Provérbios 11 - Dupade Uruode

¹ Pangarádejnai chetaguipise ayoréode isocade uje ore chuguhese dẽrapáidode cucha mu déji kílo udore yúode, enga ore chãra dojode ayoré ome, uje chiese upúsu mu taque ore. Mu Pangarádejnai que chise cuchade guẽrasórone ayoré ore unerotiguérique uje ore chuguhese dojode ayoré gaite oredie, ga jé upúsu.

² Ujetiga dicotárechoquí ayorérique ga urasade ore chietáyime uté gosi. Jé basa ga pajnotaque ayorérique ga urasade ore chicotame úringai áyipierãque.

³ Ayoré parágode ore ipararinguei cho quique pate arégode quigode ome ore. Jé basa ga ayoré aringácachoquíode ore aringaquéode chajni ore gáyode ga socárome ore iji udore quigade enga chejnápise ore.

⁴ Ujetiga ayoré ugúcha dipeséode ore déji Dupade iquei to jne enga a ore pota tẽra jóroga aja Dupade jne jeta chiqueta ore, mu a chojningame ore: "Que cuchárique tṍraji uacagúchade udore ome yu. Bapatíojane u bagúchade udore aja yujuyaquei." Jé basa ga ayoré ate arégode ore ipararinguei u uje chãraque Dupade ujuyaquei yui tome ore.

⁵ Cho ujetiga ayoré ate arégode ore ipararinguei ipesute dajeque ueratíguiji ore iquéode ujetiga ore chajna dajec omi tuté iji jnumone gatuaque. Jé basa ga ayoré sijnángone ore ajnai dajeque chucuase ore ¡paque! uje cuchade piéjna enga que ore chisa gatériguiji. Chamáñaje ore áyipiedie quigode jé u dajnai tuté dajeque noñátique quigode to gu.

⁶ Ayoré parágode cho jetiga ore ipararinguei tu ujetiga chijnime ore iji ore gajnenie pujuré jmainie. Jé basa jnani tãrarachugode ore itãrarachúringai u uje chigaru ore aja ñane ga que pejñuque ore iji ñane.

⁷ Ujetiga ayoré ate gajnarétique torási ga patĩ́ora dagúcha dipeséode jé aja dáyipie noñánguenie uje angurenone u dagúchade udore nanique gu. Jé aja uje chicota re uje pésu dáyipiedie iji dajei ome cuchade jnese.

⁸ Ujetiga ayoré ate arétique basirásaja pujuréraque ajénique, mu Dupade chijnime uté iji pujuredie ajei, ga doi ayoré sijnátique ga tṍraja pujuredie udire ajei ga jnani sijnai uté cho dajnenguíji pujuredie udire.

⁹ Mu ujetiga jnani sijnátique dirásiji darásarigo ore gari ga chenocare ome darasade ga pijnani que chacho dara ga socárome darasade ore ome daru noñángone ga chimate ore aja jnumi ome daru noñángone udore. Jé basa ga jnani parátique irajatigai u uje cho jetiga chiqueta ore urasade ore gu uje uté cho parágome darasade ore gatuaque gu.

¹⁰ Ujetiga ayoré parátique dérasi uté to ga urasade ore chojningame ñane: "Jé tiógara uje gajnéone cucha omone tṍraji dajñarenie ome uté. Paraque gu." Jé basa ga sijnátique jetiga toi ga ore irasique re ome uté uje toi ga ore chojninga: "Jé tiógarapísa uje toi gu uje sijnaque."

¹¹ Cho ujetiga jnani ate arégode udore ore acacarãte darasade ore ome dáyipiedie quigode, ga ore pésu dedai ueratigai. Jé basa jnani sijnángone ore chacacãre ore to ome daru noñángone ga pésu darasade isoca noñángone iji ore idai, enga cho jetiga ore idai ueratigai íjnoque gu udore ore uru noñángone.

¹² Táyipiegode u uje que ore cha chogota dojórique ayoré atique ome uté gosi. Jé basa áyipierãi u gosi jetiga jé ca chedo dojórique ayoré ome atique.

¹³ Jubérade u udore uje que darárique chicáji ore ejórique ome dáringane jubéraque. Mu darájmane udore ore cho paráguiji dayaridode ome dáringane ayoré darájma.

¹⁴ Ujetiga ca dacasutéraque cuse iji punínique ga que pajegaite ore iji ore uniri tuté ome dapesudedie pujurei. Mu ujetiga dacasutérigui déji puniri uté enga jogadi tu uje ujnomerãque ore ome date ueradode iji ore idai. Chamáñaje ore asutedie jiei gu uje ore cho ore quique ome pate arégode gatuaque gu.

¹⁵ Ujetiga ayoré dírique dirase ga jĩraque chutai dajnose carutíguiji uaque gosi, mu que pirajaque uté gosi ga chojninga: "Quene yĩri iji uaque to a. Ujetiga ajuécho ga yagábu uaque uñeque potique cucha to, enga a yimate uaque gosi dirome." Mu ca uaque gosi chojningame dajõrárique: "Que yiraja uté mu asi ome uje chutai yógome." Mu jé ca barúo udore ome uté gosi, jé soca pujuredie chise ua ome baruode ome uté gosi aringaquéode jne, uje jno enga que chimate dataidode cucha oredie gotique. Ujetiga bajegaidi tu ujetiga jé ca pĩcaraque ua ome cuchárique ga angaripísi yuruode quigode udojo.

