Matéo 3 - Dupade Uruode

Juan chacate darasade iji erãpe eyutiguei

¹ Dirode unojo jé u uje Juan chacate darasade ore iji erãpe eyutiguei iji ore uniri Judéa. Juan uté jé upo rĩ uje tṍra ore aja yodi.

² Enga Juan acajnaquéode qui tu uje chojninga: –Ecãcho uacajéode. Ayáyopo uacate bajade rĩ, uje e idógosi ujetiga Dupade chijna dáringa dacasuté cuchabe aja jnumi uné.–

³ Juan jé upúsu Dupade uruode atatasṍri Isaías ojningai uje chojninga: A ore chudute gosi pijnatígo jne ujetiga tṍraji erãpe eyutiguei. Enga a uté chojningame ore jne: "Boyo yico, yipéco dajei iji yocangarádejnai iquei uje a di jne. Apesopúsu aja quedéjnane jne."

⁴ Juan uté u uje ore ora iguidedie iji caméllode, burica quedéjnane acarane. Enga uté igarubi cuchiso aópo rĩ. Posode upo carichade, cutérone ore rĩ.

⁵ Enga Juan uté ibaguiésórone u ayorébujnane uje ore tṍraji Jerusalén, Judéa, jé aja tié Jordán ejominórone to, ujetiga ore tangári acajnaquéode.

⁶ Juan acajnaquéode chijnime ore. Jecute ore chingo dasijnaringuéone ome ñane. Quigade enga Juan chaca ore edodie iji tié uje i tu Jordán.

⁷ Enga jiei fariséode, saducéode ore uje ore yore Juan gai ujetiga chaca ore edodie iji tié to. Mu Juan chiraja fariséode, saducéode ore áyipiedie uje ore pógu dasijnaringuéone iji dáyipiedie. Enga Juan chojningame ore: –Aringácachoquí uaque. Uacajnui u uacajnai Satanás píode uga. ¿Jé uñeque ingome uaque a ujetiga piquetaque uaque jne ome uacajnei pujuyaqué uje e idógosi?–

⁸ Juan chojningápome ore rĩ: –Ajusópise uacatígo guio enga uacasoca arétigo pijoque jne, uje e uaquecãcho uacadode.

⁹ Enga jé ca ojnichome ñane: "Jé areque yoque arĩa uje jnani bajai Abraham ape disi ejo yoque." Mu que cuchárique tṍraji udore. Uje yojningame uaque ujetiga Dupade ajéo enga a dorási cucaranéringui udire enga pesurásu udire enga ore gajnunie urásu Abraham ape disi ejórigo to.–

¹⁰ Juan chacãra Dupade isocade aja jnani utácai adode enga chojninga: –Dimane ijnosé ajineré iji utácai jmainie ujetiga chaquesu pore gajnarénguenie iji pore ueradedie ujade. Ga ducarané ujetiga papose. Uje gajnarénguei adie gu.–

¹¹ Juan qué jno dacajnaquéode údi enga chojninga: –Yaca uaquedodie iji tié ome bautísmo uje imoi tu uje e uacayáyo uacate bajade. Mu Dupade utocaidi uñeque a chise uaque jne uje suépise yibai ome cutejma ujopié enga a chĩropise uacasijnaringuéone jne. Enga a chĩreta uacajéode ome Dajopié Espíritu Sánto ome bautísmo uñai jne.–

¹² Mu Juan qué chacãrápo Dupade isocade aja utácai adode rĩ enga chojninga: –E oidi pite déji jmainie ujetiga chujé dacade iji jnumi. Enga cãra ajñunie jogadi ga cãrapo itabidode jogadi rĩ. Chuse adie guio. Mu chãru itabidode gai. Mu pioi uté uje Dupade ipesute ome ayoré sijnángone ore que eruénique cuse ome ore jne.–

Juan chaca Jesús edodie iji tié

¹³ Diga Jesús tṍraji Galiléa enga chise tié uje i tu Jordán uje Juan charidi tu. Enga catecã́ri Juan ujetiga chaca edodie iji tié.

¹⁴ Mu Juan chetaque iji taningai. Enga chajnai Jesús uruode enga chojninga: –Jesús a, bamo uje bajnuépise yibai. ¿Jé gotique gu a uje bapota jeta yaca bedodie iji tié? Uhua urásu ujetiga acárase yedodie iji tié unaque.–

¹⁵ Mu Jesús chojningame: –Areque ujetiga yipéco Dupade áyipiedie jnese. Jecute jé tiógara ujetiga aca yedodie iji tié.– Enga Juan chojningame: –Jé areque.– Do gojni enga chaca edodie iji tié.

¹⁶ Uje Jesús doi guesi tiji tié, enga gaté chuchẽre dabai. Enga uté chimo Dupade Ujopié Espíritu Sánto uje doi jnumi. Enga cho cucujnadatéode aja jnumi. Enga basája Jesús gai.

¹⁷ Jé u uje ore chudute darade uje tṍraji gaté yui. Enga chojninga: –Yimeserãi yape u uné.–