Números 16 - Dupade Uruode

Dupade cho dajuñame jnani bajai Coré uje uté chetaguipise Moisés nanique gu

^1-2 Enga israélgosode uñane chetaguipise Moisés to nanique ga jé ore chuságaja uruode to ga que ore doi ojningane cucha to. Jnani bajai uje i tu Coat uté ape disi ejoi Coré u uñai uje chetaguipise Moisés nanique ga levígose uté to ga uté dai i tu Izhar. Ga uté jorane u rubéngosode uñane uje ore íode u Datán, Abíram, On ore. Ga Datán, Abíram jé ore u ñane enga ore dayé i tu Eliab. Jé basa On uté dayé i tu Pelet. Enga ore tibidi israélgosode uñane to enga ore pijnangaidode e chise 250 nanique. Ga ore pijnangaidode udore ore urasade angaranipise ore jnese, ga ujnomerãque ore jnese to.

³ Ga ore nóna ñane aja Moisés, Aarón ore to. Ore gaidi tu jeta ore chusẽre ore edodie to. Enga ore chise Moisés, Aarón ga jĩraque ore chusẽre ore edodie to ga ore narare ga ore chojningame ore: –Yachógopíse uacajosipiedie to uje uacoyo ayorédatéi iji uaque to ga uacajnáño uacamenuringuéone ome yoque to. Jecucha ga uacasíyo uacabáyode ome Dupade uje chiese Dupade iroguipise uáguiji yocujade to. Mu Dupade ajegaite israélgosode uyoque jnese. ¿Ama gosi guẽrate uacamenuringuéone ome uaque ujetiga yangácoi uaque to ga gusu pangarate uaque to a?–

⁴ Ga jĩraque Moisés doi ga chichaga dacuruté aja jnumi iji Dupade iquei ga imoi tu uje áyuguhebátigadatéi u ome ore uruode.

⁵ Enga Moisés chojningame Coré, jorane ore jnese: –A Yocangarádejnai chingopísa dajegaidi daróquedaté aja yoque dirome. Ga a obiréjnapise ingarai iji yoque dirome ujetiga doi iroquéode. Ga a gusu Dupade ajegaidípisi jne ujetiga pujuegate Dupade yui ome uté jne iji iguíjnai.

^6-7 Ujeta jec ũré anguretáyo uágome Dupade iroquéode to ga obechoi Dupade iguíjnai dirome jnese. Ga beyoi uaquerásorone uje pioi jnupuñúringai gajnei tu ga asicho cucha ai unéri taja pioi jnupuñúringai gai to ga boyo údi aja Dupade iguíjnai ajei to. Ujetiga Dupade chimesẽre uaque gosi isocade enga a obiréjna jne uje Dupade ajegaite uté gosi. Ueradéjnapise Dupade gueranone daroquéo ome levígosode uaque to, mu añuchopúsu uaqueo to ome Dupade uje e uacajnachoi Aarón isagode cucha ome uaque to.–

⁸ Ga Moisés jno daruode údi ome Coré enga chojningame: –Coré á, levígosode uaque á, uacajneque yuruode udojo jnese to, ga angachopísi quigode to jne.

⁹ ¿Ga ca cuchadatei u ome uaque a uje israélgosode ore angureni Dupa ajegaite uágome daroquéode iji uacarasade israélgoso ore ujade? Jé ca adojnóchoja uacajnéone Dupade iroquéo uje uacapéso cuchade aja quigode iji iguíjnai iji uté iquei. Chamáñaje uacabeyoi Dupade iroquéode enga uacarasade agutíyabádode u uaque to.

¹⁰ Cachi Yocangarádejnai ajegaite ua, jé aja bojode levígose ore jnese ome daroquéode to. ¿Ama ca gajnarécho to ome uaque uje uacajnachoi uágome Aarón isocade to a? uje Dupade guẽrate uté isagode ome to.

¹¹ ¿Jé gotique a uje gajnarécho uacaruode ome Aarón que, uje que uté ichajapite re aja Dupade iroquéode nanique? Cachi uacachietabáidi tupúsu Dupade, uje Dupade u gu uje chisi ome yoquisagode ome darógode uyoque jnese.–

¹² Ga quigade nanique ga Moisés tibidápoi Eliab ujnacarode ore to rĩ uje ore íode u Datán, Abíram ore ujetiga catecã́ri ore to. Mu ore chetaque ga ore chiroque daruode aja to ga ore chojninga: –Que yipótago jeta yibájoi ua.

