Números 11 - Dupade Uruode

Dupade chingo Moisés uje a chiroque dosipéode aja urasade ore jne ome ore posode iji guedosi chojmarai údode jnese

¹ E chise diri nanique uje Dupade chudute israélgosode ore úringane chi-chi-chío uje ore narañime cucha dacadode gu. Ga ore chijnime Dupade ájningai ome raque nanique ga Dupade chiroque pioi aja ore irengúi ga ore chácariji pioi ajã́ro ga chajuguipise ore agutedie.

² Ga jec u uje ore pijnacarachi nanique. Ga ore chojninga: "¡Moisés á, átaja yoque to é!" Ga Moisés doi ore uruode to nanique ga catecã́ri Dupade ome ore to ga jĩraque Dupade chujnungu sere pioi uté.

³ Enga ore pésu dayaridi tuté i nanique ga i tu Tabéra to nanique. Chamáñaje Tabéra uté i qui tu uje Dupade chisi ome pioguéjnai ome ore iji uté gu.

⁴ Uje israélgosode ore jnoji Egípto to nanique ga egíptogosode uñane nóna ore to aja ore ajesui. Ga e chise diri nanique ga egíptogosode ore áyipiedie déji daboti cásodicáite cucha pibose to ga ore chojninga: "Yujnucopísi yocuniri casica to uje íjnoque yoquibosode iji udojo to." Ga jé u nanique uje israélgosode uñane jnusi to ga quigade ga ore po jnese uje ore áyipiedie déji dosipeque ãrírique úringárique pibose to gu ga ore chojninga: "Yipésupú ga yajopo dosipétigo arione to ga subudépo yoque to jne rĩ jõ.

⁵ Urénga ueradéjna nanique uje yicoi egíptogosode ore iroquéode nanique ga yajo ore gueranone oyite arione to nanique enga subudépise yóguiji arione to nanique. Mu que gusu oyídode arione nanique mu yajo ore acade cucha to nanique, jé aja pepínonie, jé aja melonie, jé aja cebólladie, jé aja ájodie.

⁶ Mu iji udojo ga sirobi chejnápise yoque jnese uje yedugo arureque quedéjnane iji deréjnane jnese uje Dupade chamurase yoquibáyode."

⁷ (Ore ojningane arureque quedéjna uje Dupade chisi ome ore chosi cucha ajñáminie nanique uje perupíjnami ga gajnui tu poridie irisode to ome dáringanie perupíjna.

⁸ Enga israélgosode ore chimáta iji durasedie to. Enga ore nája pĩracadie ajéode to jeta ore pésu tórtade iji gaté to. Ga ore chijáro gaté ga ore pésu dotíyai iji to. Uje ore chetingare bajaque ga ore chojninga: "Jé chopise harína to uje yátago aceite aja ga yimeco iji ñane to."

⁹ Uje qué israélgosode ore mo nanique, mu Dupade e pésu jeta pejnare erámi ga tetáringai e nóna arureque quedéjnane aja jnumi to.)

¹⁰ Moisés chudute israélgosode ore uyacade to nanique enga doi guesi enga chimo ore iji ore iguíjnamone cárpa piagode ga ore poji guesi jnese. Ore po gu uje que dosipétique déji ore uniri uté to enga que toque ore isirotique garãtique cucha. Enga ore chijnime Dupade ájningai to. Enga ore pésupúsu Moisés ujuredie to.

¹¹ Enga Moisés catecã́ri Dupade ga chojninga: –Dupade á, ¿gotique uje basi ome gáguedaté ome yu to ujetiga yirote ore to? Ise ga etaque yu to nanique uje basi ome gáguedaté uaté ome yu ujeta yirote ore to. ¿Ama bajuyaquéode u udore ome yu a?

¹² ¿Ama ore dai u uyu ome bajéode to a? ¿Jeoga ore daté u uyu ga yumuña ore to ga ore chucu yijnanie to a? Enga a ca togome yu to jne ujetiga yimate ore aja punire ueradéjnai uje bangome yocayode ore to nanique.

¹³ ¿Ama yo ringome dosipétigo to a, jetiga yujégo ga cho gáguedaté tuaté to enga yejna ore isirobode iji yitígo to a? Enga ore chise yu gatuaque ga ore chojninga: "¡Be dosipéode ga yajo betígo ãríringo to!"

¹⁴ Enga que toc jeta yisi ome cucha pibosode ome gáguedaté tuaqué to uje ore uatigájnai sué yibai gu. Ga asi ome yátajasónique ome yu ga chátaja yu uje cuchade sué yibai gu.

