Provérbios 10 - Dupade Uruode

Salomón chuga dáyipiedie quigode udojo aja ñane nanique ga jogadi chojmára, enga isocai jé u udé aja ajesui tuté

¹ Salomón uyu uje yarecujaidie quigode u udojo: Uje gosi atique áyipierãque ga qui tu uje guẽrate pirasitigai ome dayé uté; mu ujetiga gosi atique táyipieque ga pésupúsu daté jnusiétigadatéi iji uté adode jmainie.

² Ujetiga gosi ugúcharángome doriquéode, daringaquéode ore, mu a ca gosi cho dagúcha iji doridode udore uje que chiqueta gosi gu uje que cuchárique tṍraji ome gosi. Mu ujetiga ũrepise gosi ome cuchade enga cho jetiga uru uréone udore charángome pitoringai.

³ Pangarádejnai que juéga jnani uréone ome chaguhei urõsórique. Jé basa ga ayoré ate gajnaréngone ore ga ore tṍrai dedo tome chagúi mu Dupade que juéga pusubudéringai ome udore ore.

⁴ Ujetiga que gosi nunaji cucha pisatique enga que chijnime dagúcharique ãrírique. Jé basa ga ujetiga gosi ujuyápise cucha pisagode ga gosi ujuya dagúchade to.

⁵ Isagocade ore u uje chise siqueré te ga ore na dacade cucha iji. Jé basa ga ducutáquechoquíode ore gajnei tu jetiga ore moji damochádode enga que ore áyipieraque déji dãrátique cucha to. Enga pajegátigai jogadi u ome ducutáquechoquíode ore dayode gu uje que ore abode chisa cuchárique.

⁶ Jnani uréone udore ore gajneque cucha arégode jnese uje ueracho ga gajnui tu ducayo pibírique ome ore. Mu jnani sijnángone, ore pógu dasijnaringuéone ome daru ueradode, mu quigade u uje ore isijnaringuéone tocade ome dojórigo ayoré.

⁷ Ujetiga jnani ũrei torási ga que pamurañaque uté ipararinguei casica iji quigade. Jé basa ga ayoré sijnátique a torási to mu que páyipie gaite uté uje que ayorérique chiraja dáyipie gaitique cucha iji.

⁸ Uje irajataque gosi enga a ujórique ayoré chiroguirásaja cucha ponáyone jnese ga que chó uñeque gánique. Jé basa ga turuturé gosi ga chedu daru bisidégode ome cuchade enga chachia re iji dagaidode cucha bisidécho jnese.

⁹ Ayoré uréone ore susípise dadode guio ga a jé ca cuchárique chósi tiji ore jne. Ayoré ate gajnaréngone udore ore u uje cho ujetiga ore ate gajnaréngone igarique udore ore enga a chuchẽri ore úringane ate gajnarécho aja guesi jne.

¹⁰ Cucha dacate gajnaréngone tṍraji aringácachoquíode ore aringaquéode. Que gusu ome ore ujode ayoréo, mu jé u to ome ore. Jé chopome jutaréquechoquíode, uje ore ujutarétigade a chinguíra udore ore aja jnumi jnese to.

¹¹ Jecucha ga yagutíyangome jnani ate arégode udore uru quigode uje tṍraji ore pijnani, uje ore uruode udore chopise yotique uje tṍraji sibíjnai ga yójigo ga yiquecágo ome. Mu jnani sijnángone ore ga ore pógu dasijnaringuéone ome daru ueradode, mu quigade u uje ore isijnaringuéone tocade ome dojórigo ayoré.

¹² Petétigade u uje chiborátaja pocaningane ome ñane. Jé basa ujetiga pijnoraquei déji gosi enga uté gosi chicadígui dojode ayoré ore adode jnese ome re.

¹³ Uje irajataque gosi ga payuquetotiguei tṍraji uté gosi pijnani. Mu turuturéode udore jé tiógarapísa ujetiga paquesuque ore údode.

¹⁴ Mu ujetiga irajataque gosi marínga, jé ca cha chucué pirajatigai ome re gatuaque, enga irajatade udore ore susípise daruode guio ome dojode ayoréo. Jé basa ga jutaréquechoquíode ore cho dajutareque gatuaque ga jé ore ipesute jeta ore dosóñime dojode ayoré. Mu ore uru bisidégode udore a chajni ore gai jne enga chinguíra ore aja jnumi.

