Matéo 27 - Dupade Uruode

Ore chijna Jesús aja Piláto

¹ Uje guedé cáma tocade enga judíode angaránone, ore asutépisedie ore chimate dáyipiedie ome Jesús ujetiga ore chujé.

² Jé u uje ore chigaru Jesús jmanecade aja ñane enga ore jno údi aja Póncio Piláto, gobernador uté uje rómagosode ore eduguéjna cuchábi icháji jogadi.

Júdas u uje chujé re

³ Uje Jesús guẽrasṍri Júdas chudute to uje ore chujé Jesús jne, enga e jnusi jórogui uje tẽra diríca. Jé u uje chayóji judíode angaránone yui enga chatirépo Jesús oredie ore gai te rĩ, uje 30 pláta guebetígo u.

⁴ Jé u uje chojningame ore: –Yirajapise yúringai sijnaque. Chamáñaje yerani casé jnani ome uaque que tiógara dáringárique chuque go. Uje que bárique cuse.– Mu ore chojningame: –Que cucha ome yoque go. Jé bapesudei bajuredie.–

⁵ Enga jé u uje Júdas tṍra ore iplátadie aja Dupade iguíjna cuchábi ajei. Enga chayója guesi. Enga chigaru detabi enga chujé re.

⁶ Judíode angaránone ore asutépisedie chisapo atiredie plátai enga ore chojningame ñane: –¿Ja yátagorása pláta unaji aja Dupade gajnenie yoquiplátai to a? Uje ayoré chui oré.–

⁷ Quigade enga ore chimate dajéode ujeta ore doi jnutique orerángome Júdas atiredie plátai. Enga ore chojninga: –Beyoi enga yicoi dácha orangóri gajnei jnupe. Enga ducurása quedéjnane ore óderigui jogate jne.–

⁸ Enga ore chĩ́care 'Diyobi Garai' aja. Enga jé yĩ́caco 'Diyobi Garai' aja, jé aja deréjnai unojo.

^9-10 Jé u uje Dupade uruode atatasṍri Jeremías urusarane tocade uje chojninga: "Israélgosode ore chojninga: 'A yicoi oredie ome jnacari uté ome pláta guebéode jne uje déji 30.' Diga guẽrasórone ore chisa ore iplátadie unaji enga ore doi oré tome dácha orangónique gajnei jnupe. Uje Dupade jé uruode u ome yu."

Piláto chidójnanga Jesús bárique cucha

¹¹ Ore chijna Jesús aja eduguéjnai Piláto ujetiga chidójnanga bárique cucha. Jé u uje chojningame Jesús: –¿Ja jé ũré enga judíode eduguéjnai gotique u ua ya?– Mu Jesús chajnai uruode enga chojninga: –Baraja uje uyu u.–

¹² Mu judíode angaránone, ore asutépisedie ore chaguhéta cuchade Jesús gai. Mu que Jesús chajnai ore gotique.

¹³ Enga Piláto chojningame Jesús: –¿Ja ca adute ore uruode ome ua ya? Uje que ãrarare babai to.–

¹⁴ Mu Jesús jé ate uje que narare. Jecute Piláto que chiraja dasocáringome, enga tija uje Jesús que cho chimíñimi iji ore jmainie.

Ore chimanipise dáyipiedie ome Jesús úringárique chuque

¹⁵ Jecucha ore eduguéjnai gobernador isocabeque nanique uje chise Páscua enga e chirame dajurúgayode uñeque. Mu jé doi darasade ore ojningárique ujetiga chirame.

¹⁶ Enga ore jurúgarique déji soldádode iguíjnai nanique uje urasade ore erángate. Uje uté cho daba dajocaningárique nanique, enga i tu Barrabás.

¹⁷ Enga ayorébui qué ore déji ñane gari enga Piláto chojningame ore: –¿Uacajegaitique iji Barrabás, Jesús ore jetiga yirame uñeque? Yojningai u uté uje chi Dupade utocaidi Crísto u.–

¹⁸ Piláto urúo unojo gu uje chiraja uje Jesús isasórone ore charatáyime uje ayoréode ore tangári enga ore cho jara aja quigade.

