Nehemías 10 - Dupade Uruode

¹ Ga Ésdras uruode udojo quigade ga ore doi darujna aode enga ore churúsãre déode iji: Enga bajai tu Nehemías uyu uje yurúsãre yi iji yocurusarane udore uje ore eduguéjnai gobernador upúsu yu gu, ga Hacalías ape yu nanique enga Sedequías churúsãre dei iji to.

² Enga Dupade iroguipísode sacerdóteo uñane uje ore isai tu picatecãraitigade ome Dupade ome darasade ore churúsãre déode to ga ore íode u udojo nanique: Seraías, Azarías, Jeremías,

³ Pasur, Amarías, Malquías,

⁴ Hatús, Sebanías, Maluc,

⁵ Harim, Meremot, Obadías,

⁶ Daniel, Ginetón, Baruc,

⁷ Mesulam, Abías, Mijamín,

⁸ Maazías, Bilgaí, jé aja Semaías.

⁹ Levígosode uñane ore churúsãre déode to ga ore íode u udojo to nanique: Azanías ujnacari Jesúa, Henadad ujnacari Binúi, Cadmiel,

¹⁰ Sebanías, Hodías, Kelíta, Pelaías, Hanán,

¹¹ Micaía, Rehob, Hasabías,

¹² Zacur, Serebías, Sebanías,

¹³ Hodías, Bani, Benínu ore.

¹⁴ Enga israélgosode yoqueduguéjnane uñane ore churúsãre déode to ga ore íode u udojo to nanique: Paros, Pahat-moab, Elam, Zátu, Bani,

¹⁵ Búni, Azgad, Bebai,

¹⁶ Adonías, Bigvai, Adín,

¹⁷ Ater, Ezequías, Azur,

¹⁸ Hodías, Hasum, Bezai,

¹⁹ Harif, Anatot, Nebai,

²⁰ Magpías, Mesulam, Hezir,

²¹ Mesezabeel, Sadoc, Jadúa,

²² Pelatías, Hanán, Anaías,

²³ Oseas, Hananías, Hasub,

²⁴ Halohes, Pílha, Sobec,

²⁵ Rehum, Hasabna, Maasías,

²⁶ Ahías, Hanán, Anán,

²⁷ Maluc, Harim, jé aja Baana.

Israélgosode ore chajo raja daruode úringane ũrepíso jnese iji Dupade iquei jeta ore dopísi uruode quigode

^28-29 Yocurasade uñane uje que ore íode déji yoquíode gari to mu ore áyipie jé u yocáyipiedie quigode to ujetiga ore doi Moisés casicaite urusarane Dupade urúo quigode jnese uje Pangarádejnai chisíome Moisés uté. Yojningane yocurása u Dupade iroguipísode ore uje udore uñane gajnepídi tu picatecãraitigade ome Dupade ome darasade iji Dupade iguíjna cuchábi ajei, jé aja levígosode to, jé aja Dupade iguíjna cuchábi piagode irodisórone to, jé aja deyade ore to uje ore chijñecáraja Dupade iradedie gáyode, jé aja Dupade iroguipísode ore iróquegatéode to uje udore gajnepídi tu cucha pisagode iji Dupade iguíjnai ejode, jé aja yocurasade uje ore idáyode déji yoquidáidatéi Jerusalén ejode, jé aja jerusaléngosípisode ore to rĩ, jé aja yocujnacarode ore jnese, jé aja yocurodie ore to rĩ, jé aja yocabode ore jnese to uje e ore chiraja cucha gajnaréngone, cucha omone ore iji ñane to, jé aja yocacotedie to. Enga yimátago yocurasade udore jnese aja yoque ujetiga yisígo yocuru iyiejájnane ome Dupade jnese. Ga jé u uje yajógo yógaja yocuruode úringane ũrepíso jnese iji Dupade iquei. Enga yocuruode u udojo nanique:

³⁰ A jé ca yisigopome yocurodie ome purása quedéjnaringo to jne rĩ jeta ca ore chójiji purása quedéjnane ore gari to. Enga a ca yipótago jne jeta yocujnacarode ore cho dacoté iji purása quedéjnane urórigui to jne.

³¹ Enga jé chopome purása quedéjnane ore to jne rĩ. Ujetiga ore pota oredie ome dagúcharigo jne iji dire puyátique mu a ca yisagopo jne enga a ca yicoi orerángome jne. Jeoga yocujnusinamáni dire u uje ore di údi iji yoque mu a ca yisago ore guẽratígo ore ugúcha jne enga ca yicoi oré tome to jne, uje dire puyaque yocujnusinamánone díño gu. Enga a yicopísi Dupade uruode to jne eti siqueredie gare iji ti enga a ca yocuñeque pésu dejnatique jne eti chise siqueredie uje gare iji ti, ga a ca gosi chichagu jnumi jne iji dejnatique. Uje jnumi gajneque gu jeta cho dajñare to iji siqueré garijitia. Enga jé chopome yoquijnose carubode iji ñane gari rĩ. Eti siqueredie gare iji ti enga jé u uje yirongo yoquijnose carubode iji ñane gari jnese ujetiga ca yoquijnose carutique déji uñeque gari.

