapáitique cucha ome dojórique ayoré bisideque, guẽrapáidi tuté cho ujetiga chuchẽre guiguíjna piagode gáyode jnese. Ga jé chopome ayoré atade iguíjnane jnese to rĩ. Uje piagode guesája iji gosi guẽrapáidi jmainie to.

¹⁷ Ujetiga ayorérique narare dabai to ome dojórique ayoré uru quitígo ga cho jetiga ũré ome daru quigode, mu quigade ga jõrai chatata cuchade quigode ome raque to ga quene yirajágo uje taque bajai tuté ome daruode quigode.

¹⁸ Ujetiga uacojórigo ayoré ore botare ñane enga beyoi ore enga ojnichome ore: "Beyoi cucaranenie ome ñane. Dupade a pésu jne ujetiga uacuñeque yuque enga isocai u uté ujetiga ayáyo uacabotaquéode ome ñane."

¹⁹ Ujetiga yoquijõrárique chejnáreque yocuru dosótigo jeoga chejnáreque yocatique uñeque ome re, ga chopise jeta suru dabai ome dajuyaquérigo ga que ayorérique chisápo uté rĩ iji dajuyaquérique ajei. A yipótago jóroga ujetiga uté chicadígui yocuru dosógode ome uté, mu a ca jĩraque chicadígui jne.

²⁰ Ujetiga gosi chuse deo ome dojñane quigode jnese, enga a uté gosi irasique re jne. A uté jorane ore chagutíyame arecujaidie jnese, mu que gusu ore gotique, uje a uté chagutíyame darecujaidie udire to.

²¹ Yocuruode uje tṍraji yoquibijnani ga chisi ome pucuecaringuei ome yoque iji ujade, jé basa ga yocuru noñángone chisi ome pitoringai ome yoque to iji ujade. Chérecheréode a jé ore gajneque dachérecheréringane to jne ome raque.

²² Pininaquei jogadi tu ome jnacánique ujetiga e chisa dacotéraque. Chamáñaje chequé pacotedie ore suépise cucha ueradode gáyode iji erámi údode jnese. Jecute uje Pangarádejnai Dupade chisi ome jnanírique acoté ome ga cho jetiga chejna dacaniratiguei aja uté gosi.

²³ Ujetiga ayoré jmatátique chijócha ayorédatérique ajei údi jeta chosṍrome cuchárique ga que chuseque daruode ome uté gosi, mu ayorédatéi tuté a chaguerase ga enochai patíja ome daruode enga chojninga: "Que yisi ome ua bajegaidi, jé dóji. Bo bu á."

²⁴ Ayoréode déji uje chiese ore chijnorapise yoque, mu jĩraque ore cho jmíti, jmíti ome yoque. Jé basa ga uñai déji uje chijnorapise yoque gatuaque enga que chicai ti ome yoque. Ga uté ijnoraquei ome yoque suépise yoquijorane ijnoraquei ome yoque uje yocatéraque jé chojmarápise múñi.