Números 22 - Dupade Uruode

Moábgosode ore eduguéjnai Balac tibidi daijnai Balaam ujetiga chacacãre israélgosode ome daru gajnaréngone

¹ Ga israélgosode ore jnopo rĩ ga ore chajuque moábgosode gajnei jnupe pei ga ore chácariji garai iji tiédaté údi uje tié uaté i tu Jordán. Ga ore idáidatéi Jericó dépisi tiógarei to iji yote quedéjnai uéchamitó uña.

² Mu moábgosode ore eduguéjna cuchábi Balac chudute ore ujnomei to uje israélgosode ore chejnápise amorréogosode ore to diríca enga todópisa israélgosode yui to. Enga ore eduguéjnai Balac uté dai i tu Zipor nanique.

³ Ga moábgosode ore catecã́ri ñane ga ore chojninga: "¡Cajichope israélgosode uatigájnane to iji yocuniri ajé casé to é!" Ga ore todópisa ore yúode to.

⁴ Ga jé u uje ore jno ga ore chayója madiángosode ore asutedie ga ore chojningame ore: "¿Ama yoco ringome yoque jne a? Uje israélgosode e ore déji yocuniri ajei to ome dapetígajnai to. A ore gajnua tu aquirájnai uje tagu jnacarai iji darúbuchai ajesúrique to, ga chejnápise, enga ore gajnua tu ga a ore chejnápise moábgosode uyoque jne." Enga moábgosode ore eduguéjnai u Balac iji dirode udojo nanique.

⁵ Enga ore eduguéjnai Balac uté tibidi daijnárique nanique uje i tu Balaam jetiga chacacãre israélgosode ore ome daru gajnaréngone. Ga Balaam uté dai i tu Beor nanique, enga uté déji daniri to nanique uje i tu Amav. Ga ore chucué uté iji idai uje i tu Petor iji yote quedéjnai tiógarei uje i tu Éufrates. Ga Balac chiroque datocaidode aja daijnai Balaam yui ga chojningame ore: "Ujetiga eso daijnai enga ojningame uté: 'Yoqueduguéjna cuchábi Balac tibidi ua to, ga chósi tome ua: Cojñonguemúone tṍraji Egípto diríca ga e ore déji yocuniri pei ome dapetígajnai.

⁶ Jecute yutṍri ua ujetiga bo bu ga abágui yibijnane. Yigaidi u gu jeta o barúja ayorébuode udore iji yocuniri. Bamo uje jiépisi ore ga etoguipise ore rĩ, ga a ore sué yoquibai iji yocuniri to, ga a ca togome yoque jeta yijócãco ore to iji yocuniri. Uje yudute bajnomei gu uje o barúja gosi ga baruode tocade to. Uerate baruode, jeoga gajnarécho, mu yudúco uje ore tocade jnese. Jecute o barúja ayorébuode iji yocuniri enga a ca ore ujñapeque jne ome yoque to, ga yujégo ore enga yijócãcopo ore iji yocuniri to jne rĩ.'"

⁷ Ga Balac uté ayójade u madiángosode ome israélgosode ore nanique. Ga madiángosode, moábgosode ore angaránone ore cháta rágaja ñane ga ore chicáji dajnai yui ga ore chijna daplátadie ome uté to jeta ore chisi ome daplátadie ome ga cho darúja israélgosode ore to. Ga jec u uje ore chingo ore eduguéjnai Balac uruode aja daijnai ga ore chojningame: –Be uté uruode ga ajna iplátadie to jne.–

⁸ Ga jec u uje daijnai narare to ga chojningame ore: –Amóñomíji yiguíjnai ajei to, ga yirocope Pangarádejnai Dupade yui to. Ujetiga jé urúo enga a yi uacarósõri utoquei to jne.– Ga jé u nanique uje Balac utocaidode moji Balaam iguíjnai ajei to.

⁹ Ga Dupade chiqueta raja daijnai Balaam uté to iji dejai uté ga chojningame: –Balaam, ¿babaguiésórone gosode to a?–

¹⁰ Ga Balaam chajnai Dupade uruode to ga chojningame: –Moábgosode ore eduguéjnai Balac utocaidode u udore ore, ga Balac uté dai i tu Zipor nanique.

¹¹ Enga Balac uté chiroque daruode aja yu ga chingome yu uje cojñonguemúrique e chise ore uniri ga e déji ajei to. Enga ore tṍraji Egípto ga jiépisi ore to iji ore uniri ajei. Enga jé u uje Balac chutṍri yu to eti yo yurúja ore ga yisi ome piserẽrachúringai ome ore to, ga ore doi ore ga ore sué ore gai enga chijócãre ore iji daniri.–

¹² Ga Dupade narare ga chojningame daijnai Balaam uté: –Ca ajína eduguéjnai utocaidode ore to jne, enga ca o barúja ayorébui to iji ore uniri ajei. Chamáñaje e yo yurúja ore to ome cucha omone jeta ore gajnecho to.–

¹³ Ga chise dire uñai ga Balaam jĩraque niji iji durasé ga tibágui Balac irógode to ga chojninga: –Boyo ga ajníño to uje a ca yijína uaque to uje Pangarádejnai Dupade charángome yu to jeta yijína uaque to.–

¹⁴ Ga jé u uje Balac irógode chajni jnese to. Ga ore chise darósõri uté ga ore chojningame: –Yingongo baruode aja daijnai Balaam uté to mu que pota batoquei to, ga que nóna yógaja de to.–

¹⁵ Balac qué chutõrápoi uñane gaté rĩ ga dopísi ore angaranipísode iji ore ujade jetiga ore doi utoquei to. Ga ore sué bajade gai uje jiépisi ore to.

