Nehemías 13 - Dupade Uruode

Dupade uruode cho quique jeta israélgosode ore cãra dajogadi ome amóngosode, moábgosode ore

¹ Uje ore déji ñane gari jnese nanique enga ore naráraja Moisés urusarane gai enga ore ajiripídi u iji Moisés urusarane uje Dupade chãraque nanique uje chojninga: "Que yujuéga eti oyo uacarásaji moábgosode ore jé aja amóngosode ore to rĩ."

² Enga Dupade etétigai tiji amóngosode, moábgosode ore u gu uje ore chãraque yote pijódode ome urasade israélgoso nanique, enga ore charángapo cucha pibosode ome israélgosode ore rĩ, enga ore charángapo daniri ome ore to rĩ uje ore chaquesu ore unirone aja Dupade ojningai punire ueradéjnai yui. Jecute Dupade guetétigade u udojo iji ore. Enga que gusu udore mu etétigai upo rĩ uje amóngosode ore eduguéjnane, moábgosode ore eduguéjnane ore cháta raja ñane ome israélgosode ore nanique. Enga ore tibidi daijna cuchábi Balaam uté nanique ujetiga ore chisi ome daplátadie ome nanique ga uté cho darúja Dupade urasade israélgose ore nanique. Mu Yocangureni Dupa Pujnuéngaisṍre chinoningase daijnai uté uru gajnaréngone nanique iji pijnani ga nóña ga puru omío nanique.

³ Uje yurasade ore chudute Moisés urusarane Dupade urúo gãrétigade quigode nanique enga jé u nanique uje ore chãraque danirone ome darasade ore jnese uje purása quedéjna udore ore datéraque, jeoga ore dai u nanique, uje gajnareque gu jeta israélgosode, purása quedéjnane ore chimerirase ñane nanique.

⁴ Uje cáma gosi chacate ore ome cuchade udore nanique enga Dupade iroguipísode sacerdote uñai uje uté i tu Eliasib uté gajnepídi tu jeta chañuru Dupade gajnéone cucha orerã́cho guio iji Dupade iguíjna cuchábi ajéode uñane ajei. Enga Dupade iroi uté Eliasib cho dajõra iji purása quedéjnane uñane ore eduguéjnai Tobías uté nanique.

⁵ Enga chise diri nanique uje Eliasib pésu dáyipiedie nanique iji dajei ujetiga chijnime Dupade gajnéone cucha oreránguejnane iji Dupade iguíjna cuchábi ajéode uñai nanique, enga chécãre jogatique enga Tobías uté cho damochápi iji ijnimingone cucha jogadi. Enga ijnimingone darasade guẽracho ome Dupade u udojo nanique: ijnimingone bajai u cucha ai unéri nanique, quigade ga chijnimápo bajo oreréjnanie nanique, jé aja cuchárade to, jé aja cuchíllodie, jé aja ore jopidode to, jé aja ore acade trígo ubugode to uje Dupade gajneque ore acade udore ubugode péode to, jé aja víno, jé aja aceite to rĩ. Uje ore chisi ome udore ome Dupade gu ujetiga Dupade irógode ore agutíyame udore to. Yojningane u Dupade irógode uje ore i tu levígosode, jé aja Dupade iroguipísode sacerdote, jé aja deyade, jé aja Dupade iguíjna cuchábi piagode irodisórone ore to rĩ.

⁶ Uje Eliasib uté pésu purása quedéjnane ore eduguéjnai Tobías mochádi iji Dupade iguíjna cuchábi ajei uñai nanique, mu Nehemías uyu que yugúsiji Jerusalén to nanique uje babilóniagosode ore eduguéjna cuchábi tibidi yu nanique gu uje i tu Artajérjes enga yugúsiji uté gari nanique iji ore uniri. Uje siqueredie e guejna ayoré chojmara nanique enga chejnapo ayoré uñai jmanáyone to nanique rĩ, ga garapóji guidai te rĩ ome eduguéjnai uté úringai eduguéjna, jecute uté tibidi yu ga yugúsiji gari nanique. Mu e iyajmaque yu iji uté gari nanique ga jé u uje yicatecã́ri uté nanique ujetiga juéga doi ome yu.

