Números 10 - Dupade Uruode

Dupade chiroque israélgosode ore aja pubuchutígo úringáringo pipesute nanique ujetiga ore chubúchu ga ore chiraja cuchade ome ore ubuchugode agoyedie udire

¹ Yocangarádejnai Dupade catecã́ri Moisés nanique ga chojninga:

² "Apéso uacabuchutígo jne jetiga gare uacabuchutígo to. Ga ajároyo guebeque serẽrachuque pórororigo ome paranguéraque ga ayóyo údi ga quérã aja quedéjnane to, ga jé u jne ujeta apéso uacabuchutígo iji uté to. Ga a aroque ubuchusórone aja jne enga a ore chubúchu dabuchugode ga jé u ujeta barasade ore chimáta rágaja ñane jnese. Mu ore chubúchapo rĩ enga jé u uje ore chiraja ujetiga ore jno to.

³ Enga ubuchusõre gárode ore chubúchu jnese ga a ore chiraja jne ujeta ore tibágui ua jnese ga ore chimáta rágaja ñane iji Dupade iguíjna ajé uñai iquei uje i tu 'Dupade, Yutuãjóa Ñane Iji Te.'

⁴ Jé basa ga ubuchungóri chojmára enga ore chiraja uje gusu ore angaránone ome Dupade iguíjnai jeta ore chimáta ñane iji uté to.

^5-6 Mu ujetiga ore pijnacaraidie nóna ore ubuchugode aja gatéode enga ójiyoi gatéode to ome uacacoringai yui. Mu ca apéso uacajochai aja uacajesui jnese, mu arócho uacajnéone ore ubuchuque yúode to, enga a jé u ujetiga uacajnei ubuchuque chise uaque to ga quene uacaboyo to. A jecucha bajade u ore iji guedé garani yui to jne, ga ore quigaminórone u umusoi garani yuminórone to jne rĩ. Enga uacasocai u uté jnese jne jetiga boyo ga ajnicho ñane aja doi jne.

⁷ Mu ujetiga ca ore pijnacaraidie nóna ore ubuchutígo ga a arajáyo jne uje cachi ore gaidi tu jeta amátayo uágaja ñane.

⁸ Ga a yirógode Aarón ape disi ejode ore u jne ore ubuchugode ubuchusórone to. Ga a gusúpusu udojo ore ome to jne jeta ore chubúchu to. A ca pecãraque yuruode udore quitique jne ome ayoré uñeque to.

⁹ Ujetiga israélgosode uacamajósoningo cugujnárasi uaque to jne iji uacanínique ajénique to, mu uacabuchugode ubuchusóningo ore cugujnáji dabuchugode yúrique to enga ore chubúchu ga ore naráraja dabuchugode ga ore chinguíra dabijnanone aja dosadode jnese to enga jé u ujetiga arajáyo jnese uje uacamajosórone u, enga jĩraque boyo ga beyoi pocaningai ome ore to. Enga a yudute ore ubuchugode agoyedie to enga a yáta yu aja uaque to jne enga yãraque uaque jne iji jõcaratade ore iquei. Ga a yisi ome uacáringáringo pujnuéngaisóño ome uaque to ujetiga ajnuéño uacamajosórone ore gáyode to.

¹⁰ Que gusu pocaningane mu a yirógode chubúchu dabuchugode to jne iji uacaninaquéode jogadode dire to, jé aja guedoside jeta tocádesi to uje qué abape ga apéso uacaninaquéode ome guedoside úringamí abape iji tocachúringai dire to enga yirógode a ore chubúchu dabuchugode to. Enga a jé ore chubúchapo to jne rĩ uje uaquẽcho uaqueranone cuchiso ome yu to uje uacajegaidi tu yocajesereringai ome ñane to gu. Ga a yudute uacabuchugode agoyedie ga a yirasique yu ome yurasade israélgose uáguiji uacaniri to. Chamáñaje uacangarádejnai Dupa uyu to gu."

