Números 14 - Dupade Uruode

Israélgosode ore tagu Dupade uruode aja nanique, ga que ore chicáji ojningai punire ueradéjnai yui to

¹ Enga israélgosode ore jnatupúsu Dupade ojningai punire ueradéjna ome raque nanique. Mu uje ore chudute guidáyode ojñane to ga áyuguhebátaque ore jnese enga ore poji dejai údode jnese uje ore todópisa Canaán unirisórone yui gu.

² Uje dire uñai nanique ga ore pojna Moisés, Aarón ore údode to ga ore chojninga: "Omi turásu jeta jé yácagoji Egípto to ica enga yichagorása yocódedie aja to jne. Jeoga yichago yocódedie aja erãpetarei udé ajénigo.

³ Gajnarénguei Dupade áyipiedie ica gu ome yoque uje jno yocúdi aja cananéogosode ore uniri udé. Uje chiese yicoi pocaningai ome ore, ga yoco yocuniri iji ore uniri uté jne. Mu a ca togome yoque jne, uje cananéogosode a ore chejna yoque to enga a ore chisa yocacotedie, yocabode ore to ga a ore cho daróguiji ore to. Omi tu ome yoque jeta yajníngopója Egípto to jne rĩ."

⁴ Ga jé u nanique uje ore catecã́ri ñane údode ga ore chojninga: "Yipéco yoqueduguéjnarique iji yocuñeque to ga a jé u jeta yoqueduguéjnarique chatirépo yógaja Egípto to jne rĩ."

⁵ Enga Moisés, Aarón que ore chirajápo dasocáringome raque to nanique rĩ ome darasade ore ipojnaquéode. Enga ore chichaga dacurutedie aja jnumone uje imoi tu uje ore áyuguhebátigade chinguíra ore aja jnumone to. Ga ore urasade toji ore gáyode iji jnumone.

⁶ Jé chopome guidai casodé ore to rĩ uje ore íode u Caleb, Josué ore. Áyuguhebátaque ore to ga ore doi daguidedie ga ore chajnangarase iji daróbedie ga imoi tu uje ore jnusipísi jórogui darasade ome Dupade guerani punire ueradéjna to.

⁷ Ga ore chejnapúsu daruode ome darasade ore ga ore chojninga: –Yoquimone cucha iji Canaán údode ueradéjnapíso jnese diríca.

⁸ Dupade ajegaite yoque diríca, enga ¿ama ca nonarása yógaja dojningai punire ueradéjna uté to a? ¿Enga ama ca chisirásome yoque to jne a? Cachi Dupade jnari israélgosode yógome ore uniri uté to uje ueradípise diríca, enga ore gachidedie aquirájnai ijnanie tamutája jnumone ga gose cutejmai jnacaraque ijoréjna diríca. Jé cho cutérone iji to diríca enga tamutája jnumone to iji dedodie to diríca.

⁹ Mu angáchoi Yocangarádejnai inejequéode to uje a chorei yóguiji uté to jne, enga ca acho uté uruode aja. Ga boyo, yicagóji ojningai tuté punire ueradéjna to. Enga ca atodóyo cananéogosode ore to. A ore cho arureque parorigode ome yoque to dirome, ga a cho jetiga yajo ore ga jĩraque yejnángo ore dirome. Chamáñaje que ore irotangónique cucha cuse to, jé basa uyoque ga yoquirotangóri u Dupa uecai to. Ayáyo uacasadodéringadatéi uté to, enga yicome ore yui to.–

¹⁰ Ga ueradéjnapise Josué, Caleb ore uruode ome darasade mu ore urasade chisa cucaranenie jnese ga ore chãráji ore to jetiga ore chatingare ore ome to enga ore chicha ore cachotígaja uté to. E ore chujérase ore mu Dupade ingoningájna cuchábi tocade iji iguíjnai enga nanganatápise iguíjnai údode enga ore pañapísiji jnese.

¹¹ Ga Dupade narare ga chojningame Moisés: –Yachopise israélgosode ore ichietabáitigade ome yu to. Yipesútedatéode e jiépisi ome ore uje jecucha ga yetingare yu ome ore, mu jé ate uje ore dojnóngaja yu to ga ore chotigase yuruode quigode to.