⁷ Enga jé u uje yajni to nanique aja yocuniri, ga yicáji yoquidai Jerusalén. Enga chise diri nanique ga yĩríji yoquidai Jerusalén to, ga yudute to uje Eliasib pésu purása quedéjnane ore eduguéjnarique mochádi iji Dupade iguíjna cuchábi ajei uñai uje uté i tu Tobías.

⁸ Yetaguipise Eliasib isocai uté ga yenochai chísaja ome isocai uté. Ga yacája uté mochádi ajei mu yiroque ore aja jeta ore chijnime itaranone iji ajei jnese, jé aja ugúchade uñane iji ajei jnese to.

⁹ Ga yojningame Dupade iroguipísode: "Dupade iguíjna cuchábi ajei uñai tuté e chise dáringai noñaque. Enga beyoi yoquijmapiedie uje cuchárique gajnareque ga chisápo dáringai uome ome yoquijmapié omenie. Yojningane udore u Moisés urusarane quigode iji Dupade uruode. Yigaidi tu gu ujetiga ueradápo Dupade iguíjna cuchábi ajei uñai uté. Ga beyopoi Dupade gajnéone cucha enga achayopóji jogadode jne rĩ; yojningane u erásorone cucha, jé aja yocurasade gueranone cucha ome Dupade, jé aja cucha ai unéri uje ore chãru iji Dupade iquei."

¹⁰ Mu que gusu Eliasib uté isoca gajnaréngone udore, mu uje qué yugúsiji babilóniagosode ore uniri ga ore cha chisi ome Dupade gajnéone cucha ome levígosode ore to. Jecute yĩri ga íjnonguipíse levígosode, deyade ore iji Dupade iguíjna cuchábi uje e ore chajni aja dedáyode gu jnese jeta ore chucué daquetangóningo cucha to.

¹¹ Enga jé u uje yimáta Dupade irógode eduguéjnane ore aja ñane enga yingo ore isoca gajnaréngone aja ore. Ga yojninga: "Jé go uje yĩri ga yajire Dupade iguíjna cuchábi mu ejode titapise ome irodingórone ore. Ga beyoi ga abichoi uacojode Dupade iroguipísode jetiga jĩraque ore chicapóji yu rĩ iji Dupade iguíjna cuchábi to rĩ, jé aja levígosode ore jnese to." Ga ore di ga jé u uje yipésapo ore jogadode ome ore rĩ, jeta ore chidota re iji dayaridode udore to.

¹² Uje judágosode ore chimo uje Dupade irógode ore dépoji Dupade iguíjnai cuchábi rĩ, ga jé u uje ore diapo deranone cucha údi iji Dupade iguíjna cuchábi rĩ. Enga jé u uje ore chisecãrápo dagúchade cucha rĩ enga ore cãra Dupade gajnepídode iji dajnéone cucha. Yojningane u ore acade trígo ubugode, jé aja víno, jé aja aceite ore.

¹³ Ga yojningame Dupade iroguipísode uñane ore: "Uacajnei tu jeta asayo yocurasade gueranone cucha. Enga apéso ore jogadode iji Dupade iguíjna cuchábi ajei uñai ga añuchopúsu guio jne iji jogadode." Ga yojningane jnani ore íode u udojo: Dupade iroguipísode uñai Selemías u uñai, ga Dupade uruode acadisṍri Sadoc upo uñai rĩ uje jecucha churúsãre dajorane ore uruode aja quigode nanique. Ga levígosode uñai u to uje cháta ore isagode aja ore ga uté i tu Pedaías. Ga ore átajasórone uñai u Zacur ujnacari Hanán uje uté dáquide u Matanías. Uje yangurenipísode jnanione udore ga yangureta ore ome Dupade gajnéone ore guẽracho ujetiga ore chañurúpusu guio. Ga ore u to uje chajuguína udore iji Dupade irógode ore, jé aja levígosode ore.

¹⁴ Ga Nehemías uyu yicatecã́ri Dupade ga yósi te ome yicatecãraitigade: "Yangureni á, Dupade á, be ga yipesudode udojo ca jnoji báyipiedie jne. Uje yañurupúsu baguíjnai guio uje yigaidi tu gu jeta jé ca baruode chimoque dínique uje ore doi badode iji Baguíjna cuchábi ajei."

