Números 21 - Dupade Uruode

Israélgosode ore sué cananéogosode iji ore idai Hórma nanique

¹ Enga jé u uje israélgosode ore jnopo rĩ ga ore chaquesúrase ore uniri Neguev iji gatócoro to. Mu arádgosode ore eduguéjna cuchábi chudute to uje israélgosode chajna dajei taja ore idai Atarim yui to, ga ore eduguéjnai uté chojninga: "Yico ga yajningaco ore iquei to ga yujégo ore to." Enga ore doi pocaningai ome israélgosode enga ore chisa uñane ga ore jno ore údi to.

² Enga jé u uje israélgosode ore catecã́ri Dupade. Ga ore chojninga: "Ujetiga asi ome yocúringáringo pujnuéngaisóño ome yoque to jne ga a yajnangaráco ore idáyode aja yoquejode to jne."

³ Ga Yocangarádejnai tangári ore enga doi ga nóna ore aja pocaningane to ga ore suépise cananéogosode ore gáyode jnese to iji darosadode. Ga ore chejnápise cananéogosode iji darosadode enga ore chajnangarase ore iguíjnane aja darosadode to iji ore idáyode jnese. Ga ore pésu ore uniri dosadi uté i to ga ore chĩ́care 'Cuchade Ĩrosṍri' aja uté to, uje israélgosode ore pésu jaribei tiji ore iguíjnane iji to gu. Ga i uté u Hórma ome ore uruode to nanique.

Uje ugade equesarane ore chajire Moisés ipesudi uga nanique ga que ore toi to

^4-5 Israélgosode ore chajniapója daquigade to rĩ ga ore jnoji cucarani uté uje i tu Hor enga ore chicapóji dãrajéone to rĩ iji daquigade enga ore cho cutuque ga ore chicáji Yote Quedéjna Caratai yui to rĩ. Uje edómgosode ore chãraque daniri gatócoro gu enga ore chajna ore údi to rĩ aja ore uniri uécha uñai to. Uje israélgosode ore chimo uje ore chajnápo dãrajéone aja erãpetarei yúode to rĩ ga jé u uje ore tagu dejode ome Moisés gaté rĩ, ga ore chujñieta Dupade to. Ga ore chojningame Moisés: –¿Gotique gu a uje bajnime yóguiji Egípto to ica ga borei yóguiji erãpetarei udé to? Uje yocujñapié ajãpe iji erãpetarei udé jmainie to. A yitogoi jnese to jne uje íjnoque cucha pijopidode iji de, jé aja cucha pibosode, íjnonguipíse iji de to. Enga eyuguipise yóguiji yocajnane yocũrajeque to. Enga derocopise yoquibosode to iji yoquijogapi udé erã́petaréque to.–

⁶ Ga Dupade chachopise ore ichérecheréringane ome ore ucuegode cucha pibose to. Ga chiroque uga ponáyone aja ore to ga tagu ore ga equesarane jiei iji ore.

⁷ Ga jé u uje ore chayója Moisés to enga ore chojningame: –Gajnarenguipise yocuruode to que ome Dupade enga a yijnico uté ájningadatérique ome yoque que. Mu que gusu Dupade gajnéone yocurúo to, mu gajnareque yocuruode ome ua to. Enga be ga acatecã́ri Dupade ome yoque to enga chijócãre uga dequejnangórone udore iji yocujade to.– Ga jé u uje Moisés catecã́ri Dupade to ome ore enga chojninga: –Be enga ãro yurasade israélgose ore isijnaringuéone to.–

⁸ Yocangarádejnai chojningame Moisés: –Aquejname ga apésu ugárique to jeta jé chopise uga dequejnangórone udore to. Enga asa ga acháji pidi eruei to ga ãráji gaté to jne. Jeta uga posode ore chajire bapesudi uga uté to jne ga jé u ujeta gosi chapídome dagúnori uga jeta chajire bapesudi uté iji gaté.–

⁹ Ga Moisés pésu ugai iji guebeque perupi to uje gajnua tu óro, ga guebeque perupi uté i tu bronce. Ga doi pidi ga ugai uté cho to-to-to iji jnumone ga chãráji gaté iji ugade posode iquei to. Enga equesarane uñane chajire Moisés ipesudi ga que ore toi to.

Israélgosode ore jnopo aja dajesúode rĩ ga ore chise moábgosode ore uniri nanique

¹⁰ Ga ugade udore quigade nanique ga israélgosode ore jnopo to rĩ ga ore chicha dapáringa uñai taja dajmite uñai uje i tu Obot.

¹¹ Ga ore jnopo rĩ ga ore chicha dapáringa uñai taja dajmite uñai to rĩ uje i tu Ije-abarim iji erãpetarei ajei to. Ga ore ajmite uñai uté idógosiji moábgosode uniri ejoi iji guedé garani yui.

