Nehemías 6 - Dupade Uruode

Purása quedéjnane ore eduguéjnane ore pésu dáyipie noñánguenie ome Nehemías ore

^1-2 E yimáco yocujuyaquei aja gaté. Ga amirone u piagode eti yaníco jorídedie aja. Mu uje yocumajosórone ore eduguéjnane chudute yocujnomei uje e yimáco yocujuyaquei aja gaté jnese, enga purása quedéjnane eduguéjnane udore ore chucué dáyipie noñánguenie ome yoque. Yojningane u ore eduguéjnane uje udore ore íode u Sanbalat, Gesem ore. Udore ore chiroque darusarane aja yu enga ore chojninga: "Nehemías, be pararinguei uje i tu Óno jne, ga yicatecãcoi ua iji yoquidáyode uñeque uje déji pararinguei ajei." Mu yiraja uje ore ujuyagaite uyu jne. Ore eduguéjnai uté uje i tu Gesem unirípisi tu Arábia nanique, ga jecucha uté jõrápisode u eduguéjnane uñane uje ore íode u Sanbalat, Tobías ore.

³ Mu yiroque yirógode aja ore ujetiga ore chingo yuruode aja ore enga yojningame ore: "A ca yibágui uaque jne uje yarengu yisagode cucha pisaguíji de gu. Ujetiga yibáguirási uaque enga a ca yirógode ore chirajárase dasagode cucha pisaque quitique eti gusu ore ome."

⁴ Mu jé ore chajo raja uje ore tibidi yu enga ore urusarane chise yu uje gagájni ore urusarane jogadode ome yu, ga ore uru qui jé chojmára ome yu iji darusarane. Mu jé cho yu to. Uje yichajnai ore urusarane mu yuru qui chojmára ome ore to.

⁵ Mu ore eduguéjnai Sanbalat uté e chirógapo darusarane aja yu gaté rĩ, enga e chejna yijmanai yajnéone urusãracho. Mu urusãraque ejode enga que chijnami pijnani, ga guesája.

⁶ Ga uruode chósi tome yu iji darusarane: "Yocurasade iji de ore cho derángu bei jnese, uje a apota báringai eduguéjna cuchape to jne. Enga yujode eduguéjnane uñai uje i tu Gesem uté chingo yu uje uaqueróyo uacajuyaquei enga amácho aja gaté enga a jé ca pungurañaque uáguiji uacajuyaquei ajei jne. Enga uacagaidi tu gu jetiga ayáyo angáchoi eduguéjna cuchábi Artajérjes uruode quigode jne."

⁷ Ga chojningame yu: "Enga e garósi yui jeta acatecã́ri uacangurenone Dupade uruode atatasóño uñane ore eti ore pésu ua jne enga eduguéjna cuchape ua jne iji uacaniri Judá uté údode. Que pimo eti yocurasade udore ore ojñane udore chise eduguéjna cuchábi Artajérjes uté jne, enga a ájningaránguipís ome ua jne. Jecute be ga áta ua aja yoquijorane uyoque to enga yicatecãcoi ñane jne ome cucha dacadode udore."

⁸ Ga jé u uje yichajnai uté uruode to iji urusarane, enga yojninga: "A cachi bapesute baruode udore quigode ome yajéode, uje que ũrepise baruode quigode gu.

⁹ Mu yiraja uje uacagaidi tu jeta ajucho yocagutedie ome uacaruode. Uacagaidi upo rĩ eti yiserẽrángoja iji uacaruode jmainie. Uje a ojnicho diríca: 'Yocurusarane a chise ore jne enga a ore cha ore chiro ore ujuyaquei aja gaté jne.' Mu cachi uacajéo ome yoque. Yujnucopísi yógome yocorai yocujuyaquei aja gaté jeta yimáco jne."

¹⁰ Yocurása uñai déji nanique uje uté i tu Semaías. Uté dai i tu Delaía, jé basa ga dáquide i tu Mehetabel. Ga chise diri uje yudute uje yocurásai Semaías uté suru dabai iji daguíjnai. Ga jé u uje yibágui uté iji iguíjnai. Uje yise iguíjnai ga uté catecã́ri yu ga chojninga: "Aguito, Nehemías, ga yico ga yicagóji Dupade iguíjna cuchábi ajei uñai jne ga yujuco yoquibai iji jne. Uje Dupade e chingome yu uje a ore chujé ua jne, jé u iji dejai tudé gajiné. Mu ujetiga agúsi Dupade iguíjna cuchábi ajei jne, enga a ca pijocayaque ua jne iji uté."

