Nehemías 12 - Dupade Uruode

Dupade iroguipísode sacerdote ore íode u udojo uje aroraque ore nanique jé aja levígosode uñane

¹ A e yatata Dupade iroguipísode ore íode ome uaque jne uje aroraque ore nanique. Yojningane u udore ore uje ore nóna Salatiel ujnacari Zorobabel, Jesúa ore nanique uje ore chajníja daniri Judá nanique. Yatatagode upo Dupade iroque uñane íode to uje ore chojningame ore levígosode nanique. Yatataque bajade u Dupade iroguipísode ore íode: Seraías, Jeremías, Ésdras,

² Amarías, Maluc, Hatús,

³ Secanías, Rehum, Meremot,

⁴ Ído, Ginéto, Abías,

⁵ Mijamín, Maadías, Bílga,

⁶ Semaías, Joiarib, Jedaías, Sálu,

⁷ Amoc, Hilcías, Jedaías ore. Dupade iroguipísode sacerdote ore eduguéjnapise ore jnese, ga ore jõrai u Jesúa nanique uje ore jnoji babilóniagosode ore gari nanique.

⁸ Levígosode ore u udojo nanique: Josué, Binúi, Cadmiel, Serebías, Judá, Matanías ore. Yojningane udore u uje deyade ore cho deduguéjnane iji ore nanique ga ore u uje ore chacate dojode deya ome Dupade iradedie, ga ore chicota Dupade gatuaque uje ore chijñecáraja Dupade iradedie udire nanique.

⁹ Levígosode ore eduguéjnane uñane ore íode u Bacbuquías, Úni ore, enga ore u nanique uje ore cháta cuchade aja ijñecacade ore to uje ore chijñecáraja Dupade iradedie iji darasade ore iquei nanique iji Dupade iguíjna cuchábi ajei.

^10-11 Jesúa ujnacari i tu Joiacim nanique. Joiacim uté ujnacari i tu Eliasib. Eliasib uté ujnacari i tu Joiada. Joiada ujnacari i tu Johanán. Johanán ujnacari i tu Jadúa.

¹² Iji dirode udojo nanique uje Dupade iroguipísode ore eduguéjnai u Joiacim ga uté jorane Dupade irócho u udojo nanique: Seraías ujnacari Merarías; Jeremías ujnacari Hananías;

¹³ Ésdras ujnacari Mesulam; Amarías ujnacari Johanán;

¹⁴ Melicú ujnacari Jonatán; Sebanías ujnacari José;

¹⁵ Harim ujnacari Ádna; Meraiot ujnacari Helcai;

¹⁶ Ído ujnacari Zacarías; Ginetón ujnacari Mesulam;

¹⁷ Abías ujnacari Zícri; Miniamín ujnacari u to nanique rĩ, mu que pirajaque uté i jecute que purusãraque iji de; Moadías ujnacari Piltai;

¹⁸ Bílga ujnacari Samúa; Semaías ujnacari Jonatán;

¹⁹ Joiarib ujnacari Matenai; Jedaías ujnacari Úzi;

²⁰ Salai ujnacari Calai; Amoc ujnacari Eber;

²¹ Hilcías ujnacari Hasabías; Jedaías ujnacari Natanael.

²² Iji dirode udojo nanique uje pérsiagosode ore eduguéjna cuchábi u Darío nanique enga purusãraque Dupade iroguipísode ore íode jnese, jé aja levígosode ore íode to. Levígosode ore eduguéjnane íode u udojo iji yojningane díño udore nanique: Eliasib, Joiada, Johanán, Jadúa ore.

²³ Enga jecucha purusãracho levígosode ore dayode íode to iji darujna aode to jé aja dirode udore nanique uje levígosode ore eduguéjnai u Eliasib ájnami Johanán.

^24-26 Ga yatataque ejode udojo u levígosode ore íode iji dirode udojo nanique uje israélgosode ore eduguéjnapísi gobernador u Nehemías uyu, jé aja uje Dupade iroguipísode uñai Ésdras u sacerdote jé aja ore acadisṍri ome Dupade uruode quigode. Ga levígosode udore ore íode u udojo nanique: Hasabías, Serebías, Josué, Binúi, Cadmiel, jé aja udore jorane to uje udore ore jnese chacate dojode levígose ome Dupade iradedie nanique uje ore chijñecáraja udire nanique iji Dupade iquei. Enga ore chijnire ñane aja nanique ome dasagode udore nanique iji Dupade iguíjna cuchábi ajei. Ore eduguéjna cuchábi David casicaite u iji taningai nanique uje chiroque udore ore dáquiode aja nanique ujetiga ore chicota Dupade gatuaque, jé aja ujetiga ore chijñecáraja Dupade iradedie gatuaque to. David uté u nanique uje Dupade cho dedójnari jnani iji uté nanique. Dupade iguíjna cuchábi piagode irodisórone ore eduguéjnane íode u udojo nanique: Matanías, Bacbuquías, Obadías, Mesulam, Talmón, Acub ore. Yatatagode jnanío udore ore eduguéjnai u Joiacim. Joiacim uté dai i tu Jesúa nanique, jé basa ga uté dáquide i tu Josadac.

