Nehemías 8 - Dupade Uruode

¹ Mu jĩraque yocurasade ore chimátapo ñane aja yoquidai Jerusalén abuéjna nanique rĩ. Enga abuéjna uaté idógosiji yocujuyaquei piagode uñai uje piagoi tuté i tu Yodi Gajnei Piago. Ga jé u uje ore chojningame ore acadisṍri Ésdras: "Be Moisés urusarane Dupade urúo ga ãraráraja quigode gai iji yoquiquei ga yangácoi quitígo to. Uje Pangarádejnai Dupade chisi ome daruode udore ome israélgosode yoca cásodicáite ore nanique."

² Dire chojmarai u nanique iji ore isecaranone guedosío uje chise gare iji ti ga yimátago ñane aja abuéjna iji yoquidai uté nanique ga jiei yóguiji nanique ga jnanione ore déji jnese, jé aja chequedíe to rĩ, jé aja gapudíe to rĩ, jé aja jnacarode ore to nanique, jé aja disiode ore to nanique rĩ uje e ore chiraja cuchade to, ga Dupade iroi sacerdote Ésdras di Dupade uruode údi ome yoque iji yoquijogadi uté nanique.

³ Ga jé u uje Ésdras naráraja Moisés urusarane quigode ga yoco paráguiji jnumi iji ejode, ga naráraja iji durasé ga jé chuságaja guedé gatócoro. Uje yugúcoji abuéjna uaté uje déji Yodi Gajnei Piago ejoi nanique, enga que uñeque chicai siñeque. Uje yoquigaidi u gu jeta yangácoi Dupade uruode quigode ome yoque uje Ésdras uté naráraja gai iji yoquiquei.

⁴ Uje yico abuéjna uaté ga yipéco gaserani iji ujeta Ésdras chague iji gaserani ga naráraja Dupade uruode gai iji yocajei tiji. Mu Ésdras jorane pacadisóño ore déji gaserani gai to iji ejode ga ore chácariji ejoi ga ore cháguena ãrachua. Udore ore íode u udojo: Matatías, Sema, Anías, Urías, Hilcías, Maasías ore. Jé basa ga pacadisórone uñane ore cháguena arasei to ga udore ore íode u udojo to nanique: Pedaías, Misael, Malquías, Hasum, Hasbadána, Zacarías, Mesulam ore.

⁵ Ga Ésdras chuchẽre Dupade uruode gai ga chayo údi iji dajmainie ga yitogóji gai jnese iji jmainie. Uje yimóngopise iji jmainie uje Ésdras chãraja yoque gu. Uje yimóngo jnese uje Ésdras chuchẽre Dupade uruode gai ga yitijagopísa ga yiyáguego jmame jnese.

⁶ Enga Ésdras chisi Pangarádejnai gai, ga chojninga: "¡Picotaque cuchape israélgosode Yocangureni Dupa Pujnuéngaisṍre!" Ga yurasade ore iji uté ejoi ore chãrai dajmanáyone iji gatéode iji uté ejode jnese. Ga ore narare jnese enga ore chojninga: "¡Ueradéjnapise! ¡Ueradéjnapise! ¡Yinínango yoc! ¡Yinínango yoc!" Enga ore doi jnese enga ore chichaga dagataidie aja jnumone jnese, ga ore chichagápo dacurutedie aja jnumone to jnese rĩ, enga ore chisi Pangarádejnai Dupade gai jnese.

^7-8 Enga Ésdras jorane ore, ore naráraja Dupade uruode gai, mu ore cha dara ga levígosode uñane jĩraque ore chajnerame ore acajnaquéode iji ore údi gaté ome darasade. Mu jé ore chajnera dádi uje Ésdras ore cha dara ga jĩraque ore chajnerame ore acajnaquéode ome darasade iji dejode. Ga levígosode udore ore íode u udojo uje udore ore chajnerame ore acajnaquéode ome darasade: Jesúa, Bani, Serebías, Jamín, Acub, Sabetai, Hodías, Maasías, Kelíta, Azarías, Jozabed, Hanán, Pelaías ore. Ga Moisés urusarane Dupade urúo choqui guesi ome israélgosode ore jnese uje ore déji abuéjna uaté nanique.

⁹ Enga israélgosode ore popise dejode. Ore chiraja jóroque dáringáringo máraque gu jnese, uje ore chudute Moisés urusarane Dupade urúo quigode gu iji dacadisórone ore pijnanone. Enga Ésdras, jé aja Nehemías uyu, jé aja levígosode yaquírango ore ome ore agoyedie ga yajógo ore aja jnumone enga yojnijo: "Ayáyo uacagoyedie, uacajnusiétigade ore uje dire puyai tudé gu ome Pangarádejnai ga pininaquei jogadi turásu diri tudé ome uacangureni Dupade uté."

