Números 24 - Dupade Uruode

¹ Balaam narare iji dajei ga chojningame re: "A jé ca yicatecãrirási Dupade to, mu jé chisirásome yuru omone ome yu to ome israélgosode ore gajnetígo yurúo to." Jecute Balaam que dopoi dasocabei to rĩ. Que chicáji sañeque ome dacatecãraitigárique. Ga chajire israélgosode iji dádi iji erãpetarei ajei.

² Ga Balaam chajire israélgosode ga chimo ore uáguedie uje ore cãra dajogadode ome ñane to. Enga áyipie qué déji ore uje chajire ore to mu Dupade Ujopié chojne raja gai to ga cho jeta chijnare raja pijnani ajei to.

³ Ga Balaam chojningame daruode: "Balaam uyu to ga yãrapi tu Beor to nanique. E yĩrarare ga yatata yajirigode cucha ome uaque. Chamáñaje que cucha ibiratique cus ome yu gu ujetiga ca yiraja quitique.

⁴ Yo jnipe iji ujade ga cuchade choqui guesode ome yu to. Ga Dupa Pujnuéngaisṍri chisi ome yedominone ome yu to iji ujade. Yudute uté uruode to iji ujade ga uté u uje ipesute yuruode uje tṍraji yibijnani ome ore, uhuaque to.

⁵ Yuruode gajnengórone u israélgosode uje yojninga: '¡Israélgosode á, jnani bajai Jacob ájnape disi ejode uaque á, uacajneque cutejmane yicotaquéo udojo á, uje ueradéjnapise uacadode jnese á, jé aja uacaguíjna borapeque dañóraque, uacarengu ore to á!

⁶ Uacarengúone gajnúone u ijnaque quedéjnanie atetade to ome dáringane ueradéjna. Enga ore gajnunie upo corã́cabidie iji tiedie edúdode to é. Enga cho jetiga Dupápisi jutícape uaque to iji uacayaridode to uje ueradípise uacayaridode udore. Enga uacaguíjnane chopise poridie to uje ore íode u cédro uje ore déji tié ejode ga tiroguipise abubíedie to ga ueradípise ome yoquedominone uje yajico ingoningájnai to. Jé aja poridie to uje ueradei ga ore íode u áloe.

⁷ Israélgosode a ore jopitique yote a ca íjnoque to, enga a déji jeta ore chóji yodode to. Mu guéode dépoji ore to rĩ uje jecucha chuta ore acade cucha to. Ujnomerãque amaléquegosode ore eduguéjnai Agag, mu israélgosode ore eduguéjna cuchábi a suépise uté gai jne. Enga israélgosode a etoguipise jne ome dojode erámi unirísoño iji ore unirone jnese.

⁸ Dupade chijnime israélgosode iji egíptogosode ore jmainie ome darotáquedatéi nanique, ga uté u uje chirotápise udore ore iji de to. Ga Dupade isocai jé u cuchiso uérãque uje i tu búfalo ga pirosobate uté uedie iquéode ome cutejmai etotigué. Ga Dupade doi to ga tṍra israélgosode ore umajosórone aja quedéjnane to ome detotiguédatéi to. Ga chisi ome petotiguei ome daréngone israélgose to ga ore doi ga ore chejnápise damajosórone ore to. Ga ore gajnúone u cuchiso sijnátique uje chujé darosipéode ga tagu ga chigase ajnoquéode jnámujnamúc, jnámujnamúc, jnámujnamúc. Ga israélgosode ojicarotaguipise ore to, ga ore chichopise dachode cucha ¡jñac-jñac!

⁹ Ore gajnui tu caraté sijnátique jé aja caraté sijnángueraque uje cho dajñare ga que ayorérique doi ga cho jome ore to ga ore tṍra rome ayorérique to. Ga jé ore dóji ti to, ga ca o jome ore to. ¡Israélgosode uaque á, ujetiga gosi cho darúja uaque ome daru omone to ga a jé chajniápo gosi gai to jne rĩ é! ¡Ga jé chopome ujetiga gosi chopo darúja ua ome daru gajnaréngone to mu a gosi uru gajnaréngone chajniápo gosi gai to jne rĩ á!"

Balaam e chajnírase aja daniri mu chatata denominone cucha ome Balac ore bajaque

¹⁰ Mu uje Balac chudute Balaam icotaquéode ome israélgosode ga chãrai dajmanocórodie iji gaté ga tãrara jmanegataidie ga chojninga: –¡Aya Balaam! Uje yibidi ua gu jetiga o barúja yocumajosórone to ujeta apésu ore iserẽrachúringáne to. Mu bedu bacotaquéode ome ore enga e gadioque bacotaquéode jogadode ome ore to.