¹⁶ Enga ore chise dagaidi daijna ga jĩraque ore catecã́ri to. Ga ore chojningame: –Zipor ujnacari Balac qué chutṍri ua to ga chósi tome ua to: "Balaam, yósi tome ua, ajína yirógode aja de to jne ga yicatecãcoi ñane iji de.

¹⁷ Ango bajegaitígo aja uyu to jne ga yisi ome ua to jne, ga a ca yujuséjo ua to jne jetiga ese yoque to. Jecute be ga o barúja ayorébuode udojo to ga asi ome piserẽrachúringai ome israélgosode udore iji yocuniri ajei to. Jecute yijócha bajei údi ga jĩraque abágui yu to."–

¹⁸ Ga Balaam chajnai uruode to ga chojningame utocaidode ore: –A uacarósõri Balac chejnárase daríjogotórigui daplátai, óroi ore aja yu to, mu a ca yírasi utoquéode to. Uje a ca yipésurásu yipesútedatérigo, jeoga yipesute ajámatique ujetiga jé ca Yangarádejnai Dupade urúo ome yu to.

¹⁹ Mu jé amóñopóji yiguíjnai tudé ajei to rĩ. Ja seca Pangarádejnai Dupa catecã́ri yu iji dejade uñeque jne, ga chécãrirase dáyipiedie to jne ga juégarása doi ome yu to.–

²⁰ Dejai tuté jé u gajiné uje Dupade chiqueta raja Balaam enga catecã́ri to ga chojninga: –Jetiga Balac utocaite ejode udore dejenápo ua jne rĩ enga ajína ore to jne. Mu edu yajegaidode iji ore ujade jne.–

Balaam chicárasiji moábgosode ore uniri mu gaté unirísõri chãraque iquei ome

²¹ Ga direjnipe enga Balaam chobéri dachidi charipíode jeta chujé raja dachidi burica quedéjna. Ga jé u uje nóna moábgosode ore angaránone aja ajesúode to.

²² Ga Balaam iroque gárode ore nóna Balaam ore aja dajei to. Mu Dupade ajei dotãre ome Balaam uje uté nóna moábgosode, enga chiroque datocaidi gaté unirisórone uñai ujetiga chãraque Balaam iquei uje qué jnome daqui tuté.

²³ Enga Balaam oruti burica quedéjna chimo gaté unirísõri uje chãrai asõre iji gaté iji ore iquei to iji ore ajnai dajeque gatócoro to. Ga buricai chimo gaté unirísõri uje chãraque ore iquei ome ore to, ga tṍra dachingóri aja quedéjnane to, ga chicáji uñánenie, uñánenie. Ga Balaam jos eti chetaque iji dabai ga chaquesu dachidi údode ga choré jóroguiji dajei yúode to.

²⁴ Mu Balaam gachidi e ore jnopo rĩ uje Dupade iroi tita iquei ome ore to gu. Mu ore chise ore acadie úvai ga chajna dajei ejode jnese enga dajébi dosi ñane ga ajámape quigábi to ga ore ujuyaquéode chajnási dajébi edúdode to uje ore ujuyaquéode udore pipesucho iji cucaranenie nanique. Mu Dupade iroi gaté unirísõre chiqueta raja ore iquei gaté rĩ.

²⁵ Uje Balaam gachidi chimo Dupade iroi gaté unirísõre iji daquei, enga que chiraja daquitique. Enga chujé raja ore ujuyaquei ga jé u uje quĩrique cṍraja dajei ejábi. Enga chinguíra dachingóri etarúdi aja ore ujuyaquei to iji dajébi edúdi to. Ga jé u uje Balaam chaquesúpise dachidi údode.

²⁶ Enga e ore jnopórase rĩ, mu Dupade iroi gaté unirísõre bajagája ore iquei. Enga chicha raja dajeque pajei ga chãraque ore iquei ome ore. Iji jogadi uté enga dajébi dosipise ñane ga ajámipísape quigábi ga que toguípise ome ore ujetiga ore jnome daquitique to.

²⁷ Ga Balaam gachidi e jnopo rĩ mu chise gaté unirísõri enga chosípise dedodie aja jnumi iji gaté unirísõri ejópisi. Ga cṍra dachisṍri údi ga Balaam moji dachidi gai iji jnumi to. Ga jé u uje Balaam chague ga chisa pítedatéi ga chaquesu dachidi údode ome to, uje ájningarangóme dachidi gu.