¹³ Yetajopise ua to gu uje bajnime yóguiji Egípto diríca. Cachi jnacarai jiépisi iji Egípto to ica ga yocachidedie aquirájnai ijnanie tamuta to ica. Ga jé chopome cutérone to iji Egípto uje tṍraji dedodie to ica. Ga bajnime yóguiji yocunire ueradéjnai ica ga jé borei yóguiji tarétigade udojo ujetiga yichago yocódedie iji udé. Mu que gusu udore mu bapota jeta o eduguéjna cuchábi iji ua to iji yocujade.

¹⁴ ¿Déji rique bojninga casica punire ueradéjna to uje chiese jnacarai jiépisi iji ica uje chiese cutérone tṍrapóji dedodie iji ica? ¿Déji rique yocajné casodica cucha gotígo to uje chiese yocajnei jnupe déji ica, enga chiese ore acatígo cucha dimáneo iji to ica ome yoque? Enga a ajose edoparigode aja yoque to, uje gusu edoparitígo uje que ore chimo cuchade ome re ga ore chajna dojode ayoré iji jnumi to. Que yoco edoparitique ga que yajnángo ua aja quedéjnane to. Ga jé dóji ga ca yibájoi ua to.–

¹⁵ Enga Moisés ajei dotãripise ome ore uruode udore to. Enga chojningame Dupade: –Jé ca amesẽre ore gueranone cucha ome ua jne, uje gajnarenguipise ore adode ome yu gu. Que gajnarenguipise yatique ome ore to, mu jé ore pojna yu. Que yutai ore gachitique burica quedéjnarique ome yu gotique uje yiji baroquéode iji ore ujade, jeoga ore ugúcha uñeque, mu cho ujetiga ore chaguhéta poriquéode yibai uje ore pojna yu que.–

¹⁶ Ga Moisés tibidápoi Coré rĩ, enga chojningame: –Obechopísi Dupade iguíjnai yui dirome, bajorane uaque, ga angoño uágaja Yocangarádejnai Dupade to dirome. Enga Aarón a chobéri Dupade iguíjnai yui to dirome.

¹⁷ Ga bajorane ore uje 250 ore, a ore chijna dajnéone jnupuñúringa erásorone dirome. Ga a ore chujé cucha ai unérone aja gáyode to dirome. Ga Aarón, uhua a ajnáño uacajnéone jnupuñúringa erásorone to dirome uje uacajéyo cucha ai unérone aja gáyode to, ga achayoi uaquerásorone udore aja Dupade iquei jnese.–

¹⁸ Ga jé u uje ore chobéri yui to ga ore chijna dajnéone pioi jnupuñúringa erásorone iji dajmainie. Ga ore chujé cucha ai unérone aja gáyode to jnese. Ga ore jno ga ore cháguena Dupade iguíjnai ajé uñai piagoi iquei, jé aja Aarón, Moisés ore to rĩ. Uje Dupade iguíjnai ajé uñai uté i tu 'Dupade, Yutuãjóa Ñane Iji Te' nanique.

¹⁹ Ga jé u nanique uje Coré tibidi darasade israélgose ore jnese to jeta ore pañaji ore adode to. Ga ore déji jnese. Mu ore toji Coré jorane ore isocade gáyode to iji Dupade iguíjnai ajé uñai iquei uje i tu 'Dupade, Yutuãjóa Ñane Iji Te,' enga Dupade ingoningájnai di iji daguíjnai to ga ore pañaji jnese.

^20-21 Ga Dupade narare ga chojninga: –¡Moisés á! ¡Aarón á! Angaráño uacajogatígome uacarasade udore to. Uje a jĩraque yejnápise ore to jne.–

²² Ga Moisés, Aarón ore chichaga dagataidie aja jnumi ga ore chijócha Dupade ajei údi to ujetiga ca Dupade chujé ore urasade to. Ga Moisés chojningame Dupade: –¡Dupade á, cachi bapesute erámi unirisórone uyoque jnese, ga yiquecágo gu ua jnese! Ujetiga ate gajnarei chojmára enga ¿ajérase yocurasade ore jnese gu uté isijnaringuéone?–

^23-24 Ga Dupade chajnai Moisés uruode ga chojninga: –Angome barasade israélgose ga ore cãra dajogatígo to ome Coré, Datán, Abíram ore iguíjnane to.–

²⁵ Ga jé u uje Moisés, jorane pangarácho ore chicáji Datán, Abíram ore yúode to.

