Nehemías 3 - Dupade Uruode

¹ Enga Dupade iroguipísode sacerdóteo ore eduguéjnapisi uje i tu Eliasib nóna dajorane Dupade irócho to enga ore chimate yocujuyaquéode peque uñai cutádedie ga ore pésu piagoi iji uté, ga ore pésapo jorídedie rĩ enga jorídedie gáraja enga ore suru gai ga catája ñane. Ga ore chichapo piagoi taja piagoi tuté jogate bajai te rĩ uje ore ĩcarai tu Áyasadie Pípidiringai taja nanique. Enga ore jno enga ore chimate doradie cototei aja gatéode to ujetiga ore choru udire enga ore chajire dejode iji ójo, uje udire íode u udojo: uña i tu Cién, jé basa ga uña i tu Hananeel, enga ore chimánapo yocujuyaquei aja gaté iji ore oragádedie cototei udire ujai te rĩ.

² Uje israélgosode ore di to uje ore idai tu Jericó enga ore cháta raja ñane ome ore ujuyaquei uje ore chiro ga ore chimate dorapídi aja gaté to. Ga Imri ujnacarode uñai chimate dorapídi aja gaté to iji ore ujuyaquéode peque uñai uje uté i tu Zacur.

³ Jnani bajai uje i tu Senaa, uté ape disi ejode ore u uje ore pésu ore ujuyaquei pijnanone uñai aja gaté enga ore pésapo jorídedie to rĩ enga catája ñane jorídedie enga ore cho joride gaté iji guebéquedatéi enga ore chiramísara guebéquedatéi aja dei. Enga ore chichapóji pijnate bajai jogadi gaté rĩ uje uté i tu Oyite Gaisórone Pípidiringai Piago nanique.

⁴ Ga Urías ujnacari Meremot chimánapo dorapídi aja gaté to rĩ. Ga Meremot daquerámi i tu Cos nanique. Ga Berequías ujnacari Mesulam chimánapo dorapídi aja gaté to rĩ. Ga Mesulam uté dáquide i tu Mesezabeel. Enga Baana ujnacari chimánapo dorapídi aja gaté to nanique rĩ uje uté i tu Sadoc nanique.

⁵ Ga jnanione tṍraji ore idai uje i tu Tecóa enga ore chimánapo dorapídi aja gaté to rĩ. Mu jnanione udore urasade uñane uje ujnomeranguipise ore, que ore pota eti ore chátaja darasade to ome jerusaléngosode ore ujuyaquéode úringane poracho aja gatéode to.

⁶ Enga jnanione uñane chimánapo piago uñai aja gaté to rĩ iji piago jogate bajai jogadi to, uje i tu Piago Taningui ome ore nanique. Enga ore pésapo jorídedie rĩ uje catápoja ñane to rĩ enga ore chiramísarapo guebéquedatéi aja jorídedie udire to rĩ uje ore suru dei tome. Enga jnanione udore ore íode u udojo: Paseah ujnacari Joiada u uñai, jé basa ga Besodías ujnacari Mesulam upo uñai to rĩ.

⁷ Enga israélgosode uñane ore tṍraji danirone uje ore déji guedé cacadi yui uje udore déji tiédaté Éufrates uécha uñai. Uje ore eduguéjnane u purása quedéjnane, mu ore di to. Enga ore chimánapo dorapídi aja gaté to rĩ. Enga udore ore íode u udojo to: gabaóngosi Melatías u uñai, jé basa ga meronótgosi Jadón upo uñai rĩ, jé aja udore ore jorane jnanío uñane to uje ore idáyode u Gabaón, Mízpa ore.

⁸ Ga Harhaía ujnacari Uziel chimánapo dorapídi aja gaté rĩ iji ore ujuyaquéode nanique. Uziel uté chirajapise uje chiro cuchade iji órodie, plátadie ore. Ga jnanione uñai déji to uje chirajapise cucha ai unérone uje pésu, ga uté chimate dajnepídi tiji ore ujuyaquéode to. Ga uté i tu Hananías. Enga jnanione udore ore orai chichagája ore ujuyaquéode jogadi uje ore chojningame uté Cutádedatédie Jogadi.

⁹ Enga ore eduguéjnane iroguipísode uñai chiro ore ujuyaquéode peque uñai aja gaté to. Ga uté gajnepídi u Jerusalén peque uñai ujeta chajire cuchade aja quigode iji, ga Hur ujnacari u uté ga i tu Refaías.

¹⁰ Ga jnanione uñai déji to uje iguíjnai idógosipísiji ore orai ujuyaquei ejópisi. Enga uté chiro ore ujuyaquei peque uñai iji daguíjnai ejópisi to, ga Harumaf ujnacari u uté enga i tu Jedaías. Ga jnanione uñai chiro ore orai iji uté iquei to, ga chichaga dorapídi aja uté orapídi, ga Hasabnías ujnacari u uté ga i tu Hatús.