³² Yipótago jeta ca cuchárique chona Dupade iguíjnai enga yipótago jnese jeta yocáyipiedie chojmára jnese ome yoquẽratígo yocugúcha ome Dupade iguíjna cuchábi jne. Jecute ayoré chojmara, chojmarane iji yoque a yisígo plátapisedie ome Dupade jne ome iguíjna cuchábi, ga grámodie batigai a chise 4 jnese ome uyoque jnese. Ga Dupade iroguipísode a ore doi cuchade oredie ome Dupade iguíjnai gajnéone cucha jne ome yoqueranenie plátai udire jne.

³³ Enga a ore doi oré tome harína jne jeta pipesute arureque puyade iji jeta pichajapite udore aja Dupade iquei iji dirode jnese tiji iguíjnai ajé puyaque uñai. Enga jé chopome ore acatígo arroze quedéjnai jeta ore doi oré tome to enga ore chibore udore ore ubugode ome Dupade. Enga a ore dopoi oré tome cuchisode uñane to jne rĩ jeta ore chibore udore ome Dupade iji dirode jnese, jé aja dire puyade jnese, jé aja dire puyade to uje guedoside qué abape, jé aja yocujnusinamánone díño uñane jnese to. Enga a ore doi cuchisode uñane oredie to enga ore chujé enga ore chibore ome Dupade enga imoi tu jeta Dupade chĩro Dupade urasade uyoque yoquisijnaringuéone jne.

³⁴ Enga eduguéjnane uyoque yocajnepídi tu jne jeta yiríngo pidode údi ome Dupade iguíjnai ujetiga dimane pidode ome yoquiborigode cuchiso jne uje yẽcója Pangarádejnai ome, uje yocangureni Dupade u uté. Enga Dupade iroguipísode, levígosode a ore gajnepídi u to jne jeta ore di pidode údi ome Dupade iguíjnai to. Enga yijnico ñane aja jne ga yipéco uñane gajnepítigo iji dirode jne, jeta uñane gajneque dire ejo gatéode jne. Yoquigaidi u jeta yicopísi Moisés urusarane quigode jne ome yoquẽrapáidode cuchiso ome Dupade, enga yoquigaidi tu jeta ca pidode chona uyoque uñéngo iji deréjnane jnese iji siqueredie jnese.

³⁵ Yoquigaidi tupo rĩ ujetiga yicoi Moisés uru quigode iji Dupade uruode ga yisígome yocacade a bajade ome Dupade jne, ga jé chopome yocacadie pore a bajedie to rĩ uje a yisígopome Dupade to jne rĩ.

³⁶ Enga jé chopome yocape bajade iji diyoquíode ore, a Dupade gajneque ore to jne rĩ enga a yoregoi Dupade iquei to jne rĩ iji iguíjna cuchábi jeta Dupade iroguipísode chimo ore to, enga a yoco ore oré jne ome Dupade. Ga a yisígo yocachidode ape bajade ome Dupade to jne, jeoga aquirájna ape bajai u jne, jeoga áyasa ape bajai u jne mu a Dupade gajneque udore ore ape bajade udore jnese jne. Enga a yisígo udore ore ome Dupade iroguipísode ore jne. Uje Dupade uruode quigode jé u gu.

³⁷ Enga a Dupade irógode a ore gajneque yoquijaroi harína bajai to jne, ga Dupade irógode a ore gajnei yocacadie pore á bajedie, jé aja yoquijoyai víno bajai to, jé aja yoquijoyai aseque bajai to jne rĩ. Jé aja levígosode a ore gajnengápo yocacade cucha adie péode to jne rĩ. Levígosode ore u gu uje ore isaque yocacade cucha ade péode gatuaque enga jno údi aja Dupade iguíjnai jogadi gatuaque. Ga jé tiógara jeta ore cho dajnéngu yocacade cucha péode to uje ore chojningame udore décima parte.

³⁸ A yisígo yocacade cucha péode ome levígosode jne mu a Dupade iroguipísode uñeque a chajire ore yúode jne jeta ore cãra yocacade cucha adie jogadode ome ñane jne iji Dupade iguíjnai ajei uñai jne, jé aja uje ore chasingare yoqueranone péode aja ñane jne. Enga a Dupade iroguipísi uje jnani bajai Aarón ape disi ejo uté a chajuguína levígosode udore ore gajnepídode iji ore to jne enga a chojningame ore jne: "Bajnepídi tu de, jé Dupade gajnepídi tudé."

³⁹ Mu levígosode ore, jé aja israélgosode uñane ore gajnei tu jeta ore chicha darasade gueranone cucha aja Dupade iguíjnai ajé uñai uje erã́sore puyade jogadi u uté to, ga ore chisiapome Dupade iguíjna cuchábi piagode irodisórone ore iji to jne, jé aja deyade ore to uje ore chijñecáraja Dupade iradedie gáyode, jé aja Dupade iroguipísode ore to. Ga Dupade gajneque yocuruode udojo jne uje a ca yijíñongome Dupade iguíjna cuchábi iji te jmete jne, mu a jecucha ga yajico yúode jne ujetiga ca cuchárique chona Dupade irógode iji dasagode gáyode iji Dupade iguíjnai uté jne.