¹⁵ Mu jeta jé ca asi ome yátajasónique ome yu ga gusu yu ome ore enga be ga ajé yu to. Ujeta jé ũré enga ajnóra yu ga ajé yu ga pujuredie eruei tu ome yu jne.–

¹⁶ Ga Moisés chejna daruode guesi nanique ga jé u uje Pangarádejnai Dupade chajnai uruode to iji quigade ga chojninga: –Moisés á, acué israélgosode dayode uñéngo uje pangaranipise ore ome darasade, jeta ore chise 70 to. Enga ajína ore aja yiguíjnai ajé uñai uje i tu 'Dupade, Yutuãjóa Ñane Iji Te.' Enga ácayoji guesi iji uté ejoi ga arochope yu iji to jne.–

¹⁷ Ga Dupade chojninga: –A yiji jnumi jne enga a yicatecã́ri ua iji ore edominone to jne. Enga a yajuguína baríjogoto Yujopié Espíritu Sánto ga a yĩrája Yujopié tuaté aja bajorane udore ore ajéode to. Ga jé u jne jeta ore nóna ua aja quedéjnane to enga jé u jne jeta ore chátaja ua to ome gáguedaté tuaté to. Enga a jé ca gusu ua jeta barote gáguedaté uaté to.

^18-20 Jetiga e yimate cucha dacadode udojo ga beyoi ga abichoi gáguedaté enga angoño yuruode ome ore to. Ga ojnichome ore to jne: "Beyoi ga aruyópise uágaja jnumone to. Uje Dupade a pésu dapesútedatérique ome uaque dirome. Enga a chejnápise uacasirobode to jne. Uje Dupade chudute to uacayacade. Ga Dupade chudúdapo uacaruode to rĩ uje uacojnicho: 'Yipésupú ga yajo dosipéode jne enga subudé yógome to.' Chudute to uje uacojnicho: 'Yoquiboso de jiei iji Egípto to nanique ga ueradéjna ome yoque jeta yajníngopórasaja yoquirósorone gáyode to ga yajopórasu ore gueranone dosipeque to rĩ.'" Ga ojnichome gáguedaté tuaté to jne: "A uacatióbio iji to jne ga a oyo pabu iji to jne rĩ, uje a acho dosipéode jne ome uacabosode iji guedosi chojmarai údode jnese." Enga yujuyaquéode a u ome ore to jne ome dosipéode uje ore chetaque yu gu ga yejnáreque ore uruode to diríca gu uje ore chisa dabade ome dosipéode diríca ga ore chojninga: 'Ueradéjnapise Egípto ome yoque diríca uje yajo cucha arione iji nanique. ¿Ga gotique gu a uje yijínango Moisés aja erãpe eyutiguei udé to diríca?'–

²¹ Ga Moisés chajnai Dupade uruode ga chojninga: –¿Ga o ringome gáguedaté tuaté jne? uje jiépisi ore to diríca. Ga yisecãco jnanione diríca ga ore chise 600.000. ¿Ama o ringome ore jne a, ujetiga ore tagu cucha arione iji guedosi chojmarai údode jnese?

²² ¿Enga déji rique aquirájnanie jogatique to, jé aja áyasadie to jeta yujégo ga chopise gáguedaté uaté to? Jetiga yote quedéjnarique dérasi de ga a yijnicorase oyite dipesérigo iji ajei mu a qué chonarása ore to, gáguedaté tuaté.–

²³ Ga Dupade chajnai Moisés uruode ga chojninga: –¿Ama adojnóngaja yujopié a? ¿Enga ca cuchárique déji yujopié to ome ua ya? Mu a amóño to dirome jetiga yuruode tocade, jeoga ca tocade to.–

Dupade chajuguína Moisés garíjogoto Dajopié Espíritu Sánto taja Moisés jorane ore ajéode to uje 70 u ore nanique

²⁴ Enga jé u uje Moisés jnoji dayaridi uté enga chicáji gáguedaté ore ga chingo Dupade uruode aja ore. Ga chojninga: "Aruyo uágaja jnumone uje Dupade a chisi ome dosipéode ome uaque dirome." Ga jé u uje doi dajegaidode iji ore dayode enga oidode u 70 enga chijna ore aja Dupade iguíjnai.