¹¹ Enga Nehemías uyu yichajnai Semaías uté uruode enga yojninga: "Pangarate yu ome yurásarigo arĩa, ga yiyaróga eti yacose yu iji Dupade iguíjna cuchábi ajé uñeque ajénique jeta ca chuque yu. Gusu Dupade irógode sacerdote uje ore gajnei tu picatecãraitigade ome darasade uje pujuegate Dupade iguíjna cuchábi ajépisi ome ore, ga a ca yijína ua aja jne."

¹² Mu yirajapise uje que Dupade urúo ome uté, mu obiréjna ome yu uje purása quedéjnane ore eduguéjnane inejequéo ome uté, ga yojningame yu: "A ore chisi ome daplátadie ome uté diríca, jecute chãra jóroque yu." Yojningane u ore eduguéjnane uje ore íode u Sanbalat, Tobías ore.

¹³ Yiraja uje ore gaidi u gu jeta Semaías uruode pésurásu yisadodéringarique enga yipésurásu cucha gajnarétique ome Dupade ga deroco Dupade ome yu. Ore gaidi upo rĩ ujetiga yurasade ore chududirase yujnomei uje yipésu yate gajnaréngone ome Dupade enga e que ore tangárapoi yu rĩ.

¹⁴ Yicatecã́ri Dupade ga yojninga: "Dupadé, Yangureni á, ca acadígui eduguéjnane udore uru gajnaréngone udore ome yu. Jé aja baruode atatasórone uñane uje ore chãra yu to enga ore pota jeta ore chajuque yaguté to ome daringaquéode darúo, jé aja baruode juto uaté chequé to uje chajuque yaguté to ome darupatáringane to. Uje uaté i tu Noadías. Ca acadígui unojo ore isoca gajnaréngone udore ome yu jnese."

¹⁵ Yoquejnane dire guejnanie ayoré gare nanique, ga chejnapo ayoré uñai jmanáyone rĩ ga gare iji guidai te rĩ uje yimáco yocorai yocujuyaqué aja gaté nanique. Uje yimáco yocujuyaquei aja gaté nanique ga yimácoji guedosi nanique uje uté i tu Elul, ga 25 de Elul u nanique uje yimáco yocujuyaquei aja gaté jnese nanique.

¹⁶ Enga chajuguipise pachamite quedéjnane unirisórone ore agutedie iji yoquejode uje yimáco yocorai yocujuyaquei aja gaté. Enga cho jetiga íjnoque ore etotiguei iji yoquijmainie. Uje ore úringane dicotárechoquí chicai jnumi ome ore. Ga ore chojninga: "Ore angureni Dupa u gu uje jĩraque ore chimate dajuyaquei taja gaté, enga ore úringane pirosobate e jogadi u ome yoque."

¹⁷ Mu purása quedéjnane ore eduguéjnane uñai qué chajo raja dáyipie noñánguenie ome yoque uje uté i tu Tobías. Uje uté jecucha ga churúsãre darusarane aja judágosode yocurasade uñane ore uje ataque ore, ga eduguéjna ore rĩ ga chiroque darusarane aja ore.

¹⁸ Uje cáma yugúsiji yurasade ore uniri Judá uté nanique ga yurasade udore uñane ore irasique purása quedéjnane ore eduguéjnai Tobías uté nanique. Uje eduguéjnai uté iyoquíjna yocurasade uñai nanique gu uje iyoquíjnai uté i tu Secanías, uje Secanías uté dai i tu Ara. Enga Tobías ujnacari Johanán jé dopoi dayé isocai to nanique rĩ, enga chucué dacoté iji yocurasade ore urodie nanique. Enga jé u nanique uje yocurásai Berequías ujnacari Mesulam chisi ome daro to ome uté nanique. Ga jé u uje udore ore cho dacayáji purása quedéjnane ore eduguéjnai Tobías iji yocujade nanique.

¹⁹ Ga jé u uje uté jõrápisode chicota uté iji yejode uje yujo judío ore mu. Enga jecucha ore jute yuru quigode ome uté to. Enga que toc jeta ca uté chiraja judíode yoquisocade iji dirode jnese uje ore jute judíode yoquisocade ome uté enga jé u uje Tobías uté churúsãre darusarane ome yu gatuaque. Gaidi tu gu ujetiga aringaquéode chajuque yaguté.