²⁸ Enga Yocangarádejnai pésu burica quedéjna ga narare to ga chojningame dachisṍri: –¿Ama yipesutique cucha ome ua to a? Uje e baquesu yúdode ga gadioque iji yocajnai udé dajeque to.–

²⁹ Ga Balaam chojningame dachidi: –Cachi ajñieta yu to uje bacáji uñánenie iji yúdi ome yu to. Mu ujetiga yiquesérique dérasi yijmainie to enga yichagúrasu ua ome ¡paru! to ga a atopísirási to.–

³⁰ Mu burica quedéjna chojninga: –Barajapise yu arĩ́e uje yujnunguémeque ua aja bajesúode erámio to ga barajapise yisocade uje yijnoque ua aja quedéjnane to uje yijnoque ua nanique iji báringai jnacaripise, ga qué yijnoque ua to iji báringai udé jnani to mu que yisoca udojo gotique to enga ejo yisoca uté to ome ua.– Ga Balaam chojninga: –Jé ũrepise ua, arĩ́e. Jecucha ga bacáputají bajesúode to.–

³¹ Ga quene Yocangarádejnai chuchẽre edodie gáyode to, ga quene chimo gaté unirísõri iji uraque daquei to. Ga chimo gaté unirísõri uje chãrai dasõre iji gaté to. Ga Balaam jĩraque chajo raja ñane iji gaté unirísõri iquei to, ga chichagápo dacuruté aja jnumi to rĩ iji iquei uje todópisa to gu.

³² Ga gaté unirísõri e catecã́ri ga chojninga: –Balaam, ¿gotique gu a uje baquesu bachidi burica quedéjna údode ga gadioque que? Uyu u arĩ́e uje yicha yu aja uacaquei que. Yetaguipise gu uje bajína Balac utocaidode ore aja dajei to gu.

³³ Bachidi burica quedéjna chimo yu iji uacaquei ga chicáji quedéjnane ome ua to. Ujetiga bachidi burica quedéjna cáputaji dajesui ga e yujérase ua to que uje yajegaidi tu gu jeta yujé ua ome yasõre. Mu bapite gu bachidi burica quedéjna uje chicáji quedéjnane iji dajei ejode ome ua to. Mu a yujérase ua to que, mu a ca yujérase bachidi burica quedéjna to.–

³⁴ Ga Balaam chajnai gaté unirísõri uruode ga chojninga: –Gajnarenguipise yadode. Chamáñaje que yimo ua gu iji yiquei uje bãraque yiquei ome yu. Jetiga gajnareque yisocade ome ua uje yijína ore eduguéjnai Balac utocaidode to ga a yajni to ga yajni aja yiguíjnai jne.–

³⁵ Mu gaté unirísõri chajnai uruode ga chojninga: –Yujuéga jeta ajína jnanione udore ore to, mu a yipésu baruode jne enga baruode a quigode u yipesutígo barúo quitígo to jne.– Ga jé u uje Balaam jnopo rĩ ga nóna eduguéjna cuchábi Balac utocaidode moábgosode angarácho aja dajei to uje ore chajníja deduguéjnai Balac jogadi to.

Eduguéjna cuchábi Balac chachai Balaam iji garani yui nanique

³⁶ Uje Balac chudute to uje Balaam e déji dajei ga qué chicáji yui enga jno ga chachai iji garani uté. Ga ore tuangóa ñane iji tié edúdi to uje tié tuaté i tu Arnón. Ga ore uniri eruei upúsu uté to.

³⁷ Enga Balac catecã́ri daijnai ga quĩrique pojna ga chojninga: –¿Gotique gu a uje que abágui yibijna bajade to diríca? Uje cachi a o cucha bisidéguiji yu to diríca. ¿Enga cachi badojnóngapója yẽratígo cucha to diríca rĩ a?–

³⁸ Mu Balaam chajnai uruode ga chojninga: –Cachi yiji babijnane to ga bamo yu iji de to. Mu ca ajos eti yo yurúja bojningane ayoré dipeséo to ome yujopié gajnaréngueraque. Gusu yo yurúja ore ome Dupade ojningane cucha ome yu to.–

³⁹ Ga Balaam e nóna dabijnángaisṍri Balac aja dajei to ga ore chicáji ore idai uje i tu Quiriat-huzot.

⁴⁰ Ga ore eduguéjnai Balac chiroque darógode aja dachidode cuchiso ga chojninga: "Ajéyo yachidode dosipécho uñéngo to ga yujode pangarate, Balaam yacásorango ñane to iji yocatigárique to jne. Yojningane u aquirájnane, áyasadie ore ujetiga ajéyo ome yoque jne."

⁴¹ Ga chise dire uñai ga jé u uje eduguéjnai Balac catecã́ri daijnai Balaam enga chojninga: –Bo ga yoco cucarani to jne uje i tu Bamot-baal. Yigaidi tu jeta yugúcoji cucarani ójo to ga yingo yojningane ayoré dipeséo ore aja ua to jne uje ore chojningame ore israélgosode.–