¹⁵ Jnani ugúcharã́i tuté gosi u uje cho dõráchatiguiji dagúchade ome darosadode. Jé basa ayoré jmatai uté que õráchatique cuse gu uje ijmátaringuéi nája jnumi.

¹⁶ A Dupade cho oré jnani ate ujñapetade jne ga guerani tu pucuecaringué eyúgojmai ome ore. Mu jnani sijnángone a jé ore gajnéone u date gajnaréngone jnese jne.

¹⁷ Uje gosi tangári paquĩraquéode enga gosi chicáji dajeque pucuecaringuei gaisṍri. Jé basa ga gosi chetaque paquĩraquéode ga gosi qui u dajei uje chicáji pitoringai.

¹⁸ Urupatáquechoquíode u uje ore pógu detétigade iji dajei ome dajorane ga ore doi daru omone ga cho jetiga ũré ore, mu taque ore. Enga áyipie eyuque jutaréquechoquíode udore ome dajnimingone dojode ayoré adode.

¹⁹ Uje chérecheré gosi ga que gosi basíji sumájningárique, pipojnaquérique ore yúrique. Mu ujetiga gosi ca tṍra daruode aja guesi ome cuchade ga áyipierãi tu uté gosi.

²⁰ Jnani uréone ore uruode chopise pláta nanganatágueraque ome dáringa ueradé. Jé basa ga jnani ate gajnaréngone ore áyipie, que cuchárique tõrapísiji gotique.

²¹ Jnani ate arégode jecucha ga ore chacate dojode ayoré, uje irajataque ore gu. Jé basa turuturéode que ore irajatigárique cuse enga ore toi dáringai turuturé údi bisideque.

²² Uje Pangarádejnai chacacãre gosi ga que cucha gajnarétique chimera amangaquéode ome uté. Enga cucha ueradipise Dupade amangaquéode udore cucha ome gosi enga sué ugucharane ore ugúcha dipeséode gáyode jnese.

²³ Táyipiegode ore irasiguipise raque ome dasijnaringuéone jnese. Jé basa ga irajatade ore irasique rome cucha arégode úringane pipesucho jnese.

²⁴ Jnani sijnángone u uje iyieja jóroque yui jetiga cuchárique chósi ti ore, mu jé ore gajneque narañímeone cucha udore jnese. Mu unere cuchárigo yui tome jnani ate arégode udore ore ga jé ore gajneque cuchade udore.

²⁵ Úyujnamia uje chijnirósi jnumi taja dajesui ga tṍraji jnani sijnai tuté enga chubúchuja dajesui ga que chisa dejóringome ga cachodi jé u uté. Jé basa ga jnani ate arétique jé ecáji deréjnane gatuaque.

²⁶ Ayoré ducutáquechoquírique ujetiga irósõri chirógui jórogaja cuchárique mu que chaguitome, jé chopise cucha sujnátique ome darósõri uje chacája patarane. Chopome pioque úyujnaraque rĩ jetiga chajni edodie. Uje narañípisome daroque ducutáquechoquí tuté gu.

²⁷ Ujetiga gosi chopise dangarádejnai iji Pangarádejnai enga gosi ucuecaringuei chajnera dádi. Mu Pangarádejnai a chibéro ayoré sijnátique ucuecaringuei jne iji erámi tudé.

²⁸ Jnani ate arégode udore ore u uje uneripise ore iqueminórone cucha yui ome ore. Jé basa iyiejapise ayoré ate gajnaréngone udore ore iqueminórone cucha yui ome ore.

²⁹ Jnani ate ujñapetade udore ore irotasṍri tu Pangarádejnai. Jé basa ga ayoré ate gajnaréngone udore ore guejnasṍri tu uté.

³⁰ Jnani gajnaréngone a jé ca ore cho daniri iji erámone udé gatuaque to jne. Jé basa jnani uréone a ore ecáji erámi tudé gatuaque jne.

³¹ Jnani ate arégode udore u uje ore chajnerame payuquetotiguei údi ga tṍraji ore pijnani gatuaque. Mu jnani sijnángone udore a ca ore chajnerápome daru noñángone údi jne rĩ uje Pangarádejnai a chãraque darai tome ore jne enga a cho ujetiga paquesuque ore arei to jne.

³² Jnani uréone udore ore u uje ore chedu dara omone iji dajéode, jé basa ga jnani sijnángone udore ore u uje que ore chiraja daru ũrénique ome darapatáringane, ome daringaquéode, ome detétigade ore.