Chise diri uje israélgosode ore pésu daninaquédatéi ome dajuyaquei úringai pimanique iji dabai

²⁷ Enga chise diri uje yipéco yoquininaquédatéi ome yocujuyaquei úringai pimanique iji yoquibai, ga yisígo yoquimani uté ome Dupade ga uté gajneque jne, ga yibicoi levígosode ore jnese jeta ore cháta raja yoque to ome cutejmai yoquininaqué. Enga ore chijna dajocayade, jé aja dabuchugode ore ome cutejmai yoquininaqué nanique.

^28-29 Ga deyade ore di jnese to uje ore gajnepídi u ijñecacai ome Dupade iradedie, uje deyade ore idáyode déji Jerusalén guesode enga ore tṍraji dajñarenie uje ore chise yóguiji Jerusalén. Uñane ore tṍraji dedai Netófa, jé uñane tṍraji ore idáyode uñane to rĩ uje ore idáyode udore íode u udojo nanique: Bet-gilgal, Géba, Azmavet ore.

³⁰ Enga Dupade irógode sacerdóteo, jé aja levígosode uñane ore dopísi Moisés urusarane quigode ome raque. Enga ore churúpise dabáyode, ga jé ore chuságaja daguidedie ga que ore iguidedie iguínique cuse to. Enga ore dopísi Moisés urusarane Dupade urúo quigode to ome darasade ore úringáringo icha yui to, ga jé chuságaja ore ujuyaquei iji ore gai to, jé aja ore ujuyaquei jorídedie to rĩ. Ga ore pésupúsu gu uje ore gaidi tu jeta ichapise cuchade jnese ome Dupade yui jetiga chajire ore ujuyaquéode udore, enga cho dajnéngu to.

³¹ Enga Nehemías uyu yojningame yoqueduguéjnane: "Ocho yocujuyaquei ga arichóji ójo gai to." Ga Dupade irógode, levígosode ore nóna yoqueduguéjnane ore iji yocujuyaquei ójo to ga ore diguiji to. Enga yojningame ore: "Ajucho uáguiji ñane enga uacuñéngo chicai yãrachua qui, enga uacuñéngo chicai yarasé qui, enga atuãchóa ñane iji sañeque jne. Enga ajñecacho jnese ga aracho Dupade iradedie aja uacaquigode." Ore jno ga ore qui tu yãrachua qui ga ore diguiji yocujuyaquei ójo ga ore chicáji yocujuyaquei piagoi yui uje i tu Pasigode Gajnei Piago.

³² Enga judágosode yoqueduguéjnane peque uñai ore nóna Osaías ga ore chajna bajade ucode ore uje ore chijñecáraja Dupade, enga ore diguiji yocujuyaquei gai to.

³³ Enga udore ore íode u udojo: Azarías, Ésdras, Mesulam,

³⁴ Judá, Benjamín, Semaías, Jeremías ore.

³⁵ Enga Dupade iroguipísode sacerdote uñane chajna yoqueduguéjnane udore enga ore diguiji yocujuyaquei ójo to enga ore chubúchu dabuchugode aja ore quigade enga ore íode u udojo: Jonatán ujnacari Zacarías u uñai, enga uté dáqui gatéode ore íode u udojo: Semaías, Matanías, Micaías, Zacur, Asaf ore.

³⁶ Ga Zacarías jorane ore uje ore chubúchu dabuchugode to ore íode u udojo: Semaías, Azarael, Milalai, Gilalai, Maái, Natanael, Judá, Hananí. Enga udore ore ubuchugode jé upúsu eduguéjna cuchábi casicaite David urása cásodicáite ore ubuchugode to. David uté u uje Dupade cho dedójnari jnani iji uté nanique. Enga yocacadisõre cuchábi Ésdras doi nanique enga diguiji deyade udore ore iquei iji yocujuyaquei ójo uje ore chubúchu dabuchugode iji ójo.

³⁷ Enga yojningane udore ore jnese ore jno ga ore diguiji yocujuyaquei ójo enga ore chise yocujuyaquei piagode uñai uje i tu Sibíjnai Gajnei Piago, ga ore jnopo rĩ enga ore chise ore ora cototé uje déji yocujuyaquei ójo uje ore chojningame uaté David Idai Gajnei Cototé. Ga ore uchiejnane chajna cototé uaté aja gaté ga ore choru to aja ójo ga ore chajna ore uchiejnane aja uécha uñai gaté rĩ, enga ore jnopo rĩ, ga ore chisápo yocujuyaquei piagode uñai te rĩ uje i tu Yodi Gajnei Piago uje uté dépisiji guedé garani yui.

