Números 12 - Dupade Uruode

Aarón, María ore dojnóngaja Dupade iroguipísi Moisés nanique

¹ Ga jé u nanique uje María, Aarón ore uruode gajnaréngome Moisés uje chisa dacoté tiji purása quedéjnane nanique uje ore uniri i tu Etiopía.

² Ga ore chojninga: "Gajnareque uje ore cho cuchadatei iji Moisés ga que pajirique gadórique to. ¿Ga jé ca ore chimo a? uje Dupade catecã́ri yoque to." Mu Yocangarádejnai Dupade chudute ore uruode udore nanique.

³ Ga Dupade doi nanique ga chirotápise Moisés to uje chirajapise gu uje jnani pajnotaque Moisés to, ga que chosi riji gaté to. Jecucha ga chosi riji jnumone to.

⁴ Ga jé u nanique uje Dupade catecã́ri Moisés, jorane Aarón, María ore to ga chojninga: "Boyo ga arocho yi iji yiguíjna ajé uñai uje i tu 'Dupade, Yutuãjóa Ñane Iji Te.' Ga jé u uje ore jno ga ore chicáji ojningai uté jnese to.

⁵ Enga ore chimo gue abuja nanique uje chicáji ore yui to ga ore chiraja uje Yocangarádejnai pié tu uaté to ome ore. Ga jé u uje chise Dupade iguíjnai piagoi to ga cháji ti ore ejoi. Ga Dupade narare nanique ga uruode ibisócho enga pijnangaidode u Aarón, María ore. Ga chojninga: "Ajoso yi to é." Ga jé ore chose yui to.

^6-8 Ga Dupade narare nanique ga chósi tome ore: "Uacamóño uje yiqueta yu aja yuruode atatasórone uñane to, mu yedugádode u purigode ome ore, jeoga edominone. Jé basa ga Moisés sué ore gáyode jnese uje que cho caru ome dapesudode yiroquéo gotique, ga yoquicatecãrainipise ñane. ¿Ama ca atodóyo gadoi a? uje uacadojnóchoja yiroguipísi to é."

⁹ Ga ájningaránguipíse Yocangarádejnai ome Aarón, María ore jnese uje ore dojnóngaja Moisés ome dasocade udore gu. Ga jé u uje noñome ore iji te jmete nanique.

¹⁰ Enga Dupade pié gue abuja jĩraque chãra re iji gaté iji Dupade iguíjnai iquei. Enga María chajire dabai mu taratapise gai ga aoríchi gai ga dequejnaréquedatéi e díji uaté uje dequejnaréquedatéi uté i tu lépra ome ore nanique. Mu qué María chajire dabai bisideque, ga qué chajire dabai mu dajai Aarón chimo to uje tarata gai ga jĩraque chojningame re iji dajei: '¡Lépra a isagué yoquẽro to jõ!'

¹¹ Ga catecã́ri Moisés ga chojninga: "Yocangarádejná, Moisés á, jé ca o bajuñame yoque to ome yoquichietabáitigade ome ua to. Que yirajagopise cuchárique diríca uje yidojnójoja ua diríca.

¹² Moisés á, jé ca ajuéga yoquẽro ome ao gajnarei uté to. Uje gajnui tu chequé ica carujnai ome dao noñangue ejoi tuté to."

¹³ Ga Moisés catecã́ri Dupade ga chojninga: "Dupade osõripise yoque to. Ga aquetápo yoquẽro ome yoque to jne rĩ."

¹⁴ Ga Dupade chajnai Moisés uruode ga chojninga: "Baraja israélgosode uacajmapiedie to. Uje gosi chetaque datique isocade ome re to ga chutĩ́raja edodie ¡ture! Ga pésu dabi iñoñaringuei ome datirane udore to. Enga chijócãre dabi ga chácariji ore irengúi ejode iji dire garitíode enga chise dire garitíode udore ga quene pujuegate degúi ome uté gosi to jeta diapóji degúi to rĩ ga dirode gare iji ti ome. Ga jé yisocai tupúsu ome María to, ga yujnapise ga cho jeta yutĩ́raja edodie ¡ture! to. Ga chise dire gare iji tíode ga quene ecápise to, enga quene pujuegate degúi ome uaté jne."

¹⁵ Enga ore chijócãre María nanique ga chácariji ore irengúi ejode ga guejnane dire gare iji ti iji ore irengúi ejode. Mu urasade qué ore chirote uaté tiji darengúi nanique ga que ore jnoji darengúi uté to.

¹⁶ Uje dirode e gare iji ti ga María chisápo darasade ore to rĩ ga quene ore jnoji darengúi uté to uje i tu Hazerot. Enga ore jno ga ore chise dajminémei iji erãpetarei ajei to nanique uje i tu Parán enga ore chácariji uté to.