Números 17 - Dupade Uruode

Que potigayaquérique déji Aarón úringai Dupade iroguipísi uje uté ogué u gu uje ujnienie cuse nanique

^1-2 Ga Dupade chojningame Moisés: "Angome pangaránone iji uacáguedie jnese jetiga ore chicai yiguíjnai ga ore chijna doguedie jnese aja yiguíjnai uté to. Ga gusu pangarate chojmara, chojmarane iji uacáguedie ore to. Ga pangaránone a gare ore iji yirídai jnese iji yiquei tuté to. Enga ore chise yiquei jnese ga jĩraque arúsãre ore íode iji ore oguedie to.

³ Enga arúsãre Aarón i iji ogué to uje levígosode ore utocaite uté, ga barúsaraníe ore oguei gare iji yirídai to jne.

⁴ Ga bo ore oguedie údi aja yiguíjnai uje i tu 'Dupade, Yutuãjóa Ñane Iji Te,' enga acháji yuruode pi cajo iquei to jne. Chamáñaje jogadi u uté gu ujeta yicatecã́ri ua iji uté.

⁵ Ga a yipésu yajegaidi uté ogué jne enga ujniéringui cuse to aja guesi yui. Ga a obiréjnapise ome ujode pangarácho ore to uje yajegaidi tu uté gosi uje ogué ujnienie cuse to. Yigaidi u gu ujetiga israélgosode ore chiraja uacáringane yajegaicho ga ore cha bu dachietabáitigade ome uaque to iji yiquei."

⁶ Ga Moisés chingopísa Dupade uruode ome israélgosode enga jé u uje ore angaránone di doguedie údi iji Moisés to. Ga gare iji yirídai to ore oguedie. Ga Aarón ogué déji ore oguedie ujai to.

⁷ Ga Moisés jno ore oguedie údi aja Dupade iguíjnai ajé uñai enga chicha udire iji Dupade uruode pi cajo iquei to.

⁸ Dire uñai ga Moisés chicapóji Dupade iguíjnai ajé uñai rĩ enga chajire Aarón ogué ga ujnienie cuse to. Mu que gusu ujnienie mu pojnánguenie cuse to. Enga adie cusapo to rĩ enga adie udire e timanipise to ga adie udire i tu alméndra. Ga obiréjnapise uje Dupade ajegaidode u levígosode ome daroquéode to. Mu ajegáitedatéi upúsu levígosode ore utocaidi Aarón ome daroquéode to uje ogué tu gu uje ujnienie cuse to.

⁹ Ga Moisés doi ore oguedie jnese iji Yocangarádejnai Dupade iquei, ga jno udire údi aja darasade israélgoso ujetiga ore chimo to. Quigade enga gajnesórone ore chisa doguedie jnese.

¹⁰ Ga Dupade chojningame Moisés: "Bopo Aarón ogué údi aja yiguíjnai ajei rĩ uje ujnienie cuse gu. Ga acháji yuruode pi cajo iquei to. Yigaidi tu gu jeta ca potigayaquérique déji barasade ore ome Aarón, ape disi ejode ore úringane yirócho iji ore ujade, uje yiraja ore gu uje ate noñaque barasade udore enga jecucha ga ore tagu yuruode aja. Mu jé socaseti ore jnusina Aarón ogué isocade jne enga jé u ujetiga ore cha dachietabáitigade to ome yu, enga a ca yujé ore jne."

^11-12 Moisés pésupúsu Dupade uruode quigode marínga jé israélgosode ore isoca dasocade to ga que ore cha dachietabáitigade ome Moisés gotique. Ga ore chojningame Moisés to: "Que yichagopo yógaja dínique to rĩ. A Dupade chejna yoque jnese jne.

¹³ Yimóngo gu uje yocurasade chicáji Dupade iguíjnai yui mu ore toi ¡paque, paque! to. A ca yocuñeque dépoji dínique to jne rĩ ga gose ua to."