Nehemías 5 - Dupade Uruode

Arorade que ore chiraja dasocáringome raque uje garósi ore iplátadie gu

¹ Mu unojo quigade nanique ga arorade, jé aja udore ore acotedie ore chopise dáyugu raque gu dajmátaringuéi. Enga ore chetaque darasade atacho isocade uje que posongaquérique déji udore ajénique gu ome ore.

² Enga ore chojninga: "Yocabode uyoque, ¿jé yoco píringome yoque jne uje a yitogoi jne ome chaguhéode? Uje jiei yocabode gu ga que yirajágo yoquisocáringome yoque jeta yicoi trígo oredie jeta yajo to enga ca yitogoi."

³ Ga uñane chojninga: "Uje íjnoque yoquiplátadie diríca enga yicatecãcoi ugucharane iji yocujade enga yojnijo: 'Yijnama bapláta jne.' Mu ore chojningame yoque: 'Ajna mu ujetiga ca amate bacuénta jne enga a yo yajnéngu baguíjnai jne. Jeoga yo yajnéngu bejnai. Jeoga yo yajnéngu bajnei jnupe petique.'"

⁴ Jé basa ga udore jorane ore chayója iplatarane, ugucharane ore enga ore chojningame ore: "Bamo uje íjnoque yoquiplátadie ome eduguéjna cuchábi jeta yoco yocoré to ome uté. Jecute yijnama jne ga jé u jeta yoco yocoré ome eduguéjnai." Mu jnani atade udore jé ore isocai u dasocai uté ga ore chojninga: "Ajna yipláta jeta uacoyo uacoré ome peduguéjna cuchábi uté, mu ujetiga ca amácho jne enga a yo yajnéngu uacaguíjnai jne, jeoga uaquejnai jne, jeoga uacajnei jnupe petique jne."

⁵ Ga ore chojninga: "Jé judío yoque to arĩa, ga yocurása atátigo, uyoque, jé yocopise ñane. Udore ore abode, yocabode jé ore chopo ñane rĩ. Mu yocabode u uje yẽco ore ome atade ore jeta yajo ore oredie, ga ore doi jnani atade udore ore iroquéode bisideque. Jecute yocuro uñanie e ore déji dáringanie pirogue, ga yocopise yocáyugu uje que pisocai cuse ome udire jeta yicopoi udire oredie rĩ enga ore chatire yocurodie yoquibáyode. Que yirajágopo yoquiquetangónique garãtique cucha ome yoque rĩ. Uje e yejnángo yoquiguíjnane, jé aja yoquejnane, jé aja yocajnéone jnupe aja ore jnese. Ga e que cucha piquetangónique dépoji yoque rĩ jetiga yimáco yoquijnose carubode iji ore."

⁶ Mu Nehemías uyu ga, uje yudute atade, ugucharane, eduguéjnane ore isocade udore iji arorade udore ore pijnanone, enga ájningaránguipíse yu ome atade, iplatarane, eduguéjnane udore ore jnese.

⁷ Yejna yáyipiedie aja cuchade udore bajaque, enga quigade enga yipojna eduguéjnane, jé aja ugucharane, iplatarane ore ga yingo ore isocade quigode aja ore. Yibidi yurasade judío ore jnese to jeta yicatecãcoi ñane jnese ome cucha dacadode udore.

⁸ Uje e ore déji yejode jnese ga yicatecã́ri ore jnese ga yósi tome ore: "Israélgosode uyoque jecucha yijóchago yocangureni Dupade ajei údi ujetiga Dupade chijnime yocurasade iji purása quedéjnane jmainie, enga chatire ore yoquibai jetiga yimóngo ore iji yocujade to. Uje purása quedéjnane udore ore angurenone dupa cãra dasocade ome yocangureni Dupápisi isocade to. Mu quedéjna uacasocai ome yu, uje uacasocade jé cho purása quedéjnane isocade to uje e uacasayo uacarásapísode to ga uacoyo uacaroque gaté iji ore. ¿Ama jé yo ringome jne a, ujetiga yijnimápo ore iji uacajmainie gaté rĩ?" Mu yiya dara, ga íjnonguipíse ore uru quigode ome yuruode.

⁹ Mu igasique yuruode ga yicatecãrápoi ore rĩ, ga yinejé ore údode ome yuruode ga yósi tome ore iji yejode: "Ayáyo uacasocade uje gajnarécho gu. Omi tu ujetiga uacacuegode urásu dara omone ome yocangureni Dupápisi, ujetiga ca pujñiete Dupade ome uacasocade udore. Uacamóño uje a yocumajosórone udore uje ore angurenone u dupa quedéjnane a ore cho yoquiyoguéji uacasocade udore enga a ore chojninga: 'Cajicho to judíode udore uje ore chajnose ñane ome uñane ugúchade.'"

¹⁰ Ga yojningame ore: "Beyoi yoquijogasúode, yijorane yoquisocade to. Uje ore chutai yógome yoquiplátadie, jeoga yocacade trígo to, mu que yucuegoi oré to ga que yajnóco ore to ome ore iguíjnane, jé aja ore gajnéone jnupe, jé aja ore guejnane to rĩ. Mu jetiga chise dínique jeta ore chimate yoque enga a jé ca yutágoi ore ijnose carubode iquei. Jeta ore chimate yoque ga jé areque. Mu ujetiga ca ore chimate yoque enga jé arégapo to rĩ." Ga yojningame ore: "¿Ama ca ueradome uaque a? jeta ãroño ore ijnose carubode iji uacáyipiedie ajéode."

