Nehemías 4 - Dupade UruodePurása quedéjnane ore eduguéjnai cho júruru nanique gu judíode ore orai ore idai ujuyaquéo ga chujñieta ore aja quedéjnane 1 Mu purása quedéjnane ore eduguéjnai Sanbalat chajire yocorapídode ga chiraja uje jé ũrepise uje yirógo ore ujuyaquei aja gaté ga jé u uje cho júruru. Ga jé u uje chujñieta judíode uyógaja quedéjnane. 2 Enga uté jecucha chamáta dajorane eduguéjna ore, enga chamátapo dajorane uñane to rĩ uje soldádode eduguéjna ore uje samáriagose ore. Enga chósi tome dajñiequéode ome ore: "¡A judíode udore toi ome dayaguhéode jne! ¡A ore pota jeta ore tẽrapome Dupade jne rĩ ome dẽrapáidode cuchiso, mu a ca eduguéjnai Artajérjes juégapome ore jne rĩ jeta ore tẽrapója dangureni dupa gotique rĩ!" Enga chojninga: "A ore pota eti ore chimánapo dajuyaquéode aja gaté, mu ore jos eti ibisoque ore jeta ore chiro aja gaté. Mu a ca ore chimánapo aja gaté rĩ, ore ujuyaquéode udore, uje e base nanique gu ga e cucha cãri iji jnumi." Enga chojninga: "¡Cajire to, a ca togome ore jeta ore chijnime cucaranenie iji unucódedie údode, enga ore doi ga ore chirópo aja gaté rĩ ome cucaranenie udire ujetiga ore chijnimíji jnumi údi!" 3 Enga ore eduguéjnai Sanbalat uté jõrápisi tu amóngosode ore eduguéjnapisi nanique uje uté i tu Tobías. Ga Tobías uté chirate dajõrai uté nanique ga jé u uje chujñieta judíode ore to. Ga uté cana dajõrai uruode gai nanique ga chojninga: "Jé ũrepise ua." Enga chojninga: "¡Cajire ore orai to, enga a erapujnángueraque choru ga jĩraque chucuase aja jnumi!" Nehemías chudute ore ujñiequéode nanique ome urasade judío, ga catecã́ri Dupade jeta chĩro ore ujñiequé noñángone ome urasade 4 Mu, Nehemías uyu, yicatecã́ri Dupade nanique ga yojninga: "Yocangureni Dupá, angári yu uje yocumajosórone ore chujñieta yógaja quedéjnane. Dupadé, yijócha bajei údi ujetiga ore uru noñángone chajni ore gáyode. Enga ore umajosórone doi ga sué ore gai, enga ore jno ore údi aja punire quedéjnarique to. 5 Jé ca ãro ore isijnaringuéone, mu be ga barongone u ore ujñiequé noñángone ome yoque. Bamo uje barasade israélgoso uyoque yirógopo yocujuyaquéode aja gaté rĩ iji bajnei tudé yoquidai, ga ore chujñieta yóguiji gáyode." Purása quedéjnane ore pésu dáyipiedie jeta ore pésu judíode ore ujuredie iji ore orai gai 6 Uje yijíñongome yocumajosórone iji Dupade jmainie ga jé u uje yirógopo yocujuyaquéode aja gaté rĩ, enga yocorapídode e chãraja yocabubíedie nanique. 7 Ga eduguéjnane udore ore chimo uje judíode que ore tangári ore uru noñángone ome raque, mu jé ore chajnera dádi uje ore chiro enga que ore timíninga ore ujñiequéode. Ga jé u uje ájningaránguipíse ore ome judíode ore. Ga cuchiyi tupúsu uje ore chimo ore ujuyaquei péroringáne uje cṍra jnumone nanique mu e ore chimánapo aja gaté rĩ iji péode uñane ujade uje qué ore catáji gaté. Yojningane ore eduguéjna u ore uje ore íode u Sanbalat, Tobías ore, jé aja ore jorane eduguéjna uñane uje ore unirone déji Arábia to nanique, jé aja amóngosode, asdódgosode ore eduguéjnane to. Enga yojningane udore ore cho júruru jnese nanique. 8 Enga jé u nanique uje eduguéjnane udore ore catecã́ri ñane ga ore chojninga: "Yicoi ga yamátago yoquisoldádode aja ñane enga ore pésu ore ujuredie jne, ga jé u jeta udore uñéngo dosóñime yoque jne, ga a ore chaquĩ́ra dajorane ome ore ujuyaquéode úringai poraque to jne, enga a ore cha jne." 9 Mu jecucha yicatecãcoi yocangureni Dupade ome yoque nanique. Enga yipéco poridéode nanique ujetiga ore chajire yocorapídode yúode iji dirode údode jnese, jé aja dejade udore údode jnese to rĩ. 10 Mu judíode uyoque yoqueduguéjnane uñane ore catecã́ri ñane chere-chere-chere. Enga ore chojninga: "Orasórone uñane eyuque ore arĩa iji dasagode cucha jmainie. Enga ¡cajicho unucodé cõrachuguedie amirenie to! ¡Qué jiei jeta yijnico cucaranenie iji unucódedie údode! ¡Enga a ca toguipis ome yoque jeta yimánapo aja gaté rĩ yocujuyaquéode!" 