¹² Ga ore jnopo rĩ ga ore chicha darengúi taja dajmite uñai to rĩ uje idógosiji tuijnai to uje i tu Zered.

¹³ Ga ore jnopo rĩ ga quene ore chise tié to uje i tu Arnón ga ore chaquesu uaté to ga ore chicha dapáringaméi taja uéchamitó to. Ga tié tuaté chajuque erãpetarei to ga amorréogosode déji tié uaté uécha uñai, jé basa ga moábgosode ore déji uécha uñai to.

^14-15 Enga israélgosode ore churúsãre pocaningane isocade iji darujna aode to nanique uje Yocangarádejnai pésu ore úringáringo pujnuéngaisóño iji udore ga ore igoiguéode u to. Ga ore igoiguéode uñai chósi te to: "Ga yicoi yoquijocaningane nanique ga yibaco, yibaco aja yocajesúode to nanique. Ga yico nanique ga yibacóji ore idáidatéi ejode to nanique uje i tu Vaheb uje déji ore uniri dosadi to nanique uje i tu Súfa. Ga yico nanique ga yimóngo tuijnane aja yocajesúode to aja tié yui to uje i tu Arnón. Ga tuijnane udore uñai umarejna to nanique. Ga jé u nanique uje yajnángo uté aja ore uniri dosate uñai to uje i tu Ar. Ga jé u nanique uje yimáco yógaja yocumajosórone ore uniri eruei to uje i tu Moab."

¹⁶ Ga jé u nanique uje israélgosode ore jno ga ore chise yote quedéjnai uje i tu Arnón, ga ore jnopo rĩ ga ore chise ore ajmite uñai uje i tu Beer. Ga Beer uté i qui tu ore jochai yote. Ga jogadi u uté nanique uje Yocangarádejnai catecã́ri Moisés iji to nanique enga chojninga: "Amáta barasade ore aja ñane to ga jé u ujetiga yisi ome yodi ome uaque to."

¹⁷ Ga jé u nanique uje israélgosode irasiguipise re to ga ore chijñecáraja dajesúode to iji darengúi údode. Ga ore iradedie achachagúgode u udojo to uje ore chojninga: "¡Yodode á, o jara, jara, jara aja guesode iji yoquerugode to á! ¡Yujode israélgose á, yicoi ga yijñecacója yoquerui udé gai to á!

¹⁸ Cachi yoqueduguéjnane ore ijnimique yodi uté to ome doidode dõráchaque to uje ore chijócha yui to. Jé aja yocasutedie uñanie to rĩ, uje ore doi doguedie to ga ore chijócha yui to ga ore ijnimique ome dõrachade to."

¹⁹ Ga ore jnoji Beer uté to, ga ore cho jñuque, jñuque, jñuque aja dajesúode to ga ore chapája dajesúode to. Ga ore apáringaméone u udojo to: Mataná, Nahaliel, Bamot ore.

²⁰ Ga ore chise moábgosode ore uniri uje déji cucarani údipísi uje cucarani uté i tu Písga. Jeta gosi choru cucarani uté to enga chicáji cucarani ójo to enga chimo erãpetarei amotacúdi jnese, ga pijoguipise erãpetarei to.

Israélgosode ore doi pocaningai ome eduguéjna cuchábi Sehón ga ore suépise uté gai nanique

²¹ Enga israélgosode ore chiroque datocaidode aja amorréogosode ore eduguéjna cuchábi yui to uje i tu Sehón nanique.

²² Enga ore chojningame uté: "Ajuéga uacaniri to ga yajujo iji gatócoro to, enga uacacade cucha déji mu a ca yisago jne. Jé aja yodode to iji uaquerugode. A ca yójigo to jne. Gusu yajnángo dajeque obiréjnai aja yocajesui uje uaqueduguéjnane ajnai tu dajei uté to."

²³ Ore eduguéjnai Sehón chudute ore uruode mu charanguipise ome ore to jeta ore chajuque uniri iji gatócoro to. Enga Sehón chimáta darógode aja ñane to enga ore jno ga ore chicáji erãpetarei ajei ujetiga ore doi pocaningai ome israélgosode ore to. Ga ore chise israélgosode iji ore idai Jaháza enga doi pocaningane ome ore iji uté.

²⁴ Ga jé u uje ore doi pocaningane ome ñane to, mu israélgosode ore chejnápise jõcaratade ore. Ga ore chejnápise ore ga ore cho dajnéngu ore unirone to uje ore déji tiedie Arnón, Jaboc ore ujai. Enga punirone udore chise amóngosode ore uniri eruéode. Mu soldádode déji amóngosode ore uniri eruei uté ga ore irágu eruéode.