¹² A yiroque dequejnaréquedatéi aja ore jne ga a chejna ore jnese jne. A yĩro israélgosode taque, taque jne enga a yicha bape disi ejode iji ore jogadi jne. Ga a bape disi ejórigo jiépisi jne enga a ore suépise israélgosode ore jne ome dapetígajnai, ga a etoguipise ore enga a ujnomerãque ore jne iji erámi údode jnese.–

¹³ Mu Moisés chajnai Dupade uruode ga chojninga: –¡Úngare á, Dupade á! A cáma qui tu to gotique jeta ejna yurasade israélgose ore to. Uje bajnimique ore iji Egípto ica gu ome bajopiédaté. Enga gajnareque ujetiga egíptogosode ore chudute bajnomei to uje bejnápo israélgosode ore to rĩ.

¹⁴ Jetiga egíptogosode ore chudute to jne uje bejna israélgosode ore uyoque to enga a ore chingome cananéogosode ore to jne enga a ore chujñieta ua to. A e ore chudute uje israélgosode Yocangarádejnai tu ua ga bajína yógaja quedéjnane to. A e ore chudute to jõ uje yijínango ñane iji cucarani ójo diríca ga bo ayoré iji ua to ga yicatecãcoi ñane iji cucarani uté ójo to diríca. A e ore chudute bajnomei to uje yajnángo batocaidé gue abuja iji jnumone to iji dirode jnese, mu chise dejai to ga gue abuja tuaté pésu re ga díreca ejode to iji dejade ga uaté idírecaringuéi chijñate yoquibáyode to iji dejade. Ga gajnua tu yoquijnaningone cucha.

^15-16 Ujetiga be baruode udore ga ajé yoque jnese to enga a ore chudute bajnomei uté to ga a ore chojningárasa: 'Cajicho to uje ore angureni gotique a ca ujñapeque uje chiroque ore aja dojningai punire ueradéjna mu que doi daruode to. A ca toque ojningai punire ueradéjna ome ore gu jecute chujé ore jnese iji erãpetarei. Uje qué ore déji ojningai punire yúode, mu chejna ore uje qué ore chicáji yúode to.'

¹⁷ Jecute, Yangarádejná, ca ejna ore to. Mu ango báringai ujopíerãque aja ore to enga bo ore údi aja bojningai uté punire ueradéjnapise to.

¹⁸ Uje bojningame yoque nanique: 'Yetéquetí yo júruru ga jiépisi yijnoraquéode ome ayoréode ore jnese. Yiraja uje ore tagu yuruode aja, mu a ore chajni yibai ga jĩraque yĩro ore isijnaringuéone to. Ga jĩraque yiraja ate gajnarétique iji ore ujade enga uté gosi a u to jne jeta jĩraque yo yujuñame gosi to. Enga a ca gusu yujuyaquéode ome uté gosi mu a jé chise ape gatérigo ore to jnese jne.'

¹⁹ Yimo basocade iji taningai uje bajnime israélgosode iji Egípto to iji taningapísi nanique, uje badota ua ome ore adode gatuaque. Ga jé be basocade ome ore to iji de to gajneri ga ãropo ore isijnaringuéone to rĩ iji de gajneri. Yiraja gu uje qué jiei bajnoraquéode ome yurasade ore, uyoque to.–

Dupade chãraque dojningai punire ueradéjna ome israélgosode nanique gu ore angoninguite paritigade

²⁰ Ga Yocangarádejnai chajnai Moisés uruode ga chojninga: –U arĩa, a yiji baruode jne. Enga a yicadígui ore isijnaringuéone jne.

²¹ Que potigayaquérique déji uje Dupa ueca yu. Ga que potigayaquérique dépoji to rĩ uje yingoningájnai chĩreta yipesudode puníño udore ore jnese iji erámi údode jnese.

²² Enga que potigayagápo yurúrique rĩ, uje yĩrarare enga jecucha yuruode tocade. Jecute uje yãraque yojningai punire ueradéjna ome ore ga que potigayaquérique déji yuruode udore to, enga a ca ore chisípise yojningai tuté punire jne. Yojningane u israélgosode ore uje ore pañaji yipesútedatéode iji egíptogosode ore uniri ica uje yijnime ore iji egíptogosode ore jmainie ica, jé aja yipesútedatéode to uje yipésu iji de erãpetarei udé ajei. Ore chimo to mu ore dojnóngaja yipesudode udore ore jnese. Ore u uje ore pañapísiji yingoningájnai mu ore cho cucha bisidéguiji, enga ore pésu yujuredie gatuaque to iji erãpetarei udé ajei. Que ore áyipieraque dépisi yuruode úringáringo pipesucho to enga ore tagu yuruode aja gatuaque to.