¹¹ Enga orasórone ore jno dorapídi údi ga ore orapídi chichaga raja ore ora cototé casicaite jogadi. Ga jé u uje jnani gárode uñane ore chirópo ore ora casicaite aja gaté to rĩ, uje jecucha ore choru cototé uaté ga ore chajire dejode iji ójo. Ga ore oragadé uaté a déji ore iborigode cucha ejórique nanique ga jé u uje ore cho unuchúji i nanique, ga i tu Cototé Cucha Piborigode Jogadébei. Ga jnani gárode udore ore íode u udojo nanique: Harim ujnacari u uñai uje uté i tu Malquías, jé basa ga uñai i tu Hasub ga uté dai i tu Pahat-Moab.

¹² Enga ore eduguéjnane iroguipísode uñai uje gajneque ore idáidatéi Jerusalén peque uñai ujetiga chajire cuchade aja quigode iji, uté nóna darodie iji dorapídi to ga ore chiro ore ujuyaquei aja gaté to. Ga Halohes ujnacari u uté nanique ga i tu Salum.

¹³ Hanún jé aja jorane ore uje ore idai i tu Zanóa ore pésapo ore ujuyaquei piagode uñai aja gaté to iji jogate baja casicaite jogadi, uje ore chĩ́care Tuijnai Yuminóri Piago aja uté nanique. Ga ore chimate piagoi ga ore pésapo joride to, jé aja iramísarasõri guebeque jeta ore suru dei tome. Mu que gusu piagoi mu ore chimate dorapídi to iji ore ujuyaquei ga ore orapídi métrode chise 450 nanique. Enga ore imani tuté déji Tuijnai Yuminóri Piago, Basigode Qui Piago ore ujai.

¹⁴ Mu Recab ujnacari Malquías u uje chimate piagoi aja gaté uje i tu Basigode Qui Piago. Ga chátaja joride, joride iramísarasõri guebecho to. Ga yojningai uté uje i tu Malquías ore eduguéjnai u iji ore idai Bet-haquerem nanique.

¹⁵ Colhoze ujnacari Salum u nanique uje chimate piagode uñai aja gaté to iji piago bajade uñai jogadi casicaite, uje ore chĩ́care Sibíjnai Gajnei Piago aja uté nanique. Mízpagosode ore eduguéjnai uté iji ore idai uté nanique. Ga pésu guiguíjna gajnui iji piagoi gai iji gaté, enga pésapo piagoi joride rĩ, jé aja joride iramísarasõri guebeque to uje ore suru dei ome gaté. Enga orapídi chisápo abuéjna to rĩ uje déji uté uje ore pésu i to ga i tu Eduguéjna Cuchábi Gajnei Abué. Ga ore ipesudé gajño idógosiji abuejna uaté uje ore pésu gajño uté i to nanique, ga i tu Siloé. Enga Salum uté orai chichagája uchiejnane uje chicai jnumi iji Jerusalén peque uñai uje ore pésu i to, ga i tu David Gajnepídi Guidai.

¹⁶ Ore eduguéjnai déji nanique uje i tu Nehemías ga uté dai i tu Azbuc enga uté idai i tu Bet-sur. Ga uté gajnepídi u Bet-sur peque uñai nanique ujetiga chajire cuchade aja quigode iji. Enga uté chudute uje ore chirópo ore ujuyaquéode aja gaté nanique rĩ ga jĩraque chicáji Jerusalén to nanique, enga chirópo ore ujuyaquei peque uñai aja gaté to nanique rĩ. Enga uté orapídi chise David Ore Ódedie Jogadi tiógarei, enga orapídi chisápo Yodi Ajnapídebei tiógarei to rĩ, enga jnopo rĩ ga chisápo Soldádode Ore Charidébei tiógarei to rĩ.

¹⁷ Enga levígosode uñane ore chátaja darasade israélgoso ore uje ore chiro dajuyaquei nanique iji Jerusalén gai. Ga udore uñai i tu Rehum, ga uté dai i tu Bani. Ga Hasabías u uñeque uje kéilagosode ore eduguéjnane uñai uté ga gajnepídi tu ore idai peque uñai to. Ga uté chojninga nanique: "A yiro yajnepítiguiji ore ujuyaquéode to jne, enga a ore churúsãre yoquidai Kéila i iji to jne iji darusarane udore uje orasórone ore íode déji udore.

¹⁸ Enga Hasabías uté jõrai eduguéjna uje gajnepídi u ore idai Kéila peque uñai, uté chiro dajnepídi to aja gaté nanique, uje uté i tu Bavai. Enga Bavai uté dai i tu Henadad.

¹⁹ Enga mízpagosode ore eduguéjnai chirópo dajnepídi iji ore ujuyaquéode aja gaté rĩ, uje ore eduguéjnai uté i tu Ezer. Enga Jesúa ujnacare uté. Enga uté orapídi chise ore ujuyaquei ajidé uje déji Ore Õrachade Jogadébei Guiguíjna tiógarei.

²⁰ Enga Zabai ujnacari uje i tu Baruc uté chiróji Ezer uté orapídi iquei iji ajidé iquei uñai. Enga uté orapídi jno ga chirója Dupade iroguipísode eduguéjnai iguíjnai piagoi tiógarei uje uté i tu Eliasib.