²⁵ Enga israélgosode ore chopise dajnéngu amorréogosode ore idáidatéi Hesbón, jé aja guidai ajámamone iji ore idáidatéi uté ejode to. Ga ore chácariji ore uniri ajéode to.

²⁶ Ga ore yui amorréogosode ore eduguéjnapise Sehón uté idaipísi tu Hesbón uté to nanique. Mu moábgosode ore gajneque bajaque nanique. Mu Sehón chejna ore nanique ga jé basa ga cho dedai iji ore idai uté nanique ga chopo dajnéngu ore gajnei jnupe jnese to rĩ jé aja tié Arnón edúdipisi.

²⁷ Ga amorréogosode igoiguéode cuse to ome deduguéjnai Sehón uje chijna moábgosode ore uniri iji ore gari to nanique. Ga ore igoiguéode udojo chósi te: "Acayóji yoqueduguéjna cuchábi Sehón idáidatéi Hesbón to. Uje yoqueduguéjna cuchábi Sehón pota jetiga cho dedáji dejnai ore idai Hesbón uté to. Ga beyoi ga yirogopo aja gatéode to rĩ, ore idáidatéi uté, ga yoqueduguéjna cuchábi chichapo dagochocoi ueradéjnaraque aja to jne rĩ. Enga yoquipesutígo yocujuyaquéo chise idai eruéode jnese jne, ga a ca cuchárique chósi ti iji yoqueduguéjna cuchábi Sehón iji uté ajei to.

²⁸ Chamáñaje pioguéjnai tṍraji yoqueduguéjna cuchábi Sehón uté nanique, ga chicáji moábgosode ore idai Ar aja dajesui ga chejna ore idáidaté ujnomerãi uté jnese. Uje ore idáidatéi uté chiqueta raja guesáringai iji tiédaté Arnón edógai to mu pioi pésupúsu jaribei tiji to.

²⁹ Ga yosõripísi jóroque moábgosode uje ore angureni dupa Quémos que chátaja ore to ga que cucha pajmitique tṍraji ore to. Enga que ore angureni uté ujñapeque iji yoqueduguéjnai jmainie ga noñome moábgosode iji te jmete ga ore chayome yoqueduguéjnai Sehón jnese enga ore timiningara dacotedie ome pocaningai jnese.

³⁰ Ga yoqueduguéjna cuchábi Sehón ujopié tṍra pioguéjnai taja guesi tiji dabijnani to ga chejna moábgosode ore idáyode jnese uje ore íode u udojo to: Hesbón, Dibón, Nófa, Medéba ore. Uje idájapise Medéba mu pioque cuchábi jé chise to."

Israélgosode ore doi pocaningai ome basángosode ore eduguéjnai Og nanique ga ore suépise uté gai

³¹ Israélgosode e ore chejnápise amorréogosode ore idáyode uñane aja re to.

³² Ga Moisés qué chirógapo darasade uñane aja ore idai uñai gaté rĩ jeta ore cho guidai ome to. Ga ore idai uté i tu Jazer. Ga guidáyode di ga ore chojninga: "Yico ga yejnángo ore to." Enga ore doi ore ga ore chijócãre amorréogosode ore aja quedéjnane to enga ore cho dajnéngu ore idai uté to, jé aja guidai ajámamone iji ejode to.

³³ Ga ore chojninga: "Yicopoi basángosode ore to ga yejnángopó ore to jne rĩ enga a yocópo yocuniri iji ore uniri to jne rĩ." Mu uje basángosode ore eduguéjna cuchábi Og chudute israélgosode ore ujnomei, ga uté chimáta dasoldádode to ga ore chachai israélgosode ore iji ore garani jeta ore chejna ore. Ga ore chise ore idai Edrei ga ore chácariji ga ore chirote israélgosode ore yui iji uté ejode to.

³⁴ Ga Yocangarádejnai Dupade catecã́ri Moisés to ga chojninga: "Ca atodópisa ore eduguéjnai Og, irógode soldate to. Uje a yicha ore aja baquei to enga a ejnáñopise ore jne. Ga a ore chijnime eduguéjna casé Sehón, irógode jmané to ome uaque jne. Enga a oyo uacaniri iji ore uniri to jne. Ga jé adi tupúsu ore eduguéjnai Sehón, ore adi casé to jne uje uacoyo uaquedai iji Sehón uté idai Hesbón to diríca."

³⁵ Ga jé u uje israélgosode ore doi pocaningane nanique ga ore chujé eduguéjna cuchábi Og, ujnacarode ore, jé aja isoldádode ore jnese to nanique, ga ore cho daniri iji ore uniri to nanique. Ga que uñeque chapídiji dínique nanique uje israélgosode ore chujé basángosode ore jnese nanique.