Provérbios 1 - Dupade Uruode

Que Salomón churúsãre darecujaidie udire bisideque, mu gaidi u payuquetotiguei ome ajirisórone uyoque gu

¹ Salomón uyu enga yarecujaidie quigode u udojo ome yurasade. Uje yai u israélgosode eduguéjna cuchábi David nanique. Enga jé yo yai to ga eduguéjna yu to ome yurasade israélgose ore.

² Yipésu yarecujaidie udire gu ujetiga payuquetotiguei déji yurasade ore to. Yigaidi tupo rĩ ujetiga yarecujaidie udire cho quique cuchade to ome yurasade ore. Yipota jeta yátaja yurasade ome pacajnaqué obiréjnane uje que piraque ga ore chachietáji quigode to.

³ Yurúsãre udojo gu ujetiga yurasade chajire enga irajataque ore to ome cuchade, enga upo rĩ ujetiga ca paringaquérique déji ore ajénique ome ore ujórigo ayoréo, jé upo rĩ ujetiga ũrépise gosi ome daruode quigode.

⁴ Enga yáyipie jogadípise jnacarode ore to ujetiga ore chajire yarecujaidie udire enga áyipierãque ore to uje cáma ore chijnime payuquetotiguérique ãrírique gu. Enga a quene ore chiraja dasoca arégode to ome yurusarane udojo to jeta ore chajire quigode.

⁵ Ujetiga irajataque gosi enga áyipierãque gosi te rĩ, enga a gosi tangári yarecujaidie quigode jne. Enga irajatigai a chajnerame re jne, jé aja date arégode ore. Enga jé u jne ujetiga chise dáringárique áyipieranguipíse.

⁶ Enga a ore chiraja parecujátigui quitígo jne ujetiga ore chajire yurusarane udojo. A ore chirajápo pacajnaquéode gajnúringo cucha jne rĩ, jé aja pacajnaqué ibirade jnese.

⁷ Pirajatigai quene chise ayorérique uje angoninguite guesaque ayorei uté gosi ome Pangarádejnai Dupade. Mu táyipieque udore ore jnese uje ore chetaque dáringáringo pacadique, enga ore cho cucha bisidéguiji áyipierane ore uru quigode.

Yarecujaidie udire gajnesórone u jnacarode uaque

⁸ Yababode uaque á, ujetiga bayé cho baquique ome cuchade enga angári bayé ojningane udore. Jé cho baté acajnaquéode ome ua, jé ca acháji siñéngome ua to.

⁹ Chamáñaje bayé, baté ore acajnaquéode udore gajnúone u pujnápeode uje badíja betabi, jé aja ducayórique uje bacája ga nanganatáji benochai.

¹⁰ Yabi á, ujetiga cucha gajnaréngone ipesusórone ore chãra ua enga ore chojninga: "Uerate erámone jogosórone cucha" marínga, ca amíninga ore icotade udore cucha ome ua.

¹¹ Jé soca ore chojningame ua ya: "¡Boji te ga yico ga yoco yocujuñame ayorérique bisideque jne! Unere yui gu ujetiga yiroco ayoré tuté iquei ga yisago ga yujégo jne.

¹² A yocajnua tu ducóderaque jne uje chinire ayoré totique gánique uje a yimáco uté aja jnumi to ga cachodi jé u uje topísi uté gosi.

¹³ A yoriago yoquigode udore ore ugúchade to enga a yĩretágo yoquiguíjnane ajéode ome yocorigode ore ugúcha."

¹⁴ A ore dejéna ua ja daquigade enga a ore chojningame ua jne: "Boji te ga ajína yoque to ga yoriago ga yátago yocoritígo cucha aja ñane jne ga yamátago enga a chajni ne iji jnumi."

¹⁵ Mu yababi á, ¡jé ca ajína udore ore to jne! ¡Etaque udore ore isocade ga angara baquitígome udore ore isocade udore!

¹⁶ Uje que ore cho dajñare ome dapesutique cucha gajnareque, jé aja uje que ore cho dajnimitique diquiyo uja to go.

¹⁷ Que togome gosi ujetiga pésu dajuyaquérique ome chugúperone ujetiga pota chisa, mu chugúperone chiraja pujuyaquei tuté ga que ore chacája gotique, mu ore chicai quedéjnane ome. Ga jé adi tome jnacare jõcaratáguebéode, oriechoquíode ore uje que ayorérique doi ga chicha dajuya aja ore iquénique ga ore ujuya chisa uñeque. Chamáñaje ore chajire dejode ga que pujuyáraque chisa udore uñeque.