Israélgosode ore jnoji dapáringaméi darengu iji erãpetarei nanique uje i tu Sinaí

¹¹ Enga siqueredie e gare ome israélgosode ore uje ore jnoji Egípto nanique. Enga e ore guejnane guedosi gare ga e garósi díningo jeta ore chisápo gadióguei to rĩ. Mu uje ore chajire Dupade iguíjnai mu ore chimo gue abuja iji Dupade iguíjnai gai ga cho jñáraja gaté.

¹² Jecute israélgosode ore pésu dagúchade ga ore pésu dajochade aja dajesúode ga ore jno jnese to. Ga ore jnoji dapáringaméi darengu iji erãpetarei to uje i tu Sinaí, ga ore jno ga ore chajnápo gue abuja aja jnumi to rĩ aja ujoi erãpetarei to uje i tu Parán. Enga jé u uje gue abuja chácare to.

^13-14 Uje ore jno ga ore tangaripísi Moisés uruode quigode to ga bajaque jõcaratade aja ore iquéode to. Ga jõcarataque bajade u judágosode ore uáguedie jnese. Ga bajaque ore aja ore iquei ga ore chijnoque dabandéra uje ore pijoguto tu uaté to gu. Ga jõcaratade ore eduguéjna cuchábi uje i tu Naasón nóna bandéra jnungórone aja dajei to ga uté dayé i tu Aminadab nanique.

¹⁵ Ga ore quigaminórone u ísacargosode ore ga ore eduguéjna cuchábi nóna ore aja dajei to uje uté i tu Natanael nanique. Ga uté dai i tu Zuar.

¹⁶ Ga ísacargosode ore quigaminórone u zabulóngosode. Ga ore eduguéjna cuchábi nóna ore aja dajei to uje uté i tu Eliab. Ga uté dai i tu Helón.

¹⁷ Ga ore chajnangarase Dupade iguíjna cuchábi péode ga ore chisi Gersón ape disi ejode, Merári ape disi ejode iji ga ore chijnoque péode to iji jõcarataque bajade ore quigade.

¹⁸ Ga jé u uje jõcarataque ejode ore quítequigája Dupade iguíjnai jnungórone quigade. Ga bajade u rubéngosode ga ore chijnoque dabandéra to uje ore pijoguto tu to ga ore nóna deduguéjna cuchábi aja dajei to uje uté i tu Elisur. Ga uté dai i tu Sedeur.

¹⁹ Ga ore quigaminórone u simeóngosode ga ore nóna deduguéjnai aja dajei to uje uté i tu Selumiel. Ga uté dai i tu Zurisadai.

²⁰ Ga simeóngosode ore quigaminórone u gádgosode ga ore nóna deduguéjnai aja dajei to uje uté i tu Eliasaf, ga uté dai i tu Deuel.

²¹ Ga gádgosode ore quigaminórone u Coat ape disi ejode uje ore chijnoque Dupade iguíjnai erásorone cucha to uje puyágome ayoré quedéjnarique ore to jeta ore chijnoque. Enga Dupade iguíjnapísi jnungórone ore déji ore iquei ga ore chise dapáringaméi darengu enga jĩraque ore pésu Dupade iguíjnai aja quigode bajaque, ga jé basa ga erásorone jnungórone ore di to ga jĩraque ore na cuchade aja jogadode to.

²² Ga Dupade iguíjnai erásorone jnungórone ore quigaminórone u efraíngosode ore to ga ore chijnoque dabandéra tiji ore quigábode to ga ore pijoguto tu uaté to. Ga ore nóna deduguéjnai aja dajei uje i tu Elisáma. Ga uté dai i tu Amiud.

²³ Ga efraíngosode quigaminórone u manasésgosode ga ore nóna deduguéjnai aja dajei uje uté i tu Gamaliel. Ga uté dai i tu Pedasur.

²⁴ Ga manasésgosode quigaminórone u benjamíngosode ga ore nóna deduguéjnai aja dajei uje uté i tu Abidán. Ga uté dai i u Gedeóni.