²³ Jecute a ca udore uñeque chimópise yojningai punire ueradéjnapise uje yingome ore dayode nanique iji taningapísi. Ore dojnóngaja yu gu, ga a ca ore chimópise puniri uté úringai ueradéjnapise ome dedodie to jne.

²⁴ Mu yiroi Caleb jé cãraque re iji dojode jnani ujade to. Uje tangaripísi yuruode to. Jecute yojningai punire ueradéjna guesája yui ome uté to. Uje chísome dáringai guidai diríca enga a chisápo to jne rĩ. Ga jé jogadi tu jeta chopise daniri iji to jne, jé aja ape disi ejode ore iji uté quigáningo to.–

²⁵ Enga Dupade chojninga: –Uje barasade ore todo yojningai tuté punire ueradéjna unirisórone to, ga ojningame ore: "Boyo ga yico ga yajníngopója yocapáringane to jne rĩ iji yoquiquigade. Enga a yicagopóji yote quedéjna caratai yui to jne rĩ. Uje que apajnapechome amaléquegosode, cananéogosode ore yúode to gu uje ore déji garáijnane iji punire ueradéjnai yúode."–

²⁶ Enga Yocangarádejnai e catecã́ri Moisés, Aarón ore to.

²⁷ Enga chojningame ore: –Yachopise israélgosode ate gajnarenguipísode ome yu to uje ore dojnóngasíja uyu to. Enga sijnanguipíso ore enga jecucha ore chaguhéta cuchade yibai. Enga cho jetiga ca yudute ore uru gajnaréngone ome yu to. Mu yudute ore ichietabáitigade to.

²⁸ Mu boyo ga angoñopísa yuruode aja ore to ga ojnichome ore: "Yocangarádejnai dopísi daruode ome cuchade enga chósi tome uaque: 'Que anguretáyo yu to jecute uacatodóyo cuchade jnese. Jecute a yujuéga uágome uacatódode cucha to, ga a ore tocade jnese jne, ga uacaruode udore chajni uacabáyode to jne. Uje Dupa ueca yu ga que yuruode toja to.'

²⁹ Dupade chojningápome uaque to rĩ: 'A achayo uacódedie aja de erãpetarei tudé jnese to jne. Yojningane u ore uje e ore guejnanie siquerei chejna ayoré chojmarai to enga a ore u jne jeta ore chicha dóderigui aja erãpetarei jne. Enga yojningane upo ore to rĩ uje ore guejnanie siquerei chãraja 20 años ga a ore toji erãpetarei udé jnese. Ore u gu uje ore chugúa uje ore dojnóngasíja yu to.

³⁰ Ga gusu Caleb, Josué ore to jne jeta ore chise yojningai quigode punire ueradéjna to. Ore u gu uje ore changureta yuruode. Mu uaque ga yingo punire ueradéjnai taja uaque to, mu uacáyipiedie chicai quedéjnai ome yuruode quigode to enga a ca eso yojningai punire uté to jne. Uacajneque yuru iyiejájnane to nanique mu que eso yuruode unétique ga uacadojnóchopo aja to rĩ, jecute a ca eso yojningai punire ueradéjna to.

³¹ Enga yiroque uágaja punire ueradéjnai tuté diríca, mu e uacamucháso yuruode quigode to, ga chiese puniri tuté unirisórone chejna uaque jne ga ore jno uacabode údi to jne rĩ ome uaque. Mu uacosorane uacape udore, a ore u jne jetiga ore gajneque yojningai punire ueradéjna uté to. Ga a ca poite ore to jne, mu a yisi ome ore úringáringo pujnuéngaisóño ome ore to jne. Ga a ore u jne jetiga ore sué puniri tuté unirisórone gáyode. Enga a ore cho dajnéngu puniri tuté údode jnese jne.

³² Mu uacabode a ore pésu daninaquéode iji yojningai punire uté to, jé basa ga ore dayode uaque a ataratáyo iji jnumone iji erãpetarei tudé údode to jne uje uacacho yuruode aja gu uje yiroque uágaja yojningai tuté punire ueradéjna yúode to.

³³ Mu uacabode a qué ore chácariji erãpetarei ajei to, ga a ore isai tu dachidode cuchiso jé aja siqueredie jeta chise 40 to. Uje que toque yojningai punire ueradéjna ome ore uje qué uacagúsoji uacabode ore ujade to. Jé u jeta e aquíjnocho jnumi to jnese enga a gusu uacabode jne iji guesi, ga jé u jeta quene yorei ore iji yojningai punire ueradéjna tuté to. Ga cho jeta qué ore chejnáreque re to ome yujuyaquéode ome uaque to uje cáma ore chise yojningai punire ueradéjna gu.

