Provérbios 16 - Dupade Uruode

¹ Ayoré chojmarane ore u uje ore pésu jórogu dáyipiedie ome cuchade yúode jnese. Jé basa Pangarádejnai u uje juéga cuchade udore ome yoque, jeoga ca juéga ome yoque.

² Jecucha ga ayoréode uyoque yajico yoquipesudode cucha ga cho jetiga ueradipíso jnese ome yoque, mu gusu Pangarádejnai uje chiraja yocáyipiedie quigode ome cuchade udore, enga chirajapise yocúringai ũré, jeoga taque yoque.

³ Ajíñome báyipiedie quigode iji Pangarádejnai jmainie ga báyipie quigode a tocade jne.

⁴ Pangarádejnai Dupade chimate dajegaidode cucha jnese nanique uje pésu ore, enga áyipie quigode cuse ome damaningone udore cucha jnese, jé aja jnani sijnángone ore to. Pimanique ore ome ore gajnei pujuyaqué yui.

⁵ Pangarádejnai a ca chidota rome ayoré dicotárechoquíode jne, mu a cho dajuñame ore jnese jne. Jĩraque cho dajuñame uñane, jé que jnátu jeta cho dajuñame uñéngo to.

⁶ Pangarádejnai oidi tu dajnoraquei, daru uréone ore ome ayoré ate gajnaréngone ore uje chicadígui ore ate gajnaréngone. Uje gosi e tangaripísi Pangarádejnai ga cho jetiga Dupade cãra uté gosi ome isoca bajade.

⁷ Uje Pangarádejnai que chise danguresónique unerotiguérique enga doi enga chĩro uté gosi guetesórone etétigade ome uté enga ore cha dajei dotáningane ome uté gosi to.

⁸ Yabi á, uje garósi basagode cucha oredie udire ome ua, mu jé areque uje bejna baguesi ome gu. Jé basa ga baplátadie jiei ome baringaquéode, mu que cuchárique tṍraji uté ome ua gotique.

⁹ Ayoréode ore gajnei tu uje ore pésu dáyipie gajnéone cucha yúode. Jé basa ga Pangarádejnai gajnei tu jeta cho uté quique ome uruode quigode jnese ujetiga áyipiedie udore tocade.

¹⁰ Eduguéjna cuchábode ore gajnei tu ujetiga ore chajnerame Dupade áyipiedie ome darasade. Enga a ca ore cho paraque jne ome dajiritigade ujetiga ore chajire darásarigo ore adode aja quigode iji uraque danirone.

¹¹ Pangarádejnai potapísa jeta jé ũrépise yógome yocuguheyade cucha kílode jeta jé upúsu uje yẽco cuchade. Chamáñaje Pangarádejnai jé ipesute cuchade úringane puguheyacho nanique gu.

¹² Jecucha ga eduguéjnane ore cho dajuñame ayoréode ate gajnaréngone ore iji daniri. Ore gaidi tu gu jeta ore chãraque danirone ome cucha gajnaréngone. Ore chiraja gu uje a ca ore ujnomérique cuse to iji daniri jeta cucha gajnaréngone piéjna ore uniri.

¹³ Eduguéjnane que ore chise darasade unerotiguérique uje ore chedu daru uréone, date omone ore.

¹⁴ Ujetiga ayorérique chijnime deduguéjnarique ájningárique ga cho jetiga iroi tibágui gosi ga chojningame: "Qué yingo bajnei pocaninga ome ua uje bagachodi a jé u iji de gajneri." Mu ujetiga áyipierãque gosi enga jĩraque chayója deduguéjnarique enga chijócha ajei údi ome re jeta ca ajénique dotárome uté gosi.

¹⁵ Ujetiga gosi pésu deduguéjnai irasitigai, ga jogadi u uje tijode cho jnángome uté gosi. Chamáñaje eduguéjnane osongáca ore ome darasade ga ore gajnunie u jururudie uje chuta erámi enga pésu cuchade iquéraningai.

¹⁶ Cucha ueradipísi tu uje jé gosi chimate óro nanganatáguedie aja re. Mu cuchiyi tupúsu jeta gosi chimate dayuquetotiguei aja re. Cucha ueradi tupo rĩ jeta gosi chimate pláta nanganatáguedie aja re, mu cuchiyi tupúsu pirajatigai jeta gosi chimate darajatigade aja re.

¹⁷ Jecucha ga isocai u ome jnani ate arégode uje ore cãra dajesúode ome ayoré ate gajnaréngone, enga que ore chirate ore isoca noñángone. Ujetiga gosi ca chuseque dadode guio, jé chopise gosi jeta gosi ca chuseque re to.

