Provérbios 12 - Dupade Uruode

¹ Ujetiga uneripise pacajnaquéode ome gosi, ga gosi ijnorai tu pirajatigai to ome re. Mu ujetiga ca gosi chise pacajnaquéode unétique ga obiréjna uje que pota pirajatigai ome re, uje chijnóra dáyipie noñánguenie ome re gu.

² Pangarádejnai chatapísaja ayoré parágode ore. Jé basa ga cho ayoré ate gajnarénguiji ayoré áyipie noñángone ore enga cho dajuñame ore.

³ Ujetiga ayorérique gaidode u pisijnaringuéone ga que toc ujetiga ca pinguíra uté aja quedéjnane. Jé basa ayoré ate arégode ore gajnui tu pojnac uje erode chicai jnumi enga que cuchárique chucuase ore aja quedéjnarique. Uajate ore iji jnumi gu.

⁴ Chequé paráguedie cho ujetiga ore eduguéjna cuchábode u dabayode ga cho jetiga ore chanire ducayórique aja ore enochai. Jé basa ga chequé sijnánguenie ore u uje jecucha ore tagu dejode ome dabayode ga ore abayode que ore irasique re ome ore uruode udore. Enga ore isijnaringuéone udore chajo dabayode aja jnumone.

⁵ Jnani uréone ore áyipiedie jogadipise páyipie omenie gatuaque. Jé basa jnani sijnángone ore áyipiedie jogadipise paringaquéode, purupatáringane ore.

⁶ Jnani sijnángone ore uru noñángone gajnua tu pujuyáraque ujetiga ca ayorérique chapídome uté jeta basája. Jé basa ayoré ate arégode cho jetiga ore uruode chisi ome pucuecaringuei ome ore ujode ayoré ore enga ore eca ome.

⁷ Ujetiga Dupade ujuyaquei socárome ayoré sijnángone ore jne, enga e ore eruei tupúsu. Jé basa ga ayoré ate ujñapetade gajnui tu guiguíjnarique uje uajádiji dajogadi ga que cṍra gotique. Jé jogate.

⁸ Ujetiga gosi irajatigai garósi ga jé tiógara dáringai picotaque uje garósi. Jé basa ga ujetiga jiei gosi irajatigai ga jé tiógarapísa dáringai pisígai. Mu turuturéode jé ore tiógarapísa dáringane pichietabáicho.

⁹ Ujetiga ayorérique cho ayorédatéi iji re mu que chisa cucha pisatique enga a ca cuchárique tõrapísiji icotaquéode udore ome re. A uté dojnóngaja dojórique ayoré uje chiese ayoré gajnareque, mu ayoré gajnarei tuté sué gai. Tagu dabosode gu enga iroi cuse to ujetiga doi iroquéode. Chamáñaje ayoré gajnarei tuté chisa cucha pisagode gu.

¹⁰ Áyipierane ore chiraja to uje cuchisode ore chejnáreque dayaguhéode to, jecute ore chisi ore iji dabose ajóningane to. Jé basa táyipiegode que posongaquérique déji ore ajéningome dachidode cuchiso ore, uje chiese gusu cuchiso ore gu, ga ore cho damajo ore.

¹¹ Ujetiga gosi guejnatique cuse ga gosi chaca cuchade iji, ga gosi posode garani u gosi guejnai uje chutã́riji. Ga pose uásode garani tu uté úringai utáca. Jé basa ga táyipiegode ore chedu dasoránenie uje chiese ore chise dapláta uásejnaringuiji udore, udore, udore mu cachi ore urúo uje que cuchárique tṍraji ore isoránenie udire.

¹² Ate gajnaréngone ore áyipie noñánguenie chopise chímenonie jeta ore basája chímenonie ajei ga suru ore gai iji. Mu jé isoca ome jnani ate arégode uje cho jetiga ore éningo chicáji jnumi ga que pucuayaque ore iji deréjnane. Jé ore jogate gaté uje uajate ore iji gaté gu.

¹³ Urupatáquechoquíode jé ore chajnera darupatáringane údi ome raque enga ore urupatáringane ga chacópise ore gáyode ome cutejmane darapatáringadatéo. Mu jnani uréone ore chiraja jetiga ore chajuque re ome dajnéone pijosipié jeta ca sué ore gai.

