Números 27 - Dupade Uruode

Dupade ajegaidi u Josué nanique ujetiga chácariji Moisés charidi to

¹² Ga Yocangarádejnai Dupade catecã́ri Moisés nanique ga chojningame: –Be ga oru cucarani to uje i tu Abarim. Yigaidi tu gu jeta ajire yojningai punire ueradéjnai iji quedéjnai, uje choquípisiji guesi iji cucarani ójo to. Enga yojningai tuté u uje e yisi ome israélgosode ore to ujetiga ore cho dajnéngu to jne.–

¹³ Mu Dupade chojninga: –Gusu bedominone ome to jne jeta ajire iji quedéjnai to. A udojo quigade jne enga a atopísi to jne. Enga a ajna bayode jnani bajácho ore aja jnaropié to jne, jé aja batigate Aarón to rĩ.

¹⁴ Enga yãraque yojningai punire ueradéjna ome Aarón, uaque gu uje que beyoi yuruode ica gu uje uacagúsoji erãpetarei to ica uje i tu Zin. Uacagúsoji uacajminémei Cádes ica uje barasade ore pésupúsu yujuredie to ica uje chiese ore toi ome dayádode to ica. Enga yojningame ua: 'Acatecã́ri cucarané jeta yodi tṍraji to ome baruode.' Mu que be yuruode to ica enga bajé cucarané to. Enga que ore chajirape yadode to ica uje yipésurásu baruode to ujetiga yodi tṍraji cucarané ome baruode to. Ga a ore jos eti bajnimique yodi ome bogué ica. Ga cho jetiga apógu yingoningájnai ome ore to ica. Jecute uacapéso yote uoi i ica ga i tu Meríba ome uaque uje uruode qui tu 'Pajei Dotáningane Ijnimi Yote.'–

^15-17 Ga Moisés chajnai Dupade uruode ga chojningame: –Yangaráni á, yirajapise uje yocucuecaringuei gãrapi tu Dupa Eyúgojmai uhua to jnese. Jetiga bajéo ga ajnime yucuecaringuei tiji yu to. Mu ca ajuéga jeta yurasade ore chiqueta raja jnumi tiji yiquigade to. Apésu ore angarátique to iji yiquigáningo. Ga a uté basája ore iquéode to jne ga jno ore údi aja bojningai punire ueradéjnai to. Uje ore gajnunie u áyasadie gu ga gajnareque jeta ca ore irodingónique cuse ujetiga chijñaque ore uje ore chicáji dajesúode erámio to.–

¹⁸ Enga jé u uje Dupade chajnai Moisés uruode to enga chojninga: –U arĩ́e, ũrepise ua to. Yajegaidi tu Josué to ujetiga chácariji bayaridi to jne. Yojningai tu jnani bajai Nun ujnacari uté. Áyipieranguipíse Josué gu. Enga be ga asa gatoi ga ajo aja jnumi ga acatecã́ri uyu ome to, ga jé u jne jeta pijoque úringai yajegaite to.–

¹⁹ Ga Dupade chojninga: –Ga bo uté údi aja Aarón casica ujnacari Eleazar uje uté catecãraite yu ome darasade to. Enga abichoi uacarasade ore jnese to jne, enga ango Josué aja ore to jne enga a ore chiraja jne uje yajegaidi u uté to ome yiroquéode to.

²⁰ Enga jĩraque Josué cháta raja ua ome bajnéone yiroquéo to. Yigaidi u gu ujetiga barasade chimo imenuringuei to uje qué aqueca, ga jogadi u jne ujetiga ore tangári to iji baquigade.

²¹ Enga angome Josué ujetiga chucué yáyipiedie quigode gatuaque to ome darasade ore enga quene chiroque ore aja cuchade uje chirajapise uje yajegaicho cuchade udore gu. Ga jé basa enga urasade israélgose ore dopísi uté ojningane cucha to. A Josué chingo raja yiroi Eleazar ome cuchade, ga jé basa ga Eleazar a catecã́ri yu bajaque ome cuchade enga ajiri a urásu daríjogoto cucarané uje uaté i tu Urim. Enga jé u jeta chajire cucarané uaté enga chiraja yipotigádode cucha, enga a uté u jne jeta jé basa chingome quitígo ome Josué to. Jé basa ga a Josué u jne jeta chingopísa yuruode ome darasade israélgose ore. Jé basa ga a ore tangaripísi uté gaté to jne.–

²² Ga Moisés dopísi Dupade uruode to ga jno Josué údi aja ojningai tuté ore angaráni Eleazar. Enga jnopo údi aja israélgosode ore jnese rĩ ga chojningame ore: 'Cajicho to, a uacangaráni u uté jne iji yiquigáningo to.'

²³ Moisés pésupúsu Dupade ojningane cucha quigode jnese, ga doi ga chisa Josué gatoi ga chanire aseque puyai aja ujetiga pijóguipísome úringai Dupade iroque iji Moisés quigade. Ga Moisés chojninga: "Yajnéone cucha e bajnecho jnese to jetiga ajnerame jne ome yocurasade ore to, ga a ore agutíyabádi u ua jne iji yiquigáningo to."