Matéo 28 - Dupade Uruode

Jesús ecápo rĩ iji dáringai toque

¹ Chise dínique iji dire puyai quigade enga quene direjnipe. Enga María Magdaléna, ujo María ore chobéri Jesús ode yui.

² Uje qué ore jnome yui mu jnumi chijocase re iji Jesús ode jogadi uje Dupade irótique tṍraji gaté gu. Enga Dupade iroi uté u uje chijnare raja Jesús ode piagoi. Enga tṍra cucarané iji piagoi. Enga doi enga cháji gai.

³ Enga nanganata Dupade iroi uté enga chopise ajnorápiedie. Enga iguidedie póroropisi.

⁴ Jé u uje chajuque soldádode agutedie uje ore chimo enga ore cṍraja jnumone, enga ore cho togode iji jnumone.

⁵ Enga Dupade iroi chojningame chequedíe: –Jé ca atodóyo go. Yiraja uje uacacuei u Jesús uje ore chajója curesei diríca.

⁶ Uacacuei uté e que déji ne go. E ecápo rĩ. Uje jé urúo diríca. Jé cajicho gojni jogadi casé to.

⁷ Boyo bu, enga angoño cucha dacadode unojo ome acadigode ore uje uté toi diríca mu e ecápo rĩ. Enga a bajagája ore iquei jne aja Galiléa, enga a ore chimo iji ta jnese jne. E gusu yuruode ome uaque.–

⁸ Enga jé u uje chequedíe ore jnoji ode mu que ore digape. Jĩraque ore chayo. Ore todo gu uje ore chimo Dupade iroi, mu e deroco ore isadodéringai uje ore áyipie dépoji dacadisṍri casé úringai uecápo rĩ. Jecute ore irasé ráguiji ujade. Enga ore chijna dagajñunie aja acadigode ujetiga ore chatata Jesús ujnomei ome ore uje ecápo rĩ.

⁹ Jé u uje ore chuningame mu Jesús chiqueta raja ore enga catecã́ri ore. Enga ore doi enga ore sose yui enga ore chiporigase guídade aja jnumone ome ore ininaquéode uje ore achietáji.

¹⁰ Jesús chojningame ore: –Ca atodóyo go. Mu abáchoi yijorane ore enga angoñome ore uje yipota jeta ore chicáji Galiléa enga a yimóngo ñane iji jne.–

Soldádode ojñane u unojo ome dasutedie

¹¹ Uje chequedíe qué ore jnome acadigode yui enga Jesús ode irodisórone soldate uñane jnome idáidatéi yui to ujetiga ore chingo cucha dacadode aja judíode angaránone asutépisedie ore.

¹² Ore asutépisedie tibidi pangarate uñane enga ore pésu dáyipiedie ome Jesús ujnomei. Enga ore chojninga: –Yicoi enga yoco oré soldádode ore jne enga ore doi yocurúrigo jne.–

¹³ Enga ore chojningame soldádode: –Ojnicho jne: "Que yunínango Jesús acadi casodé ore que uje ore toria dacadisṍri casé iji dejnínga gatócoro uje qué yimóngo."

¹⁴ Ca agutúyo uágome eduguéjna cuchábi Piláto yui. A chudute to jne, enga yajníngo jne ome yocuru quitígo. Jé u uje a ca cuchárique chósi tiji uaque jne.–

¹⁵ Jé u uje soldádode ore chisa ore gueranenie plátai ¡saque! Enga ore dopísi ore uruode ome ore. Jecute judíode jé qué ore urúo, jé aja dirode unojo, uje chiese porite Jesús iji ode nanique.

Jesús iroquei u uné ome dacadigode apóstoles udore

¹⁶ Enga jé u uje Jesús acadigode apóstoles ore, uje chojmára ore iji yirídai, ore chicai Jesús ojningai cucarãte iji Galiléa.

¹⁷ Uje ore chimo Jesús enga jé u uje ore chichaga dagataidie aja jnumi iji iquei. Mu uñane qué ore chotigase uje chiese cáma Jesús u go.

¹⁸ Jé u uje Jesús sose ore yui enga chojningame ore: –Yai Dupade e tẽra yúringa dacasuté ome yu iji guéode, erámone ore jnese.

¹⁹ Boyo enga acayóji ayoréode iji punirone jnese. Enga apéso yunéningarique ome ore jnese, enga a ore changureta yu to jne. Jé u jne ujetiga óraño ore aja yodi jne ujetiga ore changureta yai Dupade, abi uyu, Ujopié Espíritu Sánto ore.

²⁰ Acacho ore ome cuchade jnese jne uje e yacadique uágome enga ore doi to jne ome dáringane yirócho. Enga a arajáyo jne uje a yugúsiji uacari jne iji dirode jnese, jé aja erámone eruei.– Amén, qui jé upúsu.