¹⁸ Mu ujetiga dicotare gosi mu gosi icotaquéode jé inguíraja gosi aja jnumi. Jé chopo ome udore rĩ uje ore cho ayorédatéi iji raque, enga que ore chisa gatérique uje ore cṍra ¡paque! enga ore úringai cuchadaté eruei tu ome ore.

¹⁹ Mu yababi á, jé ca ajéngome ugucharane ore jetiga ore cana babai ome bajõra jmatágode ore, uje que cucha gotique jeta o bajõrai iji ayoré jmatátique. Mu bajõrai tuté ayoré jmataque suépise bajorane ayoré ugúcharã́que dicotárechoquí ore gáyode ome úringai ayoré uerate.

²⁰ Cuchade añerasṍri uje uerate añerane cucha jnese ga a irasicho dañerane udore cucha jne. Enga pininaquei gajnesṍripísi tu uté gosi uje changuretapise Pangarádejnai.

²¹ Ujetiga áyipierãque gosi ga gosi ujórigo ayoré a ore chimo ga ore chojningame: "Ũré enga irajataque uté." A jĩraque pangarate gosi jeta gosi chusípise daruode guio gatuaque.

²² Ujetiga gosi chucué dasocade cucha yúode jnese ga cho jetiga uté gosi ucuecaringuei gãrapíode jé u dáyipie aréguedie quigode udore. Ujetiga gosi pota chacate ayoré turuturérigo ore ga uté gosi uturuturéringane e pijoque to.

²³ Ujetiga gosi áyipie jogadípise páyipie omenie gatuaque ga nararome cuchade ga jé upúsu uru quigode. Enga ujode ayoré ore irasique uru quigode.

²⁴ Ujetiga uneréjna gosi ojñane ome ujórique ayoré ga chopise cutepeque poyatique ome danéningai. Ga yangácoi yocujórique ayoré uru unérone ome yoque enga jé u uje yicanirajopo to rĩ enga tijode cho jnángome yoque.

²⁵ Jé ca amíninga ore ujetiga ore jnorase bádi aja dajeque uñeque uje ueradipis ome ore ojñane quigode. Mu uté a jno bádi aja pitoringai jne jeta ajna.

²⁶ Cho jetiga yoquiyaguhéode u ujetiga chiroque yógaja cucha pisagode ga yisago yoquejode.

²⁷ Ayoré sijnángone ore gajnua tu ejo pipotáraque uje que pimoque ore atique. Enga ore uruode gajnunie u ejo pipota ocaraidie uje chachẽre dejode.

²⁸ Ujetiga ayorérique ajegaidedie u dáyipie gatuaque ga que chise dojórique ayoré áyipierãque unétique enga uté gosi ijnimique pajei dotáningane ome dojode ayoré ore. Jé chopome ayoré jutaréquechoquíode ore rĩ uje ore chijnime darade ga ore gaidi tu jeta ore chajuque dojode ayoré ore iji ñane ome dajnimingone dara.

²⁹ Ayoré sijnángone ore dejéna dojode ayoré aja dajnai dajeque jnúcuñunguéi. Chãra ore ome ga chiese dajeque uerate mu taque.

³⁰ Ujetiga gosi pota pésu cucha gajnarétique ga gosi chachietáji yui. Mu gosi a edodie cacójame dajnei pujuyaqué yui te jne ujetiga chimate re aja.

³¹ Mu ujetiga e uaque gosi uchúrigui cuse marínga, jé ca uaque gosi ajéngome dachúrigui jne. Chamáñaje gosi uchudie udire chopise ducayo nanganatátique ome uté gosi gu. Enga a gosi úringai pangarate jogadi upúsu jne iji dáringai choquíjna ujetiga jec ũré enga gosi adode ueracho.

³² Ujetiga gosi jé ca narañime cuchárique ga uté gosi suépise ayoré chaguesíode ore gáyode ome Dupade. Ujetiga gosi chiraja jeta pisijnaringuérique chisírase áyipie, mu chidota rome dáyipie quigode ga cho jeta e cho dajocaningame dáyipie gajnarénguenie udire quigode, ga sué dáyipie gajnarénguenie udire gai. Ga cuchadatépise uté gosi ome Dupade, enga sué ayoré jõcarataque dipeséode ore gáyode jnese uje ore chejna dachẽrai degu ¡jaripe!

³³ Ujetiga jnaníringo chojningame ñane: "Be, ga yicobi yocajñamini ome ñane ga yajico yungónique jne iji yoque." Mu Pangarádejnai u uje chiraja dajegaidi tiji udore ore ga pésu ga gosi yuque ome dajõrai.