Nehemías 11 - Dupade Uruode

Ore tibidi darasade nanique iji ore uniri Judá údode ujetiga uñéngo chécãre dedáyode ga ore cho deda iji Jerusalén to

¹ Mu yipéco yocáyipiedie ome yoque jeta yoqueduguéjnane ore déji yoquidai Jerusalén jnese ga ore cho dedáji to. Mu yocáyipiedie jé u to jeta jerusaléngosode yiquérango to iji yoquidai uje garósi yóguiji gu. Jeta jerusaléngosode yõco yoque to uje garósipise yóguiji Jerusalén gu. Enga yicatecãcoi yocurasade ore iji yoquidai Jerusalén dosadode. Enga yojnico: "Yijorane uaque á, asingacho uágaja ñane. Jeta ore batigai chejna yijmanáyone enga chojmarárique chicai yoquidai Jerusalén udé to. Enga jé isocai upo to rĩ ome uñane to rĩ ujetiga ore batigai chejna yijmanáyone enga chojmarárique chicapóji yoquidai tudé Jerusalén to jne. Uje Dupade cho dedai iji yoquidai Jerusalén uté gu enga gajnareque eti garósi yóguiji."

² Mu yocurasade chudute udojo uje yibicoi ore iji yoquirosadode iji Jerusalén ejode enga jiei ore uje ore chojninga: "Ejẽ́, a uyoque u to jne arĩa." Enga yocurasade jerusaléngose yacãco Dupade gai ome udore ore uje jĩraque ore doi yoquibijnane.

³ Israélgosode uñane qué jiei ore uje ore gajnéone jnupe déji pidai uñane ga udore ore chácariji deda arode uje ore idáyode udore déji ore uniri Judá uté údode, ga jiei Dupade irógode to uje ore cho dedáji udore ore idáyode udore to, jé aja levígosode, jé aja jnanione to uje ore doi Dupade irógode iroquéode iji Dupade iguíjna cuchábi, jé aja eduguéjna cuchábi casicaite Salomón irógode ore ape disi ejode ore to. Mu a qué yatata yoqueduguéjnane uñane ore íode iji de uje udore ore chécãre dedáyode enga ore cháta raja yoque iji yoquidáidatéi Jerusalén nanique. Judágose udore uñane, jé basa ga benjamíngose uñane.

⁴ Ga judágosode udore íode u udojo: Uzías ujnacari Ataías u uñai, enga Ataías uté dáquide, dáqui gatéode udore ore íode u udojo nanique: Zacarías, Amarías, Sefatías, Mahalaleel, Fares ore.

⁵ Enga Baruc ujnacari Maasías u uñai, enga Maasías uté dáquide, dáqui gatéode udore ore íode u udojo nanique: Colhoze, Hazaías, Adaías, Joiarib, Zacarías, Silóni.

⁶ Enga jnani bajai Fares casicaite uté ape disi ejo yatatagode udore ore jnese. Pocaningai irajasórone udore ore jnese nanique. Enga udore ore jnese ore nóna daguiosode ore aja Jerusalén jnese nanique ujetiga udore ore cho dedáji Jerusalén to nanique ga udore ore batigai chise 468 nanique.

^7-9 Benjamíngosode uñane uje ore chécãre dedai nanique ga ore cho dedáji yoquidai Jerusalén nanique ga ore íode u udojo: Salú u uñai, jé aja uté uyade uje ore íode u Gabai, Salai ore. Udore ore dai i tu Mesulam, ga uté dai i tu Joed. Joed uté dai i tu Pedaías; Pedaías uté dai i tu Colaías; Colaías dai i tu Maasías; Maasías dai i tu Itiel; Itiel dai i tu Jesaías. Ga Salú iguiosode ore nóna uté jnese nanique enga ore cho dedáji Jerusalén to jnese nanique, ga ore batigai chise 928. Udore ore cho deduguéjnai iji Zícri ujnacari Joel; enga Senúa ujnacari Judá u ore asuté to ga cháta cuchade aja Joel uté nanique.

¹⁰ Dupade iroguipísode sacerdote udore uje ore cho dedáji yoquidai Jerusalén nanique ore íode u udojo: Joiarib ujnacari Jedaías u uñai, ga Jaquín upo uñai rĩ.

¹¹ Hilcías ujnacari Seraías upo uñeque rĩ, enga Seraías uté dáquide, dáqui gatéode ore íode u udojo nanique: Mesulam, Sadoc, Meraiot, Ahitob ore. Dupade iroguipísode ore eduguéjnapísi u Ahitob casicaite uté nanique.

¹² Seraías uté ujode Dupade iroque uñane ore nóna uté aja Jerusalén uté nanique enga ore cho dedáji to nanique enga ore batigai chise 820. Enga Jeroham ujnacari Adaías upo uñai nanique rĩ, enga Adaías uté dáquide, dáqui gatéode ore íode u udojo: Pelalías, Ámsi, Zacarías, Pasur, Malquías ore.

¹³ Adaías uté iguiosode ore nóna uté to nanique ga jnanione iji udore ujade, ore batigai chise 242. Azareel ujnacari Amasai upo uñai nanique rĩ. Enga Amasai uté dáquide, dáqui gatéode ore íode u udojo: Azai, Mesilemot, Imer ore.