¹⁰ Enga Ésdras nejé ore údode ga chojninga: "Ayáyo ga beyoi uacabosode enga acho enga eduyo uacabose unérone ome uaque jne. Enga ójiyopo víno "dulce" rĩ uje uneréjnapise uté ga que chujé ayorérique. Mu uacajorane uñane ujetiga ca ore potique cuse enga abichoi ore to enga a ore tagu uacabosode to jne uje Pangarádejnai Dupade gajneque diri udé gu." Enga chojninga: "Ayáyo uacajnusiétigade udore, enga anínañopúsu uaque iji Dupade iquei, uje petotiguei garani tu pininaquei uje garani tu Dupade gu."

¹¹ Enga levígosode jé chome ore to, ga ore chojningame darasade iji dejode: "Ayáyo uacajnusiétigade jmete. Uje pininaquei jogadi tu diri tudé uje yangácoi Dupade uruode iji diri tudé gu."

¹² Ga jé u uje yocurasade ore cha dajnusiétigai ga ore tagu dabosode jnese enga ore chóji dajódode víno "dulce" to rĩ uje que chujé josónique ayoré. Enga ore tibidi dajorane jeta ore tagu ore posode. Enga ore nínapúsu raque aja quedéjnane enga ore chojningame ñane: "Uneréjna uje yocacadisórone ore chacadape yógome Dupade uruode rĩ. Uje e yirajágo ore acajnaquéode quigode to."

Israélgosode ore pésu dajnusinamáni dire uté uje ore moji daguíjna potíode údode iji nanique

¹³ Ga dire uñai enga gusu judíode ore angaránone uje ore chamátapo uñane ome Dupade uruode rĩ enga jnani uécho ore. Ga levígosode ore déji to. Enga ore gaidi u gu ujetiga ore tangaripísi Moisés urusarane iji Ésdras pijnani ga chacate ore ome udore quigode.

¹⁴ Mu uje Ésdras ore naráraja Moisés urusarane Dupade urúo enga ore chise jogadi uje chatata ore jnusinamáni dire quigode uje uté i tu Piguíjna Potíode. Uje Dupade uruode pei uté chatata udore ome ore eti chise guedosírigo uje gare iji ti enga israélgosode ore pésu ore jnusinamáni dire uté nanique uje ore moji daguíjna potíode údode iji nanique.

¹⁵ Ga ore chingome ore jnusinamáni dire uté quitígo ome darasade uñane to iji ore idáidatéi Jerusalén, jé iji pidáyabode to iji Jerusalén ejode. Enga ore chojninga: "Beyoi ga yujnusinángo yoca cásodicáite ore icoringai dire to iji egíptogosode ore uniri. Acayóji erámi ga acueyoi guiguíjna cutádode, jé aja porójodie ga yirógo yoquiguíjna potíode ga yipéco yocayode jmapié cásidicáite uje ore pésu daguíjnane aja dajesúode nanique. Ga yicopísi Moisés casicaite urusarane quigode jnese ome judíode uyoque yocujnusinamáni dire uté."

¹⁶ Enga ore doi poridie, porójodie udire ga ore chimate daguíjna potíode aja gatéode jnese ga ore ipesudode guiguíjna póño udojo déji yoquidai údode jnese. Uñane chicha dorade daguíjna póño aja daguíjnane ejode, jé uñane chicháji Dupade iguíjna cuchábi ejopísode, jé uñane chicha daguíjna potíode aja abuéjna ujade uje uaté idógosiji yocujuyaquei piagoi uje i tu Efraín Gajnei Piago, jé uñane chicháji yocujuyaquei piagode uñai ejode to uje uté i tu Yodi Gajnei Piago.

¹⁷ Enga udore mochádode gare iji ti iji dorade guiguíjna pore ajéode. Uje ore jnusinamánone díño quene eruei u dire garijitíode gu. Enga ore ininaquei que eruénique cuse ome ore uje ore dopísi Dupade uru quigode gu. Uje israélgosode ore angarádejnai upúsu jnani bajai Nun ujnacari Josué nanique ga que ore chimoque siqueréraque uje ore jnusina dajnusinamáni dire uté nanique. Mu Josué uté toi nanique enga que uñeque jnusinápo dajnusinamáni dire uté rĩ, ga jé chuságaja diri uté nanique uje Ésdras chacate ore ome ga quene ore jnusinápo nanique rĩ. Enga siqueredie jiépisi iji udore ujai uje que ayorérique jnusinápo nanique rĩ enga jé chuságaja Ésdras uje chacate ore ome.

¹⁸ Uje ore déji dajnusinamánone dire gáyode nanique mu Ésdras que chacho chacate ore ome Moisés urusarane quigode nanique. Enga dirode gare iji ti uje chacate ore nanique. Enga Ésdras ajirigode jogadode jiépisi nanique iji Moisés urusarane quigode uje naráraja gáyode iji ore iquei. Mu dire gare iji tíode íjnoque nanique ga ore chimátapo ñane rĩ uje dirode gadióguiji ti nanique. Enga ore doi dáguedaté ga jiei ore iji dáguedaté uaté nanique enga ore doi dasocai uje ore jnusina Dupade uruode ome ñane enga ore chojninga: "Dire puyai tu ome yoque uje Dupade gajneque dire puyai udé gu."