11 Enga yocumajosórone jos eti ca dimane yógome udore ore yui jne. Uje a ore chojninga: "A ore chuniname eti yujégo orasórone uñane enga yajujo ore agutedie jne enga a jĩraque ore cha chiro dorai dajuyaquei aja gaté jne." 12 Mu judíode uñane uje ore idáyode idógosiji yocumajosórone idáyode uje ore chimo uje ore pésu re ome yoque, enga jecucha ga ore chayója yoque enga ore chojninga: "E dimane yocumajosórone ome uaque jeta ore doi uaque, enga a ore tṍraji quedéjnane ome uaque jne." 13 Uje yudúco ore uruode udore ga yojningame yurasade ore: "Ayáyo uacorai yocujuyaqué ga yamátago ñane aja ore iquéode jeta ore di ga yujégo ore to. Enga jogasurane amátayo uágaja ñane iji uacajogadode ga idája uáguiji ñane jne." Ga yocurasade udore jnese uje ore chiro iji guesi yui enga ore doi ajei to iji yoquidai yui. Enga ore chisa dõrachade ome yocumajosórone ore yui to. Enga uñane chisa queséode, jé uñane chisa dojigode, enga uñane chisa asṍrenie to. 14 Mu yiraja uje uñane todo ore yui. Jecute yiyague enga yicatecã́ri yoqueduguéjnane ore, jé aja jnani atade ore, jé aja pangurenéjnane ore to. Ga yicatecã́ri ore iji yujode judío ore iquei jnese jeta ore tangári yuruode quigode jnese. Enga yejnapúsu yuruode ga yojninga: "Ca atodóyo ore. Ejna uacáyipiedie aja Pangarádejnai uje uté déji yoquejode iji de. Uje cucha pirosobádejnai tu uté ga que picasite uté enga picasidójma. Enga arotáyo uacatígo, uacacotérigui ore, jé aja uacajogasúode ore to jnese. Ajnusoi uágome yocumajosórone ore jocaningai to." 15 Uje yocumajosórone ore chimo uje e dimane yógome ore yui jeta yujégo ore to, enga e ore cha dajocaningai enga ore cha jmete to. Ga e yirógopo yocujuyaquei aja gaté rĩ. 16-17 Mu yecãco yoquisocai, ga uñane chajire yoquejode ome yocumajosórone ore, jé basa ga uñane chiro yocujuyaquei aja gaté. Enga orasórone cha ga e ore chajire yoquejode ome yocumajosórone ore enga e uñane ore chirópo yocujuyaquei aja gaté to rĩ uje ore ajirique yoquejode que. Enga pisadodéringane e jnoji yoqueduguéjnane uñane ore enga e ore chirópo yocujuyaquei aja gaté rĩ iji darasade judágose yocujade to. Enga yocurasade uñane ore chijna yocorai yocujuyaquei erásorone iji dajmanai uñai, jé basa ga ore chijna dõrachade iji dajmanai uñai. 18 Mu yocujuyaquei orasórone ore chiro mu ore iqueséode jé jogate ore ógorodie gáyode. Mu yijõrai uje déji yari dimane ome dabuchui to jeta yimóngo yocumajosórone ga jĩraque chubúchu dabuchui ome yoquijorane jeta jĩraque ore chayóji gadoi to. 19-20 Uje jé yurúo ome ore gu uje yojninga: "Idája yóguiji ñane iji yocorai yocujuyaqué ga que yudúco ñane atique. Mu ujetiga adúcho yijõrai ubuchui enga jĩraque acugujnáño iji gadoi. Uje a amóño jne uje cho jeta jõcarataque Yocangureni Dupade to ome yocumajosórone ore enga a amóño jne eti uté chatapísaja yoque ome ore." 21 Uje guedé quene tocádesi ga e yirógo yocujuyaquei aja gaté, mu jecucha yijnángo yocõrachade aja yocajesúode. Ga yirógo aja guedéjnoringái uje e tota erámi enga guédodie e choqui guesode uje yiyágo. Ga yoquisocabei u uje uñane chiro mu uñane chajire yoquejode ome yocumajosórone. 22 Ga jecucha yojningame yurasade ore: "Ujetiga yiyágo yoquisagode yoquejo enga ajníñoja yoquidai ajei ga yimóngoji, mu uñane ore chácarabíji guesi yúode jeta ore chajire yoquejode ome yocumajosórone ore." 23 Nehemías uyu, jé aja yijõrapísode, jé aja yoquejode ajirisórone to rĩ, yimóngo iji dejai ga que yocuñéngo yejñúngo yoquiguidéraque. Yimóngo yoquiguidedie údi. Enga moque yoque mu yocõrachade catája yoquijmana ujade uje yimóngo. |
© 2021 Ethnos360
Global Partners