Nehemías 1 - Dupade Uruode

Nehemías chijócha Pangarádejnai Dupade ajei údi ome urása casodica ore

¹ Nehemías chatataba dadode iji darujna aode udojo, ga uté dai i tu Hacalías nanique. Ga Nehemías uté urúpisode u udojo ga chojninga: –Pérsiagosode ore eduguéjna cuchábi Artajérjes guejnanie siqueré e chise 20 ome dáringai eduguéjna nanique uje Nehemías uyu yidai u ore idai uje i tu Súsa nanique. Ga Súsa uté ore idai ibijoi tu nanique. Itigate di nanique uje yugúcoji guedoside uje i tu Quísleu.

² Uje itigate diji yu uje uté i tu Hananí, ga nóna dajorane aja yu uje ore tṍraji judíode yocuniri Judá. Ga jé u uje yicatecã́ri ore ome yurása arora casodica ore uje ore jno nanique ga ore chicai Jerusalén nanique.

³ Enga ore chajnai yicatecãraitigade ome re nanique ga ore chojninga: "Arora cásodicáite uje eduguéjna chatire yógaja yocuniri Jerusalén nanique, enga e cucha gajnaréngone chise yóguiji yoquidai Jerusalén uté ga cucha gajnaréngone udore chinguíra pajegátigai aja arorade uyoque. Ga yojñane gajnéone u yocujuyaquéode iji yoquibai iji yoquidáidatéi Jerusalén. Uje e serẽrája enga cási cṍra iji yoquibai enga pioi tagupo piagode jorídedie ica rĩ enga serẽrája iji uté jmainie. Ga e íjnoque yoquetotiguei iji yoquidai uté, ga cuchade jnese chise yoque ga pésu yoquiserẽrachúringai."

⁴ Enga yudute itigate ojñane udojo enga chijõrorase yu ga ore ojñane chajo yu aja ñane ga yibópise iji yejode. Ga áyuguhebátaque yu ga que yagúpo cucha pibotique rĩ. Ga dirode jiei ome yu uje yo yuyágome yu, ga yedu gaté unirísõri Dupade uje yijócha ajei údi ome yurása casodica ore uyoque.

⁵ Ga yósi tome Dupade nanique uje yicatecã́ri: "Pangarádejná, baniri tu gaté ome báringai Dupa, enga cucha pirosobádejnai tu ua ga que dupa uñeque cho bamenuringuejnai. Yirajapise ua ga gosi chijnóra ua enga doi baru uréone quigode jnese, enga baru uréone a tocade jne ome gosi jne. Uje Dupa ũrei tu ua gu.

⁶ Yijócha bajei údi iji de, enga bamo yu iji dejai údode, jé iji diri údode uje yicatecã́ri ua ome yurasade israélgosode ore uje bo baróguiji udore ore gatuaque. Mu que yipógu ome ua uje angoninguite pariguipise israélgosode yocujade ome ua, ga yipéco yoquisijnaringuéone jnese. Jé aja yijogasúode ore uyoque to, yicoi yocate gajnaréngone to.

⁷ Enga yoquisoca gajnaréngone udojo que déji pajénique. Uje baro casica Moisés di baru uréone údi iji yoque ica, jé aja baréngone cucha údi iji yoque ica rĩ. Enga israélgosode yirajágo bameserane cucha, jé aja betégode cucha mu que yipéco udore quigode.

⁸ Be ga ajnusina baru cásodicáite ome baroi Moisés uje bãrarare nanique enga bósi tome yoque nanique: 'Ujetiga ca beyoi yuruode quigode jne, enga a jé jogadi tu jne jeta yisite uágaja purása quedéjnane ore unirone ujade, iji erámi údode jnese uje jé uacajóyo uágaja uacasijnaringuéone ome yu gu.'

⁹ Enga bojninga nanique: 'Ujetiga ajníño yibai enga beyopoi yuru uréone quigode jne rĩ, enga a yangárapoi uaque jne rĩ, enga a yimátapo uágaja ñane jne rĩ iji purása quedéjnane ore ujade iji erámi údode enga a yichapo uágaja uacaniri casica Jerusalén rĩ. Uje yajegaite uaquedai Jerusalén uté to nanique, enga jé chopome yu to nanique jeta yo yidáji to ga yiguíjna cuchábi jogadi upúsu uté to ga yúringai picotaque pijogúsorone a u uaque jne iji uaquedáidatéi uté.'"

¹⁰ Ga yojningame Dupade: "Cachi barasade u israélgosode yoque arĩa, uje bajnime yóguiji yocumajosórone jmainie ica ome cutejmai betotiguejna.

¹¹ Uje yicatecã́ri ua, Pangarádejná, Dupade á, mu que yigaidi tu jeta picotaque barasade israélgosode uyoque, mu yigaidi tu jetiga picotaque ua ome erámi unirisórone ore iji erámi údode jnese. Jecute be ga angári yicatecãraitigade unojo ome yurasade israélgose uyoque. Uje yipotapísa jeta yirógopo yoquidáidatéi Jerusalén ujuyaquéode aja gaté jne rĩ. Jecute uje yiji eduguéjna cuchábi iroquéode, mu be ga angurase áyipie jne jeta tangári yuruode jne." Iji dirode udore nanique ga yajnepídi tu ujetiga jecucha yaningára eduguéjna cuchábi uté jódode cucha aja uté gatuaque.