¹⁸ U mu udore ore pésu ome dojode ayoréo dajuyadie, mu jé ore gajné dajuyadie udire to ujeta ore basája dajuyadie udire iji dirode uñeque to dirome.

¹⁹ Ujetiga gosi ca áyipieraque jnoji cucha poriquérique ome re ga uté gosi áyipie gaidode doriqué chimánaja jnumi.

Cho jetiga ayoré payuquetotiguei enga tẽra rome ayoré angoninguite gueságode ore

²⁰ Payuquetotiguei que cho dajeque pajei uje tibidi yógome dabijnane.

²¹ Tibidi ayorébujnane ore jnese uje ore diguiji guidai údode, jé aja udore ore to uje ore chacája guidai jeoga ore doi guesi iji guidai iji guidai ujuyaquéode piagode.

²² Enga chojninga: "Jnacare boquerade uaque á, que eso payuquetotiguei unétique ga uacajnórañopise uacaboqueréringane udore ome cuchade jnese. Jé chopo táyipiegode uaque to rĩ. Cachi uacaboyo uacáringane táyipieque údi gatuaque enga que uacáyipieraque dépisiji pirajatigai ome uaque.

²³ Beyoi enga angachopísi yu uje yo uacaquique ome cucha dacadode. Enga a páyuquetotiguédatérique déji uaque jne. A yujuéga ome uaque jne ujetiga arajáyo yáyipiedie quigode jnese.

²⁴ Uje e yibididique uaque, enga yidejéna uágaja yi, mu que eso yunétique jeta abáchoi yu.

²⁵ Mu uaquetácho uje yo quique cuchade ome uaque. Yo quigode uaque ujetiga ca eso uacate gajnaréngone unétique rĩ, mu que angáchoi yuruode gotique.

²⁶ Jecute ujetiga ore chinguíra dipótigaja uaque jne enga a yingana uacabáyode jne, adi jé u uje uacanganáño yibai diríca gu. Ujetiga uacajnéone pujuyaquéo péro uacabánique jne enga a atãraráñoji jmainie jne enga jogadi a u jetiga yingana uacabáyode iji uacatãrarachúringáne udore.

²⁷ A pujuredie socárome uaque jne ga gajnui a u guetṍratique jne uje chucuase cuchade iji daquéode. Ga a jé u jne ujetiga ca uacanínique cusapo iji udore jmainie jne rĩ. Mu a jé isoca dasocade udore ome uaque jne ujetiga yingana uacabáyode."

²⁸ Payuquetotiguei qué jnopo daruode údi rĩ ome ore ga chojninga: "A agúsoji uacajnenie pujuré jmainie marínga, a abichoi jórogui yu jne mu a jé yate jne ujetiga jé ca yosõre uágome payuquetotiguérique. A acueyo jórogui yu iji erámi údode jnese jne marínga, a jé ca esópo yu jne rĩ.

²⁹ Chamáñaje uacadojnóchoja payuquetotiguei diríca ga que apótayo jetiga ajuécho uágome Pangarádejnai Dupade to diríca.

³⁰ Que eso yarecujaidie unétique gu ome uaque. Uje yaquĩ́ra jóroque uágome uacate gajnaréngone jóroque ica mu que angáchoi yu gotique.

³¹ A ejnárecho uaque jne enga gose uacangoninguite paritigade udore jne ome cuchade jnese. Uacate gajnaréngone gajnúone u uacabosode cucha pibose unéningome uaque. Mu quigade ga uaquejnárecho jóroque uágome uacaca cusuguedie udire jne.

³² Ujetiga gosi agúpurangóme cuchade jnese, mu gosi chetaque eti ujórique ayoré cho quique ome cucha agúpuraníque, mu a gosi chuninarásome eti gosi toi ome dojningárique cucha uje chiese chiraja mu cachi gosi urúo. Adi jé upome ayoré turuturéode ore rĩ uje ore uturuturéringane chequésãre ore to.

³³ Mu uté gosi uje tangári payuquetotiguei uyu enga a uté gosi u jne ujetiga pajesereringai jogadípise uté gosi jne iji deréjnane jnese. Enga a uté gosi ca tãrarápome dasadodéringane gajnetique cucha jne rĩ, uje chiraja gu uje chañuru deo ome darosobádode cucha."