¹⁹ Uje qué Piláto déji dayaripi gai uje qué chirote ayorébui ore ajéningo, enga acoté chiroque daruode aja uje chojningame: –Ca báyipieraque gajnaréngaja uté to. Uje que bárique cuse. Yĩ́cara que gu enga yurigode gajnaréchome que.–

²⁰ Mu judíode angaránone ore nejéna ayorébui údode ujetiga ore chutai Barrabás ujeta Piláto iramei tu. Jé basa ujetiga yui tu Jesús.

²¹ Piláto catecãrápoi ayorébui gaté rĩ. Enga chojningame ore: –¿Jé uacajegaitique iji jnani gáreode udore ore ujetiga yirame uñeque?– Enga ore chojninga: –¡Arame Barrabás!–

²² Piláto chojningame ore: –¿Jé yo ringome Jesús, Dupade utocaidi Crísto jne a?– Mu ore chojningame jnese: –¡Ajo aja curesei gai!–

²³ Jé u uje Piláto qué catecãrápoi ore gaté rĩ. Enga chojningame ore: –¿Jé uté bárique a?– Mu ore pijnate gatéo uje ore chojninga: –¡Ajo aja curesei gai!–

²⁴ Mu Piláto chiraja uje que chijnime ayorébui ãrírique ome Jesús, enga e todópo rĩ ujetiga diga ca chiraja dasocáringome ayorébui atique. Jecute churu dajmainie iji ayorébui ore iquei jnese. Enga chojningame ore: –¿Amóño a? uje yuru yijmainie iji uacaquei. Qui tu gu uje que yajéo uté úringai chuque uje que yiraja bárique cucha gu. A oyo uacaba uté jne.–

²⁵ Enga ore chajnai enga ore chojningame jnese: –Que cucha go ujetiga yoco yoquiba uté úringai chuque. Jé upo rĩ ujetiga yocape disi ejórigo jé qué ore cho daba to erase.–

²⁶ Diga Piláto doi ore áyipiedie enga chirame Barrabás. Jeque chiroque darógode aja Jesús ujetiga ore chaquesu údode bajaque. Enga quigade enga ore jno údi ujetiga ore chajo aja curesei gai.

²⁷ Jé u uje eduguéjna cuchábi irógode soldácho ore jno Jesús údi aja Piláto igóchocoijná enga ore chamáta ñane iji Jesús ejode jnese.

²⁸ Quigade enga ore chejñu Jesús iguidedie iji gai. Jeque ore na iguidé caraté aja.

²⁹ Ore chirópo ojnane rĩ enga ore cho gatoje iji enga ore chajója Jesús ójo. Jeque ore na ogué pojnaque aja jmanai ãrachua. Jé u uje ore cháji dagataidie iji iquei enga ore chujñieta enga ore chojningame: –E bopise eduguéjna cuchábode ¡jõ!– Enga ore chojningápo rĩ: –¡Que gajnúrique cuse judíode eduguéjna cuchábi uné!–

³⁰ Ore doi datuátigade gaté ome. Enga ore chutĩ́raja edodie. Ore chisapo ogué rĩ iji jmainie enga ore chujé gatoi ome iji quedéjnane.

³¹ Quigade enga uje ore chimate úringai pujñiete aja jnumi enga ore chejñuapo iguidé caraté iji gai te rĩ. Enga ore napo iguidépisedie aja rĩ. Enga jé u uje ore jno údi ujetiga ore chajo aja curesei gai.

Ore chajo Jesús aja curesei gai

³² Enga ore jno Jesús údi aja cachodi yui ujetiga ore chajo aja curesei gai. Mu ore chise jnanírique uje i tu Simón uje idai u Cirene. Mu soldádode doi uté enga ore chisi ome Jesús gajnei curesei ome ujetiga chijnoque.

³³ Enga jé u uje ore chise cachodi uje i tu Gólgota. (Gólgota i qui tu dacatode ajnoquei.)

