Matéo 4 - Dupade Uruode

Satanás etingaquéode u unojo ome Jesús

¹ Enga Jesús jnoji tié uje i tu Jordán. Enga Dupade Ujopié Espíritu Sánto chorei Jesús uté iji erãpe eyutiguei, ujetiga Satanás chequetingare iji.

² Mu Jesús cho dayágome re iji dirode, dejade ore jnese uje guejnanie ayoré gare. Iji unojo quigade enga quene chejnáreque dayaguhei.

³ Jecute Satanás sose Jesús yui ujetiga chequetingare uté enga chojningame: –Ujetiga jé ũré enga Dupade abipise ua enga apésu cucaranenie udire enga nóña jne enga arurécho jne.–

⁴ Mu Jesús que doi Satanás áyipiedie mu chajnai uruode enga chojningame: –Dupade uruode déji enga chojninga: "Que gusu cucha pibotique jeta ayorérique ecame. Mu yiquecágo to gu Dupade uruode uje yoco cucha pibotíji."–

⁵ Chejna unojo guesi enga Satanás chorepoi Jesús iji Dupade ijnorai idai Jerusalén rĩ. Enga chorepóji Dupade iguíjna cuchábi ójo te rĩ.

⁶ Enga Satanás chojningame: –Be gojni enga ṍra ua aja jnumi ujetiga jé ũré enga Dupade abipise ua.– Satanás e potapísa ujetiga sué jóroque Jesús gai. Jecute chijna jóroga Dupade uruode ome enga chojningame: –Dupade uruode déji to arĩa uje chojninga: Dupade a chingome darótigo jne ujetiga ore chirote ua. Ujetiga abasíji gaté mu a Dupade irótigo chisa ua iji gaté yui jne, ujetiga ca cuchárique chósi ti iji ua.–

⁷ Jesús chajnai Satanás uruode enga chojningame: –Jé ũré ua, mu bécãre quigode gu. Uje Dupade uruode déji to enga chojninga: "Que toc ujetiga pujñiete Dupade ome ojningane cucha quigode."–

⁸ Quigade enga Satanás jno údi aja cucarãte chaguesi ójo. Jé u uje Satanás chingo punire ueradode aja jnese, iji erámi údode. Chingopo úringane cuchábejna ome rĩ.

⁹ Satanás chojningame Jesús: –Ope bangaráni iji yu bajaque enga achagába bagataidie aja yiquei enga jé bajnechope punirone unojo jnese jne.–

¹⁰ Mu Jesús chojningame Satanás: –Satanás á, acai siñeque iji yejode. Uje Dupade urusarane déji uje chojninga: "A gusu Dupade jne ujetiga angári. Enga gusu uté jne ujetiga be iroquéode."–

¹¹ Enga Satanás noñome Jesús iji te jmete. Enga gaté unirisórone uñane ore chise Jesús ujetiga ore chátaja.

Jesús chacate Galiléa jogosórone ome Dupade uruode

¹² Jesús chudute uje e ore suru Juan gai iji soldádode iguíjnai. Enga jé u uje Jesús chajnésarapo Galiléa rĩ.

¹³ Chajmita darasade ore iji Nazaret. Mu diga chácariji ore idai Capernaúm uje déji gajño Galiléa pijnanai. Capernaúm uté idógosiji pachaminone Zabulón, Neftalí ore to.

¹⁴ Jnani bajai Dupade uruode atatasṍri Isaías urusarane e tocade uje chojninga:

¹⁵ Yurúsarome pachaminone Zabulón, Neftalí ore jogosórone uje pachaminone udore déji dajéquedatéi gáyode uje chicáji Galiléa pijnanai iji Jordán dosadi iji guedé garani. Mu que judío ore go.

¹⁶ Pachaminone udore jogosórone ore déji ijnangununie ajñonie icaite, Mu e ore chimo dírecaringuéi to. Pitoringai suru ore gai nanique. Mu ore ejode cho jnaque gajneri ome ore imoi dírecaringué tuté.

¹⁷ Jesús e chacate capernaúmgosode enga chojninga: –Ayáyo uacasoca gajnaréngone ome Dupade. Uje e idógosi ujetiga Dupade chijna dáringa dacasuté cuchabe aja erámi uné.–

Jesús dejéna oyite gaisõre gagájnione aja daquigade

¹⁸ Jesús diguiji gajño Galiléa pijnanai enga chimo jnacare gáreode uje ore jõra ñane. Chojmarai i tu Simón uje i uñai tupo Pédro rĩ. Jõrai i tu Andrés. Oyite gaisõre ore enga qué ore tṍra doradie chímeno aja gajño uje Jesús chise ore.

¹⁹ Enga Jesús chojningame ore: –Boyóji te ga ajínaño yu. Enga a yécãrape uacasatígo jne. Ga a ca acueyoi oyítigo rĩ, mu a uacacuegode u ayorérigo jne ujetiga amácho ore aja panguretigai ome Dupade to.–

²⁰ Uje ore chudute Jesús uruode udore enga que ore áyipieraque dépoji dachímenonie, dasagode cucha rĩ. Jé u uje ore carubája Jesús quigade.

²¹ Jesús jnoja daquei, mu chimópo jnacare gáreode uñane rĩ. Enga jé ore jõrapo ñane rĩ. Jacóbo, Juan ore u. Enga ore déji dai Zebedéo gari iji uraque dachidi cuco ajei. Uje qué ore chuga uraque dachímeno daquesupídode. Jé u uje Jesús catecã́ri ore ujetiga ore nóna to.

²² Jĩraque udore ore noñome cucoi, uraque dai ore, enga ore nóna Jesús to.

Jesús chacate ayoré dipeséode

²³ Enga Jesús diguiji Galiléa údode. Enga chacate judíode ore iji ore aquiningaméone udore, udore, udore. Enga omío atatagode ome ore. Uje chingo ore uje idógosi ujetiga Dupade cho darásaji danguresórone ore to. Chiquetápo ore ejnareque ponáyone jnese to rĩ.

²⁴ Síria jogosórone e ore chudute Jesús ujnoméone to. Jecute ore chijna darása ejnaretade aja Jesús to. Jé aja ũrusode uje Satanás utocaidode déji ore ajéode, sereretáguebéode, noñángone ore rĩ. Enga Jesús chiqueta ore jnese.

²⁵ Quigade enga ayorébui ore chajna Jesús uje ore tṍraji Galiléa, Decápolis, Jerusalén, Judéa ore. Ore tõrapóji tié Jordán dosadode iji guedé garani rĩ.