²⁵ Ga ore erueminórone u dángosode ga ore chijnoque dabandéra iji ore quigade to ga ore pijoguto tu uaté to gu. Ga ore nóna deduguéjnai aja dajei uje uté i tu Ahiezer. Ga uté dai i tu Amisadai.

^26-27 Mu asérgosode, neftalígosode ore cháta rágaja ñane iji dángosode ore uáguedie quigade. Ga asérgosode ore eduguéjnai i tu Pagiel nanique, ga uté dai i tu Ocrán. Jé basa ga neftalígosode ore eduguéjnai i tu Ahíra. Ga uté dai i tu Enán.

²⁸ Enga jecucha ga israélgosode ore isocabeque dasocabéode udore nanique uje ore jnoji darengúone gatuaque.

Moisés catecã́ri dacoté dajai jetiga nóna israélgosode ore aja dajesúode to nanique

²⁹ Enga e chise diri nanique uje Moisés catecã́ri dacoté dajai jetiga nóna israélgosode ore aja ore ajesúode to. Uje acoté dajai uté i tu Hobab ga purása quedéjna ome israélgosode ore nanique ga ore chojningame urasade to nanique madiángosode. Ga uté dai i u Reuel ga madiángose to. Ga Moisés catecã́ri ga chojningame to: –Hobab á, yicatecã́ri ua to á. ¿Jé go uje que ajína yoque to a? Uje yicagóji Dupade ojningai punire ueradéjna to gu uje e chichagája israélgosode yoqui nanique jeta chisi ome yoque to jne. Enga a jé ca yujuséjo ua to jne iji yocujade ujetiga ajína yoque to. Uje Yocangarádejnai nóna yógaja yocajesúode to ga caniranguipísome yoque to. Yocajneque uté uru iyiejájnane to enga a jé ca toque jeta jé ca doi daruode quigode ome yoque jnese jne.–

³⁰ Mu Hobab chajnai Moisés uruode ga chojninga: –Úngare á. Que yipota. Uje iapade ore de ta gu, yiguiosode ore jnese, ga yipota jeta yajni to aja yocuniri.–

³¹ Mu Moisés chaquĩ́ra ga chojninga: –Ca ajni to. Enga ajína yoque to. Chamáñaje barajapise erãpetarei udé údode gu. Enga a u jne ujetiga yicagóji pajmitígo to ujetiga ueradome yoquirengúringo jogatígo to.

³² Ujetiga ajína yoque to ga a bajnepítigo déji to jne ujetiga Yocangarádejnai e doi daruode ome yoque to ga yicoi ojningane cucha omío to uje a chisi ome yoque jne, dojningane cucha.–

^33-34 Ga jé u nanique uje Moisés acoté dajai tuté nóna israélgosode ore aja quedéjnane to nanique. Ga jé u nanique uje ore jnoji erãpetarei Sinaí ga ore chajna Dupade uruode pi jnungórone iji jnumi ga cho jetiga Dupade uruode pi cajo chingo ore irengu ejórigaja ore to. Enga ore jno nanique ga Dupade ichajagué gue abuja déji israélgosode ore gai ga nonapísa ore aja dajei iji deréjnane údode jnese. Enga dire ga obiréjnapise iji ore gai to. Ga dirode gadioque nanique uje quene ore chise darengu ejoi to.

³⁵ Uje Moisés chimo uje Dupade uruode pi cajo jnungórone e ore jno enga Moisés jecucha catecã́ri Dupade enga chojninga: "¡Yocangarádejnai Dupade á! ¡Be ga ṍra yocumajosórone iji yoquiquéode to! ¡Enga ango báringai pirosobate aja betesórone ore iji yoquiquéode to enga a ore chimo ua jne ga ore chayóji yoquiquéode to!"

³⁶ Ga Dupade uruode pi cajo jnungórone ore chácare to ga jé u uje Moisés tibidápoi Dupade gaté rĩ. Ga chojningame Dupade: "¡Yocangarádejná! ¡Ajni israélgosode yocuague gai to é! ¡Enga ácare yoquejode to é! ¡Uje barasade israélgose jiei yoque iji yoquiyaridi udé é!"