¹⁴ A Dupade cho yocuruode oré ome yoque jnese. Enga a ca yico Dupade guẽrapáidode cucha unerotiguérique jne ujetiga ueracho yocuruode gatuaque. Jé chopome yoquipesudode to rĩ, a yimóngo udore oredie jnese to.

¹⁵ Ujetiga gosi chorase ayoré táyipietique quique mu que tangári dojórique ayoré uruode. Chiese irajataque ome dajéode gu. Jé basa ga a po quique ayoré áyipierã́tique quique enga jĩraque tangári uje paraque gosi gu.

¹⁶ Ayoré táyipiegode jĩraque ore dosója dejode ome cuchade jnese. Mu ayoré áyipierã́tique ga que dosója dejórique gu uje chiraja gu uje gajnareque eti dosója dejode, ga chidota rome ore ate gajnaréngone udore jnese.

¹⁷ Ujetiga ũrepise ayorérique ome daruode ga ũrepísome ojña gajnéone cucha jnese. Jé basa ga ayoré gojñangarã́quechoquíode uje ore chatata cuchade mu que pangarate ore ojñárique uje urupatáquechoquí ore gu.

¹⁸ Ayoréode uje ore uruode dosója ore ujode ayoré ga cho jetiga ore chichagu ore ome asṍreraque ome daru dosógode udore. Jé basa ga ayoré áyipierane udore ore cho jetiga ore uruode chisi ome pijóningai ome ore ujode ayoré. Uje paraque ore gu.

¹⁹ Ayoré uru uréone a ore ecáji deréjnane jnese jne. Jé basa ga ayoré urupatáquechoquíode jĩraque ore chise deruéode.

²⁰ Ujetiga ayoré urupatáquechoquírique chatatarása dajequigode mu urupatáringane chimera uru uréone quigode ome darapatáringane. Mu jnani parágode uje que ore pota pésu dojórique ayoré ujuréraque ome cuchárique, uje ore cho gosi quique enga ore ujode ayoré irasique re ome ore uru quigode udore.

²¹ A jé ca cuchárique sué ayoré ate ujñapetade udore gánique jne. Jé basa ga sijnángone udore, ga cuchade a na ore aja jnumi jne, uje tṍraji dajñarenie ome ore.

²² Pangarádejnai chetaguipise aringácachoquíode ore. Jé basa ga nínapúsu re ome udore uje ũrepise ore ga ore chimate daruode quigode aja guesi jnese.

²³ Ujetiga irajataguipise gosi marínga, que narare bisidégome darajatigade udore, mu susípise daruode guio ome dojode ayoréo. Mu jutaréquechoquíode udore ore jno, ga ore chatata dajutarétigade ome dojode ayoré ore jnese iji dajesúode, mu que ore chiraja uje ore jorane chojningame ore: "Jutaréquechoquí tuté que áyipieraque cuse."

²⁴ Uje ducutáquechoquí pota jóroga jeta cho quique darasade ore, mu que piyaque uruode unétique gu uje chietáyime darasade ore. Jé basa ore tangaripísi ayoré chaguesi áyipiedie uje isagóca gu, ga ore doi uru quigode.

²⁵ Ujetiga páyuguhebátigarique nárasa gosi aja jnumi mu gosi jõrai a chojningárasa: "Aya o báyugu ua iji te," enga jé u uje gosi cha dáyuguhebátigai ga gosi nína re.

²⁶ Ayoré ate ujñapetade udore ore ga que ore chacho cho quique darasade ore ome pate arégode quigode. Jé basa ga ayoré sijnángone udore ore que ore chiraja jetiga ore cho quique darasade ome pisoca arégode, uje bijnaque ore ome pisoca omone gu.

²⁷ Ujetiga ducutáquechoquírique dorási cuchisode mu cutame dei imenuringuei ga que toc ujetiga di údi ga tagu. Mu ayoré chaguesíode ga que ore cutame cuchárique ga que ore chimo chaguhéningome raque.

²⁸ Parágode ore ajnai dajeque u uje que ore chimo pitoringai iji uté to jne, uje que pitoringai cunguésõri dajei tuté go uje pucuecaringué eyúgojmai garãsóri tu gu.