¹¹ Ga yojningame ore: "Beyoi, ga atireyo ore ugúchade ore gáyode to jne, jeoga ore iguíjnane, jeoga ore guejnane, jeoga ore iplátai, jeoga ore acade cucha, jeoga víno, jeoga aceite. Mu beyoi ga atireyo ore gáyode jnese."

¹² Enga jĩraque ore chajnai yuruode enga ore chojninga: "A yatirego cuchade udore ore gáyode jnese jne." Ga ore chojninga: "A yatirego jne ga a ca yutágopoi cucha uñénguiji ore gari jne rĩ. A yicoi bojningane udore cucha jnese jne." Enga yibidi Dupade iroguipísode sacerdote ore uje ore gajnei tu picatecãraitigade ome darasade ore ujetiga ore déji yocari to iji yocuague. Ga jé u uje yicatecã́ri eduguéjnane, iplatarane ore to enga yojninga: "Beyopoi uacaruode ucode jne rĩ, ga Dupade irógode ore chududipise to jne. Ga a uacáringane ũrepíso pijoguipise jne."

¹³ Ga Nehemías uyu ga yiporigase yiguidé aja jnumi enga yojninga: "A Dupade jé isocai u unome uaque gosi jne jeta ca ũrepise gosi ome uruode uje uacangoñome yoque que. Enga a jé doi uaque gosi isocai jne uje uaquejnáño ore ugúchade jnese, ga a chejna uaque gosi ugúchade jnese to jne." Enga eduguéjnane ore jnese, jé aja atade, iplatarane ore, ore chajnai yuruode ga ore chojninga: "Baruode qui jé upúsu yocuruode qui to rĩ ome yoque." Enga e ore nínapo raque jnese jne rĩ, enga ore chacãre Dupade gai ome cucha dacadode udojo. Enga ore doi daruode udore jnese, enga uñeque que déji jetiga ca doi darúrique quitique.

Caniranguipise Nehemías uté nanique ome jorane eduguéjna

¹⁴ Pérsiagosode, médiagosode ore eduguéjna cuchábi Artajérjes ichajapite uyu aja yúringai eduguéjna nanique, uje uté guejnanie siqueré chejna ayoré chojmarai ome dáringai eduguéjna nanique. Mu uje Artajérjes uté guejnanie siqueré e chise 32 ome dáringai eduguéjna nanique, mu qué chijnóra yu to ome yúringai eduguéjna to iji yurasade judío ore ujade. Uje uté a changureta yu ome cuchade udore gu. Ga uté chojningame yu nanique iji taningápisi: "Agu barasade ore gueranone cucha to. Uje jé tiógara eti ore cho boré to uje eduguéjna ua ome ore gu." Mu yijorane uyoque que yutágoi yocurasade ore ome cuchárique to uje yoqueduguéjnai tuté juégame yoque mu.

¹⁵ Mu yurasade uñane uje eduguéjna ore iji yiquei que ore isocade u yisocade to. Uje ore chutai darasade nanique enga ore chojninga: "Oyo yoré jnese, ga uaquẽranéringui plátapise jne ga chise 40 jnese jne jeta oyo yoré iji dirode jnese. Ga jé u jeta yijogasúode uyoque yicoi yocajegaitígo cucha to, jeoga cucha pibosode u, jeoga víno u ga yicoi oré tome to." Mu que gusu ore mu ore isocade jé chuságaja ore irógode ore to enga ore chutai ore to ome ore iplátadie. Mu ome yu ga que pisoca uté ome Dupade.

¹⁶ Mu yimate yorapídode aja gaté jnese iji yocujuyaquéode. Uje cuchade chona yocurasade ore ga yisíome ore utaidode cucha ome ore to, jé aja yiplátadie mu que yajnose ore ome ore ugúchade to, jé aja ore gajnéone jnupe, ga que yijna iji ore gari gotique. Yiróquegatéode ore cháta raja darasade to jnese ome ore orai ore ujuyaqué, ga que uñeque déji jeta ca chiro yocujuyaquei aja gaté to.

¹⁷ Uje qué yugúcoji yocorai yocujuyaquei gai, ga yibidi yijorane eduguéjna uñane jé aja yijorane uñane to rĩ ujetiga ore chacásõra yoque iji yoquibosode to. Ga ayoré díode jecucha ore taguíji yimésa gai gatuaque to uje ore tṍraji pachamite quedéjnane. Ga ore batigai chirõre 150 iji dirode jnese uje yacásorango ñane iji yoquibosode gáyode.

¹⁸ Ga yujégo aquirájna chojmara iji dire chojmarane jnese, ga yátago áyasa choqui pariguéjnane to uje ore batigai chise 6, ga yátago yoquibosode aja chugúperone uñane arione to. Enga víno que chona yoque uñeque uje yójigo, mu jecucha dirode chejna yijmanáyone iji ujade ga jé u uje yójigo víno uté. Uje jiei ore iji yibosode gáyode mu que yutai uñeque uje yiraja gu uje ore chiro yocujuyaquei aja gaté gu, ga ore jmáta to ome cuchade. Ore eduguéjnai uyu mu que yutai uñeque uje ore gajnei turásu eti ore chimate deduguéjnai uyu mu.

¹⁹ Jecute Yangureni á, Dupade á, yósi tome ua: Ajire yisocade unojo eti ueradome ua. ¡Be ga añurupúsu yio uje uyu u gu uje yañuru barasade israélgoso ore guio to diríca!