³⁴ Enga ore doi víno enga ore chimesa cucha agutéragaja. Jé u uje ore chaningárarása Jesús. Jé u uje chetingare mu que chóji.

³⁵ Uje ore chimate Jesús aja curesei enga soldádode ore canare iji Jesús iguidedie ejode ujetiga ore ajñamini yungónique gajnei Jesús iguidedie. Enga jé Dupade uruode atatasórone uñai uruode tocachúringai u uje chojninga: "Ore doi dajñaminone iji yiguidedie ejode. Quigade enga ore chajuguína ñane."

³⁶ Uje ore chejna unojo guesi enga jé u uje ore cháji Jesús ejode enga ore timíninga aja quedéjnane.

³⁷ Enga ore chicha darusarane aja Jesús gatoi gai uje chatata bárique cucha. Enga ore urusarane u unojo: "Judíode ore eduguéjna cuchábi Jesús uné."

³⁸ Jesús cho dabaya jnani oriechoqui gáreode ore to iji dagachodi. Uñai dóji ãrachua. Jeque uñai dóji arasé.

³⁹ Enga ayorébui ore chujñieta Jesús aja quedéjnane. Uje ore chise enominone enga ore chachóguiji gaté. Enga ore chungurase datoidie ome aja quedéjnane.

⁴⁰ Ore chojningápome rĩ: –Bojningápie diríca ya: "A yinguírarása Dupade iguíjna cuchábi uté aja jnumi, mu a yiringárapórase rĩ iji dire gadiótigo." Be gojni enga aqueta gojni ua ujetiga jé ũré enga Dupade abipise ua enga be jnumi iji curesei gai.–

⁴¹ Enga jé ore cho judíode angaránone jnese, jé aja fariséode ore. Uje ore chujñieta Jesús to.

⁴² Enga ore chojningame ñane: –Chiquetapie dojode ayoréo diríca, que chiqueta gojni re. Jeta jé ũré ujetiga israélgosode yoquijnati eduguéjna u enga doi enga doi jnumi iji curesei gai. Enga jé urásu ujetiga yiyágo yotigáco uté.

⁴³ Jé urúpio diríca uje angureni u Dupade diríca. Chiese Dupade abipísapo diríca rĩ ome. Dupade que doi gojni enga chiqueta gojni.–

⁴⁴ Enga jé cho bayade oriechoquío uje ore chujñieta aja quedéjnane to.

Jesús itoringai adi u uné

⁴⁵ Enga jé u uje ijnangunúraque base ore gai jnese iji ore uniri uté, uje guedé déji gatócoro iji deréjnai uté. Jé u uje ore cháji ijnangunua ajei, jé aja uje guedé cho jñuque.

⁴⁶ Enga deréjnai uté jé u uje Jesús chisa dabade. Enga chojninga: –Elí, Elí, ¿láma sabactáni?– Udore qui tu uje chojninga: "Yai Dupade á, Yai Dupade á, ¿gotique gu a uje baminingara yu?"

⁴⁷ Mu ejominórone uñéngo chudute pijnacaraidie enga ore chojninga: –Tibidi Dupade angúromei proféta Elías.–

⁴⁸ Jé u uje ore uñai chayóji pamatadé gajnua yui, enga chacáji ore jotaque sujnai. Enga chadiapója daburuco eruei te rĩ, enga chṹarásaja Jesús ome daburuco ujetiga chise.

⁴⁹ Mu jorane uñane ore chojningame: –Jé dóji enga yajico jne ujetiga Dupade angúromei proféta Elías casicaite chiqueta.–

⁵⁰ Jé u uje Jesús chisapise dabade gaté rĩ. Enga pijnacaraidie chicáji gatajnoquei. Enga e toi ¡pac!

⁵¹ Uje Jesús toi enga qué jnomája uje borapeque cuchábi dajuque uje dóji Dupade iguíjna cuchábi ajei puyai ore ujai. Dajúguiji gatócoro iji gaté enga jé chuságaja jnumi. Enga nónapója rĩ uje jnumi chijocase re iji gaté. Enga jé aja cucarãte chaguesíode uje dosadode cho ¡po! ¡po!