¹⁵ Uje yimate yipésu Dupade iguíjnai úringai uerate aja quigode mu yajire yurasade ore ga yimo uje ore chisa dejode iji dire puyade ga ore chajuque yaguté. Uñane doi dacade úvadie iji dire puyade enga ore chijose jeta ore pésu víno iji ga ore chóji otadode. Jé basa ga uñane na dacade trígo iji dire puyade to ga ore chaquesu ubugode. Jé basa uñane na dacade cucha uñane iji dire puyade to ga ore gachidode burica quedéjna chijnoque ore acade cucha aja ore iguíjnai uje puyaque mu jeta gosi gachitique chijnoque cuchárique iji dire puyade mu. Enga ore jno dacade cucha údi enga ore gachidode burica quedéjna chijnoque ore acade aja ore idáidatéi Jerusalén to ujetiga ore doi oré tome ore acade cucha iji dire puyade gatuaque.

¹⁶ Enga ore juegádi tu ome purása quedéjnane ore to jeta ore di dagúchade údi to iji dire puyade ga ore doi oré tome to. Jecute tírogosode jecucha ore di gatuaque iji dire puyade iji Jerusalén ujetiga judíode ore doi oré tome ore ugúchade to.

¹⁷ A jé u uje yimáta judágosode yoqueduguéjnane ore aja ñane nanique ga jé u uje yuruode uajácho ome ore. Ga yósi tome yuruode: –Gajnarenguipise uacasocade udore uje uacoyo dire omíji Dupade ojningane dire puyácho enga uacabeyoi oredie iji gatuaque. Uje uacasayo uaquejode iji dire puyade udore enga uacoyo cucha bisidéguiji Dupade garéngone dire puyácho.

¹⁸ ¿Ama ca arajáyo uje uacai cásodicáite ore jmapiedie u uacagaidedie udire? Enga ore ijnimique yocangureni Dupade ájningai nanique enga cucha cãri yoquidai Jerusalén iji jnumi nanique ome ore isoca gajnaréngone udore. Enga Dupade chinguíra dipoi taja yoque ga noñome yóguiji te jmete ga jé u uje purása quedéjnane chujñieta yóguiji dajade. ¡Ise mu uacagaidi u ujetiga Dupade dopoi dasoca casicaite rĩ ome yocayode ore, ome cutejmai uacaturuturéringadaté iji dire puyade!–

¹⁹ Enga jé u uje chise dire puyai yuminóri dire nanique enga guedé e jno ga yojningame yurasade udore: "Ajucho yocujuyaquei jorídedie jnese. Enga achẽcho jorídedie gai jne iji dire puyai eruépisi." Enga jé u uje yiroque yiroguipísode aja yocujuyaquéode piagode enga yojninga: "Eti oredie gaisónique uñeque pota chaca yoquidai enga aranguipis ome gosi."

²⁰ Enga jé u uje oredie gaisṍreméone uje ore tẽra dagúchade ome oredie ore di jóroque iji dire puyade mu ore moji yocujuyaquei jorídedie uéchai.

²¹ Mu a yudute jne uje oredie gaisórone ore déji yocujuyaquei jorídedie uéchai iji dire puyátique enga a yibágui ore jne enga yósi tome ore jne: "Dire puyaque udé ome judíode uyoque. Boyo uaquẽrapáidode uacagúcha údi jne. Enga ca amóñoji yocujuyaquei jorídedie ejode. Ujetiga ca boyo ga a yicoi soldádode ome uaque jne enga a ore suru uacabáyode jne." Ga jé u nanique uje ore cha oredie iji dire puyade enga que ore diapo dẽrapáidode dagúcha údi nanique rĩ iji dire puyade.

²² Enga jé u nanique uje yojningame levígosode ore: "Apésupúsu uaque ome dire puyade yui ujetiga arocho yocujuyaquei jorídedie ejode. Yigaidi tu jeta ca gosi cho dire omi iji Dupade garéngone dire puyácho." Ga Nehemías uyu yicatecã́ri Dupade nanique ga yósi tome yicatecãraitigade: "Yangureni á, Dupade á, ajnusina uje yãraque dire puyade ore ome yurasade jeta ca ore chisa dejode iji baréngone dire puyácho. Yangureni á, caniranguipise ua ome yu ga jé bo bacaniratiguéode údi ome yu, enga osṍrapo yu rĩ."

²³ Mu yajire yurasade to nanique enga yimo ore isocai uñai nanique rĩ enga ore isocai tuté u uje chajuguipise yaguté nanique. Ga u nanique uje ore chisapo dacotedie iji purása quedéjnane urodie to rĩ. Ga yojningane purása quedéjna ore unirone íode u udojo: Asdod, Amón, Moab ore.

