Nehemías 2 - Dupade Uruode

Peduguéjnai Artajérjes juéga doi ome Nehemías jetiga chicáji guidáidatéi Jerusalén

^1-2 Yisai u nanique ome eduguéjna cuchábi Artajérjes ore uje jecucha yipésu ore jopidode enga yisi ome ore gatuaque iji ore atigade gáyode uje ore tac. Uje eduguéjna cuchábi guejnanie siqueré e chise 20 nanique ome dáringai eduguéjna, uje guedosi i tu Nisán nanique enga eduguéjna cuchábi chajire yedodie enga chimo uje jnusiétaguipíse yu. Uje yisi ome jodi tome enga eduguéjnai catecã́ri yu ga chojningame yu: –Nehemías, bajnusiétigai ¿gajnetique cucha ya? ¿Ama ejnarétaque ua ya? Ise mu ca ejnarétaque ua jõ. A pujuredie chise ua jõ.– Uje eduguéjnai catecã́ri yu ga chajuque yaguté ga yitodópisa iquei.

³ Mu yojninga: –¡Picotaguipise ua, eduguéjna Artajérjes iji deréjna pitade jnese jne! Jé ũrepise ua uje jnusiétaque yu. Uje yudute diríca uje israélgosode yocayode ore orai ore ujuyaqué cṍra iji yoquidai Jerusalén gai enga jé chuságaja jorídedie to uje pioi tagu ga chucuase.–

⁴ Enga eduguéjnai chojningame yu: –¿Ama apota jeta yáta cuchárigaja ua ya?– Ga jé u uje yicatecã́ri Dupade iji yáyipie jeta chisi ome yuru quitígo ome yu. Enga yiraja yuru quitígo ome eduguéjnai uté, enga jé u uje yichajnai uruode.

⁵ Enga yojninga: –Yoqueduguéjná, eti amesẽre yu ome doi enga a yiji jne enga a yajniapója yocuniri Judá rĩ uje yai, yaté ore ódedie déji ore idai Jerusalén uté gu, enga a yátaja yurasade ore jne jeta yirógopo yocayode ore ora casica ore ujuyaqué iji yoquidáidatéi Jerusalén gai.–

⁶ Enga yoqueduguéjnai uté acoté chácariji ejoi enga ore tangári yuruode jnese. Enga igasique enga eduguéjnai chojningame yu: –Nehemías, ¿guedosírigo cho rique iji ta jne jetiga ácariji ta? ¿Cho rique jne jeta ajniápo yoquibai jne rĩ?– Ga yicatecã́ri ga yipésu yiríringai tome, enga jé u uje juéga doi tome yu.

⁷ Mu yichajnai yeduguéjnai uruode nanique ga yojningame nanique: –Cucha amiri tu ome yu jeta asíome barusarane ome yu ga yijna. Enga a yaquesu punire quedéjnane jne aja yocuniri Judá yui jne enga a yisíome barusarane ome puniri unirisórone ore eduguéjnane jeta ore chajire enga ca ore chãraque danirone jeta yaquesu aja yocuniri yui. Yojningane u punirone udore uje ore déji guedé cacadi yui iji tiédaté Éufrates uécha uñai.–

⁸ Mu yojningame yeduguéjnai uté: –Apésu barusãratígo jeta gare ore, ga yisíngome uñéngo ome baroguipísi uje i tu Asaf uje uté gajnepídi u jeta chajire móntedie yúode. Ga a uté chajire barusarane udore jne enga juéga poridie ome yoque jne jetiga yaquesúgo aja jnumone. Enga a yirógopo yocujuyaquéode ome jne rĩ, ga a yipécopo yocujuyaquei piagode ome to jne rĩ, jé aja jorídedie to uje idógosiji Dupade iguíjna cuchábi jogadi, enga a yipésapo yiguíjnai tome to jne rĩ.– Enga eduguéjna cuchábi jĩraque chajnai yuruode enga chojningame yu: –Jé areque, a yipésu yurusãraque uñéngo ome ua.– Enga e yiraja uje yangureni Dupade osõrataguipise ome yu uje yojningame iji yicatecãraitigade diríca: "Angurase eduguéjnai áyipieraque ujetiga juéga doi ome yu jne." Enga e yiraja uje Dupade dopísi yuru quigode.

⁹ Uje yiji ga eduguéjnai chisi ome darusarane ome yu, mu chisiapome dasoldádode ome yu rĩ uje ore choru buricade ga ore nóna yu aja dajei. Uje yise punirone udore iji guedé cacadi yui nanique uje ore déji tiédaté uécha uñai enga jĩraque yisi ome yeduguéjnai urusarane ome udore ore eduguéjnane, enga que uñeque charángome yu ujetiga ca yaquesu ore unirone.

¹⁰ Mu ore eduguéjnane uñane ájningaránguipíse ore uje ore chiraja gu uje israélgosode ore agutíyabátique cucha a chise ore jne. Yojningane udojo eduguéjna ájningarãque ore íode u udojo: horóngosode ore eduguéjnai Sanbalat u uñai, enga amóngosode ore eduguéjnai Tobías upo uñai to rĩ.

Nehemías chajire ore ujuyaquéode iji Jerusalén dosadode

¹¹ Mu iyajmanguipise yu iji dajei uje yicáji Jerusalén yui. Ga yise Jerusalén ga yimochádode gadioque mu yo parac enga cáma yisõre iji Jerusalén údode.