¹¹ Ome uyu ga bo ga ajni to ga ajníja baguíjnai. Ga yingongome ua jeta yẽcója ua diríca, mu bo ga ajni jmete to uje a ca yisipísome cuchárique ome ua to. Chamáñaje bangaráni tupúsu israélgosode ore angaráni dupa gotique gu, ga que apésupúsu yutoquéode gotique.–

^12-13 Balaam chajnai eduguéjnai Balac uruode to ga chojninga: –E yingome barógode diríca ujeta ejna bapláta dipesérigui, jeoga baríjogonóningo cucha jnese, jeoga óro u aja yu to marínga, que togome yu ujetiga ca yiji Dupápisi ojningane cucha to. Enga que togome yu jeta yo yurúja Dupade garéngone ome yuru gajnarétigo to. Uje que yujopiéraque cuse gu ome ore to.

¹⁴ A yajni jne aja yuniri to. Mu angarami yuru chojmarárique to jne enga a yatataba israélgosode ore ipesutique cucha ome moábgosode uaque jne.

¹⁵ Ga e yiji: "Balaam jé u yu darai, ga yãrapi tu yai jnani bajai Beor. E yĩrarare ga yatata yajirigode cucha ome uaque. Chamáñaje que cucha ibiratique cus ome yu gu ujetiga ca yiraja quitique.

¹⁶ Yo jnipe iji ujade ga cuchade choqui guesode ome yu to. Ga cho jetiga yijnaripise yu aja Dupa Pujnuéngaisṍri irajade cucha quigode to. Ga uté chisi ome yedominone ome yu to iji ujade. Yudute uruode to iji ujade ga uté ipesute yuruode uje tṍraji yibijnani ome ore, uhuaque to.

¹⁷ Ga cucha piqueminórone chiqueta raja yu to gajiné iji de to. Ga yimone cucha idájapise ome yu ga quĩrique yimo iji ti. Yimo peduguéjna cuchátique iji ti uje gãrapi a u jnani bajai Jacob ájnape disi ejode israélgoso jne. Ga uté ingoningájnai gajnua tu guédoraque iji gaté. E yimo uje guédo tuaté chijnare raja jnani bajai Moab ájnape disi ejode gatodajnoquéode enga chĩro ore táca, táca to. Mu chijnare raja jnani bajai Set ape disi ejode to ga chajo ore aja jnumi táca, táca.

¹⁸ Ga e jno ga chijnare raja edómgosode ore to, jé aja uté umajosórone seírgoso ore to rĩ ga suépise udore ore gáyode jnese to rĩ. ¡A íjnoque purása quedéjnane udore ore jne, mu jé basa ga israélgosode a ore quérãpise jne ga pirosobate ore jne iji dojode puníño ujade!

¹⁹ Ga uñéngo a chapidirase iji dedánique to ga ore irasique re iji dedai to, mu pujnuéngaisṍri uté uje gãrapi tu jnani bajai Jacob ájnape disi ejode a jĩraque dirásiji ore ga jĩraque chejna ore ¡jaripe! jne."

²⁰ Balaam chimópo amaléquegosode iji denominone to rĩ ga chósi tome ore: "E yimopo amaléquegosode ore uniri to rĩ. Ga yimo uje ore uniri obiréjnapise iji punirone ujade to. Mu e yimo cuchadatériguiji ore ujade ga chejnápise ore ¡jaripe, jaripe! to."

^21-22 Ga Balaam chimópo quinítagosode ore to rĩ iji dedominone, ga ore gajneque uruode to uje chojninga: "Jnani bajai Caín ape disi ejode uaque á, yimo uacacoyapídode que. A quinítagosode uhuaque uacajoso ati ca pirajaque uáguiji uacacoyapídode udore to. Ga uacajnui tu chugúpẽri uje pésu daguíjnai iji cucarãte yorícojnane ójodie to. Mu yimo pioguéjnai uje tṍraji asíriagosode ore uniri ome uacaguíjnai uté uje déji cucarãte umarejnájnai ójo to. A ore chejna uacaguíjnai tuté enga a ore chisa uaque enga a ore jno uacádi jne aja daniri to."

²³ Ga Balaam qué jno datatagode údi ga chojninga: "Yosõripísi jóroque ore yui to jne ujetiga Dupade ujuyaquéode udore qué chise ore ucuecaringuéone to. ¿Ama uñeque chapidirase to a?

²⁴ Enga e yimo cucódatéode uje tṍraji chípregosode ore uniri to. Ga ore quítequigája asíriagosode, hebérgosode ore unirone to. Mu yimo jõcaratade ore uje ore doi jnumone iji cucode to enga ore chejnápise asíriagosode, hebérgosode ore jnese."

²⁵ Enga jé u uje dajnai Balaam, eduguéjnai Balac ore cho jmíti, jmíti ome ñane to. Daijnai chajna dajei taja daniri to ga jé basa ga Balac e chajna dajeque uñai aja dedai to.