²⁶ Ga Moisés catecã́ri israélgosode iji ore ejode to ga chojninga: –Boyo iji jnani ate gajnaréngone udore iguíjnane ejode to. Enga ca asayo ore gajnéone cucha to. Uje a Dupade ujuyaquei di iji ore to jne, enga a cháta uacuñéngo aja ore to jne jetiga ca boyo iji ore ejode ¡bu! to.–

²⁷ Enga jé u uje israélgosode chayome ore enga que ore cunguésõri Coré, Datán, Abíram ore iji ore charidode to. Enga jé u uje Datán, Abíram, ore acotedie, ore abode ore doi guesi iji daguíjnane ajéode ga ore cháguena daguíjnane piagode jnese.

²⁸ Ga Moisés catecã́ri darasade ore enga chojninga: –A yetingarape yúringai Dupade iroque to ome uaque to. Enga a quene arajáyo uje que yipesudode u cuchade ome uaque to, mu Yocangarádejnai Dupade angureni tu yu ome dapesudode cucha iji uacajade.

²⁹ A Coré, jorane ore, ore itoringáringo jé cho erámi unirisórone yoquitoringáringo isocade to jne enga a arajáyo jne uje taque yu, enga Yocangarádejnai Dupade que iroque yu ome daroquéode to.

³⁰ Mu jetiga jnumi chungare dabai jé iji de gajneri ga Coré, jorane ore basája ajénique to ome dáringane ayoré ueca enga a arajáyo jne uje Dupade iroguipise yu aja uaque. Mu a arajáyo to jne uje Coré, jorane ore u uje ore ichietabaite Dupa uecai to ga ore u uje ore chijnime Dupade ájningai to ome raque ga jé ore cachodi tu to.–

³¹ Ga Moisés chejna daruode udore guesi ga jĩraque jnumi chungare dabai to iji Coré, ore údi.

^32-33 Enga cho jetiga jnumi pijnatique cuse iji ore údi enga chungare dabai mu jĩraque chiporigásapo dabai to rĩ. Enga cho jetiga chinire Coré, Abíram, Datán, ore acotedie, ore abode ore gáyode ¡tiroc! Ga jé u uje ore ñéraja jnumi edo iji dádi to enga ore patĩ́ora dagúchade aja pié uaté jnese to. Ga udore que uñeque urásarique chimópo uñeque edodie to rĩ iji dínique to. Ga udore bijnápise ome darasade.

³⁴ Uje israélgosode e ore chudute Coré ore agoyé quedéjnanie to enga ore chayome ore agoyé quedéjnanie udire enga ore chojninga: "¡Ayóyopise ome jnumi jeta ca chaco yoquibai to!"

³⁵ Uje jnumi e chaco Coré ore gai ga Dupade chirógapo pioque dequejnangóri taja ore jorane jnanío to rĩ uje 250 u ore to. Ga chejna ore ¡jaripe! Ga imoi tu uje Dupade que chimesẽre ore iborigode cucha ai unéño to.

^36-37 Ga jé u uje Dupade chojningame Moisés: "Angome Aarón ujnacari Eleazar enga chijnime ore erásorone tiji pioi uje jnupuñúringai gajnéone u, enga doi ga tṍra jnupuñúringane aja sañeque uje qué déji ajéode.

³⁸ Jé basa pisijnaringuéone ipesusórone udore uje ore cho daba dasijnaringuéone que, a puyaque ore gajnéone jnupuñúringa erásorone udore jne. Chamáñaje ore chujé inciénso aja udore enga ore chicháji yiquei enga ore úringáringo puyaque e u. Ga boyo ore erásorone udore údi to uje pipesucho iji bronce enga ajároyo ore to jne ome paranguéraque ga ayóyo guebéode údi ga quérã aja quedéjnane to, ga apésopo popetíguiji yaserani gai to jne rĩ. Yojningai tu yaseradéjnai uté uje pẽrate cuchisode iji uté ome yu uje pipesute uté iji bronce to. Ga israélgosode ore chimo yaserani enga ore jnusina yujuyaquédatéode to jne uje yujépise jnani sijnángone ore to diríca. Enga jogadi tu jeta ore todópisa yu to ga ore doi yojningane cucha to jne."