⁵² Enga ducóderigui chuchẽrápo dabáyode rĩ. Enga Dupade anguresõre toque aórigo uñéngo ore ecápo rĩ iji ore itoringane. Enga uásejna ore.

⁵³ Mu cáma ore chingongarája penomitique, jé aja quigade uje Jesús e ecápoji datoringai quigade rĩ. Jé u uje quene ore jnoji ducódedie enga ore chacája Dupade ijnorai guidai Jerusalén to. Enga ore imosórone ayoré uásejna.

⁵⁴ Uje Jesús irodingórone soldácho, jé aja ore eduguéjnai, ore chimo jnupe tãrarachui, cucha dacate uñane ore, enga que ore isadodéringai chajire re. Jecute ore chojninga: –A jé ũrepise enga Dupade ape jnani uté gotique.–

⁵⁵ Mu chequérigui cháji quedéjnarique ome Jesús uje ore chajire iji gaté. Enga uásejna ore. Enga jé ore u uje ore jõra diríca iji Galiléa enga ore chátaja Jesús diríca iji dajei.

⁵⁶ Enga María Magdaléna déji ore gari to, jé aja Jacóbo, José ore daté uje i tu María to. Zebedéo ujnacarode ore daté dépoji ore gari to rĩ.

Arimatéagosi José chijóchame Jesús

⁵⁷ Uje guedé e chaca enga jnani atátique di uje i tu José. Enga arimatéagose. Uté u uje cho Jesús acadíguiji re to diríca iji Jesús úringai ueca.

⁵⁸ Uté jno enga chijócha Piláto ajei údi ujetiga juéga Jesús enga chañuru guio ujetiga chijóchapome rĩ. Enga Piláto chiroque darógode ujetiga ore chisi ome Jesús ome José.

⁵⁹ Enga José chamurase Jesús. Enga chipocásu gai iji borapeque ichárique. Enga jé u uje jno údi aja ducódedie.

⁶⁰ Enga chijmare Jesús aja ejopiéraque iji cucarané cucháberaque. Uje jé jochame re ica ome datoringai yui ujetiga ore nárasaja. Enga chimate gojni Jesús aja ajei enga suru piagoi ome cucarané iménujnaraque. Enga jé u uje chajni to.

⁶¹ Mu María Magdaléna, María uña jé ore cháji ode tiógarei.

Piláto irógode soldácho ore chirote Jesús ode piagoi

⁶² Dire uñai enga judíode angaránone, jé aja fariséode uñéngo ore tibágui Piláto. Enga dire puyai jé u ome ore, mu e ore chimate cucha dacadode aja jnumi jnese bajaque.

⁶³ Enga ore chojningame Piláto: –Eduguéjná, yujnusinángo Jesús urupatáringa casodé uje chojninga diríca: "A yiquecápo jne rĩ iji dire gadiótigo."

⁶⁴ Jecute be enga aroque barótigo aja uté ode, jé aja dire gadiótigo, enga ore chirote jne. Socaseti uté acadi casodé ore toria jne iji dejátique. Jé socaseti ore chojningápo rĩ ome uñane: "Uquécasé e ecápo rĩ iji itoringai quigade." Jé socaseti ore urupatáringáringo sué uté urupatáringa casodé gai gaté.–

⁶⁵ Piláto chojningame ore: –Ore déji dojo uacajegaidode soldácho. A ore nóna uágaja ode jne ujetiga ore chãraque yui ome ayorérique. Ujetiga uacajéo enga beyopoi uacasoca uñeque jne rĩ ome ode ujetiga ca toque ajei ome uñeque.–

⁶⁶ Jé u uje judíode angaránone ore tibágui Jesús ode. Enga ore chimere ducaritíguiji Jesús ode piagoi jogoto cucarané. Enga ore idójnangamáni tu ducari iji ujetiga pijoque ujetiga uñeque chijocase enga ducari chécãre dajogatique. Enga ore noñopome ore irógode soldácho iji to rĩ ujetiga ore chirote.