¹² Enga yo cuyúguiji dejaque uñai ga quene yisõre iji dejai gatócoro uté. Ga yijína yijorane jnani uñane enga yisõcóji Jerusalén edúdi. Mu que yatatame Jerusalén unirísonique yigaidi uje Dupade chungurase yáyipie jeta yirógopo yocujuyaquéode iji Jerusalén dosadode rĩ. Mu yijorane ore diguiji jnumone, jé gusu yu uje yoru buricai.

¹³ Uje yico yocujuyaquéode joride uña uje ore pésu joride uté i nanique ga i tu Tuijnai Gajnei Piago nanique, ga yicoi guesi tiji uaté ga yajnángo ujuyaquei údi uje yajico aja yocajesui. Ga yico ga yicagoi sibíjnai jogadébei yui uje jecucha ga tṍra jnumi ga cho ja-ja-ja aja guesi, ga ore pésu i nanique ga i tu Cuchiso Guichaya Gajnei Sibíjna. Ga yajicopise ore ujuyaquéode iji uté ejode. Ga yico ga yicopo joride uña rĩ uje i tu Basigode Qui Piago nanique. Mu yajico ore ujuyaquéode mu e tarata ga cucha carĩ namisé iji jnumone, ga jé chuságaja jorídedie to ga arímei iji jnumone uje a pioi tagu nanique ga chajnongósaja ñane.

¹⁴ Enga yico ga yicopoi joride uña rĩ uje i tu Sibíjnai Gajnei Piago uje idógosiji ore ora gajño uje i tu Eduguéjnai Gajnépise. Ga yipota jeta qué yiji mu ore ujuyaquei cucha carĩ namisé iji jnumi ga chãraque doi ome yoruti burica.

¹⁵ Jecute yo cutuque ga yiji tié jochai ga yajna uté aja yiqui tuque iquei. Mu yico ore ujuyaquéode eruéode uje cáma dire ga qué dejaque. Yico yocarani uqué uje joride déji ga i tu Tuijnai Gajnei Piago, ga jé u uje yacágopoja ore idáidatéi ajei rĩ.

¹⁶ Mu que yingongara yu aja ore eduguéjnane ore, jé aja Dupade iroguipísode ore to uje ore isai tu Dupade iroquéode ga que yingongara yu aja ore to. Ga udore uñeque que chiraja yipesutique iji dajade uje yajire ore idáidatéi Jerusalén údode.

¹⁷ Mu chise diri nanique uje quene yingongara yu aja ore. Ga yuruode u udojo ome udore: –Yisápo uáguiji de gu jeta yirógopo yocujuyaquéode aja gaté jne rĩ iji yoquidai Jerusalén udé údode. Uacamóño arĩa uje yocujuyaquéode iji yoquidai gai e cucha carĩ namisé ga arime iji jnumone, ga jé chuságaja jorídedie iji piagode uje arímei iji jnumone to uje pioi a tagu ore gáyode ica. Ga beyoi ga átayo uágaja yu jnese. Enga yirógopo yocujuyaquéode aja yoquibai te rĩ. Yigaidi tu gu jeta ca purása quedéjnane chujñieta yógome yocujuyaquéode iji yoquibai.–

¹⁸ Ga jé u uje yatata Dupade icaniratiguei ome yu diríca uje qué yugúsi eduguéjna cuchábi ore uniri diríca. Enga yatatapo eduguéjna cuchábi áyipiedie ome ore rĩ. Ga ore irasiguipise yuruode jnese. Ga jé u uje ore chojningame yuruode: –Ueradéjna báyipiedie. Yicoi ga yátagoja ua jne ga yirógopo yocujuyaquéode aja gaté jne rĩ.– Ga jé u uje ore catecã́ri ñane ga ore nína raque ome dedai ujuyaquéode iji gai jeta ore chirópo aja gaté jne rĩ.

¹⁹ Mu purása quedéjnane ore eduguéjnane chudute yocujnomei enga ore chujñieta yoque enga ore chósi tome dajñiequéode ome yoque: –¿Jé go uje chiese eróyopo uacajuyaquéode uacabai jne rĩa? ¿Ama eduguéjna cuchábi juégarása ome uaque a? ¿Ama chetaque marínga, jé eróyorase a?– Yojningane purása quedéjna ore eduguéjnane udore ore íode u udojo: horóngosode eduguéjnai uje i tu Sanbalat u uñai, jé aja amóngosode ore eduguéjnai uje i tu Tobías upo uñai rĩ, jé aja arábgosode ore eduguéjnai upo uñai te rĩ uje uté i tu Gesem.

²⁰ Mu yichajnai udore ore ujñiequé noñángone ome yoque ga yojningame ore: –Israélgosode yocangureni Dupa u uje idai déji gatajnoquei uéchai enga a uté u jne ujetiga chisi ome yocúringane pujnuéngaisṍre ome yoque. Uté chopise darógode iji darasade israélgose uyoque. Jecute Yoquirósõri uté a chátaja yoque jne ga a yimáco aja gaté jne. Mu uaque ga que uacajneque Jerusalén udaque. Ga que uacajnengápo yocujuyaquéode jne rĩ aja gaté iji yoquibai jeta yirógo aja gaté. Enga a jé ca uacajneque jne jeta aquíraño yógome cuchade udojo jne rĩ jeta yirógopója gaté rĩ.–