^38-39 Enga e yatata udore ore uje ore diguiji yocujuyaquei ójo ga ore chicáji yarasé qui. Enga Nehemías yugúsiji udore ore ujade to ga yicoji cototé uje i tu Cucha Piborigode Jogadébei Cototé, enga yico yocujuyaquei piagode uñane to rĩ uje udore ore íode u udojo: Efraín Gajnei Piago, Jesána Gajnei Piago ore. Ga yicoji udore ga yicópo yocujuyaquei piago uñai to uje i tu Oyite Gaisórone Gajnei Piago. Ga yico enga yico ore ora cototé to rĩ uje i tu Hananeel Gajnei Cototé, ga yocópo uaté rĩ, ga yicagóji ójo enga yiñóñangoji uéchai te rĩ, ga yocópo ore ora cototé uña to rĩ uje i tu Cototé Uje Gajnesórone 100, ga yicoji uaté ga yico yocujuyaquei piagoi uñai to rĩ uje i tu Áyasadie Pípidiringai Piago, enga yicoji uté ga yico yocujuyaquei piago uñai rĩ uje i tu Soldádode Charidébei Piago ga yibacóji uté.

⁴⁰ Ga yicoi jnumi tiji yocujuyaquei ójo ga yico ñane iji Dupade iguíjna cuchábi jnese. Ga judágosode ore eduguéjnapisode uñane jĩraque ore nóna Nehemías uyu aja Dupade iguíjnai uté nanique.

⁴¹ Enga Dupade iroguipísode ore ujnacarode uje ore chubúchu dabuchugode ore íode u udojo: Eliacim, Maaseías, Miniamín, Micaías, Elioenai, Zacarías, Hananías,

⁴² Maasías, Semaías, Eleazar, Úzi, Johanán, Malquías, Elam, Ezer. Enga deyade acadisóreméi i tu Izrahías.

⁴³ Yocurasade ore pésu daninaquéode gu uje ore chimate dorai dajuyaquei aja gaté. Enga ore irasitigai garani tu Dupade uje chĩreta ore ajéode ome pirasitigade gu. Jecute jiei ore guẽrapáidode cuchiso ome Dupade to uje Dupade iroguipísode ore chibore udore ome Dupade iji diri uté nanique. Ga jé chopome chequedíe to rĩ, ga ore nínapúsu re, jé aja disiode to ga ore nínapúsu re. Enga yocurasade ore nína re jnese ga ore ichorájnane chise gatajnoquei.

Israélgosode ore nínapúsu re gu Dupade irógode, levígosode udore ore ipesudode ome Dupade iji dajade

⁴⁴ Enga yocurasade ore chimópo Dupade iroguipísode ore ipesudode, jé aja Dupade irógode uñane uje ore i tu levígosode ore ipesudode rĩ, enga ore nínapúsu re to, enga dimane ore gueranone cucha ome ore to. Enga ore chojninga: "Beyoi ga yucuegoi yocangurenéjnane jnanío jne ujetiga ore chisa yoqueranone jne ome Dupade irógode ore, enga a ore u jne jeta ore añeraque yoquẽrapáidode cucha oreránguejnane guio, jé aja yocacade a bajácho to ga ore chañuru guio to jne, jé aja yoqueranone uñane uje yisecãco ga chejna yijmanáyone ga yisígo ome chojmarai ome Dupade. Yipéco udore quigode gu uje purusãracho udore iji Moisés urusarane Dupade urúo gu."

⁴⁵ Enga ore chojninga: "Que gusu ome Dupade irógode ore, mu a yisígome péode ome ijñecacade ore to, jé aja Dupade iguíjna cuchábi piagode irodisórone ore to rĩ. Uje yoqueduguéjna cuchábi cásodicáite David, Salomón ore ichajapite udore ore dai cásodicáite aja ore charidode udore gu nanique, ga ore gaidi tu nanique jeta ore ape disi ejode chajnerame ore isocade nanique.

⁴⁶ Enga yoqueduguéjna casicaite David ipesute bajai tu Asaf uté nanique ujetiga deyade cho dangaráni iji uté gaté. Uje yoqueduguéjna casicaite David pota nanique ujetiga jiépisi ore ininaquéode nanique ome Dupade, ujetiga ore chacãrápo Dupade gai to nanique rĩ."

⁴⁷ Iji dirode udojo nanique uje ore eduguéjnane u Zorobabel, Nehemías uyu enga yocurasade caniranguipis ore ome Dupade irógode nanique. Enga ore chisi ome ore posode ome ore iji deréjnane jnese. Yojningane u: ijñecacade uje ore chijñecáraja Dupade iradedie, jé aja Dupade iguíjna cuchábi piagode irodisórone to rĩ, jé aja levígosode to uje ore gajnepídi tu cucha pisagode iji Dupade iguíjnai, jé aja jnani bajai Aarón ape disi ejode ore to rĩ uje ore gajnei tu picatecãraitigade ome Dupade ome darasade ore.