¹⁴ Amasai uté iguiosode ore chiraja pocaningai isocade jnese, ga udore ore eduguéjnai u Gedolim ujnacari Zabdiel. Ga ore nóna darásai uté aja Jerusalén to jeta ore cho dedáji uté to ga ore batigai chise 128.

^15-16 Levígosode uñane ore chécãre dedáyode to ga ore cho dedáji Jerusalén to nanique ga udore ore íode u udojo nanique: Hasub ujnacari Semaías u uñai. Enga Semaías uté dáquide, dáqui gatéode ore íode u udojo: Azricam, Hasabías, Búni, Sabetai, Jozabad ore. Enga eduguéjna Sabetai, Jozabad ore iji dojode levígosode ujade nanique enga ore isai tu nanique jeta ore chajire cuchade yúode iji Dupade iguíjna cuchábi iguíjnai ejode.

¹⁷ Micaía ujnacari Matanías upo uñai nanique rĩ. Enga Matanías uté dáquide i tu Zábdi, enga Zábdi uté dai i tu Asaf to nanique, enga deyade uje ore chijñecáraja Dupade iradedie uje ore chamáta ñane ome picatecãraitigade ome Dupade, udore ore eduguéjnai u Asaf casicaite uté nanique. Matanías dáqui gatéode uñane ore íode u udojo to: Bacbuquías, Ábda, Samúa, Galal, Jedutún ore.

¹⁸ Levígosode ore jnese uje ore cho dedáji Jerusalén uté nanique ore batigai chise 284.

¹⁹ Dupade iguíjna cuchábi piagode irodisórone gare uje ore chécãre dedáyode nanique ujetiga ore cho dedáji Jerusalén enga ore íode u Acub, Talmón ore. Udore ore iguiosode nóna ore aja Jerusalén jnese to nanique ujetiga ore cho dedáji to nanique ga ore batigai chise 172.

²⁰ Mu israélgosode uñane jnese ore chácariji dajnéone jnupe iji dedáyode uñane iji ore uniri Judá uté údode. Jé aja Dupade iroguipísode amirone ore, ore chácariji dedáyode uñane to, jé aja Dupade irógode uñane uje ore i tu levígosode, udore amirone chácariji dedáyode uñane to iji udore, udore.

²¹ Dupade iroguipísode iróquegatéode ore eduguéjnane ore íode u Zíha, Gíspa ore nanique, ga jnanione udore ore nóna dojode Dupade iroguipísode irócho aja ore idai Ófel enga ore cho dedáji uté jnese nanique.

²² Levígosode udore uje ore gajnei tu pijñecacade ome Dupade iradedie ore eduguéjnai i tu Úzi nanique, ga Bani ujnacare uté nanique. Úzi uté dáquiode ore isai jé u uté isai to jnese iji taningai nanique ga ore íode u udojo to: Hasabías, Matanías, Micaía, Asaf ore.

²³ Eduguéjna cuchábi casicaite David ichajapite Asaf uté aja dáringai eduguéjna nanique ujetiga deyade ore cho deduguéjnai iji uté ome Dupade iradedie ujetiga ore chijñecáraja udore iji Dupade iguíjnai ajei gatuaque.

²⁴ Petaías u nanique uje chise eduguéjna cuchábi Artajérjes ujetiga catecã́ri uté ga chatata darasade áyipiedie quigode ome eduguéjna cuchábi uté, jé basa ga uté chingopo eduguéjna cuchábi áyipiedie gaté ome darasade to nanique rĩ. Petaías uté dai i tu Mesezabeel. Mesezabeel uté dai i tu Zéra, jé basa ga Zéra uté dai i tu Judá nanique.

Judíode ore idáyode uñane ore íode u udojo

²⁵ A qué yatataba yocurasade judágose ore idáyode íode to ga ore íode u udojo nanique: Quiriat-árba, Dibón, Jecabseel,

²⁶ Jesúa, Moláda, Bet-pelet,

²⁷ Hazar-sual, Beerséba,

²⁸ Síclag, Mecóna,

²⁹ En-rimón, Zóra, Jarmut,

³⁰ Zanóa, Adulam, Láquis, Azéca ore, jé aja acorásedie to iji udore ejode. Judágosode ore idáyode udore déji ore idai Beerséba, pararinguei Hinom ore ujai.

³¹ Yocurasade benjamíngose ore idáyode íode u udojo to nanique: Géba, Micmás, Aía, Betel jé aja acorásedie iji Betel uté ejode,

³² Anatot, Nob, Ananías,

³³ Hazor, Ramá, Gitaim,

³⁴ Hadid, Seboim, Nebalat,

³⁵ jé aja Lod, Óno ore. Benjamíngosode uñane ore chácariji pararinguei to uje ore chĩ́care Artesános aja uté nanique.

³⁶ Ga levígosode uñane to uje ore chácariji judágosode ore achamini ica, mu benjamíngosode e chisi ome jnumi ome ore ujetiga ore chácariji ore ejode to iji dedáyode udore ejode.