²¹ Enga Meremot u nanique uje jno Zabai orapídi eruei údi enga jno orapídi údi aja Dupade iroguipísode eduguéjnai uté iguíjnai eruei tiógarepísi. Yojningai Meremot uté dai i tu Urías nanique ga daquirámi i tu Cos.

²² Enga Dupade irógode uñane uje ore gajnepídi tu picatecãraitigade ome darasade ore to nanique, enga ore iguíjnane déji pararinguei ajei iji tiédaté Jordán tiógarei. Mu jĩraque ore di to nanique jeta ore chiro ore ujuyaquéode aja gaté to nanique iji Jerusalén gai.

²³ Enga jerusaléngosi uñai chiro ore ujuyaquei aja gaté to rĩ iji daguíjnai tiógarepísi, enga uté i tu Benjamín. Enga jnani uñai iguíjnai déji uté iguíjnai iquei iji ti uje uté i tu Hasub, enga jé doi uté isocai ga chiro ore ujuyaquei aja gaté to iji daguíjnai tiógarei. Ga jnanione uñai dépoji uté iguíjnai iquei te rĩ uje uté i tu Azarías, enga chirópo ore ujuyaquei aja gaté to rĩ iji daguíjnai tiógarei. Azarías uté dai i tu Maasías, jé basa ga dáquide i tu Ananías.

²⁴ Enga Henadad ujnacari Binúi u nanique uje jno Azarías uté orapídi údi ga chiro aja ore ujuyaquei ajidé uña aja gaté.

²⁵ Enga Uzai ujnacari uje i tu Palal, uté jno Binúi uté orapídi eruei iji ajidé iquei ga orapídi chise Eduguéjna Cuchábi Iguíjnadatéi tiógarei to. Ga Uzai uté chirópo ore oragádedie cototei aja gaté to rĩ iji ore eduguéjnai iguíjnadatéi uté ejode. Enga Faros ujnacari Pedaías chirópo ore ujuyaquei aja gaté rĩ.

²⁶ Enga Pedaías uté orapídi iji ore ujuyaquei chise piago uñai uje ore pésu piagoi uté i nanique ga i tu Yodi Gajnei Piago. Enga piagoi tuté déji guedé garani yui. Enga uté qué jno dorapídi údi gaté rĩ ga chise ore ora cototé bajé jogadi ga uté jé noñapóji ore ora cototé rĩ ga chirópo aja gaté rĩ. Ga uté atapiésorone u Dupade iroguipísode ore iróquegatéode uje ore isagode u cucha pisaque uñane iji Dupade iguíjna cuchábi ajei. Yojningane udore u ore uje ore idai i tu Ófel nanique.

²⁷ Enga tecóagosode ore tṍraji dedai to nanique jeta ore chiro ore ujuyaquei tuté aja gaté to. Enga ore chiro iji eduguéjnai iguíjna cuchábi tiógarei uje ore ora cototé cuchabé déji eduguéjnai iguíjnai ójo uté nanique. Ga ore jno ore orapídi údi aja soldádode charidébe casicaite uje i tu Ófel.

²⁸ Dupade iroguipísode sacerdote uje ore gajnei tu picatecãraitigade ome darasade iji Dupade iguíjna cuchábi ajei, udore ore gajnepídode u daguíjnane tirógareode jeta ore chiro ore ujuyaquéode aja gaté. Ore chiro iji piagoi uécha uñai uje piagoi uté i tu Buricade Pípidiringai Piago.

²⁹ Enga Imer ujnacari Sadoc chiro ore orai eruei aja daguíjnai tiógarei to. Enga Secanías ujnacari Semaías chiróji uté orapídi eruei to. Ga Semaías uté irodique ore ujuyaquei piagoi uje piagoi uté i tu Guedé Garani Yuminóri nanique.

³⁰ Enga jnani gárode ore chiróji Semaías orapídi eruei nanique ga ore íode u udojo: Selemías ujnacari Hananías u uñai, Salaf ujnacari Hanún upo uñai rĩ. Enga Salaf ujnacarode chojmára iji ti nanique ga ore desaque ejópisi tu nanique uje chiro ore ujuyaquei aja gaté. Enga Berequías ujnacari Mesulam chiróji jnani gárode udore ore iquei nanique iji daguíjnai tiógarei.

³¹ Órodie, plátadie orasóreméi chiro ore ujuyaquei aja gaté to nanique uje uté i tu Malquías, ga orai chichagája Dupade irógode iróquegatéode ore mochápi guiguíjna tiógarei, uje cuchade guẽrapaisórone ore mochápi guiguíjna déji uté to. Ore ujuyaquéode piagoi déji guiguíjnane udore iquei uje i tu Soldádode Batigábei ga Malquías uté jé jnopo dorapídi údi iji uté rĩ, ga chichaga dorapídi aja ore orutébei cototé jogadi casicaite iji ore ujuyaquei ajidé.

³² Cuchade guẽrapaisórone uñane cháta raja órodie, plátadie orasórone uñane to ga ore cháta dorapídi taja ñane enga ore chiróji cototé tuaté ga ore jno dorapídi údi aja piagoi uje i tu Áyasadie Pípidiringai Piago.