³⁴ Uacarógode guidáyo ore guejnane dire 40 ome dáringane guidáyo to iji punire ueradéjna uté diríca. Jé basa uaque ga a uaquejnane 40 to ujetiga ejnárecho uágome yujuyaquéode jne iji erãpetarei udé jne, mu que dirode u gotique, siqueredie a u to jne jeta chise 40 iji de to. Uacabade u yuru iyiejájnane udore gu uje uacacho yuruode udore aja diríca. Enga a arajáyo jne jeta arañíño jórongome cucha dacate tocachugode ome uaque uje uacangoninguite paritigade oredie u cucha dacate tocachugode udore ome uaque. Uje Dupa uecai u uyu ga jecucha yo yujuñame ore to uje ore tagu yuruode aja.

³⁵ Uje e uacadúcho yuruode to ga a yipísi yuruode ome uaque to. Enga a achayo uacode dipesérigui iji udé jnese jne. Enga uacuñeque a ca chise yojningai punire ueradéjna to jne. Chamáñaje uacátayo uágaja ñane gu ome yu uje uacacho yuruode aja diríca.'"–

Dupade chajire guidáyode ore jnese ga jé u uje ore toi paque to, udore ore jnese uje ore pésu darasade isadodéringane nanique

^36-37 Ga Dupade chajire Moisés utocaidode guidáyo ore jnese ga jé u uje ore toi paque to. Chamáñaje ore chajire cananéogosode ore uniri údode, mu que ore pésu puniri uté unéningai ome darasade gotique, mu ore chicota jnani umarejnájnane ome darasade to, ga ore ipesute darasade isadodéringane ome dojñane udore. Ga jé u uje israélgosode ore pojna Moisés nanique enga que ore doi Dupade ojningane cucha gotique ga gose guidáyode udore nanique. Jecute Dupade chujé guidáyode udore, ga chejnápise ore.

³⁸ Gusu Josué, Caleb uje ore eca nanique iji dojode guidai ujade.

Uje israélgosode dorási cananéogosode ore mu ore umajosórone tuangóa ore ga ore chujé ore ga ore chose ore iji ore idai Hórma nanique

³⁹ Uje Moisés chingopísa Dupade uruode quigode aja darasade ore jnese, enga quene ore tangári jórogui Moisés enga áyuguhebátaque ore jnese.

⁴⁰ Ga chise durasepise ga israélgosode ore chobéri dajesui enga ore choru cucarani enga ore chise ójo ga ore chajire Dupade guerani punire ueradéjna to iji tiii, ga ore chojninga: –¡Idógosi arĩa! Ga yico ga yicagóji to Dupade guerani punire ueradéjna. Urénga gajnarenguipise yoquisocade to diríca.–

⁴¹ Mu Moisés chojninga: –¿Ama adúcho to diríca ya uje Dupade chãraque punire ueradéjnai uté ome uaque diríca? Mu e uacadojnóchopója uru casodé quigode ome uaque to rĩ enga e uacapótayopo ojningai punire ueradéjna to. Úngare, ca acayóji to jne uje a ca eso to jne, jeoga cuchárique tṍraji uáguiji sañénguiji yui to.

⁴² Chamáñaje Yocangarádejnai ca nóna uágaja uacajesúode to gu, enga a uacamajosórone chejnápise uaque to jne.

⁴³ Uje dimane amaléquegosode ome uaquéode to, jé aja cananéogosode ore. Enga a ore chejna uaque ¡jaripe! aja uacajesúode to jne. Uje yoquetotiguei garani tupúsu Yocangarádejnai Dupade, mu uté e noñome uáguiji uté jmete to, chamáñaje uacacho uruode aja diríca gu iji deréjna casodé.–

⁴⁴ Mu israélgosode uñane que ore tangári Moisés aquĩraquéode to nanique ga ore jno, mu gusu ore aja dajesúode uje Moisés qué chácariji ore apáringaméi darengu to, jé aja Dupade uruode pi cajo to, qué déji dajogadi uté to.

⁴⁵ Ga ore chise cucarani mu amaléquegosode, cananéogosode ore tuangóa ore iji uté to ga ore chujé ore ga ore chucajningárome ore iji uté to ga ore chose ore iji ore idai Hórma nanique.