Matéo 7 - Dupade Uruode

Jé ca yucuegoi ñane iyoguérigo

¹ Jesús acajnaquéode chósi te: –Ca apéso ñane iyoguérigo. Socaseti Dupade doi uacayoguérigo to.

² Uje Dupade a jé cho uacayoguéji uacapesutígo uacojo ayoré iyoguéo to jne. Enga a jé chirate uacatígo to jne ome uacojórigo ayoréo ujetiga chisi ome uaque to.

³ ¿Gotique gu a uje bese bojode ayoré iyoguebode uje bayoguéode sué uté gáyode mu? Que araja uje uté iyoguebode gajnamone su pite atíãtique. Jé basa ga bayoguéode gajnua tu pocoróraque.

⁴ Que togome ayorérique ujetiga cho dojórique ayoré quique ujetiga uté ate gajnarétigo sué dojoi ayoré atígo gai.

⁵ Beyoi enga ayáyobu uacate gajnaréngone bajaque enga jogadi quene u ujetiga oyo uacojórique ayoré quique.–

⁶ Jesús cho ore quique enga chojninga: –Ca apemérañoji Dupade uruode ejórique ome ayoré táyipietique ujetiga acachome. Chamáñaje a ca chisírase Dupade uruode unétique. Socaseti socárome uágome uacacajnaquéode. Gajnui jé urásu ujeta ayorérique chisi ome cucha tĩriachuguéjnarique ome yãcoré quedéjnarique, tamocórique uñeque uje que chiraja úringai tĩriachuguéjna enga chuchiéjna iji jnumi.–

Jesús chacate dacadigode ome picatecãraitigade isocade ome Dupade

^7-8 Jesús qué chacate ore enga chojningame ore: Ujetiga atáyoi uacajegaitígo cucha iji Dupade enga a chisi ome uaque jne. Isocai jé u gu ujetiga gosi chucué cuchárique enga diga chise. Isocai jé upo rĩ ome uacuñeque ujetiga uacuñeque pota chacája guiguíjnarique enga doi enga chujé piagoi bajaque. Enga jogadi u ujetiga pucherángai ome uté gosi. Jeoga uaque gosi chutai cucháriguiji Dupade enga jĩraque uaqueso.

⁹ ¿Enga jé jnanírique gosírase ujetiga atique chutárasi arurétique marínga, chisírasome cucaranéraque ome?

¹⁰ ¿Jeoga atique utaitique oyite marínga, chisi ome ugáringome?

¹¹ Sijnaque uaque marínga, que acájnacho cucha ueratígo ome uacatígo. Enga ca iyieguirase uacai Dupade uje déji guéode uéchai ome icaniratiguérique jne ome dabode uhuaque ujetiga atáyoi.

¹² Bapotigádi u ujetiga bojórique ayoré susípise dáyipierigui quitígo guio ome ua. Enga jé be uté gosi isocai enga be enga ajusípise báyipiedie quitígo guio ome uté gosi to. Chamáñaje Moisés, jé aja Dupade uruode atatasórone jnani bajácho jnese, jé ore ajegaidi u nanique gu ome uaque.–

Jesús chacate ore ome dajeque gáreode

^13-14 Jesús chacate ore enga chojninga: –A yo quique pucuecaringuei iji deréjnane qui ome uaque jne. Gabi cho guiguíjna piago ajámi. Chopo dajeque ajã́tique rĩ. Enga garósi ore uje ore chise pigabi uté. Chamáñaje obiréjnapise piago uñai te gu, dajeque uñai ore. Enga querújna. Jecute ore cho buru, buru, buru aja quigode. Mu chorei ore iji gajño pioi. Mu yojningame uaque: Acáputayoji dajeque ajámi, piago ajámi ore enga ajnáño.

Jesús chacãra dacajnaquéode aja pojnaque árigui

¹⁵ Ajuso uaqueo ome urupatáquechoquíode. Uje chiese ore acajnaquéode garani tu Dupade. Mu que u go. Ore uruode omío, jé basa ga ore áyipiedie gajnarénguei. Enga ore gajnúone u cuchiso sijnángone uje chujé áyasadie.

¹⁶ A arajayórase ore jne gu ore ipesudode cucha jne. Uacamóño uje que toque ujetiga piranguei úvadie iji catáguebúrique ajénique. Jé adi u ome hígodie rĩ. Que piranguei go iji ojnatéraque ajénique.

¹⁷ Uacarajáyo uje pore ijorenie adie omei. Adi tupo ome pore betágueraque rĩ uje a ca ujñapeque árigui jne.

¹⁸ Que toc ujetiga pore ijõréraque gajnarénguei árigui. Que togápo rĩ ujetiga pore betágueraque áraque ujñapeque.

¹⁹ Que ducañera pore betágueraque ujetiga ca áraque cuse. A paquesu jne enga padíja pioi te jne.

²⁰ Jecute a apáñañoji jnani aringácachoquíode ore jne ome ore ipesute gajnarétique to.

A ca Dupade chimesẽre ore jnese jne ome ore úringáringo purása

²¹ Ca ajoso ati ore chise dáringáringo Dupade urása jne gu uje ore chimoringare yu enga ore chojninga: "Yangaráni a, yangaráni a." Mu a gusu ore jne uje ore doi yai Dupade uruode, ujetiga Dupade cho darása iji ore.–

²² Jesús chojningápome ore rĩ: –Ujetiga chise diri ujeta yajire ore adode aja quigode ga a uásejna ore jne ujetiga ore chijócha yajei údi enga a ore chojninga: "Yocangarádejná, yocangarádejná, yico bajnomei údi diríca. Yijnángo bajopié diríca ome Satanás utocaidode ga yórango ore aja guesode iji ore píode ayoré. Enga uásejna yoquipesútedatéode uñane to rĩ uje yĩ́caco bei."

²³ A yichajnárasi ore enga yojningárasome ore jne: "Que yimo uaque to go. Boyóji yejode ome uacapesudode cucha gajnarécho."

Jesús chacãra dacajnaquéode aja guiguíjnai ipesungóningo ore isocárigo

²⁴ Yangarásõripísode u udore uje ore gajnui tu jnacánique uje chucué dáyipie ome dapesutique daguíjna. Uté doi enga chijócha jnumi bajaque ujetiga chise cucaranenie iji jnumi údi. Jé u uje doi enga pésu daguíjnai aja gaté.

²⁵ Mu a yote bayátique, ẽpe cuchátique ore dirásiji jnacari. Mu que toc ujetiga chinguíra uté iguíjnai aja jnumi. Uje cucaranenie déji údi gu. Enga iguíjnai etóguiji jnumi.

²⁶ Jé chopome uté gosi rĩ uje chudute yuruode mu que doi yojningane cucha to. Uté gajnui tu jnacare uñai to uje que chiraja cuchárique. Chamáñaje chicha dapesutique daguíjna aja ujnáraque gai gu. Chedu ujna enga que chicha cucaranéringaja daguíjnai údi to.

²⁷ Mu a yote bayátique, ẽpe cuchátique ore dirásiji uté gosi ipesudi guiguíjna. Enga chinguíraja jnumi enga urui jnumi. Chichai te bisideque gu.–

²⁸ Jesús chejna dacajnaquéode guesi enga acajnaquéode chajuque ore agutedie.

²⁹ Chamáñaje Jesús úringai pangarádejna pijoguipise ome acajnaquéode udore. Enga que chopise Moisés urusarane atatasórone go uje querénga ore acajnaquéode chijnime ore to.