¹⁶ Chequé paráguedie ore gajnei tu uje ore urasade chisi ore gáyode ome ore icaniratiguéode, ore úringanie paráguei rĩ. Jé basa chequé chérecherédie ore gajnei tu pajegátigai ome re. Jé upome jnani ducutáquechoquíode ore to rĩ, uje que ore chimo cucháringome re. Jé basa ga jnani isagocade ore gajneque dagúcha dipeséode.

¹⁷ Osongacade uje ore chosõre dojode ayoré ga ore ujode ayoré jé chirate ore, ga ore chosõre ore to. Jé basa ga ayoré josipíerane uje ore dosója dejode, ga a jé ore gajneque dajnéone cucha dacate gajnarécho udore jnese jne ome raque.

¹⁸ Ayoré ate gajnarétique áyipieraque a déji cucha orerã́tique to ome re mu tṍra rome uje cucha dacate gajnarénguipísi chise ga áyipie gaidi jóroque cucha omone to, mu cachi ajéo. Jé basa ga ayoré ate arégode chedu dáyipie omenie ome darasade, enga ũrepise ome dojningane cucha jnese. Enga uté chuningame eti Dupade tẽrame cucha dacate orerã́tique.

¹⁹ Ujetiga gosi ucuegode u pisoca arégode ujetiga doi ga gosi chucué aja dajesúode mu chise pucuecaringuei iji te ome re. Jé basa gosi ujetiga ucuegode u pate gajnaréngone ujetiga doi enga gosi chise pitoringai iji to ome re.

²⁰ Pangarádejnai chiraja yocáyipie gajnarénguenie iji yoque ga chujãpise udore ore uje ore áyipiedie chejna raja cucha gajnaréngone úringane pipesucho gatuaque. Jé basa ga que chise gosi unerotiguérique uje chañurupúsu dadode, dáyipiedie ore guio gatuac.

²¹ Jé ũrepise yu uje a pujuyagaite jnani sijnángone udore dirome iji dirode uñeque. Jé basa ga jnani uréone udore ore, ga a ore ecáji deréjna pitade jnese jne, enga a ca ore chimo dáringárique pujuya to.

²² Ujetiga chequé omejnáraque dérasi ga aparagate dadode, e mu adode a gajnaréchoráse ga gajnua tu yãcoré quedéjna uje ore chijnire ujunai te, ga ore chanire ujúni cucha aja úna. Ujetiga yãcoré quedéjna cho daparagádu udore to mu jé ate dadi uje yãcoré quedéjna gu.

²³ Jnani ate arégode que cucha noñátique déji ore áyipie quitique ome dáyipie gaidode cucha. Mu jnani sijnángone ore áyipie gaidi tu ujetiga ore chijnime pájningárique.

²⁴ Ujetiga caniraque gosi ga caniranguipise gosi ome dojode ayoré enga que jnari cuchade ome re; mu quigade ga ujode ayoré chosṍrapo uté to rĩ ga ugúchade jiépisi iji dosongaquéode udore quigade. Jé basa ga jurétaque gosi ga que juéga cuchárique ome dojórique ayoré enga uté gosi jmáta ga jé jmátapís.

²⁵ Dupade chatapísaja ayoré canirane ore ome icaniratiguéode, enga chatire ore icaniratiguéode ore gáyode rĩ.

²⁶ Ujetiga ayorérique acatígo cucha dérasi ga ujode ayoré ore chutai jeta ore doi oredie ome, mu acangóri chetaque ga ore cho darúja uté ome daru gajnaréngone. Jé basa ga ayorérique a juéga dacade ome dojode ayoré jeta ore doi oredie ga ujode ayoré ore uruode ueracho ome uté uje juéga ome ore gu.

²⁷ Ujetiga bagaidode u pate arégode enga bojode ayoré ore chimo badode ga que ore chise banerotiguei. Jé basa ga a bagaidode u pate gajnaréngone ga bojode ayoré ore chetaque ua to ome basocade udojo, enga jé soca ore socárome ua to jne a.

²⁸ Ujetiga ayoré ugúcharã́tique chojningárasa: "A ca yitoi jne gu uje yugúchade jiépisi," mu ugúchade a chinguírarása pibetaringuei aja gosi ga e betája gu uje angurenone u dagúcha dipeséode, ga cho pore acãraque basutique uje jĩraque toi. Jé basa ga ayoré parátique uje angureni u Dupade ome re, uté gosi gajnui tu pore ujniéraque uje suéji poria pajei enga ijõre iji, ga jé cho pore gotóraque to.

²⁹ Ujetiga ca ayorérique chácariji daguíjnarique ejórique, ga que pésu cucháriguiji, ga que chajirápo datique ore yúrique rĩ, enga a chisírase dínique ga uté chojninga: "E yibágui yiguíjna casica." Mu di mu que iguíjna casica ujñapec uje que chácariji ejórique gu. Jé adi tu ome ayoré turuturéode ga que ayorérique doi ayoré turuturérique iroquérique uje turuturé ga que chise dáringárique pirósõre. Jé basa ga ujetiga turuturéode pota cucha pisatique doi ga cho darósõri iji ayoré áyipierã́tic.

³⁰ Uje ayoré ate arégode ore chacate dojode ayoréo enga cho ujetiga ore chṹra cucha a taja dojode ayoré ga ore tagu ga cho jetiga ore poté tuaté imanique ore aja pucuecaringuei. Enga uté gosi ujetiga pésu Dupade uruode unéningai ome dojode ayoréo enga áyipierãi tu uté gosi.

³¹ Dupade a tẽrápisaja ayoré uréone ore ome dẽrapáidode cucha jé iji erámi tudé jne. Jé basa ga tẽrája ayoré ate gajnaréngone ore to, mu a doi datéringane ome ore jne ujetiga cucha dacatique tṍraji ore iji erámi tudé jne.