²⁵ Enga jé u uje Yocangarádejnai doi jnumi ga nóna gue abuja taja jnumi ga catecã́ri Moisés iji daguíjnai iquei. Ga jé u nanique uje chajuguína Moisés garíjogoto Dajopié Espíritu Sánto taja Moisés jorane ore ajéode to. Enga Dupade Ujopié chacája ore jnese ga jĩraque ore chingo darajatígadatéode aja ñane to enga ore uruode u cucha iyiejájna gu Dupade Ujopié iji ore ajéode. Enga quigade ga que ore dopoi dasocade udore to rĩ uje Dupade Ujopié irajatígadatéode tṍraji ore pijnanone.

²⁶ Enga Moisés ajegaidode uñane uje ore íode u Eldad, Medad ore, que ore chise Dupade iguíjnai to enga jé ore chácariji daguíjnane. Mu ore chuniname eti Dupade Ujopié guerani pirajatíga déji ore to ga ore chatata darajatigade to.

²⁷ Ga disírique chayo aja Moisés to ga chojninga: –Moisés á, Eldad, Medad e ore chatata darajatígadatéode to iji dayaridode iji yoquirengúi.–

²⁸ Enga jnacánique narare to enga chojninga: –Moisés á, ãraque darai tome jnanione udore ore to.– Ga Moisés iroguipise jnacare darai uté to nanique enga i tu Josué. Dai i tu Nun nanique.

²⁹ Mu Moisés chojninga: –¿Ama atodo jeta ore sué yibai ome darajatígadatéode to a? Ga jé ore dóji to ga ore chatata darajatígadatéode to. Yipésupú ga Dupade Ujopiédaté Espíritu Sánto irágurásu yurasade ajéode jnese to jõ, ga ore chatatarása Dupade uru iyiejájnane ome ñane to jnese jõ.–

³⁰ Enga udojo quigade u nanique uje Moisés, ajegaidode jnanío ore chajni aja dapáringaméi darengu jnese to.

Dupade pésu úyujna ga úyujna tuaté di jiriri dipeséjnanie údi iji ore nanique

³¹ Mu chise dire uñai to nanique enga Yocangarádejnai pésu úyujna nanique ga tṍraji yote quedéjnai to ga chirógaja Moisés urasade ore. Enga usereréjnapise ga cho júruru. Ga úyujna di iji ore ga chijnoque jiriri dipeséjnanie aja ore, enga ore chajire ga judúguejna aja ore yui to. Enga jiriridíe déji úyujna ga base ore gai ga jiépisi ore. Enga irágupúsu ore apáringai ejode. Enga irágu ore ejode mu que gusu ore ejode, mu irágu ore idai ejode iji datã to. Ujetiga uñeque jnorásiji ore irengúi tuté nanique ga diguirásiji jnumone iji diri tuté údode, mu a basirásiji dejai tuté mu a qué chimórase jiriridíe iji dejode. Enga basuguedie iji ore ejode chise métro chojmarai iji ore idai ejode udore jnese.

³² Enga israélgosode e ore doi jiriridíe jeta ore chimáta, ga ore chejna deréjna chojmarai uje ore chimáta, jé aja dejai ga ore chuságapója dire uñai te rĩ iji uéchai. Ga uñane unucódedie chejna yijmanáyone ome damátadie. Mu uñane unucódedie jiépisi ga chãraja uñane unucódedie to. Enga jĩraque ore chijnime jiriridíe uchade ga ore pésu daseranone ome to uje ore chuguhese. Ore gaidi tu jeta ca tarata arione ga ore tagu iji deréjnane jnese.

³³ Enga e ore chimate daguhéya bajedie iji udire ga ore tagu to. Uje qué ore déji dachabode gai jnese mu Yocangarádejnai ujuyaquédatéi diringai tu ome ore. Chisi ome dequejnaréquedatéi ome ore ga jiépisi togode iji ore to.

³⁴ Iji cuchade udojo quigade nanique ga ore pésu dapáringaméi uté i ga i jé u Kibrot-hatáava. Ga ore i uté qui tu Pisirope Piba Ducodebi. Chamáñaje ore chijóchame togode ore iji uté nanique, udore ore jnese uje Dupade cho dajuñame ore gu ore áyipie noñánguenie uje que ore áyipiedie jnoji dosipéode nanique ujetiga ore tagu to.

³⁵ Uje israélgosode ore jnoji dajmini Dasirope Piba Ducodebi uté nanique ga ore pésapo darengu uñai to rĩ iji dajminémei to uje i tu Hazerot.