²⁴ Enga chajuque yaguté uje yocurasade udore uñane ore abode que qué chirajápo yocuruode rĩ, enga udore uñane ore doi datedie ore urasade uru guichayade uje ore uruode i tu asdódgosode uruode, jé ore abode uñane ore doi puru guichayade uñane to.

²⁵ Ga yicáji yurasade udore uje ore chóji purása quedéjnanie gari, enga yajei dotárome ore enga yejnapise yu aja guesi ome ore. Ga yinguíra yijmanai taja uñane, jé basa ga yayo uñane gatúode údi ga yĩrarare enga yósi tome ore: "Enga beyoi enga ãraracho iji yiquigade ome uacáyuquetoringane jne enga oyósi tome Dupade jne: 'Dupade á, a ca yujuéga yuróraque, yujnacánique ore jne ome purása quedéjnarique ore jeta ore chóji ore gari.' Enga ojnichópo jne rĩ: 'Dupade á, a ca yóji purása quedéjnaraque gari jne enga a ca yopise yacoté iji purása quedéjnaraque jne.' Enga oyósi tome uacáyuquetoringáringo jne.

²⁶ Enga yĩrarare ga yopósi tome ore rĩ: "Uacasijnaringuéone udore jé chopise israélgosode ore eduguéjna cuchábi casicaite Salomón isijnaringuédatéi casicaite. Iji taningai nanique ga uté ujnomei sué eduguéjna cuchábode ore ujnoméone gáyode nanique iji erámi údode jnese. Ga Dupade chejna cutejmai dajnoraquédaté aja uté to nanique. Enga ichajapite uté úringai eduguéjna cuchape aja uté nanique ujetiga israélgosode ore cho deduguéjnai iji uté nanique. Mu uté acotedie gapu dipeséjnai ore pésu unerotiguei nanique ome Dupade uje uté acoté dipeséjnanie purása quedéjna ore chacate uté ome dangurenone dupa quedéjna adode nanique.

²⁷ Jecute uaque u uje uacapéso uacarasade uyoque yoquiñoñaringuei ome Dupade, enga a yoco yoquiba uacasoca noñángone udore jnese jne. A ca yujuéjopo uágome cucha gajnarétique jne rĩ jeta asayopo purása quedéjnaringui ore rĩ."

²⁸ Ga Dupade iroguipísode ore eduguéjna cuchábi Eliasib uté ujnacarode uñai Joiada uté abi u to uje chisa purása quedéjnane uñai uro nanique ga cho dacoté iji. Ga Eliasib uté ájnami uté acoté u purása quedéjnane eduguéjnai uro uje uté i tu Sanbalat. Ga uté upúsu israélgosode ore yoquetésõredatépisi nanique, ga uté ijnimique pocaningai ome yoque gatuaque nanique. Jecute yejna yu aja guesi nanique ga ájningaránguipíse yu nanique, ga Eliasib ájnami uté chayome yoque nanique.

²⁹ Ga Nehemías uyu yicatecã́ri Dupade nanique ga yósi tome yicatecãraitigade: "Yangureni á, Dupade á, amíningapísa baroguipísode, levígosode ore iji yocujade uje udore ore ipesute yoquiñoñaringuéone ome ua uje ore dopísi betégode iji yocujade gu. Enga jé chuságaja ua to uje ore cho cucha bisidéguiji dáringane barócho.

³⁰ Mu uyu ga yiroque purása quedéjnanie udire aja dode, enga yãraque purása quedéjnanie ore isocade ome barógode udore. Ga e yirógapo barógode udore aja bajegaidode cucha to jeta ore chijnire ñane aja ome bapotigádode cucha omío to iji baguíjna cuchábi ajei. Enga baroguipísode, levígosode e ore dépoji dajnéone baroquéo iji baguíjna cuchábi ajei enga e ore pésapo quigode rĩ.

³¹ Enga yoquerogode pite dimane ome yoquiborigode cuchiso yui uje yibocome ua iji dire puyade jnese. Enga yocacade e a bajade dimane iji baguíjna cuchábi ajei to iji baquei. Yangureni á, Dupade á, ajnusinápisa yu ome yipesudode udojo baroquéo enga amesẽre yisocade udojo ome ua."