³⁹ Ga jé u uje Dupade iroi Eleazar doi ga chimáta Dupade equesarane jnanío ore erásorone udore uje pioi chejnápise jnanione udore que, enga jno pioi jnupuñúringai gajnéone udore údi aja darógode ore to jeta ore chijáro to. Ga jé u uje ore chimanipise ga ore jno údi aja Dupade aseradéjnai uje pipesute uté iji bronce to enga ore chaníraja guesi yui ga ore pésu popei ome iji guesi yui ome to.

⁴⁰ Eleazar pésupúsu Dupade uruode jnese uje tangári udore iji Moisés pijnani nanique. Gaidi u gu ujetiga israélgosode ore chimo udore enga ore jnusina Dupade uruode ome aseradéjna uñai uje inciénso gajnei tu. Ujetiga gusúpusu Aarón, ape disi ejode ore jeta ore chibore cucha ai unérone to ome Dupade to iji uté. Jé basa ujetiga ayoré unejátique pota chãru inciénso iji uté enga uté gosi cachodi jé u to ga chijnime Coré jmané to jetiga chuque gosi to.

⁴¹ Ga chise dire uñai ga jé israélgosode ore chaguhéta Moisés, Aarón ore gai ga ore chojninga: –Uaquejnáño yocurása casodé ore to diríca uje Yocangarádejnai Dupade urasapísode u ore múñi.–

⁴² Ga ayorébui ore chimere ránguiji Moisés, Aarón ore údode to aja Dupade iguíjnai yui. Mu ore chise Dupade iguíjnai ajé uñai uje i tu 'Dupade, Yutuãjóa Ñane Iji Te,' ga jĩraque gue abuja doi jnumi to iji uté ga Dupade ingoningájnai choqui guesode iji uté.

^43-44 Ga jé u uje Moisés, Aarón ore di ga ore cháguena Dupade iguíjnai ajé uñai iquei ga Dupade catecã́ri Moisés ore iji uté to.

⁴⁵ Ga chojningame ore: –Angaráño uacajogatígo ome ayorébuode to uje a yejnápise ore gajneri.– Ga jé u uje Moisés, Aarón ore chichaga dacurutedie aja jnumone to iji Dupade iquei.

⁴⁶ Ga Moisés chojningame Aarón: –Be pioi jnupuñúringai iji Dupade gaserani gai to enga abore cucha ai unéri to iji erã́sori gai, ga bo údi aja ayorébui iquei to enga ãrai gaté iji ore iquéode to ga ajócha Dupade ajei údi iji ore iquei to jetiga Dupade chicadígui ore isijnaringuéone to. Chamáñaje ájningaránguipíse Yocangarádejnai Dupade gu, ga e chiroque cucha dequejnangónique aja ore. Aguitóji ore yui to. Enga aquĩ́ra Dupade ujuyaquédatéi ome ore to.–

⁴⁷ Ga Aarón dopísi Moisés uruode to ga chayópisiji ayorébui iquei to. Enga Aarón chise ayorébui mu uñane e ore toi to ga e ore cṍraja jnumone to. Enga Aarón chãrai cucha ai unéri erã́sori iji gatéode ga chojninga: "Dupade á, ¡ãro ayorébuode ore isijnaringuéone é!"

⁴⁸ Ga jé u uje Aarón doi togode ga chicha dedoboi taja ore to. Jé basa ga chicha uecade aja daquei to ga jé u uje jĩraque cucha dacate dequejnangóri jĩraque cha chequésãre ore.

⁴⁹ Enga ore chisecãru togode ga chise 14.700 ga jiépisi togode iji ore to. Ga qué uñane déji to, toque gatéode ore uje ore patĩ́ora Coré ore to diríca.

⁵⁰ Ga Aarón chimo uje cucha dacate dequejnangóri e cho jnaque ga chajni aja Dupade iguíjnai uje qué Moisés chirote gu iji ajé uñai piagoi iquei uje ajé uñai uté i tu 'Dupade, Yutuãjóa Ñane Iji Te.'